1-2. Ciugo cia Jehova thĩinĩ wa Isaia 65:16, 17 itũteithagia atĩa gũthiĩ na mbere gũkirĩrĩria?

KĨGOMANO gĩa thikũ ithatũ kĩa mwaka wa 2017 kĩarĩ na kĩongo, “Ndũgakue Ngoro!” Kĩgomano kĩu nĩ gĩatũteithirie kuona ũrĩa tũngĩkirĩrĩria mathĩna maitũ. Rĩu nĩ mĩaka ĩna kuuma hĩndĩ ĩyo, na no tũrakirĩrĩria mathĩna thĩinĩ wa thĩ ĩno njũru.

² Nĩ moritũ marĩkũ ũcemanĩtie namo ica ikuhĩ? Hihi nĩ gũkuĩrũo nĩ mũndũ wa famĩlĩ kana mũrata wa hakuhĩ? Hihi nĩ ũrahiũrania na mũrimũ mũnene kana mathĩna ma ũkũrũ? Hihi kwanyu nĩ mũgũmĩirũo nĩ gĩcanjama kĩa ndũire, ngũĩ, kana kũnyarirũo? Hihi nĩ ũhutĩtio nĩ mũrimũ wa Korona kana mĩrimũ ĩngĩ ta ĩyo? Nĩ twĩriragĩria mũno hĩndĩ ĩrĩa maũndũ macio mothe magaathira tũriganĩrũo nĩmo na matige gwĩkĩka rĩngĩ.—Thoma Isaia 65:16, 17.

3. Nĩ ũndũ ũrĩkũ twagĩrĩirũo gwĩka ihinda-inĩ rĩrĩ, na nĩkĩ?

³ Ũtũũro thĩinĩ wa thĩ ĩno nĩ mũritũ, na no gũkorũo nĩ tũgũcemania na maũndũ maritũ o na makĩria mahinda marĩa maroka. (Mat. 24:21) Nĩ ũndũ ũcio, nĩ tũrabatara gũthiĩ na mbere gũkũria ũkirĩrĩria. Nĩkĩ? Tondũ Jesu aaugire ũũ: “Na mwakirĩrĩria nĩ mũkaahonokia mĩoyo yanyu.” (Luk. 21:19) Kũririkanaga atĩ o na andũ arĩa angĩ no maracemania na mathĩna o ta marĩa tũracemania namo na makahota gũkirĩrĩria, no gũtũteithie tũtigakue ngoro.

4. Nĩkĩ no tuuge atĩ Jehova nĩwe ũigĩte kĩonereria kĩrĩa kĩega mũno gĩa gũkirĩrĩria?

⁴ Nũũ ũigĩte kĩonereria kĩrĩa kĩega biũ kĩa ũkirĩrĩria? Nĩ Jehova Ngai. No kũhoteke nĩ wagegio nĩ macokio macio. No ũngĩĩcũrania ũhoro wamo, no ũtaũkĩrũo nĩkĩ gĩatũma tuuge ũguo. Thĩ ĩno ĩratongorio nĩ mũcukani na ĩrĩ na mathĩna maingĩ mũno. Jehova arĩ na ũhoti wa kũmĩniina o rĩmwe no aikarĩte  etereire nĩguo ageeka ũguo ihinda rĩrĩa rĩroka. (Rom. 9:22) Ihinda-inĩ rĩrĩ, Ngai athiĩte na mbere gũkirĩrĩria nginya ihinda rĩu amũrĩte rĩkinye. Rekei twarĩrĩrie maũndũ kenda marĩa Jehova akirĩrĩirie.

5. Rĩĩtwa rĩa Ngai rĩhakĩtwo gĩko atĩa, na ũndũ ũcio ũtũmaga ũigue atĩa?

⁵ Rĩĩtwa rĩake kũhakwo gĩko. Jehova nĩ endete rĩĩtwa rĩake, na endaga andũ othe marĩhe gĩtĩo. (Isa. 42:8) No kwa ihinda ta rĩa mĩaka 6,000 mĩhĩtũku, rĩĩtwa rĩake nĩ rĩcambĩtio mũno. (Thab. 74:10, 18, 23) Ũndũ ũcio wambĩrĩirie mũgũnda-inĩ wa Edeni rĩrĩa Mũcukani (rĩĩtwa rĩrĩa riugĩte “Mũcambania”) aaugire atĩ Ngai nĩ aaimaga Adamu na Hawa ũndũ ũrĩa ũngĩatũmire makorũo na gĩkeno. (Kĩam. 3:1-5) Kuuma hĩndĩ ĩyo, Jehova akoretwo akĩigĩrĩrũo atĩ nĩ harĩ kĩndũ kĩa bata aimaga andũ. Jesu nĩ aatangĩkaga mũno nĩ ũndũ wa kuona rĩĩtwa rĩa Jehova rĩkĩhakwo gĩko. Nĩ ũndũ ũcio, aarutire arutwo ake mahoyage ũũ: “Ithe witũ ũrĩ igũrũ, rĩĩtwa rĩaku nĩ rĩtherio.”—Mat. 6:9.

6. Nĩ kĩĩ gĩtũmĩte Jehova areke ihinda iraihu rĩhĩtũke atarĩ aronania atĩ nĩwe ũrĩ na kĩhooto gĩa gwathana?

⁶ Andũ aingĩ kũregana na wathani wake. Jehova nĩwe wagĩrĩirũo gũkorũo arĩ mwathani wa igũrũ na thĩ, na njĩra yake ya gwathana nĩyo njega makĩria. (Kũg. 4:11) No Mũcukani nĩ ageretie kũhĩtithia araika na andũ nĩguo mecirie atĩ Ngai tiwe ũrĩ na kĩhooto kĩu gĩa gwathana. Ihinda iraihu nĩ rĩabataraga kũhĩtũka nĩguo kũmenyeke atĩ Jehova nĩwe wagĩrĩire gwathana. Tondũ Ngai nĩ arĩ ũũgĩ mũingĩ, nĩ aheete andũ ihinda rĩiganu rĩa kwĩyatha nĩguo mone atĩ matingĩhota gwĩka ũguo mategũtongorio nĩwe. (Jer. 10:23) Nĩ ũndũ wa wetereri wa Ngai, ũhoro wĩgiĩ nũũ ũrĩ na kĩhooto gĩa gwathana nĩ ũkaamenyeka wega. Andũ othe nĩ makaamenya atĩ nĩwe wagĩrĩire gũkorũo arĩ mwathani na atĩ Ũthamaki wake noguo tu ũngĩrehe thayũ wa ma na ũgitĩri thĩinĩ wa thĩ.

7. Nĩa manaremera Jehova, na Jehova akaameka atĩa?

⁷ Ũremi wa ciana imwe ciake. Jehova oombire andũ o hamwe na araika marĩ akinyanĩru. No mũraika ũmwe nĩ aaremire agĩtuĩka Shaitani (rĩĩtwa rĩrĩa riugĩte “Mũregani”) na agĩtũma Adamu na Hawa arĩa maarĩ akinyanĩru maremere Jehova. Thutha ũcio, araika angĩ o hamwe na andũ nĩ maanyitanĩire na Shaitani harĩ kũremera Jehova. (Jud. 6) Thutha ũcio, o na andũ a rũrĩrĩ wa Isiraeli arĩa Ngai eethuurĩire we mwene nĩ maamũregire na makĩambĩrĩria gũthathaiya Ngai cia maheeni. (Isa. 63:8, 10) Jehova ndaakenirio nĩ wagi ũcio wa wĩhokeku. No nĩ akirĩrĩirie na no egũthiĩ na mbere gũkirĩrĩria nginya ihinda rĩkinye rĩa kũniina aremi acio. Ihinda rĩu rĩakinya, andũ ake ehokeku nĩ magaakena, arĩa o nao makoretwo magĩkirĩrĩria maũndũ moru thĩinĩ wa thĩ.

8-9. Nĩ maheeni marĩkũ marĩtio igũrũ rĩgiĩ Jehova, na twĩkaga atĩa nĩ ũndũ wamo?

⁸ Maheeni ma Shaitani. Shaitani aaririe ũũru igũrũ rĩgiĩ Ayubu ndungata ya Ngai, akĩenda kuonania atĩ ndungata ciothe cia Jehova imũtungatagĩra nĩ ũndũ wa indo iria aciheaga. (Ayub. 1:8-11; 2:3-5) Ũguo nĩguo Shaitani augaga igũrũ rĩgiĩ ndungata cia Jehova o na ũmũthĩ. (Kũg. 12:10) No tũteithĩrĩrie harĩ kuonania atĩ Shaitani nĩ mũheenania na njĩra ya gũkirĩrĩria magerio na gũikara tũrĩ ehokeku harĩ Jehova nĩ ũndũ wa kũmwenda. O ta ũrĩa Ayubu aarathimirũo nĩ ũndũ wa gũkirĩrĩria, o na ithuĩ nĩ tũrĩrathimagwo twakirĩrĩria.—Jak. 5:11.

⁹ Shaitani nĩ ahũthagĩra atongoria a ndini cia maheeni kũrutana atĩ Jehova nĩ Ngai  mũũru, na nĩwe ũtũmaga andũ mathĩnĩke. O na amwe maugaga atĩ rĩrĩa ciana nini ciakua, nĩ Ngai ũcioyaga tondũ nĩ arabatara araika angĩ kũrĩa igũrũ. Hatarĩ nganja kũu nĩ kwagĩra Ngai gĩtĩo biũ. No nĩ tũĩ atĩ Jehova nĩ Ngai ũrĩ wendo. Rĩrĩa twarũara mũrimũ mũnene kana twakuĩrũo nĩ mũndũ twendete, tũtiugaga atĩ nĩ Ngai. Handũ ha ũguo, nĩ tũkoragwo na ma atĩ mũthenya ũmwe nĩ agaatwehereria maũndũ macio. Ningĩ nĩ twĩraga andũ arĩa angĩ atĩ Jehova nĩ Ngai ũrĩ wendo. Ũndũ ũcio nĩ ũtũmaga one macokio mega ma gũcokeria ũrĩa ũmũnyũrũragia.—Thim. 27:11.

10. Thaburi 22:23, 24 yugaga atĩa igũrũ rĩgiĩ Jehova?

¹⁰ Kuona ndungata ciake endete ikĩnyamarĩka. Jehova nĩ Ngai mũcayanĩri. Ndakenaga rĩrĩa aigua tũgĩkaya nĩ ũndũ wa mĩnyamaro ĩrĩa tũragerera hihi ta rĩrĩa tũranyarirũo, tũrĩ arwaru, kana nĩ ũndũ wa kwaga gũkinyanĩra gwitũ. (Thoma Thaburi 22:23, 24.) Jehova nĩ atuuragwo rĩrĩa tũratuurũo, nĩ endaga gũtwehereria ruo na nĩ arĩrweheria. (Ringithania Thama 3:7, 8; Isaia 63:9.) Ihinda nĩ rĩgaakinya, rĩrĩa ‘agaatũgiria maithori mothe mathire maitho-inĩ maitũ, na gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo.’—Kũg. 21:4.

11. Jehova aiguaga atĩa igũrũ rĩgiĩ ndungata ciake njĩhokeku iria ikuĩte?

¹¹ Kwamũranio na arata ake arĩa makuĩte. Jehova aiguaga atĩa nĩ ũndũ wa ndungata ciake njĩhokeku iria ikuĩte? Nĩ eriragĩria mũno gũgaaciona rĩngĩ. (Ayub. 14:15) Ta geria gwĩciria ũrĩa Jehova eriragĩria gũkoona Iburahimu mũrata wake rĩngĩ. (Jak. 2:23) Kana Musa ũrĩa maaragia nake “ũthiũ kwa ũthiũ”? (Tham. 33:11) Ningĩ no mũhaka akorũo nĩ eriragĩria gũkaaigua Daudi na aandĩki acio angĩ a thaburi makĩina nyĩmbo njega cia kũmũgooca. (Thab. 104:33) O na gũtuĩka arata acio a Jehova nĩ maakuire, ndarĩ ariganĩrũo nĩo.  (Isa. 49:15) Nĩ aririkanaga maũndũ mothe mamegiĩ. Bibilia yugaga atĩ “kũringana nake othe marĩ muoyo.” (Luk. 20:38, kohoro ka magũrũ-inĩ.) Mũthenya ũmwe nĩ akaamariũkia, na o rĩngĩ athikĩrĩrie mahoya mao ma kuuma ngoro na etĩkĩre ũthathaiya wao. Angĩkorũo nĩ ũkuĩrĩirũo nĩ mũndũ wendete, kũmenya ũguo no gũkũmĩrĩrie.

12. Nĩ ũndũ ũrĩkũ ũtuurithagia Jehova mũno matukũ-inĩ maya ma mũico?

¹² Kuona andũ aganu makĩhinyĩrĩria andũ arĩa angĩ. Rĩrĩa ũremi wambĩrĩirie mũgũnda-inĩ wa Edeni, Jehova nĩ aamenyire atĩ maũndũ nĩ mangĩathũkire o na makĩria o na gũtuĩka thutha ũcio nĩ mangĩacokire maagĩre. Jehova nĩ athũire waganu, wagi wa kĩhooto, na mbaara iria irĩ kuo thĩinĩ wa thĩ. Hingo ciothe nĩ arũmbũyagia andũ arĩa mahinyagĩrĩrio kaingĩ, ta andũ arĩa matarĩ hinya, ciana cia ndigwa, na atumia a ndigwa. (Zek. 7:9, 10) Jehova nĩ atuuragwo mũno, makĩria rĩrĩa ona ndungata ciake njĩhokeku ikĩnyamario na igaikio njera. No tũkorũo na ma atĩ nĩ endete andũ othe arĩa makiragĩrĩria hamwe nake.

13. Nĩ mĩtugo ĩrĩkũ mĩũru Ngai onaga andũ magĩka, na ageeka atĩa nĩ ũndũ wa mĩtugo ĩyo?

¹³ Gũthũka kwa mĩtugo. Andũ moombirũo nĩguo megerekanagie na Ngai, no Shaitani endaga makorũo na mĩtugo mĩũru biũ. Rĩrĩa Ngai oonire “atĩ waganu wa mũndũ warĩ mũingĩ mũno” matukũ-inĩ ma Nuhu, Bibilia yugaga atĩ “Jehova akĩĩrira nĩ ũndũ wa kũũmba andũ gũkũ thĩ, na akĩigua atuurĩtwo ngoro-inĩ yake.” (Kĩam. 6:5, 6, kohoro ka magũrũ-inĩ, 11.) Hihi maũndũ nĩ magagĩrĩte kuuma hĩndĩ ĩyo? Aca. No mũhaka akorũo Shaitani nĩ akenaga mũno ona andũ makĩingĩrania na ngomanio itagĩrĩire cia mĩthemba yothe nginya cia andũ matahikanĩtie kana cia arũme kwa arũme kana atumia gwa atumia. (Ef. 4:18, 19) Shaitani nĩ akenaga o na makĩria rĩrĩa atũma andũ arĩa marĩ ũthathaiya-inĩ wa ma magwe mehia-inĩ maritũ. Jehova ndegũtũũra akirĩrĩirie, kũrĩ hĩndĩ akoonania atĩ nĩ athũire mĩtugo ya ũra-thoni, na njĩra ya kweheria andũ arĩa mekaga mĩtugo ĩyo.

14. Hihi andũ nĩ makoretwo makĩrũmbũiya thĩ na nyamũ iria Ngai oombire?

¹⁴ Kuona ũũmbi wake ũgĩthũkangio. Mũndũ to ‘gwatha athaga mũndũ agatũma one o maũndũ moru,’ no ningĩ ndarũmbũyagia thĩ na nyamũ iria Jehova oombire na agĩciga rungu rwake. (Koh. 8:9; Kĩam. 1:28) Ataaramu amwe maugaga atĩ kwa ihinda rĩa mĩaka ĩigana ũna ĩgũka, andũ nĩ megũtũma mĩthemba makĩria ma milioni ĩmwe ya nyamũ na mĩmera ĩthire biũ. Na nĩkĩo maugaga atĩ maũndũ marĩa matũrigicĩirie marĩ ũgwati-inĩ. No ũndũ mwega nĩ atĩ Jehova eranĩire atĩ nĩ ‘akaananga andũ arĩa manangaga thĩ’ na atue thĩ paradiso.—Kũg. 11:18; Isa. 35:1.

15-16. Nĩ kĩĩ kĩngĩtũteithia gũkirĩrĩria hamwe na Jehova? Heana ngerekano.

¹⁵ Ta wĩcirie maũndũ marĩa mothe moru Ithe witũ wa igũrũ akirĩrĩirie kwa ihinda rĩa mĩaka mĩingĩ. (Rora gathandũkũ “ Maũndũ Marĩa Jehova Akirĩrĩirie.”) Jehova no aniine mũtabarĩre ũyũ mũũru wa maũndũ hĩndĩ o yothe. No wetereri wake nĩ ũtũteithĩtie mũno. Ta wĩcirie ũhoro wa ngerekano ĩno. Mũthuri ũmwe na mũtumia wake makerũo atĩ kaana kao gagaaciarũo karĩ na mathĩna manene ma mwĩrĩ, na gaciarũo gatigaakorũo na ũtũũro mũhũthũ na gatigaatũũra ihinda iraihu. Ĩndĩ o na makĩmenyaga kũrera kaana kau nĩ gũgũkorũo na moritũ, magakena nĩ ũndũ wa gũciarũo gwako. Tondũ nĩ mendete kaana kau, magakirĩrĩria moritũ mothe marĩa maracemania namo nĩguo makarere na njĩra ĩrĩa njega biũ.

 ¹⁶ O ũndũ ũmwe na ũcio, andũ othe arĩa moimanĩte na Adamu na Hawa maciaragwo matarĩ akinyanĩru. O na kũrĩ ũguo, Jehova no amendete na nĩ amarũmbũyagia. (1 Joh. 4:19) Na ngũrani na aciari acio tuona ngerekano-inĩ, Jehova no ahote kũniinĩra ciana ciake mĩnyamaro. Nĩ abangĩte mũthenya ũrĩa akaniina mathĩna marĩa mothe andũ macemanagia namo. (Mat. 24:36) Na githĩ wendo wake ndũbatiĩ gũtũma tũkirĩrĩrie hamwe nake nginya mũico?

17. Kĩonereria kĩa Jesu thĩinĩ wa Ahibirania 12:2, 3, kĩngĩtũteithia atĩa gũthiĩ na mbere gũkirĩrĩria?

¹⁷ Jehova nĩ aigĩte kĩonereria kĩega mũno kĩa ũkirĩrĩria. Jesu nĩ eegerekanagia na Ithe harĩ gũkirĩrĩria. Hĩndĩ ĩrĩa aarĩ gũkũ thĩ nĩ aakirĩrĩirie mĩario mĩũru, gũconorithio, na mũtĩ wa kũnyarirĩrũo nĩ ũndũ witũ. (Thoma Ahibirania 12:2, 3.) Ũkirĩrĩria wa Jehova no mũhaka akorũo nĩ waheire Jesu hinya wa gũkirĩrĩria. O na ithuĩ no ũtũhe hinya wa gũkiragĩrĩria.

18. 2 Petero 3:9 ĩtũteithagia atĩa gũtaũkĩrũo nĩ ũndũ ũrĩa ũhingagio nĩ wetereri wa Jehova?

¹⁸ Thoma 2 Petero 3:9. Jehova nĩ oĩ ihinda rĩrĩa rĩega biũ rĩa kũniina thĩ ĩno njũru. Nĩ ũndũ wa wetereri wake andũ aingĩ nĩ mamũmenyete, na rĩu kũrĩ na andũ kĩrĩndĩ kĩnene arĩa mamũthathayagia. Andũ acio nĩ makenaga tondũ Jehova nĩ aakirĩrĩirie ihinda iraihu nginya magĩciarũo na magĩkinyĩrĩra kũmwenda na kũmwĩyamũrĩra. Rĩrĩa andũ milioni nyingĩ magakirĩrĩria nginya mũico, nĩ gũkooneka wega atĩ Jehova nĩ aatuire itua rĩega rĩa gũkorũo arĩ na wetereri.

19. Twagĩrĩirũo gũtua itua rĩrĩkũ, na nĩ ũndũ ũrĩkũ tũkaamũkĩra?

¹⁹ Jehova nĩ atũigĩire kĩonereria kĩega kĩa ũrĩa tũngĩhota gũkirĩrĩria tũrĩ na gĩkeno. O na gũtuĩka Shaitani nĩ atũmĩte kũgĩe na mĩnyamaro mĩingĩ, Jehova atũũrĩte arĩ ‘Ngai mũkeni.’ (1 Tim. 1:11) O na ithuĩ no tũtũũrie gĩkeno o twetereire Jehova agaatheria rĩĩtwa rĩake, atũũgĩrie ũnene wake, aniine waganu wothe, na atwehererie mathĩna marĩa tũrĩ namo. Rekei tũtue itua rĩa gũthiĩ na mbere gũkirĩrĩria o tũkĩririkanaga atĩ o na Ithe witũ wa igũrũ no akirĩrĩirie. Tũngĩka ũguo, nĩ tũkeeyonera ũũma wa ciugo ici: “Gũkena nĩ mũndũ ũrĩa ũthiaga na mbere gũkirĩrĩria igerio, tondũ arĩkia gwĩtĩkĩrĩka nĩ akaamũkĩra thũmbĩ ya muoyo, ĩrĩa Jehova eerĩire arĩa mathiaga na mbere kũmwenda.”—Jak. 1:12.