1-2. a) Ki sa Jezi te fè nan nuit anvan yo te touye l la? b) Ki kesyon nou pral egzamine nan atik sa a?

 JOU ki te jedi 14 Nizan ane 33 epòk nou an, li te byen ta nan aswè lè yo t apral trayi Jezi, yo t apral jije l, kondane l, tòtire l e apre sa yo te egzekite l. Jezi te fèk fin manje yon manje espesyal ak apot fidèl li yo nan yon pyès ki te nan yon chanmòt. Apre soupe a, Jezi te di apot li yo kèk pawòl pou ankouraje yo. Lè lè a te rive pou yo tout t ale, Jezi te fè yon priyè ki gen anpil enpòtans. Apot Jan te pale de priyè sa a. Nou jwenn li nan Jan chapit 17.

² Ki sa priyè Jezi te fè a fè n konnen sou sa k t ap trakase l nan moman sa a? Ki jan priyè sa a montre sa k te enpòtan pou li pandan tout sèvis li sou tè a? Ann chèche jwenn repons kesyon sa yo.

“MWEN FÈ YO KONNEN NON W”

3. Ki sa Jezi te di anrapò ak non Jewova, e ki sa l te vle di menm? (Jan 17:​6, 26).

³ Men sa Jezi te di nan yon priyè l te fè: “Mwen fè yo konnen non w.” N ap remake pandan de fwa Jezi te di li te fè disip li yo konnen non Jewova. (Li Jan 17:​6, 26.) Ki sa l te vle di menm? Èske l te fè yo konnen yon non yo pa t konnen? Piske disip Jezi yo te Juif, yo te deja konnen Bondye rele Jewova. Non sa a parèt plizyè milye fwa nan Liv ki te ekri ann ebre yo. Donk, Jezi pa t ap pale konsènan non pèsonèl Bondye. Okontrè, li t ap  pale konsènan sa non sa a reprezante. Li te ede disip li yo konnen Jewova pi byen, sa gen ladan l objektif Jewova genyen, sa l te fè, sa l pral fè ak kalite li genyen. Se sèl Jezi ki konn Jewova byen konsa.

4-5. a) Ki jan non yon moun ka vin gen plis enpòtans pou nou? Bay yon egzanp. b) Nan ki sans disip Jezi yo te vin konn non Jewova?

⁴ Ann pran yon egzanp. Imajine gen yon ansyen nan kongregasyon w lan ki rele David. Li se yon doktè ki konn fè operasyon. Gen plizyè ane depi w konn frè sa a. Men, yon jou, ou vin gen yon ijans e w bezwen yon doktè pou ede w. Yo kouri avè w nan lopital kote frè sa a ap travay la e l sèvi ak konesans li genyen antanke doktè pou l sove lavi w. Kounye a, ou vin pi renmen frè sa a. E lè w tande non l, sa fè w panse ak sa l te fè pou ou a. David pa jis ansyen ou te konnen depi byen lontan an, li se doktè ki sove lavi w la tou.

⁵ Menm jan an tou, disip Jezi yo te deja konnen non Jewova. Men, non sa a te vin gen plis enpòtans pou yo paske Jezi te ede yo konn Jewova pi byen. Sa k fè nou ka di sa? Paske Jezi te imite Papa l nan tout sa l te di ak nan tout sa l te fè. Donk, apot Jezi yo te vin “konnen” Jewova pi byen lè yo te tande fason Jezi te anseye e lè yo te wè fason l t ap aji ak lòt moun. — Jan 14:9; 17:3.

“NON W OU BAN MWEN AN”

6. Nan ki sans Jewova te bay Jezi non L? (Jan 17:​11, 12).

⁶ Nan priyè Jezi te fè a, li te priye pou disip li yo, men sa l te di: “Voye je sou yo poutèt non w ou ban mwen an.” (Li Jan 17:​11, 12.) Èske sa vle di yo t apral rele Jezi Jewova? Non. Remake nan priyè Jezi te fè a, lè l t ap pale de non Jewova, li te di “voye je sou yo poutèt non w”. Donk Jezi pa t vin gen non Jewova. Ki sa Jezi te vle di menm lè l te di Bondye ba l non l? Toudabò, Jezi se te reprezantan Jewova e se te pòtpawòl Li. Li te vin nan non Papa l e l te fè mirak nan non sa a (Jan 5:43; 10:25). Epitou, non Jezi vle di “Jewova se delivrans”. Donk, non Jezi gen non Jewova ladan l.

7. Bay yon egzanp ki montre Jezi te kapab pale nan non Jewova.

⁷ Ann pran yon egzanp. Lefètke yon anbasadè reprezante yon dirijan, li ka pale nan non dirijan an. Donk, pawòl anbasadè a gen menm fòs ak pawòl dirijan an. Menm jan an tou, Jezi te reprezante Jewova e l te pale ak moun yo nan non Jewova. — Mat. 21:9; Lik 13:35.

8. Nan ki sans non Jewova te “nan” Jezi anvan Jezi te vin sou tè a? (Egzòd 23:​20, 21).

⁸ Piske Jezi se Pawòl la, li te sèvi kòm Pòtpawòl Jewova pou l te fè zanj yo ak lèzòm konnen sa Jewova te vle yo konnen ak sa l te vle yo fè (Jan 1:​1-3). Petèt Jezi se zanj Jewova te voye al ede Izrayelit yo lè yo te nan dezè a. Lè Jewova t ap mande Izrayelit yo pou yo obeyi zanj sa a, li te di yo: “L ap aji nan non m.” a (Li Egzòd 23:​20, 21.) Non Jewova te “nan” Jezi nan sans Jezi reprezante Jewova e se sitou li menm ki bay prèv Papa l fè tout bagay dwat e Li sen.

 “PAPA, FÈ NON W JWENN GLWA”

9. Jis nan ki pwen non Jewova te enpòtan pou Jezi? Sa k fè nou ka di sa?

⁹ Jan nou sot wè pi wo a, menm anvan Jezi te vin sou tè a, se non Jewova ki te pi enpòtan pou li. Nou konprann poukisa lè Jezi te sou tè a li te montre nan tout sa l t ap fè jan non Jewova enpòtan pou li. Lè Jezi te prèske fini sèvis li sou tè a, li te di: “Papa, fè non w jwenn glwa.” Lè sa a Papa l te reponn li byen fò nan syèl la: “Mwen te fè l jwenn glwa e m ap fè l jwenn glwa ankò.” — Jan 12:28.

10-11. a) Ki jan Jezi te bay non Jewova glwa? (Gade foto a tou.) b) Poukisa non Jewova bezwen vin sen e n bezwen defann li?

¹⁰ Jezi te fè non Papa l jwenn glwa tou. Ki jan? Youn nan fason li te fè sa se lè l te fè konnen bèl kalite Jewova genyen yo ak bèl bagay Li fè pou lòt moun. Men se pa sa sèlman li te fè pou l bay non Jewova glwa. Jezi te bezwen montre aklè tout sa Jewova fè dwat e non L sen b. Jezi te montre jan sa enpòtan lè l te aprann disip li yo fason pou yo priye. Men sa l te di: “Papa nou ki nan syèl la, se pou non w vin sen.” — Mat. 6:9.

¹¹ Poukisa non Jewova te bezwen vin sen e yo te bezwen defann li? Paske nan jaden Edenn nan, Satan Ledyab te bay manti sou Jewova Dye. Satan te fè konnen Jewova se yon mantè e L te anpeche  Adan ak Èv jwenn yon bagay ki t ap bon pou yo (Jen. 3:​1-5). Satan te fè konprann tou Jewova pa aji yon fason ki dwat. Manti Satan te bay sou Jewova yo sal repitasyon oswa non Jewova. Annapre, nan epòk Jòb la, Satan te fè konnen, moun k ap sèvi Jewova yo se pou enterè sèlman yo fè sa. Mantè sa a fè konnen tou moun ap sispann sèvi Jewova lè yo jwenn eprèv paske yo pa renmen l toutbon (Jòb 1:​9-11; 2:4). Sa te mande tan pou n rive wè kiyès ki t ap bay manti. Èske se Jewova oswa Satan?

“MWEN BAY LAVI M”

12. Ki sa Jezi te dispoze fè paske l renmen non Jewova?

¹² Lefètke Jezi renmen Jewova, li te vle fè tout sa l kapab pou l fè non Jewova vin sen e pou l defann non L. Men sa l te di: “Mwen bay lavi m.” (Jan 10:​17, 18). An reyalite, li te menm dispoze mouri pou non Jewova c. Adan ak Èv, de premye moun ki te pafè yo, te vire do bay Jewova. Konsa, yo te pran pozisyon pou Satan. Jezi li menm te dispoze vin sou tè a e l te montre aklè li renmen Jewova. Li te montre sa lè l te suiv tout sa Jewova te di l e lè l te fè tout sa Jewova te mande l (Ebre 4:15; 5:​7-10). Li te ret fidèl pandan tout vi l, jiskaske l mouri sou yon poto nan soufrans (Ebre 12:2). Konsa, li te montre aklè li renmen Jewova e li renmen non L.

13. Poukisa se sitou Jezi ki te kapab montre Satan se yon mantè? (Gade foto a tou.)

¹³ Fason Jezi te viv te montre se Satan ki mantè a, se pa Jewova (Jan 8:44)! Jezi te pi byen konnen Jewova pase nenpòt lòt moun sou tè a. Si te gen menm youn nan akizasyon Satan te lage sou Jewova yo ki te laverite, Jezi t ap konnen. Men, Jezi te detèmine pou l defann repitasyon Jewova oswa non L. Menm lè sanble Jewova te abandone Jezi, Jezi te dispoze mouri olye l te vire do bay Papa l ki gen lanmou. — Mat. 27:46. d

“MWEN FINI TRAVAY OU TE BAN M FÈ A”

14. Lefètke Jezi te fidèl, ki jan Jewova te rekonpanse l?

¹⁴ Nan yon priyè Jezi te fè lannuit anvan l te mouri a, li te kapab di: “Mwen  fini travay ou te ban m fè a.” Li te gen konfyans Jewova t ap rekonpanse l poutèt li te fidèl (Jan 17:​4, 5). Li te gen rezon fè Papa l konfyans. Jewova pa t kite l rete nan tonm nan (Tra. 2:​23, 24). Li te resisite Jezi e l te mete l nan yon pozisyon ki pi wo nan syèl la (Flp. 2:​8, 9). Rive yon lè, Jezi te kòmanse dirije antanke Wa nan Wayòm Bondye a. Ki sa Wayòm nan t apral reyalize? Men sa dezyèm pati nan priyè Jezi te aprann disip li yo di: “Se pou Wayòm ou an vini. Se pou volonte w [Jewova] fèt sou tè a kou nan syèl la.” — Mat. 6:10.

15. Ki bagay ankò Jezi pral fè?

¹⁵ Talè konsa, Jezi pral fè lagè kont ènmi Bondye yo e l ap detwi mechan yo nan Amagedon (Rev. 16:​14, 16; 19:​11-16). Yon ti tan apre sa, li pral voye Satan nan “twou san fon an” kote l ap nan prizon e l pap ka fè anyen menm (Rev. 20:​1-3). Pandan Rèy mil an Jezi a, li pral fè gen lapè ankò e li pral fè lèzòm vin pafè ankò. Li pral resisite moun ki mouri yo. Li pral fè tout tè a vin yon paradi. Objektif Jewova pral reyalize! — Rev. 21:​1-4.

16. Ki jan lavi a pral ye apre Rèy mil an an?

¹⁶ Ki jan lavi a pral ye apre Rèy mil an an? Peche ak enpèfeksyon ap disparèt. Lèzòm pap bezwen mande padon ankò pou peche yo sou baz ranson an. Lèzòm pap bezwen yon entèmedyè ant yo menm ak Bondye ankò oswa yo pap bezwen yon klas prèt ankò. E “dènye ènmi [Jezi ap] gen pou l elimine a se lanmò”, anpalan de lanmò nou eritye nan Adan an. Tonm yo pral vid. Mò yo pral retounen viv ankò. Tout moun sou tè a pral pafè. — 1 Kor. 15:​25, 26.

17-18. a) Ki sa k pral rive apre Rèy mil an an? b) Ki sa Jezi pral fè lè moman an rive pou l sispann dirije? (1 Korentyen 15:​24, 28). (Gade foto a tou.)

 ¹⁷ Ki bagay ankò ki pral rive apre Rèy mil an an? Lè sa a gen yon bagay vrèman espesyal ki pral rive: Pèsonn pap janm gen dout ankò Jewova se yon Bondye ki sen e ki jis. Poukisa? Nan jaden Edenn nan, Satan te fè konnen Jewova se yon mantè e li pa dirije lèzòm avèk lanmou. Depi lè sa a, moun k ap sèvi Jewova yo pa sispann montre aklè se fason Jewova ap dirije a ki pi bon. Donk, apre Rèy mil an an, repitasyon Jewova ap vin pwòp nèt. Jewova pral montre byen klè li se Papa nou ki nan syèl la ki renmen nou.

¹⁸ Finalman, tout moun pral konnen tout sa Satan te di sou Jewova yo se manti. Ki sa Jezi pral fè lè moman an rive pou l sispann dirije? Èske l pral suiv egzanp Satan e l pral fè rebèl ak Jewova? Non! (Li 1 Korentyen 15:​24, 28.) Jezi pral remèt Papa l Wayòm nan. Li pral soumèt anba direksyon Jewova. Pa gen okenn dout, kontrèman ak Satan, Jezi ap dispoze remèt Jewova tout otorite l genyen paske l renmen L.

19. Ki enpòtans non Jewova gen pou Jezi?

¹⁹ Nou konprann rezon ki fè Jewova te dispoze bay Jezi non L! Jezi te reprezante Papa l yon fason ki pafè. Donk, ki enpòtans non Jewova gen pou Jezi? Non Jewova pi enpòtan pou Jezi pase nenpòt lòt bagay. Li te dispoze mouri pou non sa a e l ap dispoze remèt Jewova tout otorite l genyen apre Rèy mil an an. Ki jan n ka suiv egzanp Jezi? N ap jwenn repons kesyon sa a nan atik ki vin apre a.