Isaya 44:1-28
44 “Cwale teeleza, wena Jakobo mutangaaka,Ni wena Isilaele, yeniketile.+
2 Ki se sabulela Jehova,Mubupi wahao, Yena yakubupile,+Yakutusize kuzwa ka nako yeneuli mwa mba,* uli:
‘Usike wasaba, wena Jakobo mutangaaka,+Ni wena, Jeshuruni,*+ yeniketile.
3 Kakuli nikasela yashwile linyolwa* mezi+Ni kububiseza linukana mwa naha yeomile.
Nikasululela moya waka fahalimwaa bana* bahao,+Ni mbuyoti yaka fahalimwaa baikulu bahao.
4 Mi bakamela sina mobumelela bucwañi bobutala,+Sina likota za popula ze kwatukwaa linukana za mezi.
5 Yomuñwi ukali: “Niwa Jehova.”+
Yomuñwi yena ukaipiza ka libizo la Jakobo,Mi yomuñwi ukañola fa lizoho lahae kuli: “Ni wa Jehova.”
Mi ukaipiza ka libizo la Isilaele.’
6 Ki se sabulela Jehova,Mulena wa Isilaele+ ni Muliululi wahae,+ yena Jehova wa limpi, uli:
‘Ki na wapili ni wa mafelelezo.+
Hakuna Mulimu yomuñwi kwandaa ka.+
7 Ki mañi yaswana ni na?+
Habulele, ataluse, mi apake cwalo ku na!+
Kuzwa ka nako yenitahisize batu ba kwaikale,Babulele lika zekatahaNi lika zekaezahala.
8 Musike mwasaba,Mi musike mwakakamaliswa ki sabo.+
Kana hanisika bulelela cimo yomuñwi ni yomuñwi wamina ni kuzibahaza taba yeo?
Mu lipaki zaka.+
Kana kunani Mulimu yomuñwi kwandaa ka?
Batili, hakuna Licwe leliñwi;+ hakuna leliñwi leniziba.’”
9 Kaufela babaeza maswaniso a kubeta habana tuso,Mi lika zabona zebakatelwa halina kutusa sesiñwi.+
Ka kuba lipaki zabona, haliboni* sesiñwi mi halizibi sesiñwi,+Kabakaleo, baba liezize bakaswabiswa.+
10 Ki mañi yakabupa mulimu kamba kueza siswaniso sa sipi*Sesisina tuso?+
11 Hamubone! Balikani bahae kaufela bakaswabiswa!+
Likwala za misebezi ya mazoho ki batu-tu feela.
Habakubukane kaufelaa bona mi bayeme.
Bakangangama mi bakaswabiswa hamoho.
12 Mumbuti utula sipi yefa mashala ka sisebeliso* sahae.
Uinata ka lisando,Uilukisa ka lizoho lahae lelimaata.+
Mi cwale walapa mi ufelelwa ki maata;Haanwi mezi mi wakatala.
13 Mubeti unamulula muhala wa kumishalisa, ulala mulalo ka coko yefubelu.
Ulukisa siswaniso ka sifaliso mi usilikanya ka silaliso.
Usieza ka sibupeho sa mutu,+Ka bunde bwa mutu,Kuli siine mwa ndu.*+
14 Yomuñwi unani musebezi wa kulema likota za sidare.
Uketa kota ya mufuta omuñwi, ya oke,Mi waituhelela kuhula mwahalaa likota za mwa mushitu.+
Ucala kota ya laurele, mi imeliswa ki pula.
15 Cwale mutu uitusisa yona kwa kutumbula mulilo.
Uunga siemba sesiñwi sayona kuli aifutumaze kasona;Utumbula mulilo ni kubesa sinkwa.
Kono hape ueza mulimu ni kuulapela.
Uitusisa sona kubeta siswaniso, mi wasikubamela.+
16 Siemba sesiñwi sayona sayonga mwa mulilo;Mi uitusisa siemba seo kubesa nama yaca, mi wakula.
Hape waitutumuna mi uli:
“Ehe! Nifutumalezwi haninze nibona mulilo.”
17 Kono sesisiyezi ku yona usieza mulimu, ili siswaniso sahae sesibetilwe.
Wasikubamela ni kusilapela.
Ulapela ku sona mi uli:
“Nipilise, kakuli ki wena mulimu waka.”+
18 Hakuna sebaziba, hakuna sebautwisisa,+Kakuli meeto abona akwahezwi, habakoni kubona,Mi lipilu zabona halina kutwisiso.
19 Hakuna yahupula mwa pilu yahaeKamba yanani zibo kamba kutwisiso, yali:
“Nicisize siemba sayona sesiñwi mwa mulilo,Mi nibesize sinkwa fa mashala asona ni kubesa nama yenicile.
Cwale kana naswanela kueza siemba sesisiyezi kuba nto yenyenyisa?+
Kana naswanela kulapela sishingwa sa kota?”
20 Uifepa ka mufuse.
Pilu yahae yepumilwe imukelusize.
Hakoni kuipilisa ili yena, mi habuleli kuli:
“Kikuli hakuna buhata mwa lizoho laka la bulyo?”
21 “Hupula litaba zeo, wena Jakobo, ni wena Isilaele,Kakuli u mutangaaka.
Neni kubupile, mi u mutangaaka.+
Wena Isilaele, hanina kukulibala.+
22 Nikafelisa lifoso zahao sina yalikwahela ka lilu,+Ni libi zahao sina yalikwahela ka lilu lelinani mukita.
Kutela ku na, kakuli nika kuliulula.+
23 Muhuweleze inze mutabile, mina mahalimu,Kakuli Jehova uungile muhato!
Muhuweleze ka muhuwo wa tulo, mina libaka zekwatasi za lifasi!
Muhuweleze ka tabo, mina malundu,+Wena mushitu, ni likota zahao kaufela!
Kakuli Jehova uliuluzi Jakobo,Mi ubonisa kanya yahae fahalimwaa Isilaele.”+
24 Ki se sabulela Jehova, Muliululi wahao,+Yakubupile kuzwa ka nako yeneuli mwa mba, uli:
“Ki na Jehova, yaezize lika kaufela.
Neninamuluzi mahalimu ninosi,+Mi neniyanduluzi lifasi.+
Ki mañi yanaali ni na?
25 Nilyanganisa lisupo za bababulela litaba zesina tuso,*Mi ki Na yatahisa kuli balauli baeze inge likuba;+Ki Na yalyanganisa batu bababutaliNi kufetula zibo yabona kuieza bukuba;+
26 Ki Na yatahisa kuli linzwi la mutangaaka liezahaleNi kutaleleza bupolofita bwa linumwana zaka;+Ki Na yabulela ka za Jerusalema kuli: ‘Kukayaha batu ku yena,’+
Ni yabulela ka za mileneñi ya Juda kuli: ‘Ikayahiwa sinca,+Mi nikayaha sinca matota ahae’;+
27 Ki Na yabulelela buliba bwa mezi kuli: ‘Uome,Mi nikakalisa linuka zahao kaufela’;+
28 Ki Na yabulela ka za Sirusi kuli+ ‘Ki yena mulisana waka,Mi ukapeta tato yaka kaufela ka kutala’;+Ki Na yabulela ka za Jerusalema kuli: ‘Ukayahiwa sinca,’
Ni kubulela ka za tempele kuli: ‘Mitomo yahao ikatomiwa.’”+
Litaluso ze kwatasi
^ Kamba “nako yeupepwa.”
^ Lelitalusa “Yanani niti,” lona lilumbatina la kububeka Isilaele.
^ Kamba “naha yeomile.”
^ Linzwi ka linzwi, “peu.”
^ Fo kikuli, maswaniso.
^ Kamba “siswaniso sa sipi yeshengunuzwi.”
^ Kamba “palo.”
^ Kamba “tempele.”
^ Kamba “za bapolofita ba buhata.”
