SEKSYON 9
Adore Jewova an fanmi
“Adore moun ki fè syèl la [ak] tè a.” — Revelasyon 14:7.
Jan w te aprann sa nan bwochi sa a, Bib la gen anpil prensip ki ka ede ou menm ak fanmi w. Jewova vle pou w gen kè kontan. Li pwomèt ou si w met adorasyon w ap ba li a an premye, “l ap ajoute tout lòt bagay” yo pou ou (Matye 6:33). Li vrèman vle pou w vin zanmi l. Sèvi ak tout okazyon w jwenn pou w devlope yon amitye ak Bondye. Se pi gwo privilèj yon moun ka genyen. — Matye 22:37, 38.
1 FÈ RELASYON W AK JEWOVA VIN PI SOLID
MEN SA BIB LA DI: “‘M ap vin yon papa pou nou, e n ap vin pitit gason m ak pitit fi m’, se sa Jewova di.” (2 Korentyen 6:18). Bondye vle w gen yon amitye sere sere avè l. Lapriyè se youn nan bagay ki ka ede w nan sans sa a. Jewova mande w pou w “priye toutan”. (1 Tesalonisyen 5:17.) Li vrèman anvi tande w k ap di l sa k nan panse w ak sa k ap trakase w (Filipyen 4:6). Lè w priye ak fanmi w, y ap kapab wè jis nan ki pwen Bondye reyèl pou ou.
Se vre w bezwen pale ak Bondye, men, ou bezwen koute l tou. W ap ka fè sa lè w etidye Pawòl li a ak piblikasyon ki baze sou Bib la (Sòm 1:1, 2). Byen reflechi sou sa w aprann yo (Sòm 77:11, 12). Yon lòt fason w ka koute Bondye, se lè w asiste reyinyon yo regilyèman. — Sòm 122:1-4.
Lè w pale ak lòt moun konsènan Jewova, se yon lòt fason ki enpòtan tou pou w fè relasyon w gen avè l la vin pi solid. Plis ou fè sa, se plis w ap santi w pwòch avè l. — Matye 28:19, 20.
SA W KA FÈ:
-
Rezève tan chak jou pou w li Bib la epi pou w priye.
-
Antanke fanmi, met aktivite espirityèl yo anvan detant ak divètisman.
2 PRAN PLEZI NAN ADORASYON AN FANMI AN
MEN SA BIB LA DI: “Pwoche bò kote Bondye e l ap pwoche bò kote nou.” (Jak 4:8). Ou bezwen fè yon pwogram pou w fè adorasyon an fanmi an regilyèman, epi w dwe respekte pwogram sa a (Jenèz 18:19). Men, ou bezwen fè plis toujou. Bondye dwe nan lavi w chak jou. Fè relasyon fanmi w gen ak Bondye a vin pi solid, lè w pale de Bondye ak yo ‘pandan w chita lakay ou, pandan w ap mache avèk yo sou wout, pandan w kouche ak lè w leve’. (Detewonòm 6:6, 7.) Fikse objektif pou w aji menm jan ak Jozye. Men sa l te di: “Kanta pou mwen menm ak fanmi m, se Jewova n ap sèvi.” — Jozye 24:15.
SA W KA FÈ:
-
Chèche fè yon bon pwogram selon bezwen chak moun nan fanmi an.
