Jezi t ap grandi Nazarèt, yon vil ki toupiti e ki pa t gen anpil enpòtans. Vil sa a nan nò, nan yon zòn nan Galile ki gen mòn e li nan lwès lak ki rele Lanmè Galile a.

Lè Jozèf ak Mari sot ann Ejip, petèt Jezi te gen anviwon dezan, e sanble se li menm sèl yo te genyen kòm pitit. Men, annapre, Jezi te vin gen plizyè frè bò kot manman, anpalan de Jak, Jozèf, Simon ak Jida. Jozèf ak Mari te vin gen pitit fi tou. Yo se sè Jezi bò kot manman. Donk, Jezi vin gen, pou pi piti, sis ti frè ak ti sè.

Natirèlman, Jezi gen lòt fanmi ankò. Nou deja gen enfòmasyon sou Elizabèt ak pitit gason l lan ki rele Jan. Jan t ap viv plizyè kilomèt nan sid, nan Jide. E gen Salome, petèt ki se sè Mari kidonk matant Jezi, ki abite pi pre nan Galile. Mari Salome a rele Zebede e de pitit gason yo genyen yo, anpalan de Jak ak Jan, sanble se premye kouzen Jezi yo. Nou pa konnen si Jezi te pase anpil tan ak timesye sa yo toutpandan yo t ap grandi, men annapre, toule de te vin apot Jezi e yo te vin pwòch avè l anpil.

Jozèf dwe travay di pou l pran swen fanmi l ki vin gen plis moun. Li se yon bòs chapant. Jozèf leve Jezi kòm pwòp pitit gason l, se poutèt sa yo rele Jezi “pitit bòs chapant lan”. (Matye 13:55.) Jozèf fòme Jezi pou l vin yon bòs chapant tou, e Jezi aprann vrèman byen. Se poutèt sa, annapre,  men sa moun yo konn di konsènan Jezi: “Èske se pa bòs chapant lan?” — Mak 6:3.

Fanmi Jozèf bay adorasyon y ap bay Jewova a anpil enpòtans nan lavi yo. Ann amoni ak Lwa Bondye a, Jozèf ak Mari bay pitit yo fòmasyon nan domèn espirityèl ‘lè yo chita anndan lakay yo, lè y ap mache avèk yo sou wout yo, lè yo kouche ak lè yo leve’. (Detewonòm 6:6-9.) Gen yon sinagòg nan Nazarèt, e nou kapab sèten Jozèf konn al ladan l regilyèman ak fanmi l pou yo adore Jewova. Annapre, yo fè konnen Jezi te konn al nan sinagòg la, “jan li abitye fè sa jou saba yo”. (Lik 4:16.) Men, se sèten fanmi an jwenn anpil kè kontan nan vwayaj yo konn fè regilyèman pou y al nan tanp Jewova a ki nan vil Jerizalèm.