AN 1964, m te jwenn asiyasyon pou m al pyonye espesyal nan Manokwari, Papwazi delwès, kote yon ti kongregasyon t ap fè fas ak gwo opozisyon anba men klèje nan zòn nan. Kou m rive nan zòn nan, gen yon pastè potestan ki te debake lakay mwen.

Li te di m avèk raj: “M pral kraze kay sa a epi m ap retire tout Temwen Jewova nan Manokwari.”

Etandone m te gen fòmasyon antanke polisye, sa l t ap di yo pa t fè m ni cho ni frèt. Men m te reponn li avèk kalm epi, finalman, li te ale anpè. — 1 Pyè 3:15.

Nan epòk sa a, te gen uit pwoklamatè nan Manokwari. Jodi a, anviwon 50 an annapre, gen sèt kongregasyon nan zòn nan. Gen plis pase 1 200 moun ki te asiste kongrè ki te fèt nan zòn nan an 2014. Lè m wè tout sa Jewova reyalize nan ti zòn byen lwen sa a, m santi kè m ranpli ak satisfaksyon.