Ebikolwa 2:1-47

TEEKAKO

Omwoyo omutukuvu ku lunaku lwa Pentekooti (1-13)
Peetero ayogera eri abantu (14-36)
Ebigambo bya Peetero bikwata ku bantu bangi (37-41)
- Abantu 3,000 babatizibwa (41)
Abakristaayo bassa kimu (42-47)

2 Awo ku lunaku lw’Embaga ya Pentekooti,+ bonna baali wamu mu kifo kimu, ² amangu ago ne wabaawo okuwuuma okwava mu ggulu nga kulinga okw’embuyaga ey’amaanyi, ne kujjula enju yonna mwe baali batudde.+ ³ Ne balaba ennimi eziringa ez’omuliro, era buli lulimi ne lutuula ku muntu, ⁴ bonna ne bajjula omwoyo omutukuvu,+ ne batandika okwogera mu nnimi ez’enjawulo ng’omwoyo bwe gwabasobozesa.+ ⁵ Mu kiseera ekyo, mu Yerusaalemi mwalimu Abayudaaya abatya Katonda abaali bavudde mu mawanga gonna agali wansi w’eggulu.+ ⁶ Okuwuuma bwe kwabaawo, abantu bangi ne bakuŋŋaana nga basobeddwa, kubanga buli omu yawulira abayigirizwa nga boogera olulimi lwe. ⁷ Ne beewuunya nnyo era ne batandika okwebuuza nti: “Bano bonna aboogera si Bagaliraaya?+ ⁸ Naye kijja kitya okuba nti buli omu ku ffe awulira nga boogera mu lulimi lwe olw’obuzaaliranwa? ⁹ Ffe Abapaazi, Abameedi,+ Abeeramu,+ abatuuze b’e Mesopotamiya, ab’e Buyudaaya, ab’e Kapadokiya, ab’e Ponto, era n’ab’omu ssaza ly’e Asiya;+ ¹⁰ ab’e Fulugiya, ab’e Panfuliya, ab’e Misiri, ab’omu bitundu bya Libiya ebiri okumpi n’e Kuleene, awamu n’abagenyi abaava mu Rooma, Abayudaaya n’abakyufu,+ ¹¹ n’Abakuleete n’Abawalabu, ffenna tubawulira nga boogera mu nnimi zaffe ku bintu bya Katonda eby’ekitalo.” ¹² Bonna beewuunya nnyo era ne basoberwa, ne bagambagana nti: “Kino kitegeeza ki?” ¹³ Naye abamu ne babasekerera ne bagamba nti: “Batamidde omwenge omusu.” ¹⁴ Naye Peetero n’ayimuka n’abatume ekkumi n’omu+ n’ayogerera waggulu nti: “Abasajja ab’e Buyudaaya n’abatuuze b’e Yerusaalemi mmwenna, muwulirize ebigambo byange. ¹⁵ Abantu bano tebatamidde nga bwe mulowooza, kubanga essaawa ziri ssatu ez’oku makya. ¹⁶ Naye kino kye kyayogerwa okuyitira mu nnabbi Yoweeri nti: ¹⁷ ‘“Mu nnaku ez’enkomerero,” Katonda bw’agamba, “Ndifuka omwoyo gwange ku bantu aba buli ngeri, era batabani bammwe ne bawala bammwe balyogera obunnabbi; abavubuka abali mu mmwe balyolesebwa, n’abasajja abakulu abali mu mmwe baliroota ebirooto,+ ¹⁸ era abaddu bange abasajja n’abakazi ndibafukako omwoyo gwange mu nnaku ezo, era balyogera obunnabbi.+ ¹⁹ Ndikola ebyewuunyisa ku ggulu n’obubonero ku nsi, walibaawo omusaayi, omuliro, n’omukka. ²⁰ Enjuba erifuuka ekizikiza, n’omwezi gulifuuka musaayi ng’olunaku lwa Yakuwa* olukulu era olw’ekitiibwa lunaatera okutuuka, ²¹ era buli muntu alikoowoola erinnya lya Yakuwa* alirokolebwa.”’+ ²² “Abasajja ba Isirayiri, muwulire ebigambo bino: Yesu Omunnazaaleesi ye musajja Katonda gwe yatuma, era nga kino yakiraga okuyitira mu bikolwa eby’amaanyi, n’ebyamagero, n’obubonero bye yamukozesa mu mmwe,+ nga nammwe bwe mumanyi. ²³ Oyo ye musajja gwe mwakwata ne muwaayo eri abasajja abajeemu bamukomerere ku muti era bamutte.+ Katonda ye yakireetera okubaawo, n’olwekyo yali amanyi nti kyandimutuuseeko.+ ²⁴ Naye Katonda yamuzuukiza+ n’amuggya mu kufa, kubanga okufa kwali tekukyayinza kumunyweza.+ ²⁵ Kubanga Dawudi amwogerako nti, ‘Yakuwa* mmuteeka mu maaso gange bulijjo, ali ku mukono gwange ogwa ddyo nneme okusagaasagana. ²⁶ N’olw’ensonga eyo omutima gwange gwasanyuka era nnayogera n’essanyu lingi. Ate era nja kubeeranga n’essuubi, ²⁷ kubanga tolindeka magombe,* era tolireka mwesigwa wo kuvunda.+ ²⁸ Ommanyisizza ekkubo erituusa mu bulamu era olinzijuza essanyu nga ndi mu maaso go.’+ ²⁹ “Ab’oluganda, ka njogere nammwe ku bikwata ku jjajjaffe Dawudi awatali kutya, nti yafa n’aziikibwa+ era amalaalo ge gali wano ewaffe n’okutuusa leero. ³⁰ Olw’okuba yali nnabbi, era ng’amanyi nti Katonda yali amulayiridde nti agenda kutuuza omu ku baana be* ku ntebe ye ey’obwakabaka,+ ³¹ yamanya ebiribaawo era n’ayogera ku kuzuukira kwa Kristo nti teyalekebwa magombe* era omubiri gwe tegwavunda.+ ³² Yesu oyo Katonda yamuzuukiza era ffenna tuli bajulirwa ku ekyo.+ ³³ N’olwekyo, olw’okuba yagulumizibwa n’ateekebwa ku mukono gwa Katonda ogwa ddyo,+ era n’afuna omwoyo omutukuvu Kitaawe gwe yasuubiza,+ atufuseeko omwoyo ogwo gwe mulaba era gwe muwulira. ³⁴ Dawudi teyagenda mu ggulu, naye agamba nti, ‘Yakuwa* yagamba Mukama wange nti: “Tuula ku mukono gwange ogwa ddyo, ³⁵ okutuusa lwe ndifuula abalabe bo ng’entebe y’ebigere byo.”’+ ³⁶ N’olwekyo, ennyumba ya Isirayiri yonna k’ekimanyire ddala nti Yesu oyo gwe mwakomerera ku muti,+ Katonda yamufuula Mukama waffe+ era Kristo.” ³⁷ Bwe baawulira ebyo ne balumwa nnyo mu mitima gyabwe, ne bagamba Peetero n’abatume abalala nti: “Ab’oluganda, tukole ki?” ³⁸ Peetero n’abagamba nti: “Mwenenye,+ era buli omu ku mmwe abatizibwe+ mu linnya lya Yesu Kristo musobole okusonyiyibwa ebibi byammwe,+ era mujja kufuna ekirabo eky’omwoyo omutukuvu. ³⁹ Kubanga ekisuubizo kino+ kyaweebwa mmwe, abaana bammwe, era n’abo abali ewala, abo bonna Yakuwa* Katonda waffe b’aliyita gy’ali.”+ ⁴⁰ Peetero yayogera n’ebigambo ebirala bingi n’awa obujulirwa mu bujjuvu era n’abakubiriza ng’agamba nti: “Mweyawule ku mulembe guno ogwakyama muleme okuzikirizibwa.”+ ⁴¹ Abo abakkiriza n’essanyu ebigambo bye ne babatizibwa,+ era ku lunaku olwo abantu nga 3,000 ne babeegattako.+ ⁴² Ne beeyongeranga okussaayo omwoyo ku ebyo abatume bye baayigirizanga, n’okubeeranga awamu,* n’okuliiranga awamu,+ era n’okusaba.+ ⁴³ Abantu bonna ne batandika okutya, era abatume ne bakola ebyamagero bingi n’obubonero bungi.+ ⁴⁴ Abo bonna abaafuuka abakkiriza baalinga wamu era baagabananga ebintu byonna bye baalina, ⁴⁵ era baatundanga ebintu byabwe,+ ssente ezaavangamu ne bazigabana okusinziira ku bwetaavu bwa buli omu.+ ⁴⁶ Buli lunaku baakuŋŋaaniranga mu yeekaalu nga bonna bassa kimu, era baliiranga emmere mu maka ag’enjawulo nga basanyuka era ng’emitima gyabwe tegiriimu bukuusa, ⁴⁷ nga batendereza Katonda, era nga basiimibwa abantu bonna. Ate era Yakuwa* yabongerangako buli lunaku abantu abaalokolebwanga.+