Èske w twouve li Labib raz oswa ankourajan? Ki jan lekti Labib kapab itil ou? Anfèt, sa depann anpil de etadespri w parapò ak lekti w ap fè a. Ann wè sa w ka fè pou w ka vin plis anvi li Bib la toutpandan w ap pran plezi fè sa.

Chwazi yon tradiksyon ou ka fè konfyans e ki ekri yon fason ki fasil pou moun konprann jodi a. Si w ap li yon liv ki difisil anpil pou w konprann oswa ki gen anpil mo ladan l ki ansyen ou pa abitye avèk yo, ou ka pa anvi li liv sa a ankò. Donk, chèche yon Bib ki gen yon langaj ki fasil pou moun konprann e ki ka touche kè w. Anplis de sa, li dwe presi e li dwe byen tradui *.

Sèvi ak teknoloji. Jodi a, nonsèlman w ka jwenn Labib sou fòm enprime, men tou, ou ka jwenn li sou fòma elektwonik. Gen kèk Bib ou ka li sou Entènèt oubyen ou ka telechaje pou w li sou òdinatè w, sou tablèt ou oubyen sou selilè w. Gen vèsyon ki ba w posiblite pou w verifye lòt vèsè ki gen rapò ak menm sijè a byen rapid oubyen yo ka menm ba w posiblite pou w konpare plizyè tradiksyon ansanm. Si w prefere koute pase fè lekti, ou ka jwenn Labib sou fòma odyo. Gen anpil moun ki renmen koute Bib la lè yo nan transpò piblik, lè y ap fè lesiv oubyen lè y ap fè yon lòt bagay ki pèmèt yo koute anmenmtan. sa w panse si w ta eseye metòd k ap pi bon pou ou a?

Sèvi ak zouti ki ka ede w etidye Labib. Zouti ki ka ede w etidye Labib yo ka pèmèt ou pi byen pwofite lekti w ap fè a. Gen kat ki montre peyi yo pale de yo nan Bib la, k ap ede w gen yon ide sou zòn yo  mansyone nan lekti w ap fè yo e sa ap pèmèt bagay yo pi klè nan tèt ou. Gen yon seri atik, tankou atik ki nan peryodik sa a oswa ki nan seksyon “Sa Bib la anseye” a ki sou sit Entènèt jw.org la ki ka ede w konprann plizyè pati nan Bib la.

Varye metòd ou yo. Si li parèt difisil pou w li Labib depi nan kòmansman rive nan fen an, sa w panse si w ta li yon pòsyon w renmen anpil pou sa ka ankouraje w li plis? Si w vle konnen moun yo plis pale de yo nan Bib la, ou ta ka fè yon lekti ki baze sou istwa moun sa yo. W ap jwenn yon egzanp sou fason w ka fè sa nan kare ki mache ak atik sa a ki gen tit “ Fouye nan Bib la epi aprann konn moun ki ladan l yo”. Oswa ou ka vle li Labib sijè pa sijè, oswa nan lòd evènman yo te pase yo. Sa w panse si w ta eseye youn nan sijesyon yo bay yo?