Pou Temwen Jewova yo rive fè kantite bib po di ak po dore moun yo bezwen, yo enstale yon nouvo ekipman pou relye liv nan enprimri yo genyen nan Ebina, o Japon.

Okòmansman, yo te yon ti jan pè akoz tranblemanntè ak sounami ki te fèt nan peyi Japon jou 11 mas 2011 lan, sa ki te konn lakòz anpil blakawout.

Malgre sa, yo te kòmanse ak pwojè a nan mwa septanm 2011. Mwens pase twa mwa annapre, nouvo machin pou relye a te fè premye bib Tradiksyon monn nouvo a nan lang chinwa.

Machin pou relye sa a se yon machin otomatik ki mezire anviwon 400 mèt longè. Pandan fèy enprime yo ap pase nan machin nan, li relye yo, li kouvri yo, li peze yo, li ranje yo, li mete yo nan bwat, li fèmen bwat yo, epi l mete yo sou palèt.

Sa te mande bonjan planifikasyon ak kolaborasyon pou pwojè a te reyisi. Pa egzanp, yo te dwe byen fèmen aparèy pou relye a, mete l nan bwat, chaje l sou 34 konntenè, epi fè l soti ann Ewòp pou rive o Japon.

Gen dis moun ki travay nan biwo filyal Temwen Jewova yo nan peyi Etazini ki t al Japon pou soutni pwojè a. Kèk nan yo te pase sis mwa nan peyi sa a pou anseye frè nan peyi Japon yo fason pou yo sèvi ak ekipman an e pou fè mentnans ladan l.

Nouvo machin pou relye a te atire atansyon plizyè endistri nan peyi Japon, tankou endistri ki relye liv, enprimri ak endistri ki fè edisyon. Jou 19 mas 2012 la, plis pase san moun nan endistri sa yo te vizite lokal Temwen Jewova yo. Sa yo te wè te fè yo sezi.

Anvan yo t ale, yo te bay yo chak youn nan bib Tradiksyon monn nouvo a ki soti nan nouvo machin nan.

Filyal Japon an vin met ansanm ak filyal nou yo ki nan peyi Etazini ak Brezil pou yo fè bib po di pou Temwen Jewova yo toupatou nan monn nan.

Temwen yo ansanm ak moun nan lòt konpayi ki te bay èd yo nan pwojè a te kontan travay ansanm. Men sa youn nan travayè sa yo ki pa Temwen te di: “Nou tankou fanmi m.”

Nan dènye jou pwojè a, men sa yon lòt travayè ki pa Temwen te di: “Pwochen travay m ap gen pou m fè a ap pi rèd, paske l pap enteresan tankou travay mwen fè nan Watchtower a!”