Lè manm fanmi yo kowopere youn ak lòt, sa ap ede yo fè pwogrè espirityèl

YON bagay ki esansyèl pou moun ki vle pou manm fanmi yo renmen Jewova e pou yo sèvi l se fè efò pou manm fanmi an kowopere youn ak lòt. Lè Jewova te kreye de premye moun yo, li te montre li nesesè pou youn kowopere ak lòt. Èv te dwe travay ansanm ak Adan “pou ede l”. (Jen. 2:18.) Nan yon maryaj, mari a ak madanm nan ta dwe kowopere youn ak lòt, youn ta dwe ede lòt (Ekl. 4:9-12). Pou paran yo ak timoun yo byen ranpli wòl Jewova ba yo a, sa mande pou yo kowopere youn ak lòt tou.

Nan kad adorasyon an fanmi

Barry ak Heidi gen senk pitit. Yo twouve lè yo kowopere youn ak lòt pou yo etidye Labib an fanmi, sa ede yo fè pwogrè. Men ki jan Barry esplike sa yo fè: “Detanzantan, mwen bay timoun yo ti asiyasyon pou etid familyal la. Pafwa mwen mande yo prepare kèk kòmantè sou kèk atik nan Réveillez-vous! Nou fè seyans repetisyon tou pou predikasyon, yon fason pou chak timoun gen yon prezantasyon yo ka fè ki byen prepare.” Men sa Heidi ajoute: “Nou tout nou gen yon lis objektif espirityèl nou ta renmen atenn, e nou retounen sou objektif sa yo regilyèman pandan etid familyal la pou nou ka wè ki pwogrè nou fè.” Yon lòt bagay koup sa a remake, sèke lè yo pase kèk sware chak semèn san yo pa gade televizyon, sa bay tout fanmi an opòtinite pou yo fè lekti anpè.

Pou yo asiste reyinyon kongregasyon an

Mike ak Denise leve kat timoun. Ki jan fanmi yo te tire pwofi lefètke yo te kowopere youn ak lòt? Men sa Mike di: “Pafwa, malgre nou konn fin byen planifye ki sa n ap fè pou nou rive nan reyinyon yo alè, sa pa t konn mache, men nou te twouve lè nou kowopere youn ak lòt, sa te ede nou fè sa.” Men ki sa Denise esplike: “Toutpandan timoun yo t ap grandi, yo chak te gen travay pa yo pou yo fè nan kay la. Kim, pitit fi nou an, te konn bay koutmen nan fè manje e nan ranje tab la.” Men sa Michael, youn nan pitit gason yo genyen, sonje: “Lè madi swa, te konn gen reyinyon lakay nou. Donk, nou te konn netwaye pyès kote yo te konn fè l la, nou te konn pase aspiratè e nou te konn ranje chèz yo.” Matye, yon lòt pitit gason yo genyen, di: “Jou swa lè te gen reyinyon yo, papa nou te konn fè yon fason pou li rive lakay bonè yon fason pou l te ka ede nou prepare nou pou reyinyon an.” Ki rezilta yo te jwenn?

Efò yo te fè yo vo lapèn

Men sa Mike fè konnen: “An 1987, Denise avè m te kòmanse sèvi kòm pyonye. Lè sa a, twa nan pitit nou yo t ap viv ansanm avèk nou toujou nan kay la. Gen de nan pitit nou yo ki te vin pyonye tou, e lòt yo te travay nan konstriksyon Betèl. Yon lòt bagay ki fè nou gen lajwa nan fanmi an, sèke nou te gen opòtinite pou n ede 40 moun vwe lavi yo bay Jewova epi batize. Nou te gen privilèj tou pou nou travay ansanm an fanmi nan plizyè konstriksyon, e genyen ladan yo ki te fèt aletranje.”

Vrèman, sa vo lapèn pou nou kowopere youn ak lòt nan fanmi nou. Èske nou ka jwenn lòt fason pou nou kowopere youn ak lòt nan fanmi nou? Nou mèt gen asirans si nou dispoze fè sa, sa ap ede fanmi an fè plis pwogrè espirityèl.

[Foto nan paj 28]

Lè moun nan yon fanmi fè repetisyon pou predikasyon, sa ede yo fè pwogrè nan travay predikasyon an.