Nan mwa novanm 2012, Temwen Jewova yo te vann Otèl Bossert. Yo te bay nouvo pwopriyetè a kle yo, e menm jan ak plizyè lòt moun ki te nan otèl la, Temwen yo te kite otèl la pou y al yon lòt kote. Yo pral itilize kòb yo te vann otèl la pou yo soutni travay predikasyon Temwen Jewova yo.

Temwen yo te vann bilding 14 etaj ki te fèt nan stil kay epòk renesans lan paske moun yo nan syèj mondyal la pral kite Bwouklin, Nouyòk, pou y al nan nouvo bilding ki nan Wòwik, nan Nouyòk. Yo panse sa ka pran plizyè ane anvan yo demenaje.

Louis Bossert te yon komèsan ki te konn vann bwa e se li ki te fè konstwi Otèl Bossert nan ane 1909. Li te vle fè yon “otèl ki gen plizyè apatman”, ki t ap gen moun ki pase dòmi ladan l ak moun ki tou rete nan otèl la. Piske otèl la te plen rapid, li te ajoute yon lòt pati sou li an 1914, sa ki te fè otèl la vin de fwa pi gwo. An 1916, li te vin met yon restoran sou tèt otèl la ki te rele Marine Roof.

Nan ane 1980 yo, Temwen Jewova yo te achte bilding nan, yo te renove l e se ladan l tout moun ki t ap travay nan syèj mondyal yo a te rete. Travayè yo te fè sal dans yo vin tounen salamanje e restoran ki te sou tèt otèl la te vin tounen chanm pou resevwa moun k ap rete nan bilding nan ak moun yo envite yo.

Depi 2010, bilding nan resevwa Temwen Jewova ki soti toupatou sou tè a ki vin vizite syèj mondyal la.

Nouvo pwopriyetè a panse renove bilding nan pou fè l tounen yon otèl. Piske bilding nan an bon eta, li pap difisil pou yo renove Bossert, ki te gen yon seri chanm tou senp ak yon kabann ladan yo pou fè l vin yon otèl deliks.

Anvan Temwen Jewova yo t al abite nan bilding Bossert la, li te pase plizyè ane san pèsonn pa pran swen l. Koulè blan anndan l lan te sal, e gwo mas ankadreman ann ajil ki te anlè tèt bilding nan te kraze e l te pèdi fòm. Fenèt yo te ansyen e yo te pèdi fòm. Te gen anpil pijon ki te pran Marine Roof la pou kay yo. Se sa k fè, yo te kòmanse yon gwo pwojè renovasyon. Temwen Jewova nan tout peyi Etazini te bay tan yo ak kapasite yo nan pwojè sa a ki te fini nan ane 1991.

Pandan renovasyon an, Temwen yo te netwaye fasad bilding nan ki te fèt ak wòch ak granit e yo te repare yo. Yo te ranplase ankadreman ki te fèt ann ajil la ak yon ankadreman menm jan an ki fèt ak fabèglas, yon materyèl ki pi lejè. Yo te mete nouvo fenèt mawogani nan bilding nan.

Epitou, yo te renove anndan bilding nan nèt, yo te vin plis konsantre sou saldatant lan. Pou yo te ka repare mi ki fèt an mab yo, yo te voye chèche wòch orijinal yo nan min wòch ann Itali. Epi, piske dlo te fin kraze plafon ki te fèt an plak la, travayè yo te refè dekorasyon ki te ladan l lan.

Gwo poto an fè ki te nan saldatant lan te bay travayè yo gwo pwoblèm. Poto yo te fèt selon yon metòd yo rele eskalyola, yon teknik italyen yo konn itilize kote yo mete yon pat sou poto yo ki fè l sanble ak mab. Sepandan, akoz pakèt ansyen pwopriyetè ki te genyen yo, yo te pentire yo plizyè fwa. Pa gen youn nan volontè yo ki te konn itilize teknik eskalyola a. Gen yon bibliyotèk toupre a ki te bay yon liv ki esplike etap yon moun dwe suiv pou l kreye aparans mab atifisyèl sa a. Grasa liv sa a, travayè yo te fè plizyè semèn ap repare finisyon poto yo pou fè yo vin sanble ak jan yo te ye anvan an.

Lè renovasyon an te fini an 1991, bilding nan te bèl e moun te ka viv ladan l. Pou bèl efò sa yo, Lucy G. Moses te bay Bossert pot premye pri pou gwo travay restorasyon ki te fèt la.