Kesyon lektè yo poze
Kesyon lektè yo poze
Ki lè Pisans mondyal anglo-ameriken an te vin tounen setyèm pisans mondyal Bib la te anonse a?
▪ Gwo estati an metal la wa Neboukadnetsa te wè a pa reprezante tout pisans mondyal yo (Dàn. 2:31-45). Li gen rapò sèlman ak senk pisans mondyal ki te vin genyen depi epòk Dànyèl la e ki te gen enfliyans sou pèp Bondye a.
Sa Dànyèl te di konsènan gwo estati a montre Pisans mondyal anglo-ameriken an pa t ap ranvèse Anpi women an, okontrè, li t ap soti ladan l. Dànyèl te wè fè ki nan janm estati a te desann nan pye yo rive jis nan zòtèy yo. (Nan pye yo ak zòtèy yo, fè a makònen ak ajil la *.) Sa montre Pisans anglo-ameriken an t ap soti nan janm yo ki te fèt an fè. Listwa montre se egzakteman sa k te fèt. Grann Bretay, ki te fè pati Anpi women an, te kòmanse vin gen pouvwa nan fen 18yèm syèk la. Annapre, Etazini te vin yon nasyon pou moun pran oserye. Sepandan, setyèm pisans mondyal la potko fòme. Poukisa nou di sa? Se paske Grann Bretay ak Etazini potko fè okenn bagay enpòtan ansanm. Sepandan, sa te vin fèt pandan Premye Gè mondyal la.
Lè sa a, “pitit wayòm” yo te aktif, sitou Ozetazini, nan syèj mondyal la ki Bwouklin, nan Nouyòk (Mat. 13:36-43). Moun Bondye chwazi pou y al nan syèl la t ap preche nan peyi ki te anba dominasyon Anpi Grann Bretay la. Pandan Premye Gè mondyal la, Anglè yo ak Ameriken yo te vin gen yon relasyon espesyal paske yo te gen kèk ènmi yo te vin ap konbat ansanm. Lefètke moun yo te vin pi nasyonalis nan epòk sa a akoz gè a, pisans de peyi sa yo te vin fòme ansanm nan te montre li menm tou li te rayi moun sou tè a ki te fè pati desandans madanm Bondye a. Yo te met entèdiksyon sou piblikasyon rès desandans sa a te pibliye e yo te menm mete moun ki te pran devan nan travay predikasyon an nan prizon. — Rev. 12:17.
Donk, dapre pwofesi ki nan Bib la, setyèm pisans mondyal la pa t parèt nan fen 18yèm syèk la lè Grann Bretay te fèk kòmanse gen pouvwa, li te parèt nan kòmansman jou Seyè a *.
[Nòt anba paj]
^ § 4 Ajil la ak fè a reprezante kèk bagay ki nan Pisans anglo-ameriken an, yon pisans ki di tankou bout fè. Tank tan ap pase, ajil la fè li difisil pou pisans sa a deplwaye fòs li jan l ta renmen an.
^ § 6 Esplikasyon sa a se yon ajisteman parapò ak enfòmasyon ki te parèt nan liv Prophétie de Daniel la nan paj 57, paragraf 24, e ki te parèt nan tablo ki nan paj 56 ak paj 139 liv sa a.
[Foto nan paj 19]
Uit frè nan syèj mondyal òganizasyon an yo te voye nan prizon an jen 1918.
