NAN jou ki te samdi 25 avril 2015 lan, te gen yon tranblemanntè 7.8 ki te sakaje Nepal, yon peyi ki gen anpil mòn ki nan nò peyi End. Tranblemanntè a te frape yon zòn ki nan yon distans 80 kilomèt, nan direksyon nòdwès, parapò ak Katmandou, kapital la. Malerezman, gen plis pase 8 500 moun ki te mouri, konsa, tranblemanntè sa a se te katastwòf ki te touye plis moun nan tout katastwòf ki te frape Nepal yo. Plis pase yon demi milyon kay te kraze. Gen 2 200 Temwen Jewova nan peyi Nepal, e pifò nan yo t ap viv nan zòn kote tranblemanntè a te pase a. Malerezman, gen yon Temwen ak de pitit li ki te mouri.

Selon yon Temwen Jewova ki rele Michelle: “Tranblemanntè a te frape nan moman kote kongregasyon ki nan zòn kote te gen plis dega yo t ap fè reyinyon. Si l te fèt nan moman anpil nan moun yo te lakay yo, pa gen dout nan sa, t ap gen plis moun ki mouri.” Sa k fè moun ki t ap asiste reyinyon yo te chape? Youn nan pi gwo rezon yo se fason yo te fè Sal Wayòm yo.

Yo te konstwi nouvo Sal Wayòm ki nan peyi Nepal yo yon fason pou yo te reziste anba tranblemanntè. Men sa Man Bahadur, ki patisipe nan konstriksyon Sal Wayòm yo, fè konnen: “Byen souvan, yo konn mande nou poukisa nou fè fondasyon yo solid konsa, alòske konstriksyon yo pa gwo pase sa. Kounye a, nou wè byenfè yo!” Apre tranblemanntè a, frè ki responsab travay predikasyon an nan peyi Nepal yo, te bay apwobasyon pou yo sèvi ak Sal Wayòm yo kòm abri. Malgre replik yo, Temwen Jewova yo ak vwazen yo te santi yo an sekirite ladan yo.

San pèdi tan, ansyen yo te kòmanse chèche moun yo pa t jwenn nouvèl yo nan kongregasyon yo. Gen yon Temwen ki rele Babita ki di: “Ansyen yo te mete byennèt kongregasyon an anvan byennèt pa yo. Sa te touche nou pou nou wè lanmou yo genyen.” Nan jou ki te vin apre tranblemanntè a, twa manm komite ki t ap sipèvize travay Temwen Jewova yo ap fè nan peyi Nepal yo, ansanm ak kèk siveyan itineran, oswa siveyan sikonskripsyon, te kòmanse vizite kongregasyon yo pou yo te ka konnen sa frè ak sè yo te bezwen e pou yo te ka ede ansyen ki nan zòn nan.

Sis jou apre tranblemanntè a, Gary Breaux, ki sot nan Syèj mondyal Temwen Jewova yo ki Ozetazini, te vin Nepal ak madanm li, Ruby. Men sa Reuben, yon manm komite nou te mansyone pi wo a, te di: “Nou pa t konnen si frè Breaux t ap ka vini akoz tout pwoblèm ak dezòd ki te gen nan Katmandou yo e akoz replik yo. Men, li te pran detèminasyon pou l vini. E li te vini vre! Se pa ti kontan Temwen nan zòn nan te kontan vizit li a.”

Silas travay nan biwo Temwen Jewova yo nan peyi Nepal. Men sa l di: “Kou rezo telefòn yo te ranje, telefòn nan te pran sonnen lajounen kou lannuit! Lòt Temwen k ap viv toupatou sou tè a te enkyete pou nou. Gen kèk nan yo ki te pale lang nou pa t ka konprann, men, malgre sa, nou te santi lanmou yo gen pou nou ak gwo dezi yo te genyen pou yo ede nou.”

Plizyè jou apre tranblemanntè a, Temwen nan zòn nan te pote manje nan Sal Wayòm  yo pou yo pataje ak moun ki te nan bezwen yo. Mete sou sa, yo te mete yon komite sekou sou pye akoz katastwòf la, e nan yon tikras tan, yo te kòmanse voye yon pakèt pwovizyon, e pifò nan yo te soti nan peyi Bengladèch, nan peyi End ak nan peyi Japon. Nan kèk jou sèlman, gen yon ekip medikal ki te gen kèkTemwen ladan l ki te soti ann Ewòp ki te vini e ki te tabli nan youn nan Sal Wayòm yo. Lapoula, yo te kòmanse travay, nonsèlman yo te verifye eta sante moun ki te viktim tranblemanntè a, men tou yo te ede yo ak efè chòk tranblemanntè a te gen sou yo.

Gen yon dam ki rele Uttara ki di sa anpil moun te santi: “Tranblemanntè a te tèrib e li te fè nou pè. Men apre sa, se premye fwa nou te santi nou pwòch konsa ak frè ak sè nou yo.” Vrèmanvre, tranblemanntè a pa t febli lanmou pèp Jewova a gen pou li ak lanmou yo gen youn pou lòt. Okontrè, li te fè lanmou sa a vin pi plis.