Hamulaho wa kukolobezwa sina yomuñwi wa Lipaki za Jehova, basali ba libizo la Zarina, bazwa mwa Russia kukutela kwa naha yahabo bona kwa Central Asia, mi nebabata kuluta bana babona babasizana niti. Bakeñisa kutokwa hande masheleñi, bo Zarina nebaina mwa ndu yenani muzuzu ulimuñwi ni bashemi babona ni bo kaizelaa bona ni basali babona. Bashemi babona balaela bo Zarina kuli basike balutanga bana babona litaba za mwa Bibele. Mi hape bahanisa baikulu babona kuambolanga ni bo maa bona litaba za mwa Bibele.

 Bo Zarina banahanisisa mone bakatuseza bana babona kuituta za Jehova. (Liproverbia 1:8) Kacwalo, balapela ka taata ku Jehova, kukupa kuli abaetelele ni kubatusa kuba ni butali. Hasamulaho, baeza nto yeñwi yenee batusize kupeta zene bakupile mwa tapelo. Balukisa nako ya kuyo hata-hatanga kwa sibaka sesiñwi ni bana babona, mi hane banze baeza cwalo, neba batalusezanga za pupo yemakaza. Nako yene batandile ni bana babona neitusize bana babona kutabela kuziba zeñata ka za Mubupi.

 Hasamulaho, bo Zarina babata nzila ya kutusa bana babona kuziba litaba zeñata ka kuitusisa buka ya Bibele I Lutañi Luli? a Bo Zarina bañola maparagilafu ni lipuzo za mwa buka yeo fa mapepa. Hape nebaekelize litaba zeñwi lisikai kuli batuse bana babona kuutwisisa hande litaba zeo. Hasamulaho, baanga mapepa ao ni potoloto ni kulipata kwatasaa mushini wa kutapisisa, one uli mwa sitapelo. Bana babona babasizana hane bayanga mwa muzuzu wo, nebabalanga maparagilafu ni kuñola likalabo zabona fateñi.

 Bo Zarina nebakonile kuituta likauhanyo zepeli mwa buka ya Bibele I Lutañi? ka kuitusisa muezezo wo, pili bona ni bana babona basika tutela kale mwa ndu isili. Hase batutile, bazwelapili kuituta ni bana babona kusina mutu yanaakona kubatibela. Mwa kweli ya October 2016, basizana bao bakolobezwa, mi nebaitumezi hahulu kuli bo maa bona nebaezize ka butali ni ka maseme kuli babalute niti ya mwa Bibele.