Mikaele yabizwanga ki bulapeli bobuñwi kuli “Muhalalehi Mikaele,” ki libizo lelifilwe Jesu pili hasika taha kale fa lifasi nihasa kutezi kwa lihalimu. a Mikaele naakananisani ni Satani hamulaho wa lifu la Mushe mi naatusize lingeloi kuisa lushango lwa Mulimu ku mupolofita Daniele. (Daniele 10:13, 21; Juda 9) Mikaele upila ka kulumelelana ni taluso ya libizo lahae lelitalusa “Ki Mañi Yaswana ni Mulimu?” Ueza cwalo ka kuyemela bubusi bwa Mulimu ni kulwanisa lila za Mulimu.—Daniele 12:1; Sinulo 12:7.

 Halunyakisiseñi libaka Jesu haswanela kubizwa kuli Mikaele, Nduna wa Mangeloi.

•   Mikaele, ki “nduna wa mangeloi.” (Juda 9) Linzwi la “nduna wa mangeloi,” lelitalusa “mueteleli wa mangeloi,” lifumaneha feela habeli mwa litimana za mwa Bibele. Mwa Bibele, pulelo ya kuli “nduna wa mangeloi” iitusisizwe feela ku lingeloi lililiñwi, isiñi mangeloi amañata. Zeñwi za litimana zeo libonisa kuli Mulena Jesu yazusizwe kwa bafu “ukashetumuka kuzwa kwa lihalimu ka muhuwo wa taelo, ka linzwi la nduna wa mangeloi.” (1 Matesalonika 4:16) Jesu unani “linzwi la nduna wa mangeloi” kakuli ki yena Mikaele, nduna wa mangeloi.

•   Mikaele ulaela mpi ya mangeloi. “Mikaele ni mangeloi ahae balwana ni drakoni,” yena Satani. (Sinulo 12:7) Mikaele unani maata amatuna mwa lihalimu, kakuli ubizwa “yomuñwi wa manduna babahulu” ni “nduna yomutuna.” (Daniele 10:13, 21; 12:1) Ka kuya ka David E. Aune, caziba wa litaba za New Testament, malumbatina ao atalusa kuli Mikaele ki “nduna yomutuna wa mangeloi ali mpi yetuna.”

   Bibele ibulela feela mutu alimuñwi yanani maata fahalimwaa mpi ya mangeloi. Italusa za “nako yakapatululwa Mulena Jesu hazwa kwa lihalimu ni mangeloi ahae a maata mwa malimi a mulilo, hanze akutiseza bumaswe.” (2 Matesalonika 1:7, 8; Mateu 16:27) Jesu “naaile kwa lihalimu, mi mangeloi ni bulena ni maata nelibeilwe mwatasaa hae.” (1 Pitrosi 3:21, 22) Bakeñisa kuli Mulimu haasika keta mangeloi amabeli ni limpi zepeli za mangeloi kuli mpi yeñwi izamaiswe ki Mikaele mi yeñwi izamaiswe ki Jesu, kwaswanela kubulela kuli Mikaele ki yena Jesu Kreste luli.

•   Mikaele “ukayema” ka “nako ya ñalelwa” yesika bonwa kale. (Daniele 12:1) Mwa buka ya Daniele, linzwi la ‘kuyema’ hañata liitusiswanga kutalusa mulena yayema kuli aeze nto yeñwi yeipitezi. (Daniele 11:2-4, 21) Jesu Kreste, yabizwa hape kuli “Linzwi la Mulimu,” ukaeza nto yeñwi yeipitezi ka kuba “Mulena wa Malena,” ili kuyundisa lila kaufela za Mulimu ni kusileleza batu ba Mulimu. (Sinulo 19:11-16) Ukaeza cwalo ka nako ya “ñalelwa yetuna yesika bonwa kale kuzwa kwa simuluho ya lifasi.”—Mateu 24:21, 42.