Nan mwa septanm 2012, Temwen Jewova yo fèmen plis pase 20 biwo filyal e yo mete yo anba sipèvizyon filyal ki pi gwo.

Mete sou sa, yo ouvri yon filyal nan peyi Sèbi ak youn nan peyi Masedwàn. Gen de gwo rezon ki fè yo fè chanjman sa yo.

Pandan dènye ane sa yo, amelyorasyon ki fèt nan domèn kominikasyon ak nan enprimri pèmèt yo redui kantite moun ki travay nan kèk filyal. Piske vin gen mwens moun k ap travay nan pi gwo filyal yo, sa fè vin gen chanm ki disponib pou loje kèk moun ki t ap travay nan filyal ki pi piti nan lòt peyi.

Kounye a, vin gen plis Temwen ki gen eksperyans k ap soutni travay predikasyon an nan gwo filyal yo. Pa egzanp, se filyal Meksik k ap sipèvize travay predikasyon an nan peyi Kostarika, Salvadò, Gwatemala, Ondiras, Nikaragwa ak Panama. Se sa k fè, yo fèmen biwo filyal toule sis peyi sa yo.

Yo voye karant nan Temwen ki soti nan sis filyal sa yo al sèvi nan filyal Meksik la. Gen anviwon 95 lòt ki rete nan peyi yo e yo te kòmanse preche aplentan.

Gen lòt ki nan peyi ki nan Amerik santral yo ki te kòmanse travay nan biwo tradiksyon ki anba sipèvizyon filyal Meksik. Pa egzanp, gen anviwon 20 Temwen nan peyi Panama k ap tradui piblikasyon nou yo nan lang se kèk ti gwoup moun nan peyi a ki pale yo. Nan ansyen biwo filyal ki te nan peyi Gwatemala a, kounye a, gen 16 lòt Temwen k ap tradui piblikasyon yo nan kat lang moun yo pale nan peyi a. Konsa, ann Amerik santral, akoz rediksyon an, gen anviwon 75 moun nan biwo filyal la olye de 300.

Piske yo fè plizyè filyal fè yon sèl, pwoklamatè ki gen eksperyans ki t ap sèvi nan filyal ki piti yo vin kapab konsantre yo sou preche bon nouvèl la.

Men sa yon Temwen ki ann Afrik yo te voye al soutni travay predikasyon an te ekri: “Pandan premye mwa yo, sa pa t fasil pou m te chanje fason m t ap viv pou m te ka adapte m ak nouvo sitiyasyon yo. Men, piske m t ap preche chak jou, sa te fè m gen lajwa e m te jwenn yon seri benediksyon m pa t ap janm ka imajine. Kounye a, m ap etidye Labib ak 20 moun, e kèk nan yo ap asiste reyinyon yo kounye a.”