Lukka 1:1-80

TEEKAKO

Obubaka eri Tewofiro (1-4)
Gabulyeri ayogera ku kuzaalibwa kwa Yokaana Omubatiza (5-25)
Gabulyeri ayogera ku kuzaalibwa kwa Yesu (26-38)
Maliyamu akyalira Erizabeesi (39-45)
Maliyamu atendereza Yakuwa (46-56)
Yokaana azaalibwa era atuumibwa erinnya (57-66)
Obunnabbi bwa Zekkaliya (67-80)

1 Olw’okuba waliwo bangi abafubye okukuŋŋaanya ebigambo eby’amazima bye twakkiriza mu bujjuvu,+ ² nga bwe byatuweebwa abo abaalaba ebintu bino+ era abaalangirira obubaka okuva ku ntandikwa,+ ³ ow’ekitiibwa Tewofiro+ nange nnasalawo okukuwandiikira ebintu bino nga bwe biddiriŋŋana, kubanga nnabinoonyerezako n’obwegendereza okuviira ddala ku ntandikwa yaabyo, ⁴ osobole okukakasa ebintu bye wayigirizibwa.+ ⁵ Mu biseera bya Kerode,*+ kabaka wa Buyudaaya, waaliwo kabona ayitibwa Zekkaliya ow’omu kibinja kya Abiya.+ Mukazi we yali wa mu bawala ba Alooni, era yali ayitibwa Erizabeesi. ⁶ Bombi baali batuukirivu mu maaso ga Yakuwa,* olw’okuba baali bakwata ebiragiro bye byonna n’amateeka ge. ⁷ Kyokka tebaalina mwana, kubanga Erizabeesi yali mugumba, era bombi baali bakaddiye. ⁸ Awo bwe yali aweereza nga kabona mu maaso ga Katonda ng’oluwalo lw’ekibinja kye+ lutuuse, ⁹ n’alondebwa okuyitira mu kalulu ng’empisa ya bakabona bwe yabanga, okwotereza obubaani+ ng’ayingidde mu yeekaalu ya Yakuwa.*+ ¹⁰ Era ekibiina kyonna eky’abantu kyali bweru nga basaba mu kiseera eky’okwotereza obubaani. ¹¹ Awo malayika wa Yakuwa* n’amulabikira ng’ayimiridde ku ludda olwa ddyo olw’ekyoto kwe booterereza obubaani. ¹² Zekkaliya bwe yamulaba n’asoberwa, era n’atya nnyo. ¹³ Naye malayika n’amugamba nti: “Totya Zekkaliya kubanga okwegayirira kwo kuwuliddwa, era mukazi wo Erizabeesi ajja kukuzaalira omwana ow’obulenzi, era ojja kumutuuma Yokaana.+ ¹⁴ Ojja kusanyuka era ojaguze nnyo, era n’abalala bangi bajja kusanyuka olw’okuzaalibwa kwe,+ ¹⁵ kubanga aliba mukulu mu maaso ga Yakuwa.*+ Naye talina kunywa nvinnyo oba ekitamiiza kyonna.+ Alijjuzibwa omwoyo omutukuvu okuviira ddala mu lubuto lwa nnyina,+ ¹⁶ era alikomyawo abaana ba Isirayiri bangi eri Yakuwa, Katonda waabwe.+ ¹⁷ Ate era alimukulemberamu ng’alina omwoyo n’amaanyi nga Eriya bye yalina,+ azze emitima gya bakitaabwe b’abaana eri abaana baabwe,+ era n’abajeemu abasobozese okufuna amagezi ag’abatuukirivu, asobole okuteekerateekera Yakuwa* abantu abamusaanira.”+ ¹⁸ Awo Zekkaliya n’agamba malayika nti: “Kino nnyinza kukikakasiza ku ki? Kubanga nkaddiye era ne mukyala wange naye akaddiye.” ¹⁹ Malayika n’amugamba nti: “Nze Gabulyeri+ ayimirira mu maaso ga Katonda,+ era ntumiddwa okwogera naawe nkubuulire amawulire amalungi ag’ebintu bino. ²⁰ Naye laba! ojja kuziba omumwa era tojja kusobola kwogera okutuusa ebintu bino lwe birituukirira olw’okuba tokkirizza bigambo byange ebijja okutuukirira mu kiseera ekigereke.” ²¹ Mu kiseera ekyo abantu baali balindirira Zekkaliya, era nga beewuunya lwaki yali aludde mu yeekaalu. ²² Naye bwe yafuluma n’atasobola kwogera nabo, ne bategeera nti waliwo ekintu ekitali kya bulijjo kye yali alabye* mu yeekaalu. Yabakolera bukolezi bubonero, naye n’asigala nga tayogera. ²³ Awo ennaku ez’okuweereza kwe bwe zaggwaako, n’addayo ewuwe. ²⁴ Nga wayiseewo ennaku ntono, Erizabeesi mukazi we yafuna olubuto; yamala emyezi etaano nga teyeeraga mu bantu, ng’agamba nti: ²⁵ “Kino Yakuwa* ky’ankoledde mu nnaku zino. Antaddeko ebirowoozo n’anzigyako ekivume kye mbadde nakyo mu bantu.”+ ²⁶ Mu mwezi ogw’omukaaga ng’ali lubuto, Katonda yatuma malayika Gabulyeri+ mu kibuga eky’e Ggaliraaya ekiyitibwa Nazaaleesi ²⁷ eri Maliyamu,+ omuwala embeerera+ eyali ayogerezebwa Yusufu ow’omu nnyumba ya Dawudi. ²⁸ Malayika bwe yajja gy’ali, n’amugamba nti: “Emirembe gibe naawe, ggwe asiimibwa ennyo; Yakuwa* ali naawe.” ²⁹ Naye n’asoberwa olw’ebigambo bya malayika ebyo era n’atandika okwebuuza amakulu g’okulamusa okwo. ³⁰ Malayika n’amugamba nti: “Totya Maliyamu, kubanga osiimiddwa mu maaso ga Katonda. ³¹ Laba! oliba olubuto era olizaala omwana ow’obulenzi+ era olimutuuma erinnya Yesu.+ ³² Oyo aliba mukulu+ era aliyitibwa Mwana w’Oyo Asingayo Okuba Waggulu;+ era Yakuwa* Katonda alimuwa entebe ya Dawudi jjajjaawe;*+ ³³ alifuga ennyumba ya Yakobo nga Kabaka emirembe gyonna, era Obwakabaka bwe tebuliggwaawo.”+ ³⁴ Naye Maliyamu n’agamba malayika nti: “Kino kinaasoboka kitya nga sirina musajja gwe nneegatta naye?”+ ³⁵ Malayika n’amugamba nti: “Omwoyo omutukuvu gulikujjako,+ era amaanyi g’Oyo Asingayo Okuba Waggulu galikujjako. N’olw’ensonga eyo, n’oyo alizaalibwa aliyitibwa mutukuvu,+ Mwana wa Katonda.+ ³⁶ Era laba! Erizabeesi gw’olinako oluganda, ayitibwa omugumba, naye ali lubuto lwa mwana wa bulenzi, mu myaka gye egy’obukadde, era kati lwa myezi mukaaga; ³⁷ kubanga eri Katonda, tewali kigambo* kitayinza kutuukirira.”+ ³⁸ Awo Maliyamu n’agamba nti: “Laba! ndi muzaana wa Yakuwa!* Ka kibeere bwe kityo gye ndi nga bw’ogambye.” Awo malayika n’ava w’ali. ³⁹ Mu nnaku ezo Maliyamu n’asituka n’agenda mangu mu kitundu eky’ensozi, mu kibuga eky’omu Yuda, ⁴⁰ n’ayingira mu nnyumba ya Zekkaliya, n’alamusa Erizabeesi. ⁴¹ Erizabeesi bwe yawulira okulamusa kwa Maliyamu, omwana eyali mu lubuto lwe n’abuukabuuka, era Erizabeesi n’ajjuzibwa omwoyo omutukuvu, ⁴² n’ayogera mu ddoboozi ery’omwanguka nti: “Oli wa mukisa mu bakazi bonna, n’omwana gw’olizaala wa mukisa! ⁴³ Nze ani okufuna enkizo ng’eno, okukyaza nnyina wa Mukama wange? ⁴⁴ Laba! bwe mpulidde eddoboozi lyo ng’onnamusa, omwana ali mu lubuto lwange n’abuukabuuka olw’essanyu. ⁴⁵ Era naawe eyakkiriza oli musanyufu, kubanga ebintu byonna Yakuwa* bye yakutegeeza bijja kutuukirira.” ⁴⁶ Maliyamu n’agamba nti: “Ngulumiza Yakuwa,*+ ⁴⁷ era omutima gwange gusanyukira nnyo Katonda Omulokozi wange;+ ⁴⁸ kubanga alabye embeera y’omuzaana we omunaku.+ Okuva kati abantu ab’emirembe gyonna banampita musanyufu,+ ⁴⁹ kubanga Oyo ow’amaanyi ankoledde ebikulu; erinnya lye ttukuvu,+ ⁵⁰ era mu buli mulembe asaasira abo abamutya.+ ⁵¹ Akoze eby’amaanyi n’omukono gwe; asaasaanyizza abo abooleka amalala mu mitima gyabwe.+ ⁵² Abantu ab’obuyinza abawanuddeyo ku ntebe zaabwe+ n’agulumiza abanaku;+ ⁵³ abalumwa enjala abawadde ebintu ebirungi+ ne bakkuta, n’abo abaalina obugagga abagobye ne bagenda nga tebalina kantu. ⁵⁴ Adduukiridde Isirayiri omuweereza we, okulaga nti ajjukira ekisuubizo kye+ eky’okusaasira ⁵⁵ Ibulayimu n’ezzadde lye+ emirembe gyonna, nga bwe yagamba bajjajjaffe.” ⁵⁶ Maliyamu n’amala naye emyezi ng’esatu, oluvannyuma n’addayo ewuwe. ⁵⁷ Awo ekiseera kya Erizabeesi eky’okuzaala ne kituuka, era n’azaala omwana wa bulenzi. ⁵⁸ Baliraanwa be n’ab’eŋŋanda ze ne bawulira nti Yakuwa* amulaze ekisa, era ne basanyukira wamu naye.+ ⁵⁹ Ku lunaku olw’omunaana ne bajja okukomola omwana,+ era baali bagenda kumutuuma erinnya lya kitaawe, Zekkaliya. ⁶⁰ Naye nnyina w’omwana n’agamba nti: “Nedda, ajja kuyitibwa Yokaana.” ⁶¹ Ne bamugamba nti: “Tewali n’omu ku b’eŋŋanda zo ayitibwa linnya eryo.” ⁶² Awo ne bakozesa obubonero ne babuuza taata w’omwana erinnya lye yali ayagala okumutuuma. ⁶³ N’asaba ekipande, n’awandiikako nti: “Yokaana lye linnya lye.”+ Bonna ne beewuunya. ⁶⁴ Amangu ago omumwa gwe ne guzibuka era n’olulimi lwe ne lusumulukuka n’atandika okwogera,+ n’atendereza Katonda. ⁶⁵ Ab’omu kitundu kyabwe bonna ne batya era ebintu ebyo byonna ne bitandika okwogerwako mu kitundu kyonna eky’ensozi eky’e Buyudaaya. ⁶⁶ Era abo bonna abaabiwulira ne babissa ku mitima gyabwe, ne bagamba nti: “Ddala omwana ono aliba muntu wa ngeri ki?” Kubanga omukono gwa Yakuwa* gwali naye. ⁶⁷ Zekkaliya kitaawe n’ajjuzibwa omwoyo omutukuvu n’ayogera ebigambo eby’obunnabbi ng’agamba nti: ⁶⁸ “Yakuwa* Katonda wa Isirayiri+ atenderezebwe, kubanga asaasidde abantu be n’abanunula.+ ⁶⁹ Atuyimusirizza ejjembe ery’obulokozi*+ mu nnyumba ya Dawudi omuweereza we,+ ⁷⁰ nga bwe yayogera okuyitira mu kamwa ka bannabbi be abatukuvu ab’edda;+ ⁷¹ okutulokola okuva eri abalabe baffe n’okuva eri abo bonna abatukyawa,+ ⁷² okutusaasira ku lwa bajjajjaffe era n’okujjukira endagaano ye entukuvu,+ ⁷³ ekirayiro kye yalayirira jjajjaffe Ibulayimu,+ ⁷⁴ nti oluvannyuma lw’okutununula mu mikono gy’abalabe baffe, ajja kutuwa enkizo ey’okumuweereza awatali kutya, ⁷⁵ nga tuli beesigwa era batuukirivu mu maaso ge ennaku zaffe zonna. ⁷⁶ Naye ggwe omwana, oliyitibwa nnabbi w’Oyo Asingayo Okuba Waggulu, kubanga olikulemberamu Yakuwa* okuteekateeka amakubo ge,+ ⁷⁷ okumanyisa abantu be obubaka obw’okulokolebwa nga basonyiyibwa ebibi byabwe,+ ⁷⁸ olw’obusaasizi bwa Katonda waffe. Olw’obusaasizi buno ekitangaala eky’oku makya ennyo okuva waggulu kijja kujja gye tuli, ⁷⁹ okumulisiza abo abatudde mu kizikiza ne mu kisiikirize eky’okufa,+ n’okuluŋŋamya ebigere byaffe mu kkubo ery’emirembe.” ⁸⁰ Omwana n’agenda ng’akula, era ne yeeyongera amaanyi mu mwoyo; n’abeeranga mu ddungu okutuusa ku lunaku lwe yeeraga eri abantu ba Isirayiri.