Thaburi 77:1-20
Kũrĩ mũrũgamĩrĩri; kũringana na mũinĩre wa Jeduthuni.* Thaburi ya Asafu.+ Rwĩmbo.
77 Nĩ ngũkaĩra Ngai na mũgambo wakwa;Nĩ ngũkaĩra Ngai, nake nĩ ekũnjigua.+
2 Mũthenya ũrĩa ndĩ na mĩtangĩko njethaga Jehova.+
Ũtukũ ngatambũrũkia moko makwa kũrĩ we itegũtigithĩria.*
No ndiguaga ngĩũmĩrĩrio.
3 Rĩrĩa ndaririkana Ngai, nĩ gũcaya njayaga;+Nĩ ndangĩkaga na ngorũo nĩ hinya.*+ (Sela)
4 Nĩ ũgiragĩrĩria imone ciakwa itikahingĩke;Nĩ ndangĩkĩte na ndingĩhota kwaria.
5 Nĩ ndĩĩciragia ũhoro wa matukũ marĩa ma tene,+Ngeciria ũhoro wa mĩaka ya tene mũno.
6 Ũtukũ nĩ ndirikanaga rwĩmbo rwakwa;+Ngecũrania ngoro-inĩ yakwa;+Ngathuthuria* na kĩyo.
7 Hihi Jehova egũtũũra atũtiganĩirie tene na tene?+
Kaĩ gũtarĩ hĩndĩ ĩngĩ agaatũiguĩra tha?+
8 Wendo wake mwĩhokeku-rĩ, kaĩ wathirire tene na tene?
Kaĩ gũtarĩ rũciaro rũkoona kĩĩranĩro gĩake gĩkĩhinga?
9 Ngai-rĩ, kaĩ ariganĩirũo kũiguanĩra tha,+Kana hihi marakara make nĩ matũmĩte tha ciake inyihe? (Sela)
10 Hihi no mũhaka njikare ngiugaga atĩrĩ: “Ũndũ ũyũ nĩguo ũtũmaga ndangĩke:*+
Ũrĩa ũrĩ Igũrũ Mũno nĩ acenjetie mwĩkĩre wake wa maũndũ* gũtwerekera”?
11 Nĩ ngũririkana mawĩra ma Ja;Nĩ ngũririkana ciĩko ciaku cia magegania iria wekire tene.
12 Na nĩ ngwĩcũrania igũrũ rĩgiĩ mawĩko maku motheNa ndĩcũranie ũhoro wa maũndũ marĩa wĩkĩte.+
13 Njĩra ciaku nĩ theru, wee Ngai.
Atĩrĩrĩ Ngai, nĩ ngai ũrĩkũ ũngĩ mũnene tawe?+
14 Wee nĩwe Ngai wa ma ũrĩa wĩkaga maũndũ ma magegania.+
Nĩ ũguũrĩirie ikundi cia andũ hinya waku.+
15 Nĩ ũhonoketie* andũ aku kũgerera hinya waku,*+Ũkahonokia ciana cia Jakubu na cia Jusufu. (Sela)
16 Maĩ nĩ maakuonire, wee Ngai;Maĩ nĩ maakuonire na magĩtangĩka.+
Namo maĩ marĩa mariku makĩinaina.
17 Matu nĩ mooiririe mbura.
Igũrũ matu-inĩ gũkĩruruma,Na mĩguĩ yaku ĩkĩrathũka kũndũ na kũndũ.+
18 Mũgambo wa mũrurumo waku+ watariĩ ta wa magũrũ ma ngaari cia mbarathi;Nayo mĩhenũko ya rũheni ĩkĩmũrĩka thĩ ĩrĩa ĩikaragwo;*+Thĩ ĩkĩinaina na ĩgĩthingitha.+
19 Njĩra yaku yatuĩkanĩirie iria-inĩ,+Na gacĩra gaku gagĩtuĩkanĩria maĩ-inĩ maingĩ;No makinya maku matingĩonekire harĩa maagereire.
20 Watongoririe andũ aku o ta rũũru,+Marĩ rungu rwa* Musa na Haruni.+
Tũũhoro twa magũrũ-inĩ
^ Rora Ũthathaũri wa Ciugo.
^ Ũkk., “itekũganda.”
^ Ũkk., “roho wakwa ũkaga hinya.”
^ Ũkk., “Roho wakwa ũgathuthuria.”
^ Ũkk., “guoko gwake kwa ũrĩo.”
^ Kana “ũũthecaga.”
^ Ũkk., “ũkũũrĩte.”
^ Ũkk., “guoko gwaku.”
^ Kana “bũrũri ũrĩa ũrĩ maciaro.”
^ Ũkk., “Kũgerera guoko kwa.”
