HIHI mahoya mothe mathiaga kũndũ kũmwe gũtekũmakania rĩĩtwa rĩa Ngai ũrĩa mũndũ arahoya? Andũ aingĩ ũmũthĩ metĩkĩtie ũguo. Rĩciria rĩu nĩ rĩkenagia andũ aingĩ arĩa manyitaga mbaru ndini cia wĩtĩkio ũtiganĩte gũthathaiya hamwe, na arĩa mendaga ndini ciothe ciĩtĩkĩrĩke gũtekũmakania ngũrani ĩrĩa ĩrĩ ho gatagatĩ-inĩ ga cio. No hihi rĩciria rĩu nĩ rĩa ma?

Bibilia ĩrutanaga atĩ mahoya maingĩ merekagĩrio na kũrĩa matagĩrĩire. Mahinda-inĩ marĩa Bibilia yaandĩkagwo, andũ aingĩ nĩ maamenyerete kũhoya mĩhianano. No Ngai maita maingĩ nĩ ooigaga ũndũ ũcio ti mwega. Kwa ngerekano, Thaburi 115:4-6 yugaga ũũ igũrũ rĩgiĩ mĩhianano: “Nĩ ĩrĩ matũ, no ndĩngĩhota kũigua.” Tũreruta atĩa? Kũhoya Ngai ũtarĩ hĩndĩ agaakũigua nĩ wĩra wa tũhũ.

Harĩ ũhoro ũrĩ thĩinĩ wa Bibilia wonanĩtie ũhoro ũcio wega. Kũrĩ hĩndĩ mũnabii Elija ũrĩa wahoyaga Ngai wa ma eerire anabii a Baali mahoe ngai wao, nake ahoe Ngai wake. Elija ooigire atĩ Ngai ũrĩa wa ma nĩ egũcokia mahoya, no Baali ndegũcokia. Anabii a Baali nĩ meetĩkĩrire gwĩka ũguo na makĩhoya mũno nginya makĩanĩrĩra, no Baali ndamaiguire! Bibilia yugaga ũũ: “Gũtiarĩ na wa kũmacokeria; gũtiarĩ na wa kũmathikĩrĩria.” (1 Athamaki 18:29) No gwathiire atĩa rĩrĩa Elija aahoire?

Rĩrĩa Elija aahoire, Ngai aamũcokeirie o hĩndĩ ĩyo, agĩtũma mwaki kuuma igũrũ na ũgĩcina igongona rĩrĩa Elija aahaarĩirie. Nĩ kĩĩ gĩatũmire Elija acokerio na anabii acio angĩ a maheeni makĩaga gũcokerio? Nĩ harĩ ũndũ wa bata ũgwetetwo ihoya-inĩ rĩa Elija rĩrĩa rĩrĩ thĩinĩ wa 1 Athamaki 18:36, 37. Ihoya rĩu nĩ ikuhĩ rĩa ciugo ta 30 na rũthiomi rwa Kĩhibirania rũrĩa Bibilia yaandĩkirũo naruo kĩambĩrĩria-inĩ. Ĩndĩ ihoya rĩu o na rĩrĩ ikuhĩ, Elija aagwetire rĩĩtwa rĩa Ngai Jehova maita matatũ.

Baali, rĩĩtwa rĩrĩa riugĩte “mwene” kana “mwathi,” aarĩ ngai wa Akanaani, na Akanaani maarĩ na Ngai nyingĩ itiganĩte iria ciarũgamagĩrĩra Baali. No rĩĩtwa Jehova nĩ rĩa mwanya, na rĩhũthagĩrũo tu nĩ Ngai ũrĩa wa ma. Ngai ũcio wa ma eerire andũ ake ũũ: “Niĩ nĩ niĩ Jehova. Rĩu nĩrĩo rĩĩtwa rĩakwa; na ndiheaga ũngĩ o wothe riri wakwa.”—Isaia 42:8.

Hihi ihoya rĩa Elija na mahoya ma anabii acio a Baali maathiire kũndũ kũmwe? Ũthathaiya wa Baali nĩ wanyararithagia andũ tondũ wahutĩtie maũndũ ta ũmaraya na kũruta andũ magongona. Ngũrani na ũguo, ũthathaiya wa Jehova nĩ watĩithagia andũ ake Isiraeli, tondũ nĩ wamakũũraga kuumana na mĩtugo ta ĩyo. Ta wĩcirie ũndũ ũyũ: Ũngĩtũmĩra mũrata waku marũa na ũmandĩke rĩĩtwa rĩake-rĩ, hihi no wĩrĩgĩrĩre marũa macio mathiĩ kũrĩ mũndũ ũngĩ ũtetagwo ũndũ ũmwe na mũrata waku na ũrĩa ũkoragwo na mĩtugo mĩũru biũ ĩtahaanaine na ya mũrata waku? Hatarĩ nganja ndũngĩrĩgĩrĩra ũguo!

Rĩrĩa ũrahoya Jehova, ũkoragwo ũkĩerekeria mahoya maku kũrĩ Mũũmbi, o we Ithe wa andũ othe. * Mũnabii Isaia akĩhoya ooigire ũũ: “Wee Jehova, nĩwe Ithe witũ.” (Isaia 63:16) Ũcio nĩwe Jesu aaragia ũhoro wake rĩrĩa eerire arũmĩrĩri ake ũũ: “Ndĩrambata kũrĩ Awa na no we Ithe wanyu na kũrĩ Ngai wakwa na no we Ngai wanyu.” (Johana 20:17) Jehova nĩwe Ithe wa Jesu. Nĩwe Ngai ũrĩa Jesu aahoyaga, na nĩwe Ngai ũrĩa aarutire arũmĩrĩri ake mahoyage.—Mathayo 6:9.