W AP dakò avè m li enpòtan pou w rete je klè lè w lekòl. Gen anpil timoun ki gen dòmi nan je yo lè yo nan klas, men fòk ou rete je klè pou w ka aprann. Petèt ou konn al nan reyinyon kote y ap anseye w sou Bondye ak sou Bib la, se yon lòt lè ki enpòtan tou pou w rete je klè.

Ki sa w panse w ka fè pou ede w rete je klè? — * Sa ki t ap bon se pou w al kouche bonè leswa. Si w ta fè yon ti dòmi nan aprèmidi, sa t ap bon tou. Ann gade sa n ka aprann nan sa k te rive yon jèn ki te kite dòmi pran l byen ta nan nuit pandan apot Pòl t ap fè yon diskou. Gade nan Bib la nan Travay chapit 20, vèsè 7 a 12, epi w ap wè sa k te rive.

Pòl t ap vizite kongregasyon ki nan vil Twowas, yon vil ki gen yon waf. Labib fè konnen Pòl “te gen pou l pati nan demen” nan bato. Se sa k fè “li kontinye pale jiska minui”. Men sa Bib la di: “Pandan Pòl te kontinye ap pale, dòmi ale nèt ak yon jenn tigason ki rele Etich ki te chita arebò yon fenèt.” Ki sa k te pase apre sa? —

Etich sot nan fenèt la ki te “nan dezyèm etaj la li tonbe anba”. Pòl ak lòt moun yo kouri desann eskalye a byen vit. Etich te kouche atè a, li te mouri. Èske w ka imajine ki jan tout moun te tris? — Labib di Pòl pran Etich, li vlope l nan bra l. Menm moman an, Pòl di byen fò ak kè kontan: ‘Nou pa bezwen pè, li anfòm!’ Bondye fè Etich vin vivan ankò!

 Ki sa nou ka aprann sou Bondye nan sa ki te rive Etich la? — Yon bagay nou ka aprann sèke Jewova, Papa nou ki nan syèl la, ka fè moun mouri vin vivan ankò, menm timoun. Jewova konprann ou e li renmen w, wi, plis pase jan paran w konprann ou e pase jan yo renmen w. Lè Jezi te sou tè a, li te montre ki jan Papa l ye lè l te pran timoun piti nan bra l e li te beni yo. Jezi te resisite jèn tou, pami yo te gen yon tifi 12 an.

Ki jan w santi w lefètke w konnen Papa w ki nan syèl la renmen w? — Wi, sa fè nou renmen Jewova tou e nou vle obeyi sa l di. Èske w konnen ki jan nou ka montre nou renmen l? — Yon fason nou ka fè sa se lè nou di sa. Jezi te di: “Mwen renmen Papa a.” Men, Jezi pa t annik di li renmen Bondye. Li te montre sa nan sa l te fè.

Jezi te obeyi Bondye. Li te di: “Mwen toujou fè sa ki fè l plezi.” Si nou fè menm jan an, n ap eseye fè sa n kapab pou n rete je klè lè nou dwe fè sa dekwa pou n ka fè Jewova ak Pitit li a, Jezi, plezi.