KI SA w pi renmen: travay oswa jwe? — An reyalite, pa gen anyen ki mal pou yon moun jwe. Bib la di Jerizalèm te ‘plen ak tigason ak tifi ki t ap jwe sou plas piblik li yo.’ — Zekarya 8:5.

Gran Anseyan an te konn pran plezi ap gade timoun k ap jwe. Anvan l te vin sou tè a, li te di: “Mwen vin tankou yon ouvriye abil bò kote [Bondye], [...] mwen t ap rejwi devan l tout tan.” N ap remake Jezi t ap travay ansanm ak Jewova nan syèl la. E, pandan l te nan syèl la, li di: “Bagay mwen te renmen anpil yo te avèk pitit gason lèzòm.” Wi, jan nou te aprann sa deja, gran Anseyan an te enterese toutbon nan  chak moun, san wete timoun yo. — Pwovèb 8:30, 31.

Dapre ou menm, èske Jezi te konn jwe lè l te piti? — Sanble li te konn jwe. Men, piske li te “yon ouvriye abil” nan syèl la, èske li te konn travay tou sou tè a? — Pa bliye, yo te rele Jezi “pitit gason bòs chapant lan”. Men yo te rele l “bòs chapant” tou. Ki sa sa montre? — Sa montre Jozèf, ki te elve Jezi kòm pitit gason l, dwe te montre l metye a. Se konsa, Jezi te vin yon bòs chapant li menm tou. — Matye 13:55; Mak 6:3.

Ki jan de bòs chapant Jezi te ye? — Piske li te yon ouvriye abil nan syèl la, ou pa panse li te vin maton nan metye bòs  chapant lan sou tè a? — Reflechi sou jan travay yon bòs chapant pa t fasil nan epòk sa a. Siman Jezi te oblije deplase al koupe yon pyebwa, fè l fè plizyè moso, pote bwa a lakay e, apre sa, li te oblije travay bwa a pou fè tab, ban ak lòt bagay.

Èske w panse Jezi te jwenn plezi nan travay sa a? — Ou pa t ap kontan si w te ka fè bèl tab, bèl chèz ak lòt bagay pou moun sèvi? — Selon Bib la, li bon pou yon moun “rejwi nan travay li”. Lè w travay, ou jwenn yon plezi ou pa ka jwenn nan jwe. — Eklezyas 3:22.

An reyalite, travay bon pou ni lespri nou, ni kò nou. Anpil timoun annik rete chita ap gad televizyon oswa ap jwe jwèt videyo. Sa fè yo vin twò gwo, yo vin fèb e yo pa vrèman gen kè kontan. Yo pa fè kè lòt moun kontan tou. Ki sa nou bezwen fè pou nou gen kè kontan? —

Nan chapit 17 liv sa a, nou te aprann lè nou bay e lè nou fè kèk bagay pou nou ede lòt moun, sa ban nou kè kontan (Travay 20:35). Bib la rele Jewova “Bondye ki gen kè kontan an”. (1 Timote 1:11.) Epitou, tankou nou te li sa nan liv Pwovèb la, Jezi t ap ‘rejwi devan [Bondye] tout tan’. Poukisa Jezi te gen kè kontan? — Ebyen, li te bay youn nan rezon yo, lè l te di: “Papa m pa sispann travay jis kounye a, e mwen pa sispann travay.” — Jan 5:17.

Lè Jezi te sou tè a, li pa t travay kòm bòs chapant tout vi li. Jewova Dye te gen yon travay espesyal li te ba l fè sou tè a. Èske w konn ki travay? — Men sa Jezi te di: “Fòk mwen al anonse bon nouvèl wayòm Bondye a, paske se pou sa yo te voye m.” ​(Lik 4:43). Pafwa, lè Jezi te preche moun yo, yo te konn kwè sa l di yo a e yo te konn pale ak lòt moun de bagay li te di yo, menm jan Samaritèn ou wè la a te fè sa. — Jan 4:7-15, 27-30.

 Kòman Jezi te konsidere travay sa a li te gen pou l fè a? Dapre ou menm, èske se yon travay li te renmen? — Men sa Jezi te di: “Manje pa m se fè volonte sila a ki voye m nan e pou m fin fè travay li nèt.” ​(Jan 4:34). Lè w ap manje yon manje ou renmen, èske w pa pran plezi nan sa? — Sa montre w kòman Jezi te pran plezi pou l fè travay Bondye te ba l fè a.

Jan Bondye fè nou an, lè n ap aprann travay, sa ban nou kè kontan. Bondye di kado li bay lòm, se pou li “rejwi nan travay di li fè”. Donk, si w aprann travay pandan w jèn, w ap gen plis kè kontan diran tout vi w. — Eklezyas 5:19.

Sa pa vle di yon timoun piti ka fè travay yon granmoun, men nou tout ka fè yon seri de travay. Petèt paran w deplase al travay chak jou pou yo ka jwenn lajan pou fanmi an jwenn manje pou yo manje ak yon kote pou yo rete. Men, tankou w konnen, gen bon ti kou travay ki bezwen fèt nan kay la pou l ka ret pwòp, pou l ka ret bèl.

Ki travay ou ka fè k ap bon pou tout fanmi an? — Ou ka ede ranje kouvè sou tab la, ou ka lave asyèt, jete fatra, netwaye chanm ou e ou ka ranmase jwèt ou yo. Petèt ou deja konn fè kèk nan bagay sa yo. Travay sa yo vrèman itil fanmi an.

Annou wè nan ki sans jan de travay sa yo bon pou fanmi an. Dapre ou menm, poukisa li bon pou nou mete jwèt nou yo nan plas yo apre nou fin jwe avèk yo? — Sa ede nou kenbe kay la annòd, e sa ka anpeche aksidan. Si w pa ranmase jwèt ou yo, yon jou, manman w gendwa ap rantre ak de bra l byen chaje, epi pye l al tonbe sou youn nan jwèt ou yo. Li ka bite, li ka tonbe e li ka pran yon chòk. Petèt li ka menm oblije al lopital. Èske sa pa t ap grav? — Donk, lè w mete jwèt ou yo nan plas yo apre w fin jwe, se yon bon bagay pou tout moun.

 Gen lòt travay toujou timoun dwe fè. Pa egzanp, yo dwe travay lekòl. Nan lekòl, yo aprann ou li. Gen timoun ki twouve lekti se yon bagay ki amizan, men gen lòt ki di li difisil. Menmsi okòmansman, sa sanble l difisil, w ap kontan si w aprann li byen. Lè w konn li, gen anpil bagay enteresan ou ka aprann. W ap menm kapab li poukont ou nan Bib la, liv Bondye a. Donk, lè w byen travay lekòl, sa ap itil ou toutbon, pa vre? —

Gen moun ki konn refize travay. Petèt ou konn kèk moun ki konsa. Men, piske Bondye te fè nou pou nou travay, nou bezwen aprann pran plezi ladan l. Nan ki pwen gran Anseyan an te renmen travay li te konn fè a? — Pou li menm, travay sa a se te tankou manje manje li pi renmen an. E ki travay sa a li t ap pale a? — Se te pale ak lòt moun konsènan Jewova Dye, se te fè yo konnen ki jan yo ka jwenn lavi etènèl.

Men yon konsèy ki ka ede w renmen travay w ap fè. Poze tèt ou kesyon sa a: ‘Poukisa travay sa a nesesè?’ Lè w konnen enpòtans yon bagay, li pi fasil pou w fè l. Epi, kit se yon gwo travay, kit se yon ti travay, fè l byen. Si w fè sa, w ap jwenn kè kontan nan pwòp travay ou, menm jan ak gran Anseyan an.