1-2. Ịyẹ à tị́ kaa kpa anchẹ nya Ohe chị ọkẹkẹnị? (IJemsi 1:22-25)

 IJIHOVA bala Ọnyị nyamwụ tịtọ kahị ka chị ọkẹkẹnị. Ọngọ da Eje Ọnyịịla 119:2 yẹkẹẹ: “Angịlẹ kị ba ehile nyamwụ jẹ, kị juwa jwọọ ihi lọkịlẹtụ nyaa wuu, angịịwa ka pyẹ̀ẹẹ,” lee chị ọkẹkẹnị. IJisọsị myị́myị́ ya ahị ọdahile hahị nyọlẹ kọ yẹkẹẹ: “Ọng myị́ ọng ọlẹ kọ wo ẹla nya Ohe Oluhye . . . kọ juwa kpa ẹla ọọwa, họ ụkụrwọ ịnyịnyịịnyị aalẹ, ọngọọwa, ahị ọwawa [lee ọkẹkẹnị] à ka juwa ha pyịyọọ lẹlẹ!”—Luk. 11:28.

² Nyọlẹ kahị ri anchẹ nya iJihova wẹẹ, ahị ri angị kaa chị ọkẹkẹnị. Ịyẹ tị́ du? Ang lụmẹ-lụmẹ ji kị du, ma ọhẹ ọlẹ kọ la kpọnchị ri, ahị kaa wa ịBayịbụụ bala ọ-kpa ẹla ọlẹ kahị jẹ́ họ ụkụrwọ.—Wa iJemsi 1:22-25.

3. Apyobwuna oyina ahị tị́ kaa yé kori kahị kpa ẹla ọlẹ kahị wa bwu ịBayịbụụ họ ụkụrwọ?

³ Ahị kaa yé apyobwuna a-agbẹyị lụmẹ-lụmẹ kori kahị ‘kpa ẹla ọlẹ kahị wo họ ụkụrwọ.’ Ọ-chụ pwokwita, kori kahị ja kpa ẹla ọlẹ kahị jẹ́ bwu ịBayịbụụ họ ụkụrwọ, ahị kaa họ ẹla kpụ iJihova ịpyọ, ọọwa tị du kahị kaa chị ọkẹkẹnị. (Ọngọ. 12:13) Ụka kahị kpa ẹla ọlẹ kahị wa bwu ẹpwụ nya Omyi Ẹla nya Ohe họ ụkụrwọ, ahị jẹ́-ẹ la okpunyi bala alugbiyegu nyahị bala ọ jẹ́-ẹ ri igu ọlam-ọlam bala ala ọjịra-jịra. Ọhẹka ẹlẹwẹ ka la ịnyị ẹ-ẹpwụ nya ọhịhị nyang myị́ lẹ. Ahị jẹ́-ẹ chị eji ba hi akama ịlẹ kị kaa wẹ ẹga nya angịlẹ kị kaa ju ihi nya ehile nya Ohe ka. Ahị myị ju ẹla ọlẹ ká Adịrahụ iDevidi ya. Nyọlẹ kọ gu ẹnyị nya ehile, bala eje ọchịchị nya iJihova kpá ẹ-ẹpwụ nya eje ọlẹ kọ mwu, ọ chị ẹla ọọwa eju ịịlẹ: “M̀ la apyobwuna bwula ehile nyang ọkpakpa.”—Eje. 19:7-11.

4. Ịyẹ tị́ du kọ kaa chịkpẹẹ lụmẹ nyọka kpa ẹla ịlẹ kahị wa bwụ ịBayịbụụ họ ụkụrwọ ka?

⁴ Ịlẹhị lẹ ụ-ụka wuu ọ kaa chịkpẹẹ la ọ-ka wa ịBayịbụụ bala  ọ-ka kpa ẹla ọlụwa họ ụkụrwọ ka. Nanana nyori áhị hi ụbwọ lụmẹ ka, ma ahị baba pyii nyọka mwahị nya ụka ọlẹ kahị ka kpa jẹ́ ịBayịbụụ chajị kahị ka jẹ́ ang ọlẹ ká iJihova tịtọ kahị ka họ. Lẹ ahị ya ẹla u-uhye nya agbẹyị ịhyẹ ịlẹ kị ka dahị ụbwọ nyọka jẹ́-ẹ wa ịBayịbụụ ụka wuu wẹẹ. Ahị ka ya ẹla u-uhye nya abwọlẹ kahị ka jẹ́-ẹ kụ irya ju ang ịlẹ kahị wa bala abwọlẹ kahị ka kpa họ ụkụrwọ ẹ-ẹpwụ nya ọhịhị nyahị ịnyịnyị.

HU ỤKA NỌ NYỌKA WA OMYI ẸLA NYA OHE

5. Ịyẹ à tị́ kaa ye ụka nyahị gụ́ wuu?

⁵ Akụrwọ ju irwu lụme ụ-ụbwọ nya angịnyị nya iJihova alẹ du kị kaa hi ụbwọ ka. Ahị kaa bịrị ụka lụmẹ-lụmẹ ja kpahị ju ang ịlẹ ka ịBayịbụụ ya nyị baba yẹẹyẹẹ. Ọ-chụ pwokwita, iru nya angịhyẹ nyahị kaa họ ụkụrwọ nyọka jẹ́-ẹ kpahị ju ịlọhị bala ugbiyegu nyahị. (1 Tim. 5:8) Iru nya angịhyẹ tị kaa kpahị ju angịnyị nyaa ịlẹ kị jụ ẹdụrụ lee ọ-chị okwirichi lẹ. Ahị wuu tị la ụkụrwọ nyọka kpahị ju ịlọhị, ọọwa tị kaa ye ụka yẹẹyẹẹ. Datị hị akụrwọ ịwẹ wuu, ahị myị́myị́ la akụrwọ ịkịla kahị ka họ ọọjịra-jịra. Ụkụrwọ ọkpọnchị ọkịla ọlẹ kahị la ri ọ-ka ya ẹrụ ọnyịịla la ila ọchịchị. La iru nya akụrwọ ịlẹ ka ahụ la ịlọng la wẹ wuu, ányị a tị́ ka jẹ́-ẹ hu ụka nya ịBayịbụụ ọwawa nọ ha ịlọng, kụ irya ju ang ọlẹ ká wa, bala ọ-ka kpa ẹla ọlẹ ká wa họ ụkụrwọ?

6. Ányị a tị́ ka jẹ́-ẹ hu ịBayịbụụ ọwawa kụ ịlahị ẹ-ẹpwụ nya ọhịhị nyang? (Yẹ ifoto ịnyịnyị.)

⁶ ỊBayịbụụ ọwawa ri ịngịhyẹ ọlẹ kọ “chịla-chịla gụgụ wuu” ha angịnyị nya ịKịrayịsị, lẹ ọ baba kahị ka wọọ pyii. (Filip. 1:10) Ọmwụ ọdada nya eje ọnyịịla ya ẹla u-uhye nya ụma nya ọgịnyị ọlẹ kọ kaa chị ọkẹkẹnị, yẹkẹẹ: “Ọngọọwa kaa ba ehile ọlẹ ká [iJihova] da jẹ, juwa kpụ ịlọmwụ ịtịya nyamwụ ụka wuu.” (Eje. 1:1, 2) Ọla gede-gede nyori ahị ka baba nyọka hu ụka nọ nyọka kpa wa ịBayịbụụ. Ụka oyina à tị́ ka há gụ́ wuu nyọka wa ịBayịbụụ? Ụka ọlẹ kọ há ha ọngọngọọng nyahị ka datị hi awụlẹ myị́. Ma ang ọlẹ kọ baba wuu ri, chụ ụka ọlẹ kọ ka há hang nyọka jẹ́-ẹ wa ịBayịbụụ ụka wuu mẹ. Ọọnahị ọhẹ ká ẹnyị nyamwụ ri Victor yẹkẹẹ: “Ọ kaa hám nyọka wa ịBayịbụụ la ụtụrụ. Nanana nyori m ri ọngọ kaa chị ahyị  une hyaa ka, ma ụka ọwẹ ang ịlẹ kị ka yem uyawu á kaa ji gbuu ka. Irya nyam jẹ́-ẹ nọ ẹ-ẹga ookpokpo kpụ m jẹ́ kaa wo etu nya ẹla ọlẹ kam wẹẹ wa.” Ụka ọlẹ kọ chụ wẹ ka háng ahụ ịnyịnyị myị́? Tọ ịlọng wo nyori, ‘Ụka oyina kpangga à tị́ ka há ham nyọka wa ịBayịbụụ?’

KỤ IRYA JU ANG ỌLẸ KÁ WA

7-8. Ịyẹ à tị́ ka wuhi kpa la ọ-ka yé apyobwuna bwu ẹpwụ nya ang ọlẹ kahị wa? Ọ-chụ pwokwita oyina à tị́ ji.

⁷ Ẹlịlẹhị ri, ọ chịkpẹẹ kahị ka kpa ụka nyahị wa ụpwụ gbururu la ọ-ka ya ụbwọ chị ịngịngịhyẹ ka myị́. A wa ụpwụ ẹnẹhẹ ọ ka nọ chẹẹ a kpịtịya nya ang ọlẹ ka wa kaka lẹẹ? Ẹlẹwẹ họ tọhị ahị wuu ụka ọhẹ lẹ. Ọ ka jẹ́-ẹ họ tọhị ụka kahị ja wa ịBayịbụụ ịnyịnyị myị́. Ọ-chụ pwokwita, ọhẹka ahị chị nọ ha ịlọhị nyọka wa ịBayịbụụ pwụ egbeju ịmanyị tị́ ẹnụ myị́ ẹnụ. Ọọwa á tịpyọ ka. Ọ há nyọka chị ang nọ ha ịlọhị, ahị tị baba nyọka họọ pwụ ocheju ịnyịnyị. (1 Kọr. 9:26) Ma, ịBayịbụụ ọwawa tị ri ọmwụ ọdada. Nanana nyori ọ ri ọmwụ ọdada ọnyịịla, ọmwụ ọdada kem ọ tị ri wẹẹ lẹ. Ma nyọka yé apyobwuna yẹẹyẹẹ bwu ẹwpụ nya ịBayịbụụ, ahị baba nyọka họ gụ́ ọ-wọọwa ị-ịwẹ kem.

⁸ Kụ irya nya ọ-chụ pwokwita ọlẹ wẹẹ: Enyi ododo baba ha ekeji bala amẹ nyọka hịhị. Ma kori ká enyi do lụmẹ-lụmẹ ba awụlẹ ba, enyi ka kịla ọpyị kịla. Kori ká ẹnyị á dọ gụ́ ọọwa ụka ọlịnyị, ọ́ ka ju apyobwuna kaka. Chajị ọpyị kaa baba nya ụka nyọka gbile enyi ọlẹ kọ do mile, ene ká amẹ bala ekeji ka jẹ́-ẹ yé apyobwuna bwu ụwa. Ịnyịnyị, áhị ka chị agaga wa ịBayịbụụ kpoye ka. Ọọwa ri, áhị ka wa la agaga kpoye kpụ ahị ka yé ụka kụ irya ju ang ọlẹ kahị wa bala ọ-ka kpịtịya kpa họ ụkụrwọ ka lẹ ka.—Jem. 1:24.

9. Ịyẹ ahị tị́ ka họ kori ká ịBayịbụụ ọ-wa la agaga á bahi ahị?

⁹ À yẹ ká ja wa ịBayịbụụ la agaga gbururu ẹnẹhẹ lẹẹ? Ányị a tị ka họ kori kọ la ịnyị? À ka jẹ́-ẹ wa dụmwọ-dụmwọ chajị ká ka jẹ́-ẹ kpa kụ irya ju jaabwọ ka wẹẹ wa, lee o-hu ụka nọ nyọka kụ irya jwoo ụka ká wa kpá. Ọwẹ á baba ọ ka lujwo lụmẹ ka. À ka chụ nyọka ya ụka da ang ọjẹ́jẹ nyang kọ ka la gbọng gụ́ olene, chajị ká ka jẹ́-ẹ yé ụka kụ irya ju ang ọlẹ ká  jẹ́ ịnyịnyị myị́. Lee, à ka chụ nyọka wa ịgba ịmanyị-ịmanyị kem chajị ká ka yé ụka kụ irya ịnyịnyị myị́. Victor ọngọlẹ kahị ya ẹla nyamwụ lalẹ ene yẹkẹẹ: “M̀ kaa họ ká ịBayịbụụ ọwawa nyam ka la kpii, m̀ kaa wa egbeju ookpokpo kem ụka ọhẹ. Nyọlẹ ká ewu-ụtụrụ m kaa wa ịBayịbụụ wẹẹ, m̀ jẹ́-ẹ kpa ẹla ọlẹ kam wa kụ irya ju ẹ-ẹpwụ nya ahyẹẹnụ ọọwa wuu.” Abwọ myị́ abwọ ọlẹ ká chụ nyọka wa ba, maga ká wa ụ-ụgbẹyị ọlẹ ká ka yé apyobwuna yẹẹyẹẹ bwu ẹpwụ nya ịBayịbụụ ọwawa nyang.—Eje. 119:97; Yẹ akpa ọlẹ kọ ri “ Ịtọ Ịlẹ Ká ka Tọ Ịlọng.”

10. Ya ọ-chụ pwokwita ọhẹ ọlẹ kọ ya ẹla u-uhye nya abwọlẹ kahị ka jẹ́-ẹ kpa ang ịlẹ kahị jẹ́ họ ụkụrwọ wẹẹ. (1 Ala ịTẹsalonika 5:17, 18)

¹⁰ Ụka ọnyị myị́ ọnyị kọ háng nyọka kpa wa ịBayịbụụ lee abwọ myị́ abwọ ọlẹ kọ háng nyọka wa ba, maga ká kpa ẹla ọlẹ ká wa họ ụkụrwọ. Ụka ká ja wa ụpa nya ịBayịbụụ ọhẹ, tọ ịlọng wo, ‘Ányị m tị́ ka kpa ẹlẹwẹ họ ụkụrwọ ẹ-ẹpwụ nya ọhịhị nyam lẹẹlẹẹ lee ụ-ụwa ị-ịlahị?’ Ọ-chụ pwokwita, ọhẹka ịBayịbụụ ọwawa nyang kpang pwụ ụpwụ nya 1 Ala ịTẹsalonika 5:17, 18. (Wọọ.) Ụka ká wa ịgba imiiye ịwẹ kpá, à ka jẹ́-ẹ chị dayị a ka kụ irya u-uhye nya abwọlẹ ká kaa raabwọ hyaa-hyaa kaka ba bala abwọlẹ ká abwọ ọrịrị nyang kaa bwu ọkịlẹtụ kaka ba myị́. À ka jẹ́-ẹ kụ irya u-uhye nya ang ịlẹ ká ka ji Ohe obe u-uhye nyaa ịnyịnyị myị́. Ọhẹka à cheje nyọka ji iJihova obe u-uhye nya ang ịta ịkpọnchị ịhyẹ. Kori kọ dọmwụ ri iminiiti ịmanyị-manyị ká kpa kụ irya ju ang ọlẹ ká wa bwu ịBayịbụụ, ọ kaa dang ụbwọ wo etu nya ẹla ọlẹ ká wa bala ọ-ka jẹ́ jaabwọ ká ka kpa họ ụkụrwọ. Kori ká ja kpa ẹla ọlẹ ká wa bwu ịBayịbụụ họ ụkụrwọ ẹnụ myị́ ẹnụ, ọ́ ka nọ chẹẹ lẹ a ka wẹ ka ri oligu nya iJihova ọlam-ọlam lẹlẹ. Ma kori kọ lang lala o-ri ang lụmẹ-lụmẹ ji ịlẹ ka baba nyọka họ ụkụrwọ u-uhye nyaa bẹẹ?

CHỊ ANG ỌLẸ KÁ KA JỤ HỌ NỌ HA ỊLỌNG

11. Ịyẹ tị́ du ká ang ịlẹ ká baba nyọka họ ụkụrwọ u-uhye nyaa ụka ọhẹ ka lang ụmẹ myị́? Ya ọ-chụ pwokwita ọhẹ wẹẹ.

¹¹ Ụka ká wa ịBayịbụụ, ọkịlẹtụ ka kpụng enyi ụka ọhẹ myị́ chajị nya ang lụmẹ-lụmẹ ịlẹ ká yẹ nyori à baba nyọka nwụhọ. Kụ irya u-uhye nya ẹla ọlẹ wẹẹ: Ọhẹka ịBayịbụụ ọwawa nyang ọla alẹ ya ẹla u-uhye nya oye-oye ọyẹyẹ ka. (Jem. 2:1-8) À yẹ nyori à ka jẹ́-ẹ họ gụ ọọwa ẹ-ẹga nya abwọlẹ ká kaa kpahị ju angịkịla, ọọwa a dọmwụ nyọka nwụhọ dụmwọ-dụmwọ lẹlẹ. Ọwẹ há! Ijuju à wa ẹga ọlẹ kọ ya ẹla u-uhye nyọka gbe ẹlẹlẹ nyang. (Jem. 3:1-12) À kpịtịya nyori à kaa ya ẹla o-pwoku ka ụka ọhẹ. Ọọwa lẹ a cheje nyori ọwa nyị ka maga ká ẹla ọla ọnụ nya ọwa nyị ka rị ẹla o-pwoku bala ọ-kpa angịkịla wule lẹlẹ. ỊBayịbụụ ọwawa nyang ahyẹẹnụ ọkịla da ọna u-uhye nya igu oriri bala odehe. (Jem. 4:4-12) À yẹ nyori à  baba nyọka dụmwọ-dụmwọ u-uhye nya apwụ ịlẹ ká kaa wa, ifim ịlẹ ká kaa yẹ, bala eje ịlẹ ká kaa ke ụrụ la. Ị́ ka ya nyị ụtụrụ ohene wẹẹ, ọ ka lang lala o-ri ang ịlẹ ká baba nyọka họ ụkụrwọ u-uhye nyaa nyị lụmẹ lẹ.

12. Kori ká ịBayịbụụ ọwawa nyang á mẹjẹ nyori a baba nyọka nwụ ang họ ẹ-ẹpwụ nya ọhịhị nyang, ịyẹ tị́ du ká ọkịlẹtụ á ka kpụng enyi ka? (Yẹ ọdawụlẹ oleji ịnyịnyị.)

¹² Kori ká yẹ nyori à baba nyọka nwụ ang lụmẹ-lụmẹ họ ẹ-ẹpwụ nya ọhịhị nyang, ọkịlẹtụ a kpụng enyi ka. Ọ mẹjẹ nyori à la ọkịlẹtụ ọnyịịla. Ọngọlẹ kọ kpa ịlọmwụ keji à jẹ́-ẹ wa ịBayịbụụ kpụ ọ jẹ́-ẹ yẹ ang ọlẹ kọ baba nya ọ-nwụ họ ẹ-ẹpwụ nya ọhịhị nyamwụ lẹ. a Kpịtịya ịnyịnyị nyori, ọhịhị “onyeewe” o-hu dakụrụ ri ang ọlẹ kahị ka ja họ pịyọọ. (Kol. 3:10) Ịyẹ tị́ ka jẹ́-ẹ dang ụbwọ nyọka jẹ́-ẹ kịnyaa la ọ-kpa ẹla ọlẹ ká wa bwụ ịBayịbụụ họ ụkụrwọ?

13. Ụgbẹyị oyina à tị há gụ́ wuu nyọka kpa ang ịlẹ kahị wa họ ụkụrwọ? (Yẹ ifoto ịnyịnyị.)

¹³ Ọkọkọ nyọka kpa ẹla ịlẹ ká wa wuu họ ụkụrwọ ụka ookpokpo, à ka jẹ́-ẹ hu ookpokpo lee imiiye a ka họ ụkụrwọ u-uhye nyamwụ myị́. (Etu 11:2) À ka ma ụgbẹyị ọlẹ yẹ myị́: Da ang ịlẹ ká baba nyọka họ ụkụrwọ u-uhye nyaa ju ang, chụ ookpokpo lee imiiye ịlẹ ká ka họ ụkụrwọ u-uhye nyaaa lẹẹlẹẹ, ká pẹhi ihihi gbe ụka ọkịla. Ale a tị́ ka dọmwụ bwu?

14. Ẹ-ẹpwụ nya ang ịlẹ ká chị nọ ha ịlọng, oyina á tị́ ka dọmwụ bwu jene?

¹⁴ À ka dọmwụ la ang ịlẹ kị chịkpẹẹ ẹ-ẹpwụ nya ịlẹ ká chị nọ ha ịlọng myị́. Lee à ka họ ụkụrwọ u-uhye nya ẹga ọlẹ ká jẹ́ nyị baba nyọka nwụ họ gụ́ wuu jene myị́. Ụka ká jẹ́ ang ọlẹ ká wẹẹ ka họ ụkụrwọ u-uhye nyamwụ kpangga lẹ, mwahị nya ẹhị nya ẹla u-uhye nya ẹla ọọwa ka ẹpwụ nya apwụ nyahị mẹ. À ka kpa Watch Tower Publications Index lee Research Guide for Jehovah’s Witnesses họ ịnyị myị́. Raabwọ  u-uhye nya ang ịlẹ ká chị nọ ha ịlọng, bịlẹ iJihova kọ “hu imyi nya ụkụrwọ ọhọhọ họọ [dang] bala ọ-ya ọngịrị ọ-kpa họ ụkụrwọ ọọwa myị́ [hang].” (Filip. 2:13) Maga ká kpa ang ọlẹ ká wẹẹ jẹ́ họ ụkụrwọ. Ụka ká yẹ nyori ọwa nyị jẹ́ họ ụkụrwọ u-uhye nya ang nya ụgbanyẹ ọlẹ ká chị nọ há ịlọng, ọọwa ka jung ọngịrị nyọka họ ụkụrwọ u-uhye nya ịkịla. Ụka ká yẹ nyori à jẹ́ nwụ ịngịhyẹ họ ẹ-ẹpwụ nya ọngịnyị nya ịKịrayịsị oriri lee abwẹla ọkịla, ọọwa ka gung gbịla nyọka kịnyaa la ọ-nwụ họ a-agbẹyị ịkịla ịnyịnyị.

YA IWE DA KÁ OMYI ẸLA NYA OHE A “HỌ ỤKỤRWỌ Ẹ-ẸPWỤ NYA ỌHỊHỊ” NYANG

15. Ányị angịnyị nya iJihova à tị́ datị hi angịkịla ịlẹ kị kaa wa ịlaa nya angị wa ịBayịbụụ? (1 Ala ịTẹsalonika 2:13)

¹⁵ Angịhyẹ kaa wa ịlaa nya angị wa ịBayịbụụ ugbabwọ ịmanyị tị́ lẹ. Ma ị myị ju ẹla ọlẹ ká ịBayịbụụ mẹjẹ ị-ịlẹhị? Ị kaa myị ká ẹla ọọwa ka nwụ ọhịhị nyaa me? O tolujwo nyori ụka lụmẹ-lụmẹ, ọwẹwẹ nya ịtọ ẹla ịwẹ kaa ri ehe. Angịnyị nya iJihova ịwa tị datị gbang-gbang! Lala angịnyị nya ịKịrayịsị inyogo, ahị kaa ye ịBayịbụụ myị “lala ẹla nya ịlẹhị ọlẹ kọ bwu ọnụ nya Ohe Oluhye.” Ahị tị kaa họ ịngịngịhyẹ ọlẹ kahị ka ju họ myị́ nyọka kpa ẹla ọlụwa họ ụkụrwọ.—Wa 1 Ala ịTẹsalonika 2:13.

16. Ịyẹ à tị ka jẹ́-ẹ dahị ụbwọ chajị kahị ka jẹ́-ẹ ri angị kpa ẹla ọlẹ kahị jẹ́ họ ụkụrwọ?

¹⁶ Ụ-ụka wuu ọ kaa chịkpẹẹ la ọ-ka wa Omyi Ẹla nya Ohe bala ọ-kpa họ ụkụrwọ ka. Ọ-ka yé ụka wa ụka ọhẹ kaa ri ụya ọtụka. Lee ahị ka wa chị agaga kpoye du kahị ka yé ụka kụ irya jụ ang ọlẹ kahị wa ka myị́. Lee ang ịlẹ kahị baba nyọka nwụhọ wuu ka lahị ụmẹ myị́. Ọnyị myị́ ọnyị kọ ri akama nyang ẹ-ẹpwụ nya ịwẹ, à ka kụrwọọ myị́. Bwụla ụbwọ ọdada nya iJihova, à ka jẹ́-ẹ kụrụ. Ahị wuu à cheje nyọka ye ụbwọ ọdada nya iJihova myị chajị kahị ka ri angị deeri nya ang ọlẹ kahị jẹ́ ka, ma kahị ka ri angị kpa ẹla ọlẹ kahị jẹ́ họ ụkụrwọ mẹ. Ịwẹẹ ọdada á jụwa ka, jaabwọ kahị ja wa ịBayịbụụ bala ọ-kpa họ ụkụrwọ ẹ-ẹpwụ nya ọhịhị nyahị gụ́ ọọwa, ịnyịnyị ọkẹkẹnị nyahị à kaa gụ́ ọọwa lẹ.—Jem. 1:25.