1. Ɔdi nɛ ācɛ nōo lɛ ubatisim ya ɛ ma cika ō yɔ i ya a?

A LƐ ubatisim ya ɛ? Ɔdaŋ ku a le ya ɛ, eko nɛ a ya a, a mafu iyɔbu ācɛ ku a kpɔtuce Ujehofa klla dɔka ō gba ɔ ɛ̄gbā mla ɔwa ku nu. * Aku ɔkwɛyi a ba, a cika ō yɔ i ya ku ɔtu nɛ a kpoce Ujehofa a kóō yɔ i lɔfu tōōtɔ̄ɔ̄. A klla cika ō yɔ i ya ku a kpɔtuce lɔfu lɔfu ka ɔwa ku Ujehofa yɔ i yuklɔ nɛ Ujehofa dɔka kéē ya icɛ a.

2-3. Ɔwɛ nyá nɛ Ujehofa gē má ɔwɛ fu lɛ ɔwa ku nu icɛ a? Kōōcō da alɔ lɛyikwu ocabɔ ɛta nōo mafu ɛnyā a.

² Icɛ, Ujehofa gē má ɔwɛ fu lɛ ɔwa ku nu, ɔwɛ nōo gē mafu ɛdɔ ɔcɛ nɛ ó wɛ, aɔdā nɛ ó dɔka ō ya, mla aɔda nōo wɛ ɔdā okpaakpa ɛgiyi nu a. Babanya alɔ géē kɛla lɛyikwu uce ō ya ɛta ku Ujehofa, nɛ alɔ lɔfu má ipu ɔwa ku nu a.

³ Aflɛyi, “Ɔwɔicō i [gē] má eyīgoo kú ɔ̄cɛ ŋ́.” (Ācot. 10:34) Ihɔtu lɛ abɔ kwu Ujehofa ɔtu, ɛɛ nɛ ó je Ɔyinɔnyilɔ ku nu kóō “lɛ odúúdú ācɛ hɛ́tá ŋmá íne nēé bīya ā.” (1 Utím. 2:6; Ujɔ́n. 3:16) Ujehofa gē bi ācɛ ɔlɛ nu nyɔ i tɔɔna ku ɔkoolɔhi a lɛ ɛjɛɛji ācɛ nōo géē dɔka ō jahɔ. Ujehofa gē bi ɔwɛ nyā le ta ɛjɛɛji ācɛ nōo dɔka ō lɛ itene ŋma ikwū ku Ujisɔsi a abɔ kéē ya lɛ a, o ya ɛɛ kéē lɛ ohɛta. Ɔmpa, Ujehofa gē dɔka nu, ɔdaŋ ku alɔ gē ya odee ɔwɛ okpaakpa mla ipu ɛbɔ. (1 Ukɔ́r. 14:33, 40) Ó lɛ a, alɔ cika ō leyice ku ācɛ nōo gē gba ɔ ɛ̄gbā a i gáā gba ɔ ɛ̄gbā ɔwɛ igbaji ŋ, amáŋ é géē wɛ ígwu nōo lɛ ɛbɔ. Ɔmɛta, Ujehofa gē dɔka ō nwu ɛlā. (Ayis. 30:20, 21) Ɔɔma ya ɛɛ nɛ ɔwa ku nu gē ceyitikwu nɛɛnɛhi, o ya ɛɛ kéē nwu ācɛ ɔhá ɛlā ku nu nōo yɔ ipu Ubáyíbu, ipu ujɔ mla eko néē gē tɔɔna a. Ɛgɛnyá nɛ Ācɛ O Yɛce Ukraist ku eko aflɛyi a ya ɛgbla ku uce ō ya ɛta nyā ku  Ujehofa a? Ɛgɛnyá nɛ ācɛ ɔlɛ Ujehofa kē i ya ɛgbla ku nu icɛ a? Ɛgɛnyá nɛ Alelekwu Ihɔ gáā ta uwɔ abɔ, abɔ a yɔ i gba Ujehofa ɛ̄gbā mla ɔwa ku nu icɛ a?

4. Ɔdi nɛ Ujisɔsi je ɔ́da lɛ ayikpo ku nu kéē ya ipu ɔkpá ku Ācotɛ̄hɔ̄ 1:8 a, otabɔ nyā néē kē gáā miyɛ a?

⁴ Ɛpleeko ku eko aflɛyi a. Olɛhɔ nɛ Ujisɔsi tɔɔna ku nu a je eyiyoce lɛ ācɛ. (Ulúk. 4:43) Ó jé ɔ́da lɛ ayikpo ku nu kéē gɔbu yɔ i yuklɔ nɛ anu a gbɔɔ a, kéē tɔɔna ‘gā ɛga doodu ku ipu ɛcɛ a.’ (Úklɔ́ kú Ācotɛ̄hɔ̄ 1:8.) Ó teyi peee ka é gáā lɔfu yuklɔ a mla ɔfu ku abɔyi uwa gla ŋ. É géē cɛgbá otabɔ ku Alelekwu Ihɔ, nōo wɛ “otɔ́tūlé” nɛ Ujisɔsi cokonu nu lɛ uwa a.—Ujɔ́n. 14:26; Usak. 4:6.

5-6. Ɔwɛ ɛyɛɛyɛyi nyá nɛ Alelekwu Ihɔ ta ayikpo ku Ujisɔsi abɔ a?

⁵ Ayikpo ku Ujisɔsi miyɛ Alelekwu Ihɔ a, ɛ̄cī ku Upɛntikɔsi 33 ɛpleeko ku Ukraist. Boobu a, é gbɔɔ ō tɔɔna mla otabɔ ku Alelekwu Ihɔ a. Gbɔbu ɛɛ ku a jé a, ācɛ alɛwa cɛ ɛlā ku ɔkoolɔhi a. (Ācot. 2:41; 4:4) Eko nɛ ācɛ gbɔɔ ō miya ayikpo a owe a, é lɛ abɔ ci uklɔ ku ɔna ō ta a ohigbu ufi ŋ. Ikɔkɔ ɔɔma a, é gbɔɔkɔ lɛ Ɔwɔico kóō ta uwa abɔ. É gbɔɔkɔ kahinii: “Lɛ ɔfú tū alɔ iyē, alɔ ɔ̄cocɛ̄hɔ̄ kú uwɔ, ká ālɔ̄ cɛ̄ olɛhɔ̄ kú uwɔ pāālā mla ɔtōōlɛ.” Oŋma ɔɔma, é le tu mu mla Alelekwu ihɔ a klla “lɔtu lɛ gbɔɔ́ ō kɛlā Ɔwɔicō pāālā.”—Ācot. 4:18-20, 29, 31.

⁶ Ayikpo ku Ujisɔsi lɛ unwalu ɔhá duu. Ocabɔ mafu, Ɔkpiihɔ i lɛwa eko ɔɔma ŋ. É lɛ aɔkpá nōo gē jɛyi ɛlā ku Ubáyíbu teyi peee ɛgɛ nɛ alɔ lɛ babanya a ŋ. Ayikpo a kē cika ō kɛla Ɔwɔico lɛ ācɛ nōo gē ka uce ɛyɛɛyɛyi. Naana néē yɔ i má unwalu ɛyɛɛyɛyi nyā a, é lɛ ɔtu caca ya aɔdā nōo lɛbɛɛka ɔcɛ i gáā lɔfu ya gboogboo gla ŋ ma. Ipu odee bɛɛka ihayi ofu ce igwo (30) a, é lɛ ɔkoolɔhi a ‘tɔ́ɔna lɛ éwo dóódu kú ipú ɛcɛ’ ɛ.—Ukól. 1:6, 23.

7. Ɛgɛnyá nɛ ācɛ ɔlɛ Ujehofa gáā jé ɔdā nɛ Ɔwɔico dɔka ŋma ɛgiyi uwa odee nōo fiyɛ ihayi ofu ɛhɔ (100) nōo gáā yɛ a, ɔdi néē kē ya a?

⁷ Eko ku alɔ nyā. Ujehofa humayi ma ɔwɛ fu lɛ ācɛ ɔlɛ nu klla gē je ɔfu iyē lɛ uwa, kéē lɔfu ya ɔdā nɛ ó tine a ɛ. Ɔwɛ okpɔcii éyi nɛ ó gē ya ɛnyā wɛ o bu ipu Ubáyíbu nɛ Alelekwu Ihɔ tabɔ kéē ta a. Ipu Ubáyíbu, alɔ jé ɛlā lɛyikwu uklɔ ku ɔna ō ta ku Ujisɔsi mla ɔ́da nɛ ó je lɛ ayikpo ku nu kéē yɔ i yuklɔ nɛ ó gbɔɔ a gɔbu a. (Umát. 28:19, 20) Watchtower ku Ɔya Ɔmahaapa ku 1881 kahinii: “Ujehofa i fu alɔ, o ya ɛɛ ku alɔ miyɛ ocɛtra ŋma ɛgiyi alɛɛcɛ amāŋ ku alɔ kóō gáā lɛ aɔdā agbenu nɛhi ŋ. Amáŋ ó fu alɔ, ku alɔ lɔfu bi ɛjɛɛji ɔdā nɛ alɔ lɛ a le tɔɔna ku ɔkoolɔhi a.” To Whom the Work Is Entrusted, ɔkpá néē ya ipu ihayi ku 1919 a kahinii: “Uklɔ nɛ alɔ lɛ ō ya a lɛwa nɛɛnɛhi, amáŋ uklɔ ku Ondu a nɛ ó wɛ a, ó kē i je ɔfu iyē lɛ alɔ ku alɔ lɛ ɔ ya.” Bɛɛka Ācɛ O Yɛce Ukraist ku eko aflɛyi a, ayinɛ nyā lɛ ɔtu klla yuklɔ lɔfu lɔfu, ohigbu kē kpɔtuce ka Alelekwu Ihɔ a géē ta uwa abɔ kéē tɔɔna lɛ ɛdɔ ku ācɛ doodu. Alɔ abɔyi alɔ kē kpɔtuce ku Alelekwu Ihɔ géē ta alɔ abɔ lɛ a duu.

8-9. Ɔwɛ ɛyɛɛyɛyi nyá nɛ ɔwa ku Ujehofa bi le tɔɔna ku ɔkoolɔhi a ɛ ma?

⁸ Ɔwa ku Ujehofa humayi bi aɔdā nōo lɔhi fiyɛ duu a le tɔɔna ku ɔkoolɔhi a. Aɔdā nōo ba nyā lɛ ō ya mla aɔkpá ku alɔ, “Photo-Drama of Creation,” phonographs, sound cars, radio broadcasts mɛmla aɔdā ō le gwo uwaya mla aukɔmputa nɛ alɔ gē bi icɛ a. Babanya ɔwa ku Ujehofa klla yɔ i ya ɔkpá ō cɔwɔ gē ipu uce alɛwa, ɔwɛ néē kóō ya jejee ɛ ŋ ma! Ɔdiya a? O ya ɛɛ ku ɛdɔ ku ācɛ doodu kéē po ɔkoolɔhi a ipu uce ku ɔlɛ uwa. Ujehofa i gē má eyigoo ku ɔcɛ ŋ, ɔɔma ya ɛɛ nɛ ó cokonu ka é géē tɔɔna ku ɔkoolɔhi a “lɛ ācɛ kú ipú ɛcɛ, kwú ɛjɛ̄ɛ̄jī ācɛ, mɛ́mla ipɔ́ɔ́ma, mɛ́mla ucē mɛ́mla éwo” a. (Mafú 14:6, 7) Ó dɔka ku ɛjɛɛji ācɛ kéē lɔfu po ɔka lɛyikwu Ajɔɔcɛ a.

 ⁹ Ācɛ nɛ alɔ i lɔfu tɔɔna lɛ uwa ɔlɛ uwa ŋ ma bɛ? Ohigbu ka alɔ i lɔfu gā ipu ɛga néē lā ohigbu acogbaajɛ ku uwa amāŋ ka ɔwɛ ɔlɛ uwa le gwu. O ya ɛɛ ku alɔ lɔfu tɔɔna lɛ alɛwa ku ācɛ nōo ba nyā a, Ujehofa ta ɔwa ku nu abɔ kéē gbɔɔ ō bi ɔwɛ alɛwa le yuklɔ ku ɔna ō ta ɛga nɛ ɛwa gē ba a. Ocabɔ mafu, ipu ihayi ku 2001, Ígwu Nōo Gē Leyi Kwu Ɔwa Ku Alɔ a gáā cɛ, ku ayinɛ alɔ nōo yɔ Ufrance a kéē bēē bi ukarti le tɔɔna, mla ɔwɛ ɛyɛɛyɛyi ō bi le kpo ɔkpá ku alɔ bɛɛcɛ. Igbihaajɛ, ayinɛ alɔ nōo yɔ ɛga ɔhá a gbɔɔ ō bi ɔwɛ nyā le tɔɔna duu. Ɔdā nōo bɛɛcɛ ŋma ōmiya ɔɔma lɔhi i bi o. Ipu ihayi ku 2011, é gbɔɔ omiya ɛpɛpɛ éyi ipu United State, aya ku ɛga nɛ ɛwa gē ba nɛɛnɛhi ipu New York. Ɛpleeko ku ihayi aflɛyi a, ɔkpá ku alɔ néē kɔ lɛ ācɛ a wɛ u 102,129, umagajin a kē wɛ u 68,911. Ācɛ ula igwoleyi ce ofu ɛta ce éyi (4,701) kē le ka kē dɔka kéē gáā klɔcɛ ku Ubáyíbu mɛmla uwa! Ó teyi peee, ku Ujehofa yɔ i ta alɔ abɔ ipu uklɔ a mla otabɔ ku Alelekwu Ihɔ ku nu. Ohigbu ɛnyā a, Ígwu Nōo Gē Leyi Kwu Ɔwa Ku Alɔ a gáā cɛ, ku ɛjɛɛji ayinɛ alɔ nōo yɔ ipu oduudu ɛcɛ a, kéē lɔfu bi ukarti mla ɔwɛ ɛyɛɛyɛyi ɔhá le kpo aɔkpá ku alɔ bɛɛcɛ duu.

10. Ɔdi nɛ alɔ lɔfu ya, o ya ɛɛ ku alɔ ya lɔhi fiyɛ ipu uklɔ ku ɔna ō ta mla ō lɛ ācɛ piya ayikpo ku Ukraist a?

¹⁰ Ɔdā nɛ a lɔfu ya. Ujehofa gē nwu alɔ ɛgɛ nɛ alɔ géē jé ō tɔɔna a ipu ōjila ku ujɔ. Bēē nyɔ i tɔɔna ojigogo mla ígwu ku uklɔ ku ɔna ō ta ku uwɔ. Ayinɛ nōo yɔ ipu ígwu ku uwɔ a lɔfu ta uwɔ abɔ ku a ya lɔhi fiyɛ ipu ɔna ō ta mla ō lɛ ācɛ piya ayikpo ku Ukraist. Ocabɔ olɔhi ku uwa lɔfu ta uwɔ ɔtu kwu ɔtu duu. Ɛ̄jɛ̄ kóō hii jɛ uwɔ ō yɔ i tɔɔna, ɔdaŋ nɛ a kóō yɔ i má unwalu ŋ. Ɛgɛ nɛ ɛga ku Ubáyíbu nōo yɔ i gbo ikpɛyi ɛlā nyā kē ta alɔ ɛlá kwu ɔ a, alɔ gē lɔfu ya aɔdā nɛ Ɔwɔico tine a, ó wɛ ohigbu ku alɔ lɔfu iyē ŋ, amáŋ ohigbu ku alɔ gē miyɛ ɔfu ŋma ɛgiyi Alelekwu Ihɔ a nɛ. (Usak. 4:6) Da ma uklɔ ku Ɔwɔico nɛ alɔ kē yɔ i ya a.

11. Ɛgɛnyá nɛ ígwu nōo gē leyi kwu ayinɛ ɛpleeko ku eko aflɛyi a ya ku ācɛ ɔlɛ Ɔwɔico eko ɔɔma kéē piyatɔha a?

¹¹ Ɛpleeko ku eko aflɛyi a. Ígwu nōo gē leyi kwu ayinɛ ɛpleeko ku eko aflɛyi a yuklɔ tɔha, ku ɛbɔ kóō yɔ ɔtahɛ ku ācɛ ɔlɛ Ɔwɔico, ku igbaji kóō kē hii yɔ ŋ duu. (Ācot. 2:42) Ocabɔ  mafu, ipu ihayi ku 49 ɛpleeko ku Ukraist, Ācɛ O Yɛce Ukraist alɛwa eko ɔɔma i lɛ ocɛtɔha lɛyikwu ɛlā ku api ō hɛ gbɔbu ɛɛ ku ɔcɛ kóō lɔfu gba Ujehofa ɛ̄gbā ŋ. Ígwu nōo gē leyi kwu uwa eko ɔɔma a gáā leyi yɛ ɛlā a mla otabɔ ku Alelekwu Ihɔ a. Ɔdaŋ ka é géē yɛ i lɛ ocɛtɔha lɛyikwu unwalu ɔɔma ŋ nɛɛ, é géē yɛ i lɔfu yuklɔ ku ɔna ō ta a lɔɔlɔhi ŋ. Naana nɛ acocɛhɔ mla anyakwɔcɛ a wɛ ācɛ Ujiyu a, é cɛ lɛ uculo ku uwa amāŋ ku ācɛ nōo gē nwu ɛlā a lɔfu lɔfu a, kóō lɛ abɔ kwu ɔdā néē gáā miya igbihaajɛ a ŋ. Ikɔkɔ ɔɔma a, é leyi jila ɛlā ku Ɔwɔico ma, klla gbɔɔkɔ lɛ Ɔwɔico kóō je Alelekwu Ihɔ ku nu lɛ uwa, kóō ta uwa abɔ miya ɔdā ō kpaakpa ō ya. (Ācot. 15:1, 2, 5-20, 28) Ɔdi gáā ya igbihaajɛ a? Ujehofa hɔha ce ōmiya ku uwa, ɛbɔ mla opiyatɔha gáā yɔ ipu ujɔ a, é klla gɔbu yɔ i tɔɔna ku ɔkoolɔhi a.—Ācot. 15:30, 31; 16:4, 5.

12. Ɔdi mafu ka ɛbɔ yɔ ipu ɔwa ku Ujehofa icɛ, ku alɔ i klla gē ya odee ɔwɛ ku igbaji ŋ ma?

¹² Eko ku alɔ nyā. Ɔwa ku Ujehofa humayi ta ācɛ ɔlɛ Ujehofa abɔ ɛ, o ya ɛɛ kéē yɔ ɛbɔ, ku ɛjɛɛji odee kóō yɔ i yɛ ɔwɛ okpaakpa. Ɛpleeko ku ihayi ku 1895 a, Zion’s Watch Tower mla Herald of Christ’s Presence aku Ɔya ɔmigwoleyi ku ɛ̄cī 15 a, lɛ ikpɛyi ɛlā éyi anu nōo kahinii: “Decently and in Order.” É je ikpɛyi ɛlā ɔɔma ŋma ɔkpá ku 1 Ācɛ Ukɔ́rīnti 14:40. Ikpɛyi ɛlā ɔɔma kahinii: “Acocɛhɔ a ta ɔdā alɛwa gē lɛ Ācɛ O Yɛce Ukraist ku eko aflɛyi a lɛyikwu ō yɔ i ya ku igbaji kóō hii yɔ ŋ . . . Ó cɛgbá nɛɛnɛhi ku alɔ kóō yɔ i lɛyitaajɛ lɛ ‘ɛjɛ̄ɛ̄jī ɔdā dóódu nēé tá tū ipú ɔkpá kú ɛlɔ̄ɔwɔicō nōo wɛ ɔdā ō bī nwū alɔ ɛlā a.’ ” (Uróm 15:4) Icɛ, ɔwa ku Ujehofa gē yuklɔ nɛɛnɛhi, o ya ɛɛ ku ɛbɔ kóō yɔ ipu ujɔ, ɛgɛ nōó lɛ ɛpleeko ku eko aflɛyi a, ku ɛjɛɛji odee kóō klla gē yɛ ɔwɛ okpaakpa. Ocabɔ mafu: Ɔdaŋ ku a nyɔ ipu ujɔ duuma néē yɔ i ya oklɔcɛ ku Ɔda Ō Gbaajɛ, ó kóō lɔfu wɛ ujɔ nōo yɔ ipu éwo ku uwɔ amāŋ éwo ɔhá, a géē jé ɛgɛ néē géē ya oklɔcɛ a, mla ikpɛyi ɛlā néē gáā klɔcɛ a. A géē lɛ ɛbɔ ku ɔtu boobu! Ɔdaŋ ka ó wɛ Alelekwu Ihɔ ku Ɔwɔico ŋ, a gbɛla ku alɔ géē lɛ ɛdɔ ɛbɔ nyā gla a?—Usɛf. 3:9, NW.

13. Ɛdɔ ɔka nyá nɛ ɔkpá ku Ujɛ́mīsi 3:17 gáā ya ku alɔ da iyi alɔ a?

¹³ Ɔdā nɛ a lɔfu ya. Ujehofa dɔka ku ācɛ ɔlɛ nu kéē ‘yɔ̄ gē pīyatɔ̄há mla iyī uwa kpɔ́ ɛ́gɛ́nɛ̄ alelékwū kú Ɔwɔicō yá ɔ̄ tɔ́ɔtɛ́ lɛ uwa oŋmá lɛ ɛbɔ́ nōó je lɛ uwa ā.’ (Āfi. 4:1-3) Ó lɛ a da iyi  uwɔ ɔka nyā: ‘N gē ya ku opiyatɔha mla ɛbɔ kóō yɔ ipu ujɔ? N gē lɛyitaajɛ lɛ ācɛ nōo gē leyi kwu alɔ? Ācɛ ɔhá lɔfu lɔtuce um gla, ofiyɛ duu ɔdaŋ ku um lɛ íkwu ipu ujɔ? N gē ya odee teeko, gē je otabɔ klla le tutu ō ce ācɛ ɔhá ɛhɔ?’ (Jé Ujɛ́mīsi 3:17.) Gbɔɔkɔ lɛ Ujehofa lɛyikwu Alelekwu Ihɔ ku nu, ɔdaŋ ku a má ka ó lɛ ɛga duuma nɛ a cika ō ya lɔhi fiyɛ. Ɔdaŋ ku a gē cɛ lɛ Alelekwu Ihɔ a kóō yɔ i gbo ɔwɛ nɛ a gē ya uce a, ayinɛ uwɔ ipu ujɔ géē yihɔtu uwɔ fiyɛ, a klla géē jɛ uwa eyī nɛhi.

14. Oŋma ɛlā nōo yɔ ipu Ācɛ Ukólōsi 1:9, 10 a, ɛgɛnyá nɛ Ujehofa bi le nwu ācɛ ɔlɛ nu ɛlā ɛpleeko ku eko aflɛyi a?

¹⁴ Ɛpleeko ku eko aflɛyi a. Ujehofa gē dɔka ō nwu ācɛ ɛlā nɛhi. (Aíjē 32:8) Ó dɔka kéē jé ɔ, yihɔtu nu, klla lā oyeeyi opiyoo, abɔ é wɛ ayipɛ ɔlɛ nu nōo he ɔ ɔtu a. Ɔdaŋ ka ó wɛ ohigbu ɛlā nɛ Ujehofa gē nwu alɔ a ŋ nɛɛ, ɛjɛɛji aɔdā nyā i géē yɛ i tɔɔtɛ ŋ. (Ujɔ́n. 17:3) Ujehofa bi ujɔ ku eko aflɛyi a, le nwu ācɛ ɔlɛ nu ɛlā. (Jé Ācɛ Ukólōsi 1:9, 10.) Alelekwu Ihɔ nōo wɛ “otɔ́tūlé” nɛ Ujisɔsi cokonu nu a, ta ayikpo a abɔ duu. (Ujɔ́n. 14:16) Alelekwu Ihɔ a ta ayikpo a abɔ kéē jɛyi ɛlā nōo yɔ ipu Ɛlā Ɔwɔico, klla blakwu ɛjɛɛji ɛlā nɛ Ujisɔsi ka klla ya a, néē lɔfu jé lɛyikwu ɔ ipu aɔkpá ku ɔkoolɔhi a. Ɔdā ō jé nyā ya ku ɔtu okpoce ku ayinɛ nōo yɔ ujɔ ku eko aflɛyi a kóō lɔfu tōōtɔ̄ɔ̄. Ó klla ya kéē yihɔtu ku Ɔwɔico, Ɔyi nu mla iyi uwa fiyɛ.

15. Ɔwɛ ɛyɛɛyɛyi nyá nɛ a má Ujehofa ya okonu ō ce ku nu nōo yɔ ipu Ayisáya 2:2, 3 jila a?

¹⁵ Eko ku alɔ nyā. Ujehofa ka akacɛ ka “eko géē wā ɛ̄cɔ̄bū,” nɛ ācɛ ŋma éwo ɛyɛɛyɛyi géē wa “ɛfu” ku nu. Ɔɔma kē le ka é géē wa i wɛ ipu ācɛ nōo gē gba ɔ ɛ̄gbā ɔwɛ ɔkwɛyi, o ya ɛɛ kóō nwu uwa lɛyikwu ɔwɛ ku nu. (Jé Ayisáya 2:2, 3.) Alɔ yɔ i má akacɛ ɔɔma yɔ i ya jila icɛ. Alɔ yɔ i má ku ɛ̄gbā ō gba ku ɔkwɛyi lɔhi nɛɛnɛhi fiyɛ ɔwɛ ō gba ɛ̄gbā ɛkɛmgbɛ duuma a. Ujehofa yɔ i nwu ācɛ ɔlɛ nu ɔdā alɛwa ŋma ipu Ubáyíbu! (Ayis. 25:6) Ujehofa yɔ i bi “ɔ̄cocɛ̄hɔ̄ nēe cika ō lɛ ɔtū ce  ɔ́, nōo jéeyī” a le nwu alɔ ɛjɛɛji aɛlā nyā, ɔwɛ ɛyɛɛyɛyi. Ocabɔ mafu, alɔ lɔfu jé aɔkpá ɛyɛɛyɛyi, jahɔ tu aɛlā ō ka tɛɛcɛ klla má auvidio ku aikpindolo. (Umát. 24:45) Ɔtu gē ya alɔ ɛgɛ nɛ ó ya Ɛlihu nōo wɛ oklobiya ku Ujobu a, eko nɛ ó kahinii: “[Ɔwɔico] jé ō nwū ɔ̄cɛ odée fíyɛ́ odúúdú ācɛ nēe ī nwū ɔ̄cɛ odée ā?”—Ujób. 36:22.

16. Ɔdi nɛ a cika ō ya ku a lɛ itene ŋma ɛlā nɛ Ujehofa yɔ i nwu alɔ a?

¹⁶ Ɔdā nɛ a lɔfu ya. Alelekwu Ihɔ ku Ɔwɔico géē ta uwɔ abɔ ku a bi ɛlā nɛ a yɔ i jé ŋma Ubáyíbu a le yuklɔ ipu oyeeyi ku uwɔ. Gbɔɔkɔ bɛɛka ɔcɛ éyi nōo gwiije ku aɛ̄gbā nōo kahinii: “Ujehofa, Kōōcō, lɛ ɔdā nɛ a tine ku um ya a nwu um. N géē yɛce ɔwɛ okpaakpa ku uwɔ. Nwu um ku um lɛ ɔtu ku um ya ekponu ō yuufi iye ku uwɔ.” (Aíjē 86:11) Lɛ eko taajɛ ku a bēē jé klla klɔcɛ ku Ubáyíbu mla aɔkpá mla aɔdā ɔhá nɛ ɔwa ku alɔ gē ya a. Ó lɛ aafu ŋ, a gáā yɔ i ya ɛnyā ku a nwu ɛlā foofunu ŋ. Amáŋ o ya ɛɛ ku a wɛ i cɛ lɔfu lɔfu ku ɛlā nɛ a yɔ i nwu a wɛ ɔkwɛyi, ku a klla bi ɔ le yuklɔ ipu oyeeyi ku uwɔ. Alelekwu Ihɔ ku Ujehofa lɔfu ta uwɔ abɔ ku a ya ɛnyā. A klla cika ō bēē ta ayinɛ uwɔ ɔtu kwu ɔtu duu. (Uhíb. 10:24, 25) Ohigbu ɔdi? Ohigbu ka uwa wɛ apɔlɛ ku uwɔ. Gbɔɔkɔ lɛ Ɔwɔico kóō je Alelekwu Ihɔ ku nu gā uwɔ ku a ta ohi ŋma ɔtu ipu ōjila ku ujɔ, ku a klla ceyitkwu ya ɔfu ku uwɔ eko duuma nɛ a lɛ uklɔ ō ya ɛyi ede a. Ɔdaŋ ku a gē ya aɔdā nyā, a géē yɔ i mafu lɛ Ujehofa mla Ɔyi nu ku a yihɔtu ɛnɛɛnɛ “aálá” ku uwa.—Ujɔ́n. 21:15-17.

17. Ɔwɛ nyá nɛ a gáā mafu ku a yɔ i yuklɔ tɔha mla ɔwa ku Ujehofa mla ɛjɛɛji ɔtu ku uwɔ a?

¹⁷ Eko éyi géē wa, eko ɔɔma i kē gboji ō wa gɛ nóó, nɛ ɔwa nōo gáā yɔ ipu ɛcɛ nyā foofunu a, géē wɛ ɛ̄nɛ̄ Ɔwɔico gē bi Alelekwu Ihɔ ku nu yɔ i ma ɔwɛ fu lɛ uwa. Ó lɛ a, bi ɔtu caca le yuklɔ tɔha mla ɔwa ku Ujehofa. Bēē mafu bɛɛka Ɔwɔico a ku a yihɔtu ɛjɛɛji ācɛ, ŋma lɛ ō tɔɔna ku ɔkoolɔhi a lɛ ɛjɛɛji ācɛ nɛ a má a. Gbla Ujehofa ya ɛgɛ nɛ ó dɔka ku ɛbɔ kóō yɔ, ku igbaji kóō kē hii yɔ ŋ ma, ŋma lɛ ō ya ku opiyatɔha kóō yɔ ipu ujɔ a. A kē hii mlanyi ō yɔ i jahɔ tu Ɔcɛ Ō Jé Ō Nwu Odee Fiyɛ Oduudu Ācɛ Ō Nwu Odee a ŋ, ŋma lɛ ō nwu odee ŋma ɛjɛɛji ɛlā nɛ ó gē nwu a. Ɔdaŋ ku a gē ya lɛ a, eko duuma nɛ ɛcɛ ku Ebilii nyā wa oŋmɛyi, a gáā yuufi ŋ. Ikɔkɔ ɔɔma a, a géē lɛ ɔtu klla hayi pi ācɛ nōo gē gba Ujehofa ɛ̄gbā kpaakpa ipu ɔwa ku nu.