Mulao wa Kueza Hande Babañwi Utalusañi?
Kalabo ya Bibele
Mwa ngambolo yahae yezibahala hahulu ya fa lilundu, Jesu naabulezi kuli: “Lika kaufela zemubata kuli batu bamiezeze, mubaezeze zona ni mina.” (Mateu 7:12; Luka 6:31) Hatiso ya Encyclopedia of Philosophy italusa cwana mulao wo wa kueza hande babañwi: “Zemubata kuli babañwi bamiezeze, mubaezeze zona ni mina.”
Mulao wa Kueza Hande Babañwi utalusañi?
Mulao wa Kueza Hande Babañwi ulususueza kueza babañwi sina mone lukatabelela kuezezwa. Ka mutala, batu babañata baitebuhanga hahulu haiba babañwi babakuteka, kubabonisa sishemo, ni kubalata. Kacwalo, luswanela kueza babañwi sina mone lukabatela kuezezwa.—Luka 6:31.
Ki kabakalañi Mulao wa Kueza Hande Babañwi hauli wa butokwa?
Mulao wa Kueza Hande Babañwi ulutusa mwa miinelo yemiñata. Ka mutala, ukona . . .
Kutiisa manyalo.—Maefese 5:28, 33.
Kutusa bashemi kuhulisa hande bana babona.—Maefese 6:4.
Kutusa kuli balikani, batu babapila hamoho mwa silalanda, ni batu babasebeza hamoho baswalisane hande.—Liproverbia 3:27, 28; Makolose 3:13.
Mulao wa Kueza Hande Babañwi ki mulao oswana ofumaneha mwa Mañolo ebabizanga batu babañata kuli Testamente Yakale. Jesu naabulezi kuli kueza cwalo “ki sona sesitaluswa ki Mulao [libuka zapili zeketalizoho za mwa Bibele] ni Bapolofita [libuka za bupolofita].” (Mateu 7:12) Ka mubulelelo omuñwi lukali, Mulao wa Kueza Hande Babañwi ukoñomeka taba ya butokwa hahulu yeneñozwi mwa Testamente Yakale, yona ya kulata wahenu.—Maroma 13:8-10.
Kana Mulao wa Kueza Hande Babañwi ulutusa feela kufumana lika zelutokwa ku bona?
Batili. Mulao wo sihulu ulususueza kufana. Jesu hanaafa mulao wo, naabonisa moluswanela kupilisanela ni batu babañwi, kukopanyeleza cwalo ni lila zaluna. (Luka 6:27-31, 35) Kacwalo, mulao wo ulususueza kueza hande batu kaufela.
Mukona kusebelisa cwañi mulao wanaafile Jesu wa kueza hande babañwi?
1. Mube ni temuho. Muise pilu batu babañwi. Ka mutala, mwendi mubona kuli mutu yomuñwi upalelwa kushimba hande lika, muutwa kuli mutu yapila bukaufi ni mina bamusweli mwa sipatela, kamba mwendi mulemuhile kuli mutu yomuñwi yemubeleka ni yena uzwafile. Haiba “muisa pilu . . . ku za babañwi,” mukaeza momukonela kaufela kubulela kamba kueza lika zeñwi zeka batusa.—Mafilipi 2:4.
2. Mulike kuutwisisa mobaikutwela babañwi. Mulike kuipeya mwa muinelo wali ku ona mutu yomuñwi. Nemuka ikutwa cwañi hane mukaba mwa muinelo oswana wo? (Maroma 12:15) Haiba mulika kuutwisisa mobaikutwela babañwi, mukasusuezwa kubatusa.
3. Mube bababunolo. Muhupule kuli batu bashutana. Zene bakabata batu babañwi kuli baezezwe haki zona zene mukabata kuli batu bamiezeze zona. Kacwalo, mulike kuezeza babañwi lika zebabata kuli mubaezeze.—1 Makorinte 10:24.
Hape Mwendi Mwakona Kutabela Litaba Ze
LIKALABO KWA LIPUZO ZA BIBELE
Kuba “Musamaria Yomunde” Kutalusañi?
Ka butali, Jesu naaitusisize likande le kuli alute batu mobaswanela kupilisanela ni babañwi, kusina taba ni simuluho yabona, mushobo, kamba sibaka kobazwa.
MUZUHE!
Kupila Bupilo Bobunde—Kuikola Bupilo Mwa Lubasi ni Kuba ni Balikani Babande
Kuli mube balikani babande, mutokwa kuba ni moya wa kufana kufita kulibelelanga feela kufiwa.
MAVIDIO A TUDOLI TOTUSWANISIWA
Mulikani wa Niti ki Mutu Yacwañi?
Balikani ba buhata bakona kufumanwa ka bunolo, kono mukona kufumana cwañi mulikani wa niti?
KA ZA LUNA
Mufumanehe Kwa Mukopano
Muzibe litaba ka za mikopano yaluna. Mufumane sibaka sa mikopano sesili bukaufi ni komupila.