1-3 Ki byenfè n ap jwenn lè nou imite Jewova nan fason li demontre lanmou?

“YON moun pi kontan lè l bay pase lè l resevwa.” ​(Travay 20:35). Pawòl sa yo Jezi te di kore gwo verite sa a: Lè yon moun gen lanmou ki pouse l pa wè tèt li sèlman, sa fè l jwenn anpil byenfè. Se vre, lè yo demontre lanmou anvè yon moun, sa fè moun sa a kontan anpil, men, yon moun jwenn plis kè kontan toujou lè se li menm ki demontre lanmou anvè lòt moun.

² Pa gen yon moun ki pi byen konnen verite sa a pase Papa nou ki nan syèl la. Jan nou deja wè sa nan chapit anvan yo ki nan pati sa a, se Jewova ki bay pi bèl egzanp nan demontre lanmou. Pa gen yon moun ki te janm demontre yon pi gwo lanmou pase l, oswa ki te janm demontre lanmou pandan plis tan pase l. Donk, nou ka konprann se pa san rezon ki fè yo rele Jewova “Bondye ki gen kè kontan an”. — 1 Timote 1:11.

³ Bondye nou an, ki renmen nou anpil, vle pou nou fè efò pou nou imite l, sitou nan zafè demontre lanmou. Men sa Efezyen 5:1, 2 fè konnen: “Se pou nou imite Bondye, antanke pitit li renmen, e se pou nou kontinye mache nan lanmou.” Lè nou imite Jewova nan zafè demontre lanmou, nou jwenn anpil kè kontan. Anplis de sa, nou gen anpil satisfaksyon dèske nou konnen n ap fè kè Jewova kontan, paske Pawòl li a ankouraje nou pou nou gen “lanmou [...] youn pou lòt”. (Women 13:8.) Men, nou gen yon lòt rezon ki fè nou dwe “kontinye mache nan lanmou”.

4, 5. Poukisa li enpòtan pou nou demontre lanmou ki pouse nou fè sakrifis la pou kretyen parèy nou yo?

⁴ Poukisa li enpòtan pou nou demontre lanmou anvè kretyen parèy nou yo? Yon fason senp, nou ka di se lanmou ki alabaz vrè krisyanis lan. San lanmou, nou pa ka santi nou pwòch kretyen parèy nou yo, e sa k pi enpòtan an sèke, si nou pa gen lanmou, nou pa gen okenn valè nan je Jewova. Ann egzamine jan Pawòl Bondye a mete aksan sou verite sa yo.

⁵ Nan dènye nuit Jezi te pase sou tè a, men sa Jezi te fè disip li yo konnen: “M ap ban nou yon nouvo kòmandman: se pou nou youn renmen lòt. Menm jan mwen renmen nou an, nou menm tou, se pou nou youn renmen lòt. Tout moun ap konnen nou se disip mwen si nou gen lanmou nan mitan nou.” ​(Jan 13:34, 35). Ekspresyon “jan mwen renmen nou an” ede nou konprann aklè Labib ban nou lòd pou nou demontre menm kalite lanmou Jezi te demontre a. Nan chapit 29 la, nou te wè jan Jezi te kite yon bèl egzanp nan demontre lanmou ki pouse yon moun fè sakrifis pou lòt moun, e nou te wè jan l te mete enterè lòt moun anvan enterè pa l. Nou menm tou, nou dwe demontre lanmou ki pouse nou pa wè tèt nou sèlman, e sa dwe tèlman parèt aklè, menm moun ki pa fè pati kongregasyon kretyen an ap ka rive wè sa. Wi, lanmou ki pouse nou fè sakrifis pou frè nou yo se mak ki idantifye nou antanke vrè disip Kris.

6, 7. a) Kòman nou fè konnen demontre lanmou se yon bagay Pawòl Jewova a bay anpil valè? b) Sou ki aspè nan lanmou pawòl apot Pòl te di yo nou jwenn nan 1 Korentyen 13:4-8 la pale?

⁶ E si nou ta wè nou manke gen lanmou lakay nou? Men sa apot Pòl te fè konnen: “Si m [...] pa gen lanmou, mwen vin tounen yon gong k ap sonnen, oswa  yon senbal k ap fè bri.” ​(1 Korentyen 13:1). Yon senbal k ap fè bri bay yon vye son. Men, ki sa nou ka di pou yon gong k ap sonnen? Gen yon lòt tradiksyon Labib ki mete “yon klòch k’ap sonnen”. Egzanp sa yo byen tonbe! Yon moun ki pa gen lanmou tankou yon enstriman mizik k ap fè anpil bri e ki deranje zòrèy moun. Yon bri konsa plis deranje moun olye li atire yo. Kòman yon moun konsa ta fè gen bon relasyon ak lòt moun? Men sa apot Pòl te ajoute: “Si mwen tèlman gen lafwa mwen ka deplase mòn, men mwen pa gen lanmou, mwen pa anyen.” ​(1 Korentyen 13:2). Fè yon ti reflechi, menmsi yon moun ta fè anpil gwo bagay, si li pa gen lanmou, li se “yon moun ki pa itil anyen”. (The Amplified Bible.) Èske li pa klè demontre lanmou se yon bagay Pawòl Jewova a bay anpil enpòtans?

 ⁷ Men, kòman nou ka demontre kalite sa a anvè lòt moun? Pou nou reponn kesyon sa a, ann egzamine pawòl apot Pòl te di yo nou jwenn nan 1 Korentyen 13:4-8. Nan vèsè sa yo, apot Pòl pa t ap pale de lanmou Bondye gen pou nou ni de lanmou nou gen pou Bondye, men, li t ap pale pito de fason nou dwe demontre lanmou youn pou lòt. Li te esplike kèk bagay pou ede nou konprann sa lanmou ye ak sa lanmou pa ye.

8 Kòman pasyans ka ede nou nan relasyon nou gen ak lòt moun?

⁸ “Lanmou gen pasyans.” Lè nou gen pasyans, sa mande pou nou sipòte lòt moun (Kolosyen 3:13). Èske se pa nou tout ki bezwen gen yon pasyans konsa? Etandone nou enpafè e n ap sèvi Jewova kòtakòt, li toutafè nòmal pou nou atann nou, detanzantan, kretyen parèy nou yo ka deranje nou e nou ka deranje yo tou. Men, lè nou gen pasyans ak metriz, sa ka ede nou viv ak lòt moun malgre ti defo yo genyen, san nou pa kraze lapè ki genyen nan kongregasyon an.

9. Ki fason nou ka demontre byenveyans anvè lòt moun?

⁹ “Lanmou gen [...] byenveyans.” Yon moun ka demontre byenveyans lè l fè bonjan aksyon pou ede lòt moun e li di bèl ti pawòl pou ankouraje yo. Lanmou pouse nou chèche fason pou nou demontre byenveyans anvè lòt moun, sitou anvè moun ki plis bezwen nou demontre byenveyans anvè yo. Pa egzanp, sa ka rive gen yon kretyen parèy nou ki aje ki bezwen moun pase tan avè l, oubyen ki ta renmen yon moun ba l yon ti vizit pou ankouraje l. Yon manman k ap leve pitit li poukont li, oswa yon sè k ap viv nan yon kay kote tout moun pa Temwen Jewova ka bezwen moun ba l yon ti kout men. Yon moun ki malad oswa k ap fè fas ak yon gwo pwoblèm ka  bezwen tande yon zanmi fidèl di l bon ti pawòl pou ankouraje l (Pwovèb 12:25; 17:17). Lè nou pran devan pou nou fè bagay sa yo, se demontre nou demontre jan nou renmen kretyen parèy nou yo. — 2 Korentyen 8:8.

10. Ki jan lanmou ede nou pou nou defann laverite e pou nou pa kache l, menm lè li pa fasil pou nou fè sa?

¹⁰ “Lanmou [...] pran plezi nan sa ki verite.” Gen yon lòt tradiksyon Labib ki mete: “Lanmou [...] kontan ak laverite.” Lanmou pouse nou pou nou toujou fè sa ki dwat e pou nou “youn di lòt laverite”. (Zekarya 8:16.) Pa egzanp, si yon moun nou renmen fè yon peche ki grav, lanmou nou gen pou Jewova ak lanmou nou gen pou moun nan ap fè nou rete fidèl ak prensip Jewova yo olye nou eseye kache sa moun nan te fè a, oswa bay eskiz pou sa l te fè a, oswa bay manti pou kache sa l te fè a. Se vre, li ka pa fasil pou nou aksepte sa k rive a. Men, si se nan enterè moun nou renmen an nou ye vre, n ap anvi li jwenn konsèy ak disiplin ki soti nan men Bondye lanmou an, e n ap byen kontan si moun nan byen reyaji devan konsèy ak disiplin sa yo (Pwovèb 3:11, 12). Anplis de sa, antanke kretyen ki demontre lanmou, nou ta renmen “konpòte nou yon fason ki dwat nan tout bagay”. — Ebre 13:18.

11. Lefètke lanmou sipòte tout bagay, ki jan nou ta dwe reyaji devan defo frè ak sè nou yo genyen?

¹¹ “Lanmou [...] sipòte tout bagay.” Ekspresyon sa a vle di mo pou mo “Li kouvri tout bagay”. (Kingdom Interlinear.) Men sa 1 Pyè 4:8 fè konnen: “Lanmou kouvri yon pakèt peche.” Wi, yon kretyen ki kite lanmou dirije l pap chèche fè lòt moun konnen defo kretyen parèy li yo genyen. Jeneralman, erè kretyen parèy nou yo fè pa twò grav, e nou ka kouvri yo ak lanmou. — Pwovèb 10:12; 17:9.

12. Ki jan apot Pòt te montre li te gen konfyans nan Filemon, e ki sa nou ka aprann nan egzanp apot Pòl?

 ¹² “Lanmou [...] kwè tout bagay.” Dapre tradiksyon Moffatt la, lanmou “toujou ap chèche gen konfyans nan sa ki pi bon an”. Nou pa dwe sispèk kretyen parèy nou yo pou granmesi, oswa gen dout sou sa k pouse yo aji. Lanmou ede nou “gen konfyans nan sa ki pi bon” ki gen lakay frè nou yo, e li ede nou gen konfyans nan yo *. Ann pran yon egzanp nou jwenn nan lèt apot Pòl te ekri Filemon an. Apot Pòl te ekri Filemon pou l ankouraje l pou l byen resevwa Onezim, yon esklav Filemon te genyen ki te sove kite lakay li e ki te vin kretyen. Olye Pòl te eseye fòse Filemon aksepte Onezim, li te eseye touche kè l pito. Pòl te fè Filemon konnen li te kwè l ap fè sa ki dwat la. Men sa l te di Filemon: “Mwen gen konfyans w ap obeyi, se poutèt sa mwen ekri w, piske mwen konnen w ap menm fè plis pase sa mwen di yo.” ​(Vèsè 21.) Lè se lanmou ki pouse nou demontre konfyans nan frè nou yo, sa ap fè yo bay tout yo menm nan sa nou mande yo fè a.

13. Ki jan nou ka montre nou vle wè sa k pi bon an pou frè nou yo?

¹³ “Lanmou [...] espere tout bagay.” Lanmou pa sèlman kwè, men li gen espwa tou. Lefètke nou gen lanmou, nou vle wè sa k pi bon an pou frè nou yo. Pa egzanp, si yon frè “fè yon fo pa san l pa rann li kont”, nou ta renmen li byen reyaji devan konsèy yo ba li yo (Galat 6:1). Anplis de sa, nou pa janm pèdi espwa moun lafwa yo fèb yo ap repran fòs. Nou demontre pasyans anvè moun sa yo lè nou fè tout sa nou kapab pou nou ede yo vin gen yon lafwa ki djanm ankò (Women 15:1; 1 Tesalonisyen 5:14).  Menm lè yon moun nou renmen anpil ta pase prensip Bondye yo anba pye, nou pa pèdi espwa yon jou l ap tounen nan bon sans li epi l ap vin jwenn Jewova, menm jan pitit gason gaspiyè a te fè sa nan egzanp Jezi te bay la. — Lik 15:17, 18.

14. Nan ki sans nou ka rankontre sitiyasyon ki ka mete andirans nou aleprèv anndan kongregasyon an, e kòman lanmou ka ede nou byen reyaji devan sitiyasyon sa yo?

¹⁴ “Lanmou [...] andire tout bagay.” Lè yon moun gen andirans lakay li, sa ede l kanpe tennfas devan pwoblèm ak difikilte. Se pa toujou deyò kongregasyon an nou konn rankontre sitiyasyon ki mete andirans nou aleprèv. Pafwa, se anndan kongregasyon an nou konn rankontre sitiyasyon sa yo. Piske nou enpafè, pafwa sa ka rive nou gen pwoblèm ak frè nou yo. Yon pawòl youn nan yo di san reflechi ka fè nou mal anpil (Pwovèb 12:18). Petèt, nou pa fin dakò ak fason yo regle yon pwoblèm nan kongregasyon an. Konpòtman yon frè tout moun respekte ka deranje w, e w ka ap mande tèt ou: ‘Kòman yon kretyen fè aji konsa?’ Lè n ap fè fas ak yon sitiyasyon konsa, èske n ap kite kongregasyon an epi nou sispann sèvi Jewova? Nou pap fè yon bagay konsa si nou gen lanmou lakay nou. Wi, lanmou nou gen lakay nou pap fè nou rete konsantre sou defo frè nou yo opwen pou nou pa ka wè bon bagay yo gen lakay yo oswa bon bagay ki gen nan kongregasyon an. Lanmou ede nou rete fidèl ak Bondye e li ede nou soutni kongregasyon an malgre sa yon lòt moun enpafè menm jan avè nou ta di oswa ta fè. — Sòm 119:165.

15. Ki sa jalouzi ye, e kòman lanmou ka ede nou evite gen jalouzi?

¹⁵ “Lanmou pa jalou sò moun.” Si nou se moun ki jalou sò moun, sa ka lakòz nou vin anvye sa lòt moun genyen,  tankou sa yo posede, privilèj yo jwenn oswa kapasite yo genyen. Yon jalouzi konsa fè yon moun chèche pwòp enterè pa l e li fè l gen move dezi nan kè l. Si yon moun kontinye konsa, sa ka retire lapè ki gen nan kongregasyon an. Ki sa ki ka ede nou reziste kont “anvi nou gen nan nou”? (Jak 4:5.) Se lanmou ki ka ede nou fè sa. Bèl kalite sa a ka ede nou kontan pou yon moun ki sanble ap jwi kèk avantaj nou menm nou pa genyen (Women 12:15). Lefètke nou gen lanmou, sa ede nou pou nou pa fache lè moun fè lwanj pou yon moun pou kapasite moun sa a genyen oswa pou yon bagay moun sa a fè.

16. Si nou renmen frè nou yo toutbon, poukisa n ap evite vante tèt nou pou sa nou rive fè nan sèvis Jewova a?

¹⁶ “Lanmou [...] pa vante tèt li, li pa kite ògèy plen tèt li.” Lè nou gen lanmou, sa anpeche nou ap mache fè elòj pou tèt nou akoz kapasite nou genyen oswa akoz bagay nou rive fè. Si nou renmen frè nou yo toutbon, kòman nou ta fè toutan ap vante tèt nou pou bon rezilta nou jwenn nan travay predikasyon an oswa pou privilèj nou genyen nan kongregasyon an? Si nou vante tèt nou konsa, sa ka dekouraje lòt moun, e sa ka fè yo santi yo pa vo anyen lè yo wè yo pa ka fè sa nou rive fè. Lanmou pap kite nou vante tèt nou pou privilèj nou jwenn nan sèvis n ap bay Bondye a (1 Korentyen 3:5-9). An reyalite, lanmou “pa kite ògèy plen tèt li” oswa, jan yon lòt tradiksyon Labib fè konn sa, lanmou “pa met nan tèt li li se yon pakèt afè”. Wi, lanmou anpeche nou pran tèt nou pou yon pakèt afè. — Women 12:3.

17. Ki konsiderasyon lanmou ap pouse nou gen pou lòt moun, e ki konduit lanmou ap fè nou evite genyen?

¹⁷ “Lanmou [...] pa aji yon fason ki endesan.” Yon moun ki aji yon fason ki endesan aji yon fason ki choke lòt  moun. Lè yon moun aji konsa, li montre li pa bay santiman ak byennèt lòt moun regle anyen pou li, e sa pa demontre li gen lanmou lakay li. Men, lè yon moun gen lanmou lakay li, li aji byen ak moun paske lanmou pouse l demontre konsiderasyon pou lòt moun. Lanmou ankouraje nou pou nou aji avèk jantiyès, pou nou gen bon konduit e pou nou montre respè pou kretyen parèy nou yo. Donk, lanmou pap pèmèt nou gen yon “konduit ki fè moun wont”, sa vle di nenpòt konduit ki ta choke oswa ofanse kretyen parèy nou yo. — Efezyen 5:3, 4.

18. Poukisa yon moun ki gen lanmou lakay li pap egzije pou bagay yo fèt jan l vle a?

¹⁸ “Lanmou [...] pa chèche pwòp enterè l.” Gen yon lòt tradiksyon Labib ki mete: “Lanmou pa ensiste pou bagay yo fèt jan l vle a.” Yon moun ki gen lanmou pa fòse moun fè sa li vle a, kòmkwa opinyon l genyen toujou kòrèk. Li pa chèche enfliyanse lòt moun lè l sèvi ak kapasite li genyen pou l konvenk lòt moun pou l fòse yo wè bagay yo menm jan avè l. Yon atitid konsa demontre ògèy, e Bib la fè konnen “moun ki gen ògèy ap tonbe kanmenm”. (Pwovèb 16:18.) Si nou renmen frè nou yo toutbon, n ap respekte fason yo wè bagay yo e, lè sa posib, n ap montre nou dispoze sede devan sa yo vle. Lè nou gen yon etadespri konsa, sa ann amoni ak pawòl sa yo apot Pòl te di: “Se pou chak moun kontinye chèche, non pa pwòp avantaj pa l, men avantaj pa lòt moun.” — 1 Korentyen 10:24.

19. Kòman lanmou ap ede nou byen reyaji lè yon moun fè nou yon bagay ki mal?

¹⁹ “Lanmou [...] pa fè kòlè fasil. Li pa note bagay mal yo fè l.” Lanmou pap fache pou ti krik ti krak. Se vre, lè yon  moun ofanse nou, li nòmal pou nou santi sa fè nou mal. Men, menm lè nou gen rezon pou nou an kòlè, lanmou pap kite nou rete an kòlè (Efezyen 4:26, 27). Nou pap pran yon kaye pou nou ekri tout sa moun nan fè nou ki pa bon oswa tout sa li di nou ki fè n fache, yon fason pou n pa janm bliye sa moun nan fè yo. Okontrè, lanmou ap pouse nou imite Bondye nou an ki gen anpil lanmou. Jan nou te wè nan chapit 26 la, Jewova padone nou lè li gen bonjan rezon pou sa. Lè li padone nou, li pa sonje peche nou yo dekwa pou l ta pini nou pi devan pou menm peche sa yo. Èske w pa rekonesan lefètke Jewova pa sonje peche li padone nou yo?

20. Ki jan nou t ap reyaji si yon kretyen parèy nou ta tonbe nan peche e sa ta lakòz li vin gen anpil pwoblèm?

²⁰ “Lanmou [...] pa pran plezi nan enjistis.” Gen yon lòt tradiksyon Labib ki mete: “Lanmou [...] pa pran plezi nan peche lòt moun.” Tradiksyon Moffatt la di: “Lanmou pa janm kontan lè yon moun aji mal.” Etandone lanmou pa rejwi nan enjistis, nou pa konsidere imoralite, sou kèlkeswa fòm nan, kòm yon bagay nou ka jwe avè l. Kòman nou reyaji lè yon kretyen parèy nou tonbe nan peche, e sa lakòz li vin gen gwo pwoblèm? Si nou gen lanmou, nou pap kontan pou sa k rive l la, e nou pap di: ‘Se bon pou li! Li merite sa.’ ​(Pwovèb 17:5). Sepandan, nou kontan lè yon frè ki te fè yon peche pran dispozisyon pou l korije sa l te fè ki pa t bon an.

21-23. a) Ki sa apot Pòl te vle di lè l te di “lanmou pa janm fayi”? b) Ki sa nou pral egzamine nan dènye chapit liv sa a?

²¹ “Lanmou pa janm fayi.” Ki sa apot Pòl te vle di la a? Lè nou egzamine kontèks la, apot Pòl t ap pale konsènan don lespri sen kretyen yo te resevwa nan premye syèk la.  Don sa yo te montre aklè kongregasyon kretyen ki te fèk fòme a te gen favè Bondye. Men se pa tout kretyen ki te ka fè gerizon oswa pwofetize oswa pale an lang. Sepandan, don sa yo pa t pi enpòtan pase sa, paske, pi devan, yo te gen pou disparèt. Men, te gen yon lòt bagay ki t ap rete, yon bagay tout kretyen t ap bezwen genyen. Li t ap pi estrawòdinè, li t ap dire plis tan pase nenpòt lòt don. Anfèt, apot Pòl te rele l “yon chemen estrawòdinè”. (1 Korentyen 12:31.) Ki sa “chemen estrawòdinè” a ye? Se lanmou.

²² Wi, lanmou kretyen yo dwe genyen apot Pòl t ap pale a “pa janm fayi”, sa vle di li pap janm fini. Jis jounen jodi a, lanmou ki pouse nou fè sakrifis pou frè nou  yo fè moun konnen kiyès ki vrè disip Jezi yo. Èske w pa wè yon lanmou konsa nan kongregasyon kote moun yo ap sèvi Jewova toupatou sou tè a? Lanmou sa a ap la pou toutan, paske Jewova pwomèt sèvitè fidèl li yo lavi ki pap janm fini an (Sòm 37:9-11, 29). Annou toujou fè efò pou nou fè tout sa nou kapab pou nou “kontinye mache nan lanmou.” Lè nou fè sa, n ap ka jwenn pi gwo kè kontan moun jwenn lè yo renmen bay. Anplis de sa, n ap ka kontinye viv, wi n ap ka kontinye demontre lanmou pou toutan, toutpandan n ap imite Jewova, Bondye nou an ki gen anpil lanmou.

²³ Nan chapit sa a ki se dènye chapit nan pati ki pale sou lanmou an, nou te egzamine kòman nou ka demontre lanmou youn pou lòt. Men, lefètke nou jwenn anpil byenfè grasa lanmou Jewova demontre a, menm jan nou jwenn anpil byenfè grasa pisans li, jistis li ak sajès li, nou dwe mande tèt nou: ‘Kòman mwen ka montre Jewova mwen renmen l toutbonvre?’ Nou pral egzamine kesyon sa a nan dènye chapit liv sa a.