1, 2. Poukisa yon papa ki gen lanmou kontan wè pitit gason l obeyi l, e kòman santiman papa sa a reflete santiman Jewova ?

 YON papa ap gade nan fenèt li, l ap obsève tigason l lan k ap jwe avèk kèk zanmi. Balon y ap jwe a sot nan lakou a al nan lari a. Tigason an ap suiv balon an ak je l e li anvi al pran l. Youn nan zanmi l yo ankouraje l pou l kouri al pran balon an nan lari a. Men, tigason an sekwe tèt li, li di : “ Mwen pa gen pèmisyon pou m fè sa. ” Papa a santi l kontan.

² Poukisa papa a kontan konsa ? Se paske li te bay pitit gason l lan enstriksyon pou l pa sot nan lari a poukont li. Lè tigason an obeyi, menm lè li pa konnen si papa a ap obsève l, papa a konnen se aprann pitit li a ap aprann obeyisans, e kòm rezilta, pitit la plis an sekirite. Papa sa a gen menm santiman ak Jewova, Papa nou ki nan syèl la. Bondye konnen pou nou ret fidèl e pou nou viv bèl avni ki sere pou nou an, nou dwe aprann fè l konfyans e nou dwe aprann obeyi l (Pwovèb 3:5, 6). Se poutèt sa li te voye pi bon anseyan pami lèzòm nan ban nou.

3, 4. Kòman sa fè posib pou Jezi te “ aprann obeyisans ” e pou yo te “ fè l vin pafè ” ? Bay yon egzanp.

³ Labib di yon bagay sou Jezi ki etonan : “ Aktout li te yon Pitit Gason, li te aprann obeyisans nan bagay li te sibi yo, e apre yo fè l vin pafè, li vin koz lavi etènèl pou tout moun ki obeyi l. ” ​(Ebre 5:8, 9). Pitit Gason sa a te egziste nan syèl la depi yon kantite tan moun pa ka konte. Li te wè Satan ak zanj rebèl parèy li yo ki dezobeyi, men premye Pitit Gason Bondye te fè a pa t janm fè ekip ansanm avèk yo. Pwofesi enspire a aplike pawòl sa yo sou li : “ E mwen menm, [...] mwen pa t fè rèd. ” ​(Izayi 50:5). Nan ka sa a, ki jan pawòl sa yo ki di “ li  te aprann obeyisans ” lan ka aplike sou Pitit Gason obeyisan sa a ? Ki jan yon kreyati konsa ki deja pafè, yo ka “ fè l vin pafè ” ?

⁴ Annou pran yon egzanp. Yon sòlda gen yon epe an fè. Kwak yo pa janm teste epe sa a nan batay, li byen fèt pou travay li pral akonpli a e yo modle l avèk elegans. Sòlda a chanje epe sa a pou youn ki fèt ann asye, yon metal ki pi solid. Nouvo epe sa a deja sèvi nan batay avèk efikasite. Èske n pa wè se yon echanj ki saj ? Menm jan an tou, obeyisans Jezi te demontre anvan l te vin sou tè a te san fay. Men, apre pasaj li sou tè a, obeyisans li te atenn yon lòt nivo. Kounye a, li te teste, se kòmsi li te vin solid, e li te pase aleprèv pa mwayen yon seri pwoblèm Jezi pa t ap janm ka rankontre nan syèl la.

5. Ki sa k te fè obeyisans Jezi a enpòtan konsa, e ki sa nou pral analize nan chapit sa a ?

⁵ Obeyisans te esansyèl nan misyon Jezi te genyen lè l te vin sou tè a. Antanke “ dènye Adan ”, Jezi te vin sou tè a pou l fè sa premye paran nou an pa t rive fè a : kontinye obeyi Jewova Dye menm anba eprèv (1 Korentyen 15:45). Epoutan, obeyisans Jezi a pa t yon bagay otomatik, yon bagay li fè pou lafòm. Jezi te obeyi ak tout lespri l, ak tout kè l e ak tout nanm li. E li te fè sa ak kè kontan. Fè volonte Papa l te pi enpòtan pou li pase manje (Jan 4:34) ! Ki sa k ap ede nou imite obeyisans Jezi a ? Toudabò, nou pral reflechi sou sa ki te motive Jezi. Si nou devlope menm motivasyon ak Jezi, sa ap ede nou nonsèlman pou nou reziste devan tantasyon, men tou pou nou kontinye fè volonte Bondye. Apre sa, nou pral wè kèk rekonpans n ap jwenn si nou demontre yon obeyisans ki sanble ak pa Kris la.

6, 7. Site kèk bagay ki te motive Jezi pou l obeyi.

⁶ Obeyisans Jezi a te soti nan bèl kalite li te genyen nan kè l. Jan nou te wè sa nan chapit 3 a, Kris te gen imilite nan kè l. Awogans fè moun meprize obeyisans, tandiske imilite ede  nou obeyi Jewova volontèman (Egzòd 5:1, 2 ; 1 Pyè 5:5, 6). Anplis de sa, obeyisans Jezi a te soti nan sa l te renmen e nan sa l te rayi.

⁷ Sa ki pi enpòtan an, sèke Jezi te renmen Jewova, Papa selès li a. N ap pale plis an detay sou lanmou sa a nan chapit 13 la. Yon lanmou konsa te ede Jezi devlope lakrentif pou Bondye. Lanmou li pou Jewova te tèlman pisan, li te tèlman gen yon respè ki mele ak lakrentif pou Jewova, li te pè pou l pa deplè Papa l. Lakrentif Jezi te gen pou Bondye se te youn nan rezon ki fè Bondye te konn koute priyè Jezi yo (Ebre 5:7). Epitou, lakrentif pou Jewova se youn nan karakteristik dominasyon Jezi antanke Wa mesyanik. — Izayi 11:3.

8, 9. Jan sa te pwofetize, ki jan Jezi te santi l anrapò ak sa ki jis e anrapò ak mechanste, e ki jan l te kite santiman sa yo parèt aklè ?

⁸ Yon lòt bò, lanmou pou Jewova mande pou nou rayi sa Jewova rayi. Pa egzanp, note sa yon pwofesi ki gen rapò ak  Wa mesyanik la di : “ Ou renmen jistis e ou rayi mechanste. Se poutèt sa Bondye, Bondye w la, wenn ou ak luil lajwa plis pase konpayon w yo. ” ​(Sòm 45:7). “ Konpayon ” Jezi yo se te lòt wa ki te soti nan liy fanmi wa David. Nan moman yo t ap wenn Jezi a, li te gen rezon pou l rejwi anpil, pou l gen yon gwo kè kontan, plis pase nenpòt nan konpayon l yo. Sa k fè sa ? Ebyen, rekonpans li pi gwo lontan pase rekonpans pa yo, wayote l la pi pwofitab lontan pase wayote pa yo a. Li jwenn rekonpans paske lanmou li genyen pou sa ki jis ak lahèn li genyen pou mechanste te pouse l obeyi Bondye nan tout bagay.

⁹ Ki jan Jezi te eksprime santiman l aklè anrapò ak sa ki jis e anrapò ak mechanste ? Pa egzanp, lè disip Jezi yo te jwenn bon rezilta paske yo te obeyi direksyon l te ba yo nan travay predikasyon an, ki jan l te reyaji ? Li te vin gen yon sèl kè kontan (Lik 10:1, 17, 21) ! E lè plizyè fwa, moun Jerizalèm yo te demontre yon etadespri dezobeyisan, kote yo rejte efò Jezi fè avèk amou pou l ede yo, ki jan l te santi l ? Li te kriye akoz chemen rebelyon vil sa a te pran an (Lik 19:41, 42). Konduit moun te gen anpil enpòtans pou Jezi, kit se bon konduit, kit se move konduit.

10. Ki santiman nou bezwen kiltive anrapò ak bon aksyon e anrapò ak move aksyon, e ki sa k ap ede nou kiltive santiman sa yo ?

¹⁰ Lè nou medite sou santiman Jezi yo, sa ede nou egzamine pwòp tèt pa nou anrapò ak sa ki motive nou pou nou obeyi Jewova. Menmsi nou enpafè, nou ka kiltive yon lanmou sensè pou sa ki bon e nou ka kiltive yon gwo lahèn pou move konduit. Nou bezwen priye Jewova pou nou mande l ede nou kiltive santiman ki sanble ak santiman pa l e ki sanble ak pa Pitit Gason l lan (Sòm 51:10). Anmenmtan, nou dwe evite enfliyans k ap febli santiman sa yo. Li esansyèl pou nou chwazi avèk swen ni detant n ap pran ni moun n ap frekante (Pwovèb 13:20 ; Filipyen 4:8). Si nou chèche gen menm motivasyon ak Kris, obeyisans nou pap yon senp fòmalite. N ap fè sa ki jis paske nou renmen fè sa. N ap evite move aksyon, pa  paske nou pè pou yo pa dekouvri nou, men paske nou rayi konduit konsa.

11, 12. a) Ki sa k te rive Jezi byen bonè nan ministè li ? b) Ki jan Satan te sèvi ak taktik ki rize nan premye tantasyon l te mete devan Jezi a ?

¹¹ Byen bonè nan ministè Jezi, li te sibi yon eprèv ki t apral teste lahèn li genyen pou peche. Apre batèm li, li te pase 40 jou ak 40 nuit nan dezè a, san manje. Nan finisman peryòd sa a, Satan te vin tante l. Gade ki jan Dyab la te rize. — Matye 4:1-11.

¹² Toudabò, Satan di : “ Si w se yon pitit Bondye, di wòch sa yo pou yo tounen pen. ” ​(Matye 4:3). Ki jan Jezi te santi l apre pakèt tan li te fè san l pa manje a ? Bib la di aklè : “ Li te grangou. ” ​(Matye 4:2). Donk, Satan te jwe sou dezi natirèl yon moun genyen pou l manje, sandout, volontèman li te tann jiskaske Jezi febli fizikman. Epitou, remake pawòl pwovokan Satan te lanse : “ Si w se yon pitit Bondye. ” Satan te konnen Jezi te “ fèt an premye nan tout kreyasyon an ”. (Kolosyen 1:15.) Antouka, Jezi pa t kite Satan fè l antre nan dezobeyisans. Jezi te konnen se pa t volonte Bondye pou l sèvi ak pouvwa li pou l satisfè dezi egoyis li. Li te refize fè sa, li te montre li apiye l sou Jewova avèk imilite pou l jwenn sa l bezwen pou l viv e pou l dirije lavi l. — Matye 4:4.

13-15. a) Ki dezyèm e ki twazyèm tantasyon Satan te mete devan Jezi, e ki jan Jezi te reyaji ? b) Ki jan nou fè konnen Jezi pa t janm ka bese vijilans li devan Satan ?

¹³ Nan dezyèm tantasyon an, Satan te mennen Jezi nan yon zòn ki byen wo, sou balistrad tèt tanp lan. Avèk ladrès, Satan te tòde Pawòl Bondye a, li tante Jezi pou Jezi fè yon egzibisyon pou l soti anlè lage kò l anba, konsa, zanj yo ta atrap li. Si foul moun ki nan tanp lan ta wè yon mirak konsa, ou kwè apre sa yon moun ta oze doute se Jezi ki Mesi yo te pwomèt la ? E si foul la ta aksepte Jezi kòm Mesi a sou baz yon  egzibisyon konsa, èske Jezi pa ta ka evite yon pakèt soufrans ak pwoblèm ? Petèt. Men, Jezi te konnen se te volonte Jewova pou Mesi a fè travay li avèk imilite, se pa t volonte Jewova pou l fè gwo egzibisyon pou moun ka kwè nan li (Izayi 42:1, 2). La ankò, Jezi te refize dezobeyi Jewova. Gwo renome pa t atire l.

¹⁴ Men, e atirans ki genyen nan pouvwa ? Nan twazyèm tantativ Satan an, li te ofri Jezi tout wayòm ki gen nan monn nan si Jezi ta fè yon senp jès adorasyon pou li. Èske Jezi te medite sou òf Satan an ? Men sa l te reponn : “ Al fè wout ou, Satan. ” E li ajoute : “ Paske sa ekri : ‘ Se Jewova Dye w la ou dwe adore, e se li menm sèl ou dwe bay yon sèvis sakre. ’ ” ​(Matye 4:10). Pa gen anyen ki t ap janm pouse Jezi adore yon lòt dye. Okenn òf pouvwa oswa okenn òf pou l ta vin yon moun ki gen enfliyans nan monn sa a pa t ap pouse l komèt kèlkeswa zak dezobeyisans lan.

¹⁵ Èske Satan te kite sa ? Se vre li te kite Jezi apre Jezi te fin ba l lòd fè sa. Sepandan, Evanjil Lik la fè konnen Dyab la “ te retire kò l bò kote l annatandan yon lòt moman apwopriye ”. (Lik 4:13.) Vrèmanvre, Satan t apral jwenn lòt okazyon pou l teste Jezi e pou l tante l, jiska lafen. Labib di nou Jezi “ te sibi eprèv nan tout domèn ”. (Ebre 4:15.) Kidonk, Jezi pa t janm ka bese vijilans li, e nou menm tou, nou pa dwe janm bese vijilans nou.

16. Ki jan Satan tante sèvitè Bondye yo jodi a, e ki jan nou ka kontrekare efò l ap fè yo ?

¹⁶ Satan kontinye ap tante sèvitè Bondye yo jodi a. Malerezman, byen souvan akoz enpèfeksyon nou, li fasil pou l atenn nou. Avèk riz, Satan jwe sou tandans egoyis nou gen lakay nou, sou ògèy ak tandans nou genyen pou nou kouri dèyè pouvwa. Satan ka menm sèvi ak tout tandans sa yo ansanm lè l itilize pyèj materyalis ! Li esansyèl detanzantan pou nou pran tan pou nou egzamine tèt nou onètman. L ap bon pou nou medite sou pawòl nou jwenn nan 1 Jan 2:15-17 la. Etan n ap fè sa, nou ka mande tèt nou si tikras pa tikras, dezi lachè  ki nan sistèm sa a, swaf pou byen materyèl ak dezi pou nou enpresyone lòt moun pa diminye lanmou nou pou Papa nou ki nan syèl la nan yon sèten degre. Nou dwe sonje monn sa a sou wout pou l pase menm jan ak Satan, chèf li a. Annou rejte efò l ap fè avèk riz pou l twonpe nou, pou l fè nou peche ! Annou suiv egzanp Mèt nou an, paske “ li pa t fè peche ”. — 1 Pyè 2:22.

17. Ki jan Jezi te santi l anrapò ak obeyi Papa l, epoutan ki objeksyon kèk moun ka soulve ?

¹⁷ Obeyisans ale pi lwen lontan pase annik pa fè peche. Kris te konn suiv chak lòd Papa l ba li. Li te deklare : “ Mwen toujou fè sa ki fè l plezi. ” ​(Jan 8:29). Obeyisans sa a te bay Jezi gwo lajwa. Natirèlman, gen moun ki ka fè konprann sa te mwens konplike pou Jezi obeyi. Petèt, moun sa yo met nan tèt yo Jezi te gen kont pou l rann sèlman bay Jewova, ki pafè, alòske nou menm, byen souvan, nou gen pou nou obeyi moun enpafè ki nan pozisyon kote yo gen otorite. Alaverite, Jezi te konn obeyi moun enpafè ki te nan pozisyon kote yo gen otorite.

18. Lè Jezi te jèn, ki jan l te yon egzanp nan kesyon obeyisans ?

¹⁸ Lè Jezi t ap grandi, li te anba otorite paran l, Jozèf ak Mari, ki te enpafè. Sandout, plis pase pifò timoun, li te ka wè defo ki lakay paran l. Èske li te rebele, kòmkwa li kite wòl Bondye ba li antanke timoun pou l ap di yo ki jan pou yo dirije yon fanmi ? Gade sa Lik 2:51 di sou Jezi, lè l te gen 12 an : “ Li te kontinye soumèt li devan yo. ” Pa mwayen obeyisans sa a, li trase yon bèl egzanp pou jèn kretyen yo k ap fè efò pou yo obeyi paran yo e pou yo respekte yo kòmsadwa. — Efezyen 6:1, 2.

19, 20. a) Ak ki sitiyasyon difisil espesyal Jezi te fè fas anrapò ak obeyi moun ki enpafè ? b) Poukisa vrè kretyen yo jodi a dwe obeyi moun k ap dirije pami yo ?

¹⁹ Anrapò ak obeyi moun ki enpafè, Jezi te fè fas ak sitiyasyon difisil vrè kretyen jodi a pa janm rankontre. Reflechi  sou epòk espesyal li t ap viv la. Depi lontan, Jewova te apwouve sistèm relijye juif la ansanm ak tanp li an ki Jerizalèm, ansanm ak pretriz li a, men li te sou wout rejte l pou l ranplase l ak kongregasyon kretyen an (Matye 23:33-38). Antretan, anpil chèf relijye t ap anseye manti ki soti nan filozofi grèk. Koripsyon te tèlman pran yon ekstansyon nan tanp lan, Jezi te rele tanp lan “ yon gwòt vòlè ”. (Mak 11:17.) Èske Jezi te evite ale nan tanp sa a ak nan sinagòg yo ? Non ! Jewova te toujou ap itilize dispozisyon sa yo. Annatandan Bondye te entèvni e annatandan li te chanje bagay yo, avèk obeyisans, Jezi te kontinye ale nan fèt ki te konn fèt nan tanp lan e l te kontinye ale nan sinagòg la. — Lik 4:16 ; Jan 5:1.

²⁰ Si Jezi te konn obeyi nan sikonstans sa yo, nou pa bezwen mande ki jan vrè kretyen yo dwe rete obeyisan jodi a ! Anfèt, n ap viv nan yon epòk ki vrèman diferan, nan moman retablisman adorasyon ki pa kontamine yo te predi depi lontan an. Bondye ban nou asirans li pap janm kite Satan kòwonp pèp li a li restore a (Izayi 2:1, 2 ; 54:17). Se vre, nou jwenn peche ak enpèfeksyon nan kongregasyon kretyen an. Men, èske nou ta dwe sèvi ak mankman ki lakay lòt moun kòm yon eskiz pou nou dezobeyi Jewova, petèt pou  nou sispann asiste reyinyon oswa pou nou vin ap kritike ansyen yo ? Sa pa ta dwe janm rive ! Okontrè, ak tout kè nou, n ap soutni moun ki pran latèt nan kongregasyon an. Avèk obeyisans, nou asiste reyinyon yo, nou al nan kongrè e nou aplike konsèy biblik nou resevwa nan rasanbleman sa yo. — Ebre 10:24, 25 ; 13:17.

21. Ki jan Jezi te reyaji devan presyon lèzòm t ap fè pou l dezobeyi Bondye, e konsa, ki egzanp li kite pou nou ?

²¹ Jezi pa t janm kite lòt moun, menm zanmi l ki te gen bon entansyon, anpeche l obeyi Jewova. Pa egzanp, apot Pyè te eseye fè Jezi, Mèt li a, konprann li pa t nesesè pou l soufri e pou l mouri. Yon fason fèm, Jezi te rejte konsèy Pyè a, yon konsèy li te bay ak bon entansyon, men ki te mal oryante, kote l te mande Jezi pou l bon ak tèt li (Matye 16:21-23). Jodi a, byen souvan, moun k ap suiv Jezi yo fè fas ak paran ki gendwa ak tout bon entansyon yo ap eseye dekouraje yo pou yo pa obeyi lwa ak prensip Bondye mete. Menm jan ak disip Jezi nan premye syèk la, nou kenbe menm prensip sa a ki fè konnen “ nou dwe obeyi Bondye antanke chèf olye nou obeyi lèzòm ”. — Travay 5:29.

22. Repons ki kesyon Jezi te bay, e kòman l te fè sa ?

²² Lè Jezi te devan lanmò, obeyisans li te sibi pi gwo eprèv la. Nan jou sonm sa a, “ li te aprann obeyisans ” nan yon degre ki san parèy. Li te fè volonte Papa l, se pa t volonte pa l li te fè (Lik 22:42). Konsa, li te tou kite yon egzanp entegrite ki pafè (1 Timote 3:16). Li te vin tounen repons kesyon ki la depi lontan an : Èske yon imen ki pafè ka kontinye obeyi Jewova menm lè l sibi eprèv ? Adan te echwe, e se menm bagay la pou Èv. Apre sa, Jezi te vini, li te viv, li te mouri e li te trase yon egzanp san fay. Moun sa a ki pi gran pami kreyati Jewova yo te bay repons ki pi pisan ki posib la. Li te obeyi menm lè obeyisans li te koute l chè anpil.

23-25. a) Nan ki sans obeyisans gen rapò ak entegrite ? Bay yon egzanp. b) Sou ki sa chapit ki vin apre a pral pale ?

 ²³ Se obeyisans ki demontre entegrite yon moun oswa atachman yon moun genyen pou Jewova ak tout kè l. Piske Jezi te obeyi, li te prezève entegrite l e li fè tout limanite tire pwofi (Women 5:19). Jewova te rekonpanse Jezi ann abondans. Si nou obeyi Kris, Mèt nou an, Jewova ap rekonpanse nou tou menm jan an. Obeyi Kris mennen nan “ delivrans etènèl ” ! — Ebre 5:9.

²⁴ Anplis de sa, entegrite poukont pa l se yon rekonpans. Pwovèb 10:9 di : “ Moun ki mache nan entegrite ap mache an sekirite. ” Si nou ta konpare entegrite ak yon gwo kay ki fèt ak bèl blòk, chak aksyon ki demontre obeyisans ka sanble ak yon grenn blòk. Yon blòk poukont pa l ka parèt ensiyifyan, men chak blòk gen plas li, chak blòk gen enpòtans li. E lè yo mete plizyè blòk ansanm, yo rive bati yon bagay ki gen plis valè lontan pase yon sèl blòk. Lè nou mete plizyè aksyon ki demontre obeyisans ansanm, lè nou ajoute yo youn sou lòt jou apre jou, ane apre ane, nou bati bèl kay entegrite nou an.

²⁵ Yon obeyisans ki kontinye avèk letan raple nou yon lòt kalite : andirans. Jezi kite egzanp pou nou sou pwen sa a e se sou sa chapit ki vin apre a pral pale.