1. Ki sa ki ka ede n aprann renmen etidye pwofesi ki nan Bib la?

 MEN sa Benn, jèn frè nou te pale de li nan atik anvan an, di: “Mwen renmen etidye pwofesi ki nan Bib la.” Èske w renmen fè sa tou? Oswa èske w santi pwofesi yo twò difisil pou w konprann yo? Ou ka menm santi ou pa vrèman pran plezi pou w etidye yo. Men, lè w chèche pi byen konprann rezon ki fè Jewova mete pwofesi nan Pawòl li a, sa ka fè w wè bagay yo yon lòt jan.

2. Sou ki sa nou pral pale nan atik sa a?

² Nan atik sa a, nonsèlman nou pral wè rezon ki fè n dwe chèche konnen pwofesi ki nan Bib la, men tou, nou pral wè fason nou ka etidye yo. Apre sa, nou pral egzamine de pwofesi nan liv Dànyèl la pou n wè lè n konprann yo ki jan sa kapab ede n depi kounye a.

3. Ki sa n bezwen fè pou n ka konprann pwofesi ki nan Bib la?

³ Nou bezwen mande èd pou n ka konprann pwofesi ki nan Bib la. Ann pran yon egzanp. Imajine w ap vizite yon zòn ou pa konnen, men, ou gen yon zanmi w k ap vwayaje avè w ki byen konn zòn nan. Li konn egzakteman ki kote w ye e ki kote chak wout mennen. Se sèten ou t ap kontan lefètke zanmi w lan te dakò vin ansanm avè w! Jewova tankou zanmi sa a. Li konnen ki kote nou ye anrapò ak tan n ap viv la e li konnen ki sa k ap tann nou pi devan. Se sa k fè pou n konprann pwofesi ki nan Bib la, nou dwe mete n toupiti pou n mande Jewova èd. — Dàn. 2:28; 2 Pyè 1:19, 20.

4. Poukisa Jewova te fè ekri pwofesi nan Pawòl li a? (Jeremi 29:11). (Gade foto a tou.)

⁴ Menm jan ak tout bon paran, Jewova vle pitit li yo gen  yon bèl avni. (Li Jeremi 29:11.) Men, kontrèman ak nenpòt paran, Jewova kapab fè konnen egzakteman ki jan demen ap ye. Li te fè ekri pwofesi nan Pawòl li a pou n ka konnen yon seri evènman enpòtan anvan yo rive (Eza. 46:10). Pwofesi ki nan Bib la se kado Papa nou ki nan syèl la ban nou ki montre li renmen nou. Men, ki jan w ka sèten sa Bib la anonse yo ap reyalize toutbonvre?

5. Ki sa yon jèn ka aprann nan eksperyans Max te fè a?

⁵ Nan lekòl yo, byen souvan, jèn nou yo konn an kontak ak yon seri moun ki pa vrèman gen respè pou Bib la oswa ki pa gen okenn respè pou Bib la. Sa moun sa yo di ak fason yo konpòte yo ka fè yon jèn Temwen gen dout sou kwayans li. Gen yon frè ki rele Max ki te fè yon eksperyans. Men sa l di: “Lè m te nan adolesans mwen, mwen te kòmanse gen dout, mwen t ap mande tèt mwen si relijyon paran m ap anseye m nan se vrè relijyon an e si Labib se Pawòl Bondye.” Ki sa paran l yo te fè? Men sa l di: “Yo te rete byen kalm, byenke m konnen sa te enkyete yo.” Paran Max yo te sèvi ak Bib la pou yo reponn kesyon li t ap poze yo. Max te fè yon bagay tou. Men sa l di: “Mwen te etidye pwofesi ki nan Bib la poukont mwen e m te pale sou sa m te aprann yo ak lòt jèn.” Ki rezilta sa te bay? Men sa Max di: “Apre sa, mwen te vin gen konviksyon se Bondye ki te fè ekri Bib la!”

6. Ki sa w bezwen fè si w gen dout, e poukisa?

⁶ Si, menm jan ak Max, ou kòmanse gen dout sa Bib la di yo se laverite, ou pa bezwen santi w wont. Men, ou bezwen fè yon bagay. Dout menm jan ak wouy. Si yo fè kòmsi yo pa wè l, li ka manje yon bagay ki gen anpil valè tikras pa tikras. Pou w kòmanse elimine kèlkeswa dout ki ta ka detwi lafwa w, ou bezwen mande tèt ou: ‘Èske m kwè sa Bib la di konsènan lavni?’ Si w pa sèten, ou bezwen etidye pwofesi ki nan Bib la ki deja reyalize yo. Ann wè ki jan w ka fè sa.

7. Ki egzanp Dànyèl te bay sou fason pou n etidye pwofesi yo? (Dànyèl 12:10). (Gade foto a tou.)

⁷ Dànyèl te bay yon bèl egzanp sou fason pou n etidye pwofesi yo. Li te etidye pwofesi yo ak bon entansyon: li te vle konn laverite. Dànyèl te gen imilite tou, li te konnen Jewova ap bay moun ki konnen l e ki viv ann amoni ak prensip li yo bon konprann. (Dàn. 2:27, 28; Li Dànyèl 12:10.) Dànyèl te montre l gen imilite lefètke l te konte sou Jewova pou ede l (Dàn. 2:18). Epitou, Dànyèl te konn pran san l pou l etidye. Li te konn fè rechèch nan pati nan Bib la ki te disponib nan epòk la (Jer. 25:11, 12; Dàn. 9:2). Ki jan w ka suiv egzanp Dànyèl?

8. Poukisa kèk moun egzamine pwofesi ki nan Bib la?

⁸ Reflechi sou rezon ki pouse w egzamine pwofesi yo. Èske w ap etidye pwofesi ki nan Bib la paske w vrèman anvi konnen  laverite? Si se sa, Jewova ap ede w (Jan 4:23, 24; 14:16, 17). Ki lòt rezon ki ka pouse yon moun etidye pwofesi yo? Gen moun ki gendwa ap fè sa paske yo ta renmen jwenn prèv ki montre se pa Bondye ki te fè ekri Bib la. Konsa, yo t ap santi yo gen rezon pou yo deside pou tèt yo sa ki byen ak sa ki mal. Sepandan, nou bezwen etidye ak bon entansyon. Anplis de sa, gen yon kalite enpòtan nou bezwen genyen pou n konprann pwofesi ki nan Bib la.

9. Ki kalite nou bezwen genyen pou n konprann pwofesi ki nan Bib la? Esplike.

⁹ Ou bezwen gen imilite. Jewova pwomèt l ap ede moun ki gen imilite yo (Jak 4:6). Se sa k fè nou bezwen priye l pou l ede n konprann pwofesi ki nan Bib la. Epitou, nou dwe rekonèt nou bezwen èd esklav fidèl la Jewova ap itilize pou ban nou manje nan bon moman (Lik 12:42). Jewova se yon Bondye ki gen lòd. Donk, se nòmal pou l ta itilize yon sèl òganizasyon pou ede n konprann verite ki nan Pawòl li a. — 1 Kor. 14:33; Efe. 4:4-6.

10. Ki sa w aprann nan eksperyans Esther te fè a?

¹⁰ Byen egzamine sa w ap etidye yo. Kòmanse ak yon pwofesi ki enterese w epi fè rechèch sou li. Se sa yon sè ki rele Esther te fè. Li te vle konn plis bagay sou pwofesi konsènan Mesi a ki te gen pou vini. Men sa l di: “Lè m te gen 15 an, mwen te kòmanse fè rechèch pou m jwenn prèv ki montre yo te ekri pwofesi sa yo anvan Jezi te vin sou tè a.” Lè l te li enfòmasyon konsènan woulo yo te jwenn nan Lanmè Mòt yo, sa l te aprann yo te konvenk li. Men sa l remake: “Yo te ekri kèk nan woulo sa yo anvan Kris te vin sou tè a, donk, se sèten se Bondye ki te fè ekri pwofesi ki ladan yo.” Men sa Esther di: “Mwen te oblije li enfòmasyon yo plizyè fwa pou m te ka konprann yo.” Men, li te kontan li te fè efò sa a. Apre l te fin byen pran san l pou l etidye plizyè pwofesi nan Bib la, men sa l di: “Mwen te ka wè aklè poukont mwen sa Bib la di se laverite!”

11. Poukisa l bon pou n chèche konvenk tèt nou sa Bib la di se laverite?

¹¹ Lè n wè jan yon seri pwofesi ki nan Pawòl Bondye a deja reyalize, nou vin gen yon konfyans total nan Jewova ak nan fason l ap gide nou. Mete sou sa, pwofesi ki nan Bib la ede n kontinye gen bonjan espwa pou lavni, menmsi n gen pwoblèm kounye a. Ann fè yon ti pale konsènan de pwofesi nou jwenn nan liv Dànyèl la k ap reyalize kounye a. Lè n konprann yo, sa kapab ede n pou n pran bon desizyon.

12. Ki sa pye ki fèt ak “fè [ki] mele ak ajil ki mou” an reprezante? (Dànyèl 2:41-43).

¹² Li Dànyèl 2:41-43. Nan rèv Dànyèl te esplike wa Nebikadneza a, pye estati wa a te wè a te fèt ak “fè [ki] mele ak  ajil ki mou”. Lè n konpare pwofesi sa a ak lòt pwofesi ki nan liv Dànyèl la ak nan liv Revelasyon an, nou vin konprann pye a reprezante Etazini ak Grann Bretay, pi gwo pisans mondyal ki egziste jodi a, k ap kolabore youn ak lòt. Konsènan pisans mondyal sa a, Dànyèl di “yon pati nan wayòm nan ap djanm e yon pati ap fèb”. Sa k fè yon pati ap fèb? Paske moun nan pèp la, ajil ki mou an reprezante a, fè l pa fasil pou l aji avèk yon fòs ki tankou fè. b

13. Ki verite enpòtan nou kapab aprann lefètke n konprann pwofesi sa a?

¹³ Nou aprann yon seri verite enpòtan nan esplikasyon Dànyèl te bay konsènan estati li te wè nan rèv la, e sitou konsènan pye estati a. Premyèman, Pisans mondyal anglo-ameriken an montre l gen fòs. Pa egzanp, Etazini ak Grann Bretay te pami nasyon ki te pot laviktwa nan Premye Gè mondyal la ak nan Dezyèm Gè mondyal la. Sepandan, pisans mondyal sa a pèdi fòs e l ap kontinye pèdi fòs akoz pwòp sitwayen l ki nan chirepit youn ak lòt e ak gouvènman an. Dezyèmman, se Pisans mondyal anglo-ameriken an k ap dènye pisans mondyal k ap dirije anvan Wayòm Bondye a detwi tout gouvènman lèzòm yo. Byenke pafwa lòt nasyon ka ap pwovoke Pisans mondyal anglo-ameriken an, yo pap rive pran plas li. Nou konn sa paske “wòch” la ki reprezante Wayòm Bondye a pral kraze pye a, anpalan de pati nan estati a ki reprezante Pisans mondyal anglo-ameriken an. — Dàn. 2:34, 35, 44, 45.

14. Lè n konprann pwofesi ki gen rapò ak pye ki fèt ak fè ak ajil la, ki jan sa kapab ede n pran bon desizyon?

¹⁴ Èske w gen konviksyon pwofesi Dànyèl te bay konsènan pye ki fèt ak fè ak ajil la se laverite? Si w kwè sa, sa ap gen efè sou fason w ap mennen lavi w. Ou pap chèche vin gen yon pakèt kòb oswa yon pakèt byen materyèl nan yon monn ki pral detwi talè konsa (Lik 12:16-21; 1 Jan 2:15-17). Lè w konprann pwofesi sa a, sa ap ede w wè jan travay preche ak anseye a enpòtan (Mat. 6:33; 28:18-20). Apre n fin egzamine pwofesi sa a, li ta bon pou w mande tèt ou: ‘Èske desizyon m pran montre m gen konviksyon Wayòm Bondye a pral detwi tout gouvènman lèzòm yo talè konsa?’

15. Kiyès jodi a ki “wa nò a” e kiyès ki “wa sid la”? (Dànyèl 11:40).

¹⁵ Li Dànyèl 11:40. Dànyèl chapit 11 pale konsènan de wa oswa pisans politik ki nan lit youn ak lòt pou yo domine monn nan. Lè n konpare pwofesi sa a ak lòt pwofesi ki nan Bib la, nou kapab wè “wa nò a” se Larisi ak patizan l yo e “wa sid la” se Pisans mondyal anglo-ameriken an. c

16. Ki difikilte frè n ak sè n k ap viv nan peyi kote “wa nò a” ap dirije a jwenn?

¹⁶ Pèp Bondye a k ap viv nan peyi “wa nò a” ap dirije a jwenn pèsekisyon anba men wa sa a. Gen kèk Temwen yo bat e gen lòt yo mete nan prizon akoz lafwa yo. Frè n ak sè n yo pa kite aksyon “wa nò a” ap fè yo fè yo pè, okontrè, sa ranfòse lafwa yo. Sa k fè sa? Paske frè n  ak sè n sa yo konnen lefètke y ap pèsekite pèp Bondye a sa reyalize pwofesi ki nan liv Dànyèl la d (Dàn. 11:41). Lefètke nou konn sa, sa kapab ede n pou n kenbe esperans nou genyen an fèm e pou n kontinye ret fidèl.

17. Ki pwoblèm sèvitè Bondye k ap viv anba dominasyon “wa sid la” te jwenn?

¹⁷ Sa gen kèk tan, “wa sid la” te pèsekite pèp Jewova a tou. Pa egzanp, nan premye mwatye 20^yèm syèk la, te gen anpil frè ak sè yo te mete nan prizon paske yo pa t vle al nan lagè e yo te mete kèk timoun ki Temwen Jewova deyò nan lekòl yo poutèt yo pa t vle salye drapo. Pandan plizyè dizèn ane ki sot pase la yo, sèvitè Jewova k ap viv nan peyi wa sa a ap dirije a te jwenn lòt eprèv anba anba ki te fè l difisil pou yo ret fidèl ak Wayòm Bondye a. Pa egzanp, lè gen kanpay k ap fèt pou eleksyon, yon kretyen ka gen tandans soutni yon pati politik oswa yon  kandida. Petèt, li pa al vote, men, li pran pozisyon nan lespri l oswa nan kè l. Se pa ti enpòtan li enpòtan pou n pa mele nan politik nonsèlman nan aksyon nou, men tou, nan panse nou ak nan kè nou! — Jan 15:18, 19; 18:36.

18. Ki jan nou reyaji lè n wè hinghang ki genyen ant “wa nò a” ak advèsè l la? (Gade foto a tou.)

¹⁸ Moun ki pa kwè nan pwofesi ki nan Bib la ka vin pè anpil lè yo wè “wa sid la” ap “toke kòn” ak “wa nò a”. (Dàn. 11:40, nòt.) Toule de wa sa yo gen zam nikleyè ki pisan anpil ki kapab detwi tout vi sou tè a. Men, nou konnen Jewova pap kite sa rive (Eza. 45:18). Hinghang ki gen ant “wa nò a” ak “wa sid la” pa fè n ap bay tèt nou pwoblèm, okontrè, sa fè lafwa nou vin solid. Sa montre aklè, monn sa a prèske detwi.

19. Ki sa n bezwen rekonèt anrapò ak pwofesi ki nan Bib la?

¹⁹ Nou pa konnen ki jan kèk pwofesi nan Bib la pral reyalize. Menm pwofèt Dànyèl pa t konprann tout sa l te ekri yo (Dàn. 12:8, 9). Men, se pa paske nou pa fin byen konprann fason yon pwofesi pral reyalize ki fè l pap reyalize. Pa gen dout, nou kapab gen konfyans Jewova pral fè n konnen sa n bezwen konnen nan bon moman, jan l te deja fè sa. — Amòs 3:7.

20. Ki bèl pwofesi nan Bib la nou pral wè k ap reyalize talè konsa, e ki sa n bezwen kontinye fè?

²⁰ Nasyon yo pral deklare “lapè [ak] sekirite”. (1 Tes. 5:3.) Apre sa, gouvènman yo nan monn nan pral atake fo relijyon yo e y ap detwi yo nèt (Rev. 17:16, 17). Annapre, y ap atake pèp Bondye a (Eze. 38:18, 19). Evènman sa yo pral mennen tou dwat nan Amagedon, dènye gè ki pral fèt la (Rev. 16:14, 16). Nou kapab gen konfyans evènman sa yo pap pran tan pou yo rive. Annatandan, ann kontinye montre Papa nou ki nan syèl la ki renmen nou an nou gen rekonesans lè n suiv pwofesi ki nan Bib la e lè n ede lòt moun fè menm jan an.