1. Ki kòmandman byen klè Jezi te bay disip li yo? (Gade foto ki sou paj kouvèti a.)

NAN nuit anvan Jezi mouri a, li te bay disip li yo yon kòmandman byen klè. Li te di yo: “Menm jan mwen renmen nou an, nou menm tou, se pou nou youn renmen lòt.” Apre sa, li te di yo: “Tout moun ap konnen nou se disip mwen si nou gen lanmou nan mitan nou.” — Jan 13:34, 35.

2. Poukisa li enpòtan pou nou demontre lanmou youn pou lòt?

² Jezi te di moun t ap kapab rekonèt vrè disip li yo si yo montre yo gen menm kalite lanmou li te demontre a. Sa l te di a te yon verite nan premye syèk la, e li toujou yon verite jodi a. Se pa ti enpòtan sa enpòtan pou nou demontre lanmou youn pou lòt menm lè sa pa fasil!

3. Ki sa nou pral wè nan atik sa a?

³ Akoz enpèfeksyon nou, li pa fasil pou nou renmen youn lòt anpil ak tout kè nou. Aktout sa, nou dwe fè efò pou nou imite Kris. Nan atik sa a, nou pral wè kòman lanmou ka ede nou pou n renmen fè lapè, pou n pa gen patipri e pou n renmen akeyi moun. Toutpandan w ap etidye atik sa a, mande tèt ou: ‘Ki sa m ka aprann nan men frè ak sè ki kontinye montre lanmou youn pou lòt menm lè gen pwoblèm?’

4. Selon sa nou aprann nan Matye 5:23, 24, poukisa nou dwe fè lapè ak yon frè ki gen yon pwoblèm avèk nou?

⁴ Jezi te aprann nou jan li enpòtan pou nou fè lapè ak  yon frè ki gen yon pwoblèm avèk nou. (Li Matye 5:23, 24.) Li te montre enpòtans pou nou kenbe bon relasyon ak lòt moun si nou vle fè Bondye plezi. Jewova kontan lè nou fè tout sa n kapab pou n fè lapè ak frè n ak sè n yo. Li pap aksepte adorasyon n ap ba li a si nou kenbe yon moun sou kè nou e si nou refize fè lapè. — 1 Jan 4:20.

5. Ki sa k te fè l difisil pou yon frè fè lapè?

⁵ Nou ka twouve li difisil pou nou fè lapè. Poukisa? Ann egzamine sa k te rive Mark *. Sa te fè l mal lè yon frè te kritike l e l te pale l mal ak lòt moun nan kongregasyon an. Ki jan Mark te reyaji? Men sa l di: “Mwen te pèdi metriz mwen e m te fache.” Men, annapre, Mark te regrèt fason l te aji a, li te eseye mande frè a eskiz e l te chèche fè lapè avè l. Men, frè a pa t vle fè lapè. Okòmansman, Mark te di tèt li ‘Poukisa pou mwen kontinye chèche fè lapè si l pa vle?’ Men, siveyan sikonskripsyon an te ankouraje Mark pou l pa dekouraje. Ki sa Mark te fè?

6. a) Ki jan Mark te chèche fè lapè? b) Ki jan Mark te aplike Kolosyen 3:13, 14?

⁶ Lè Mark te reflechi, li te rann li kont li te manke imilite e l te gen tandans panse li pi bon pase lòt moun. Li te rekonèt li te bezwen chanje fason l wè bagay yo (Kol. 3:8, 9, 12). Avèk imilite li te retounen al kot frè a pou l mande l eskiz pou fason l te aji a. Mete sou sa, li te ekri frè a plizyè lèt, li te fè l konnen jan li regrèt sa k te pase a e jan l ta renmen yo retounen byen ankò. Mark te menm bay frè a kèk ti kado li te panse ki te ka fè l plezi. Malerezman, frè a te toujou kenbe l sou kè. Malgre sa, Mark te kontinye obeyi kòmandman Jezi ki mande pou l renmen frè l la e pou l padone.  (Li Kolosyen 3:13, 14.) Menm lè lòt moun pa byen reyaji lè n fè efò pou n fè lapè, vrè lanmou nou genyen antanke kretyen an ap ede n kontinye padone yo epi priye pou nou kapab vin anpè avèk yo ankò. — Mat. 18:21, 22; Gal. 6:9.

7. a) Ki sa Jezi te ankouraje nou pou n fè? b) Ki sitiyasyon difisil yon sè te viv?

⁷ Jezi te ankouraje nou pou nou trete lòt moun menm jan nou ta renmen yo trete nou. Mete sou sa, li te fè konnen se pa moun ki renmen nou sèlman nou dwe renmen (Lik 6:31-33). Byenke se pa yon bagay ki rive fasil, ki sa w ap fè si yon moun nan kongregasyon an ap evite w e l pa vle salye w? Se sa k te rive Lara. Men sa l di: “Gen yon sè ki te meprize m e m pa konn poukisa. M te santi m malalèz e m pa t pran plezi al nan reyinyon.” Okòmansman, men rezònman Lara te fè: ‘Se pa mwen ki antò. Dayè gen lòt moun nan kongregasyon an ki santi sè sa a dwòl.’

8. Ki sa Lara te fè pou l fè lapè, e ki sa nou ka aprann nan eksperyans li te fè a?

⁸ Lara te fè efò pou l fè lapè. Li te priye Jewova e l te deside al pale ak sè a. Yo te pale sou pwoblèm nan, youn te bay lòt akolad e yo te fè lapè. Tout bagay te sanble anfòm. Men sa Lara di: “Men, annapre, sè a te retounen aji menm jan an. M te dekouraje anpil.” Okòmansman, Lara te santi sèl sa k pou fè l gen kè kontan se sof si sè a ta chanje fason l aji. Men, alafen, Lara te rann li kont pi bon bagay li ka fè se kontinye demontre lanmou pou sè a epi “padone [l] ak tout kè l”. (Efe. 4:32–5:2.) Lara te sonje vrè lanmou kretyen yo genyen an “pa note bagay mal yo fè l, li sipòte tout bagay, li kwè tout bagay, li espere tout bagay, li andire tout bagay”. (1 Kor. 13:5, 7.) Lespri Lara te vin anpè ankò. Rive yon lè, sè a te montre l pi amikal avè l. Lè w chèche viv anpè ak frè w ak sè w e w kontinye renmen yo, ou ka gen asirans “Bondye  lanmou an, Bondye lapè a, ap [avè w]”. — 2 Kor. 13:11.

9. Selon Travay 10:34, 35, poukisa nou pa dwe gen patipri?

⁹ Jewova pa gen patipri. (Li Travay 10:34, 35.) Lè nou pa gen patipri, nou montre nou se pitit li. Nou obeyi kòmandman ki mande pou nou renmen pwochen nou menm jan nou renmen tèt nou an e nou travay pou gen lapè nan fanmi nou fòme antanke kretyen an. — Wom. 12:9, 10; Jak 2:8, 9.

10-11. Ki jan yon sè te rive konbat santiman negatif li te genyen?

¹⁰ Li ka pa fasil pou kèk moun kontinye aji san patipri. Pa egzanp, ann wè sa k te rive yon sè ki rele Ruth. Lè l te adolesan, li te fè yon move eksperyans ak yon moun ki te sot nan yon lòt peyi. Ki efè sa te gen sou li? Men sa Ruth di: “Mwen te rayi tout bagay ki gen rapò ak peyi sa a. Mwen te panse tout moun ki sot nan zòn sa a se menm, menm frè ak sè yo.” Ki jan Ruth te rive konbat santiman negatif li te genyen yo?

¹¹ Ruth te rekonèt li dwe lite kont panse negatif li genyen yo. Li te li eksperyans ak rapò sou peyi sa a nan liv Aktivite a. Men sa l di: “Mwen te fè efò pou m wè moun ki sot nan peyi sa a yon fason ki pozitif. Mwen te vin wè frè ak sè sa yo zele pou yo sèvi Jewova. Mwen te vin konprann yo menm tou yo fè pati fanmi frè ak sè nou yo sou tout tè a.” Ofiramezi, Ruth te vin konprann li bezwen fè plis pase sa. Men sa l di: “Kèlkeswa lè m rankontre frè ak sè ki sot nan peyi sa a, mwen fè gwo efò pou m janti avèk yo. Mwen te pale avèk yo e m te aprann konnen yo pi byen.” Ki rezilta sa te bay? Men sa Ruth di: “Rive yon lè, santiman negatif mwen te genyen yo te disparèt.”

12. Ki pwoblèm yon sè ki rele Sarah te genyen?

¹² Gen kèk moun ki ka gen patipri san yo pa menm rann yo kont. Pa egzanp, Sarah te panse li pa gen patipri paske li pa jije moun selon ras yo, selon kantite kòb yo genyen oswa selon responsablite yo gen nan òganizasyon an. Sepandan, men sa li admèt: “Mwen te kòmanse wè mwen gen patipri.” Nan ki sans? Sarah te sot nan yon fanmi kote moun yo se entèlektyèl e l te prefere fè zanmi ak moun ki menm jan an. Yon fwa, li te menm di yon zanmi l: “M fè zanmi ak kwayan parèy mwen ki entèlektyèl. M pa fè zanmi ak moun ki pa entèlektyèl.” Sa klè, Sarah te bezwen chanje fason l panse. Ki jan?

13. Ki sa nou ka aprann nan fason Sarah te chanje fason l panse?

¹³ Gen yon siveyan sikonskripsyon ki te ede Sarah egzamine fason l panse. Men sa Sarah di: “Li te felisite m pou fidelite m, bon kòmantè m fè ak konpreyansyon m gen sou Bib la. Apre sa, li te ede m konprann plis konesans nou ap ogmante, se plis nou bezwen travay pou nou gen yon seri kalite tankou imilite e se plis nou bezwen rekonèt limit nou e nou bezwen gen konpasyon.” Sarah te fè sa siveyan sikonskripsyon an te di l la. Men sa l di: “Mwen te rann mwen kont sa k pi enpòtan se pou nou aji avèk bonte ak lanmou.” Sa te fè li kòmanse wè frè ak sè yo yon lòt fason. Men sa l esplike: “Mwen te chèche konprann ki kalite ki fè yo gen anpil valè pou Jewova.” E nou menm? Pinga nou janm panse nou gen plis valè pase lòt moun paske nou te  resevwa pi gwo fòmasyon pase yo! Si nou “renmen tout frè nou yo” anpil, nou pap gen patipri. — 1 Pyè 2:17.

14. Selon Ebre 13:16, ki jan Jewova santi l lè nou montre nou renmen akeyi moun?

¹⁴ Jewova kontan anpil lè nou montre nou renmen akeyi moun. (Li Ebre 13:16.) Nan je Jewova, sa fè pati adorasyon n ap ba li a, sitou lè nou ede moun ki nan bezwen (Jak 1:27; 2:14-17). Se sa k fè Ekriti yo ankouraje nou pou n “pran abitid akeyi moun”. (Wom. 12:13.) Lè nou renmen akeyi moun, nou montre toutbon nou gen lanmou ak afeksyon e nou vle vin zanmi yo. Kit sa nou ba yo a se yon ti bagay pou yo pase nan bouch yo, yon bagay pou yo bwè, oswa nou ofri yo manje, oubyen tan nou ak atansyon nou, Jewova kontan lè nou fè sa (1 Pyè 4:8-10). Men, gen kèk bagay ki ka fè l difisil pou nou akeyi moun.

15-16. a) Poukisa kèk moun ka yon ti jan renka pou yo akeyi moun? b) Ki sa k te ede Edit pou l vin pi dispoze akeyi moun?

¹⁵ Nou ka renka pou nou akeyi moun akoz sitiyasyon nou. Ann pran egzanp yon vèv ki rele Edit. Anvan l te vin Temwen Jewova, li pa t tèlman renmen pran kontak ak moun. Edit te panse gen lòt moun ki te ka akeyi moun pi byen pase l.

¹⁶ Lè Edit te vin Temwen Jewova, li te chanje fason l panse. Li te fè efò pou l renmen akeyi moun. Men sa l di: “Lè yo t ap konstwi Sal Wayòm nou an, gen yon ansyen ki te mande m si m ka akeyi yon mari ak madanm k ap vin patisipe nan pwojè a pou de semèn. Mwen te sonje jan Jewova te beni vèv Safat la.” ​(1 Wa 17:12-16). Edit te dakò akeyi mesyedam yo lakay li. Èske l te jwenn benediksyon? Men sa l di: “De semèn te vin tounen de mwa. Pandan tan sa a, nou te vin bon zanmi.” Mete sou sa, li te vin jwenn benediksyon  lefètke l te vin gen bon zanmi nan kongregasyon an. Jodi a li se pyonye e li kontan resevwa patnè predikasyon l yo lakay li. Men sa l di: “Lè m bay, sa fè m santi m byen! Alaverite m resevwa anpil benediksyon.” — Ebre 13:1, 2.

17. Ki sa Luc ak madanm li te vin konprann?

¹⁷ Petèt nou deja konn akeyi moun, men, èske nou ka fè plis efò toujou? Pa egzanp, Luc ak madanm li se de moun ki renmen akeyi moun. Yo te gen abitid envite paran yo, fanmi yo, bon zanmi yo ak siveyan sikonskripsyon an ak madanm li. Sepandan, men sa Luc di: “Nou te vin rann nou kont se moun ki bon zanmi nou sèlman nou te konn envite.” Ki jan Luc ak madanm li te vin fè plis efò pou yo akeyi moun?

18. Ki jan Luc ak madanm li te vin fè plis efò pou yo akeyi moun?

¹⁸ Luc ak madanm li te chanje fason yo te wè bagay yo lè yo te reflechi sou pawòl Jezi te di yo. Men sa Jezi te di: “Si se moun ki renmen nou nou renmen sèlman, ki rekonpans nou merite pou sa?” ​(Mat. 5:45-47). Yo te vin konprann yo te bezwen imite Jewova, paske li donan ak tout moun. Donk, yo te deside envite frè ak sè yo potko janm envite. Men sa Luc di: “Kounye a, nou tout renmen ti moman sa yo anpil. Tout moun santi yo jwenn fòs ak ankourajman.”

19. Ki jan nou montre nou se disip Jezi, e ki sa w detèmine pou w fè?

¹⁹ Nou te egzamine ki jan gwo lanmou nou gen youn pou lòt la ka ede nou pou n renmen fè lapè, pou n pa gen patipri e pou n renmen akeyi moun. Nou dwe elimine kèlkeswa santiman negatif nou ta genyen e n dwe renmen frè n ak sè n yo anpil ak tout kè nou. Si nou fè sa, kè n ap kontan e n ap montre n se disip Jezi toutbon. — Jan 13:17, 35.