Ki sa Bondye vle nou fè? Èske l mande pou nou suiv yon bann règ? W ap kontan aprann repons lan se non. Dapre Jezi Kris, Pitit Bondye a, sa Bondye vle nou fè chita sou yon sèl mo. — Li Mak 12:28-31.

Toudabò, ann egzamine nan ki kontèks Jezi te di pawòl sa yo. Nan jou 11 Nizan an, kèk jou anvan li te mouri, li t ap anseye nan tanp lan. Lènmi l yo te poze l kèk kesyon ki konn mennen nan diskisyon pou yo eseye pyeje l. Men, ak chak fwa, repons Jezi bay fè yo fèmen bouch yo. Konsa, yo poze Jezi kesyon sa a: “Ki kòmandman ki premye nan tout kòmandman yo?” — Vèsè 28.

Kesyon sa a pa t fasil. Gen kèk Juif ki te konn fè deba sou lwa ki te premye oubyen ki te pi enpòtan nan plis pase 600 lwa ki nan Lwa Moyiz la. Gen lòt menm ki te panse tout lwa yo enpòtan e li pa bon pou moun panse youn pi enpòtan pase yon lòt. Kòman Jezi t ap reponn kesyon an?

Kòm repons, Jezi pa t site yon kòmandman, men li te site de kòmandman. Men premye a: “Ou dwe renmen Jewova, Bondye w la, ak tout kè w, ak tout nanm ou, ak tout lespri w e ak tout fòs ou.” (Vèsè 30; Detewonòm 6:5). Ekspresyon tankou “kè”, “lespri”, “nanm”, ak “fòs” pa vle di youn diferan parapò ak lòt *. Men sa l vle di: Lanmou pou Jewova mande pou yon moun renmen Jewova ak tout li menm, tout kapasite l e ak tout sa l genyen. Yon referans biblik esplike l konsa: “Moun dwe renmen Bondye ak tout yo menm e yo dwe renmen l nèt.” Donk, si w renmen Bondye, chak jou nan lavi w w ap fè tout sa w kapab pou w fè l kontan. — 1 Jan 5:3.

Men dezyèm kòmandman an: “Ou dwe renmen pwochen w menm jan ou renmen tèt ou.” (Vèsè 31; Levitik 19:18). Lanmou pou Bondye ak lanmou pou pwochen nou makònen ansanm. Dezyèm kòmandman an se rezilta premye kòmandman an (1 Jan 4:20, 21). Si nou renmen pwochen nou jan nou renmen tèt nou, n ap aji anvè yo jan nou ta renmen pou yo aji anvè n (Matye 7:12). Konsa, n ap demontre n renmen Bondye, li menm ki te fè ni nou menm ni pwochen nou pòtre ak li. — Jenèz 1:26.

Jis nan ki pwen li enpòtan pou n renmen Bondye ak pwochen nou? Men repons Jezi bay: “Pa gen okenn kòmandman ki pi enpòtan pase sa yo.” (Vèsè 31). Selon sa Evanjil Matye a rapòte, Jezi te di tout lòt kòmandman yo chita sou de kòmandman sa yo. — Matye 22:40.

Bondye pa mande pou n suiv yon bann règ pou n fè l plezi. Tout sa Bondye vle n fè chita sou yon sèl mo: lanmou. Lanmou te toujou fè pati adorasyon n ap bay Bondye e l ap toujou fè pati adorasyon sa a. Sepandan, demontre lanmou se pa annik di bèl pawòl oubyen annik gen yon santiman nan kè n, men se aksyon nou poze k ap demontre n gen lanmou (1 Jan 3:18). Poukisa w pa aprann plis sou fason ou ka demontre lanmou w genyen pou Jewova, Bondye ki “se lanmou” an? — 1 Jan 4:8.