DANIEL AK MIRIAM te marye nan mwa septanm 2000 e yo te abite nan vil Baselòn, ann Espay. Men sa Daniel fè konnen: “Nou t ap mennen yon vi ki swadizan nòmal.” Li kontinye pou l di: “Travay nou te pèmèt nou gen mwayen pou n manje nan bon restoran, pou n vwayaje, e pou n met bon rad. Epitou, nou te konn patisipe nan travay predikasyon an regilyèman.” Men annapre, bagay yo te vin chanje.

Nan yon kongrè ki te fèt an 2006, gen yon diskou yo te fè ki te touche Daniel anpil ki te gen kesyon ki vin apre a ladan l: “Èske n fè tout sa n kapab pou n ede ‘moun yo pral touye k ap mache tou faya yo’ pou yo vin sou wout ki mennen nan lavi ki pap janm fini an?” (Pwo. 24:11). Diskou sa a te met aksan sou responsablite pou n fè moun konnen mesaj nan Bib la k ap sove lavi yo (Tra. 20:26, 27). Men sa Daniel di: “M te santi se kòmsi se avè m Jewova t ap pale.” Anplis de sa, diskou a te montre lè yon moun fè plis nan travay predikasyon an, sa fè l gen plis kè kontan. Daniel te konnen pawòl sa yo se laverite. Miriam te gentan kòmanse ap sèvi kòm pyonye e l te jwenn anpil benediksyon ki te fè kè l kontan.

Men sa Daniel fè konnen: “M te di tèt mwen li lè pou m fè gwo chanjman nan lavi m.” E l te fè sa vre. Li te diminye nan kantite tan li te konn travay, li te kòmanse sèvi kòm pyonye, e l te kòmanse ap reflechi ak lajwa li menm ak Miriam t ap jwenn si yo t al sèvi kote yo bezwen plis pwoklamatè Wayòm nan.

An me 2007, Daniel ak Miriam te kite travay yo e yo t al abite Panama, yon peyi yo te deja vizite. Nouvo tèritwa yo a te fè pati plizyè zile nan achipèl Bokas dèl Towo ki nan Lanmè Karayib, e se pèp Ngabe a k ap viv nan pifò tèritwa sa a. Daniel ak Miriam te panse si yo te sèvi ak lajan yo te sere yo, yo t ap ka viv nan peyi Panama pandan anviwon uit mwa.

Yo te vwayaje nan zile yo sou bato ak sou bisiklèt, e yo byen sonje premye vwayaj yo te fè sou bisiklèt kote yo te fè yon distans anviwon 32 kilomèt ap vwayaje sou tèt mòn anba yon solèy ki cho anpil. Daniel te manke endispoze tèlman l te fatige. Men, fanmi nan pèp Ngabe a ki te abite sou tout wout la te byen akeyi yo lakay yo, sitou apre koup la te fin aprann kèk ekspresyon nan lang yo pale a. Sa pa t pran tan pou yo gen 23 etid Labib y ap kondui.

Sepandan, lè lajan mesyedam yo te fini, se tristès ki te pran plas kè kontan yo te genyen an. Men sa Daniel fè konnen: “Se ak dlo nan je nou te kòmanse ap reflechi pou n retounen ann Espay. Nou te tris anpil pou n kite etidyan Labib nou yo.” Men, yon mwa annapre, yo te jwenn yon bon nouvèl. Men sa Miriam di: “Yo te envite n al sèvi kòm pyonye espesyal. Se pa ti kontan nou te kontan dèske n te kapab rete nan asiyasyon nou!”

An 2015, akoz chanjman ki te gen nan òganizasyon an, yo te mande Daniel ak Miriam pou yo kontinye sèvis yo antanke pyonye pèmanan. Ki sa yo t ap fè? Yo te met konfyans yo nan pwomès nou jwenn nan Sòm 37:5 lan ki di: “Kite Jewova dirije wout ou. Met konfyans ou nan li e li menm l ap ede w.” Yo te jwenn yon travay pou ede yo nan sèvis pyonye a, e kounye a, y ap sèvi nan yon kongregasyon ki nan pwovens Veragwas, nan Panama.

Men sa Daniel fè konnen: “Anvan n te kite Espay, nou pa t panse nou t ap ka mennen yon vi senp. Jodi a, se sa n ap fè, e nou pa manke anyen ki vrèman enpòtan.” Ki pi gwo jwa yo genyen? Men sa yo di: “Se yon jwa ki san parèy pou n ede moun ki gen imilite aprann konnen Jewova!”