Se nan Lakou fi yo kès pou yo met ofrann yo te ye. Men sa nou li nan yon liv: “Toutotou [Lakou fi yo] te gen yon senp kolonad, e ant de kolòn, bò mi an, yo te met yon kès oubyen ‘twonpèt’. Te gen trèz kès antou. Se ladan yo yo te konn met kontribisyon yo.” — The Temple—Its Ministry and Services.

Yo te rele kès yo twonpèt paske pati ki anlè a te piti e pati anba a te laj. Chak kès te gen yon etikèt sou li ki make ki kalite ofrann pou yo met ladan l. Yo te itilize kòb yo te jwenn ladan yo pou sa yo te prevwa a. Se nan Lakou fi yo Jezi te chita lè l t ap gade moun ki t ap met ofrann nan kès la, pami yo te gen yon vèv malerèz. — Lik 21:1, 2.

Te gen de kès yo te rezève pou yo met kontribisyon pou taks yo te dwe peye pou tanp lan. Yo te sèvi ak youn pou yo mete ofrann pou ane ki pase a e yon lòt pou yo mete ofrann pou ane yo ladan l lan. Yo te rezève kès 3 rive nan kès 7 pou yo met kontribisyon yo te prevwa pou yo achte toutrèl, pijon, bwa, lansan ansanm ak veso annò yo. Si yon moun te kite yon kantite kòb pou yon ofrann epi kòb la te plis pase montan yo te prevwa pou ofrann sa a, li te met kòb ki anplis la nan youn nan kès ki rete yo. Se nan kès 8 la yo te met kòb ki rete nan ofrann pou peche. Soti nan kès 9 rive nan kès 12, se kote yo te konn met kòb ki rete nan ofrann pou moun ki koupab, ofrann pou sakrifis zwazo, pou nazireyen ak pou moun ki te gen lèp. Se nan kès 13 la yo te met ofrann volontè.

Se Lik ki te ekri Evanjil ki pote non l lan ak liv Travay apot yo. Lik di li “te chèche konnen tout bagay avèk presizyon depi nan kòmansman”. Men, gen kèk biblis ki gen dout sou evènman li rapòte yo (Lik 1:3). Jis nan ki pwen sa Lik te ekri yo te egzak?

Lik te site kèk verite listwa rapòte, bagay moun ka verifye. Pa egzanp, li te itilize yon kantite tit kèk fonksyonè women te genyen, tit kèk moun pa t konnen, tankou pretè oubyen majistra sivil nan Filip; politak oubyen chèf vil nan Tesalonik; e li te pale de azyak oubyen lidè nan Efèz (Travay 16:20, Kingdom Interlinear; 17:6; 19:31). Lik te rele Ewòd Antipas tetrak oubyen chèf distri, li te rele Sèjiyis Polis administratè Chip. — Travay 13:1, 7.

Lik te byen itilize tit sa yo paske lè yo te chanje yon tèritwa women kategori yo te chanje tit administratè l la tou. Men sa yon biblis ki rele Bruce Metzger di: “Referans sa yo ki nan liv Travay apot yo toujou tonbe daplon ni pou zòn yo site l la ni pou moman yo site l la.” William Ramsay, yon lòt biblis, rele Lik “yon istoryen ki nan pi wo nivo a”.