IMAJINE yon moun ba ou yon bèl kado. Ki jan w t ap santi w? — Èske w t ap annik di mèsi epi w bliye moun ki te ba w kado a nèt? Oswa èske w t ap sonje l e ou t ap sonje sa l te fè pou ou a? —

Jewova Dye ban nou yon kado estrawòdinè. Li te voye Pitit Gason l lan sou tè a pou l mouri pou nou. Èske w konn poukisa Jezi te oblije mouri pou nou? — Se yon bagay trèzenpòtan nou dwe konprann.

Jan nou te aprann sa nan chapit 23 a, Adan te peche lè l te vyole lwa pafè Bondye a. E nou eritye peche nan men Adan, zansèt nou tout. Donk, dapre ou menm, ki sa nou bezwen? — Nan yon sans, nou bezwen yon nouvo papa, yon moun ki te viv yon vi pafè sou tè a. Dapre ou menm, kiyès ki ka sèvi nou papa nan sans sa a? — Se Jezi.

Jewova te voye Jezi sou tè a yon fason pou l te ka tounen yon papa pou nou nan plas Adan. Men sa Bib la di: “‘Premye òm nan, Adan, te tounen yon nanm vivan.’ Dènye Adan an te tounen yon lespri ki bay lavi.” Kiyès premye Adan an te ye? — Se te moun Bondye te kreye ak pousyè tè a. E dezyèm Adan an, kiyès li ye? — Se Jezi. Se sa Bib la montre lè l di: “Premye òm nan [Adan] soti nan tè, e li fèt ak pousyè. Dezyèm òm nan [Jezi] soti nan syèl.” — 1 Korentyen 15:45, 47; Jenèz 2:7.

 Piske Bondye te pran lavi Jezi nan syèl la e li mete l anndan vant yon dam ki rele Mari, Jezi pa t eritye okenn peche nan men Adan. Se sa k fè Jezi te yon òm pafè (Lik 1:30-35). Se rezon sa a tou ki fè lè Jezi te fèt, yon zanj te di bèje yo pawòl sa yo: “Gen yon Sovè ki fèt pou nou jodi a.” ​(Lik 2:11). Men, pou Jezi, ki te yon tibebe, te ka vin Sovè nou, ki sa l te bezwen fè? — Li te bezwen grandi pou l tounen yon òm ki byen devlope, tankou Adan. Lè sa a, Jezi t ap kapab vin tounen ‘dezyèm Adan an’.

Jezi, Sovè nou an, pral tounen “Papa etènèl” nou tou. Yo rele l konsa nan Bib la (Izayi 9:6, 7). Wi, Jezi, ki san defo, ka vin papa nou nan plas Adan, ki te vin enpafè lè li te peche. Konsa, nou gen posiblite chwazi pou nou gen ‘dezyèm Adan an’ kòm papa nou. Natirèlman, Jezi li menm li se Pitit Gason Jewova Dye.

Nou ka aksepte Jezi kòm Sovè nou lè nou aprann konnen l. Èske w sonje anba ki sa nou bezwen sove? — Wi, anba peche ak lanmò nou eritye nan men Adan. Lavi pafè Jezi te genyen an, lè l fin gran, li te sakrifye l pou nou. Se sa yo rele ranson an. Jewova te bay ranson an yon fason pou nou ka jwenn padon pou peche nou. — Matye 20:28; Women 5:8; 6:23.

Nou pa vle bliye sa Bondye ak Pitit Gason l lan te fè pou nou, pa vre? —  Jezi te montre disip li yo yon bagay espesyal pou yo fè k ap ede yo sonje sa l te fè a. Ann fè yon ti pale sou sa.

Imajine ou nan yon chanm ki nan etaj yon kay nan Jerizalèm. Li aswè. Jezi ak apot li yo atab. Sou tab la, gen ti mouton boukannen, moso pen plat ak diven wouj. Y ap pran yon repa espesyal. Ou konn poukisa? —

Repa sa a la pou l fè yo sonje sa Jewova te fè sa gen plizyè santèn ane, lè Izrayelit yo, pèp li a, te esklav ann Ejip. Lè sa a, Jewova te di pèp li a pou yo ‘touye yon ti mouton  pou chak fanmi, e pou yo mete san ti mouton an nan ankadreman pòt kay yo’. Apre sa, li di: ‘Antre anndan kay nou, e manje ti mouton an.’

Se sa Izrayelit yo te fè. E nan menm nuit lan, yon zanj Bondye pase nan peyi Ejip. Zanj lan touye premye pitit nan pifò kay. Men, kay zanj lan te wè ki gen san ti mouton sou ankadreman pòt yo, li sote yo. Nan kay sa yo, okenn timoun pa t mouri. Farawon, wa Ejip la, vin pè akoz sa zanj Jewova a te fè a. Donk, Farawon di Izrayelit yo konsa: ‘Nou lib pou nou ale. Kite peyi Ejip!’ Lè sa a, Izrayelit yo mete sa yo posede yo sou chamo ak bourik, e yo ale.

Jewova pa t vle pou pèp li a bliye fason li te libere yo a. Se sa k fè, li di: ‘Yon fwa chak ane, ou dwe manje yon repa tankou repa ou manje aswè a.’ Yo te rele repa sa a Pak. Èske w konn poukisa? — Se paske mo sa a siyifi ‘pase anlè’ e, nan nuit sa a, zanj Bondye a te ‘pase anlè’ kay ki te gen mak san sou yo. — Egzòd 12:1-13, 24-27, 31.

Jezi ak apot li yo ap reflechi sou sa lè y ap manje manje Pak la. Apre sa, Jezi fè yon bagay ki gen anpil enpòtans. Men, anvan sa, li fè Jida, apot enfidèl la, ale. Lè Jida fin ale, Jezi pran youn nan moso pen ki rete yo, li priye sou li, li kase l e li pase l bay disip li yo. Li di yo: “Pran, manje.” Lèfini li di yo: ‘Pen sa a reprezante kò mwen m ap bay lè m ap mouri pou nou.’

Ansuit, Jezi pran yon koup diven wouj. Apre l fin fè yon lòt priyè pou l di Bondye mèsi, li pase diven an bay apot yo e li di yo: “Bwè ladan l, nou tout.” Epi li di yo: ‘Diven sa a reprezante san mwen. Talè konsa, m ap vèse san m pou m libere nou anba peche nou yo. Kontinye fè sa pou nou montre nou sonje m.’ — Matye 26:26-28; 1 Korentyen 11:23-26.

 Èske w remake Jezi te di disip li yo yo ta dwe kontinye fè sa pou yo montre yo sonje l? — Yo pa t ap gen pou yo manje Pak la ankò. Olye de sa, yon fwa chak ane, yo t ap gen pou yo pran repa espesyal sa a pou yo montre yo sonje Jezi e pou yo montre yo sonje lanmò l. Yo rele repa sa a Soupe Seyè a. Jodi a, nou konn rele l Memoryal. Poukisa? — Se paske li fè nou sonje sa Jezi ak Papa l, Jewova, te fè pou nou.

Pen an dwe fè nou reflechi sou kò Jezi. Li te dispoze sakrifye kò li pou nou ka gen lavi etènèl. E diven wouj la? — Li dwe raple nou valè san Jezi a genyen. Li gen plis valè pase san ti mouton yo te sèvi nan fèt Pak ann Ejip la. Èske w konn sa k fè sa? — Selon sa Bib la di, san Jezi ka fè nou jwenn padon pou peche nou. E lè tout peche nou fin efase, nou pap malad ankò, nou pap vyeyi ankò e nou pap mouri ankò. Nou dwe reflechi sou sa pandan n ap asiste Memoryal la.

Èske se tout moun ki dwe manje pen an e ki dwe bwè diven an nan Memoryal la? — Ebyen, men sa Jezi te di moun ki dwe manje pen an e ki dwe bwè diven an: ‘N ap patisipe nan wayòm mwen an e n ap chita sou twòn nan syèl la avèk mwen.’ ​(Lik 22:19, 20, 30). Sa siyifi yo ta gen pou yo ale nan syèl la pou yo ka wa avèk Jezi. Donk, se sèl moun ki gen espwa pou yo reye nan syèl la avèk Jezi ki dwe manje pen an e ki dwe bwè diven an.

Men, menm moun ki pa manje pen an oswa ki pa bwè diven an dwe asiste Memoryal la. Èske w konn poukisa? — Se paske Jezi te bay lavi l pou tout moun. Nou ladan l tou. Lè nou al nan Memoryal, nou montre nou pa bliye sa Jezi te fè pou nou. Nou sonje bèl kado Bondye fè nou an.