“Ki lona libaka hanili ku mina, lika kaufela zemulapelela ni zemukupa, mube ni tumelo ya kuli muliamuhezi, mi muka lifumana.”—Mareka 11:24, Bibele ya Toloko ya Lifasi Lelinca.

 “Kabakaleo nimibulelela nili, lika kaufela zemukupa ka tapelo, mube ni tumelo ya kuli muliamuhezi, mi likaba zamina.”—Mareka 11:24, Bibele ya English Standard Version.

 Ka kubulela manzwi ao, Jesu ubonisa balateleli bahae libaka habaswanela kuba ni tumelo yetiile ka za tapelo. Ubakolwisa kuli Mulimu hautwangi feela litapelo zabona kono hape walialabanga. Mutu ya lapela ka kulumelelana ni tato ya Mulimu wakona kuba ni buikolwiso bwa kuli zakupa uka lifiwa. Kuswana feela inge kuli tapelo yahae ialabilwe kale.

 Jesu ukoñomeka butokwa bwa kuba ni tumelo halulapela. Utalusa kuli mutu yalapela haswaneli ‘kukakanya mwa pilu yahae’ kono uswanela kuba ni “tumelo ya kuli zabulela likaezahala.” (Mareka 11:23) Kabakalañi? Kabakala kuli batu babakakanya habakoni ‘kulibelela kuli bakaamuhela sesiñwi ku Jehova.’ a—Jakobo 1:5-8.

 Mutu yanani tumelo ulapelanga mwa miinelo yeshutana-shutana. (Luka 11:9, 10; Maroma 12:12) Ka kueza cwalo, ubonisa kuli watokwa luli lika zakupa ni kuli unani tumelo ya kuli Mulimu wakona kualaba tapelo yahae. Hape ulumela kuli Mulimu wakona kualaba tapelo yahae ka nzila yasalibeleli ni kuli wakona kueza cwalo ka nako yeshutana ni nako yalibelela.—Maefese 3:20; Maheberu 11:6.

 Nihakulicwalo, manzwi a Jesu a, hatalusi kuli mutu kaufela wakona kulibelela kuli ukaamuhela lika kaufela zakupa ka tapelo ku Mulimu. Jesu naabulela kwa balateleli bahae, baana bane banani tumelo ili bane baeza mone bakonela kaufela kulapela Jehova Mulimu ka nzila yeamuheleha. Bibele ibulela kuli Jehova uteelezanga feela kwa litapelo zelumelelana ni tato yahae. (1 Joani 5:14) Hateelezangi kwa litapelo za batu babahana kumamela likuka zahae ka bomu ni babaeza lika zemaswe basabaki. (Isaya 1:15; Mika 3:4; Joani 9:31) Kuli muitute zeñata ka za litapelo zautwanga Mulimu, mubuhe vidio yekuswani ye.

 Kwa mafelelezo a bukombwa bwahae fa lifasi, Jesu naambolisani ni balutiwa bahae ka za butokwa bwa kubonisa tumelo yetiile ku Mulimu. Naabonisize butokwa bwakueza cwalo ka kuitusisa swanisezo. Hane banze baya kwa Jerusalema abona kota ya feiga yeneiitahanezi kumela matali. Nihakulicwalo, kota yeo neisika beya miselo, kacwalo Jesu aikuta. (Mareka 11:12-14) Ponahalo ya kota yeo inge kuli neinani miselo, neiyemela sicaba sa Isilaele sa kwaikale sene sibonahala inge kuli nesilapela Mulimu, kono inze sisina tumelo. (Mateu 21:43) Hamulaho feela wa fo, kota ya feiga yaoma, ili nto yenebonisa zeneka ezahala kwa Maisilaele bane basina tumelo.—Mareka 11:19-21.

 Ka kushutana ni Maisilaele bane basina tumelo, Jesu naanani buikolwiso bwa kuli balateleli bahae nebakaba ni tumelo yene batokwa kuli batiyele miinelo yetaata ni kupeta lika zetuna. (Mareka 11:22, 23) Kelezo ya Jesu ka za tapelo neitile ka nako yeswanela bakeñisa kuli tumelo ya balutiwa bahae neituha ilikiwa. Nebatokwa kutiyela lifu la Jesu ni kutiyela twaniso yene bakopana ni yona mwa bukombwa. (Luka 24:17-20; Likezo 5:17, 18, 40) Kacenu, balateleli ba Jesu ni bona bakona kutiyela miinelo yetaata haiba babonisa tumelo ku Mulimu ni kwa tapelo.—Jakobo 2:26.

 Mubuhe vidio yekuswani ye kuli mubone molitaluselizwe ka bukuswani liñolo la Mareka.