Nonb 32:1-42
-
Ti zòn ki nan lès Rivyè Jouden yo (1-42)
32 Desandan Ribenn yo+ ak desandan Gad yo+ te vin gen anpil twoupo bèt, e yo te wè vil Jazè+ ak peyi Galaad se bon kote pou yo gade bèt.
2 Se sa k fè desandan Gad yo ak desandan Ribenn yo t al kote Moyiz ak Eleyaza, prèt la, ak chèf yo pami pèp la e yo te di yo:
3 “Rejyon Atawòt, Dibon, Jazè, Nimra, Esbon+, Eleyale, Sebam, Nebo+ ak Beyon+,
4 peyi Jewova te fè pèp Izrayèl la pote laviktwa sou li a+ se bon kote pou moun gade bèt e sèvitè w yo gen anpil bèt+.”
5 Epi, yo te di: “Si w dakò ak nou menm sèvitè w yo, fè yo ban nou peyi sa a kòm eritaj. Pa fè nou travèse Rivyè Jouden an.”
6 Lè sa a, Moyiz di desandan Gad yo ak desandan Ribenn yo: “Èske frè n yo pral nan lagè pandan nou menm nou ret isit la?
7 Poukisa pou n ta dekouraje pèp Izrayèl la pou l pa travèse al nan peyi Jewova ap ba li san mank lan?
8 Se sa zansèt nou yo te fè lè m te fè yo sot Kadèsbaneya pou y al gade peyi a+.
9 Lè yo t al nan Vale Echkòl+ e yo te wè peyi a, yo te dekouraje pèp Izrayèl la pou yo pa al nan peyi Jewova te di l ap ba yo a+.
10 Jewova te vin fache anpil jou sa a e li te fè sèman+, li te di:
11 ‘Mesye ki te sot ann Ejip yo, soti sa ki gen 20 an pou piti, pap wè peyi+ mwen te fè sèman m ap bay Abraram, Izarak ak Jakòb la+, paske yo pa t suiv mwen ak tout kè yo,
12 sof Kalèb+, pitit gason Jefoune a, desandan Kenaz, ak Jozye+, pitit gason Noun nan, paske yo te obeyi Jewova ak tout kè yo+.’
13 Se sa k fè Jewova te fache anpil kont pèp Izrayèl la e li te fè yo fè 40 an ap monte desann nan dezè a+, jiskaske tout jenerasyon moun ki t ap fè sa ki mal nan je Jewova yo te disparèt+.
14 Kounye a, nou menm, yon bann moun k ap fè peche, nou menm jan ak zansèt nou yo. Nou se yon ras moun ki lakòz Jewova vin pi an kòlè kont pèp Izrayèl la.
15 Si nou sispann obeyi l, se sèten l ap abandone pèp la nan dezè a, e n ap lakòz tout pèp la peri.”
16 Annapre, y al kote Moyiz, yo di l: “Kite nou fè kèk patiraj an wòch isit la pou twoupo mouton nou yo ak kèk vil pou pitit nou yo.
17 Men, n ap kontinye pare nou pou n al nan lagè+ e pou n al batay bò kote Izrayelit yo jiskaske nou mennen yo nan peyi ki pou yo a pandan pitit pa nou yo ap abite nan vil ki byen pwoteje yo pou lòt moun ki rete nan peyi a pa fè yo mal.
18 Nou pap retounen lakay nou toutotan chak Izrayelit pa resevwa pòsyon tè pa l kòm eritaj+,
19 paske nou pap resevwa yon eritaj ansanm avèk yo ni pa lòtbò Rivyè Jouden an ni pi lwen, piske nou deja resevwa eritaj pa nou nan bò ki bay sou lès Rivyè Jouden an+.”
20 Moyiz di yo: “Si nou fè sa vre, nou pran zam nou pou n al nan lagè devan Jewova+,
21 e si nou chak pran zam nou, nou travèse Rivyè Jouden an devan Jewova, pandan l ap fè ènmi l yo sot devan l+
22 jiskaske peyi a vin anba men Jewova+, apre sa nou mèt retounen lakay nou+. Nou pap koupab ni devan Jewova ni devan pèp Izrayèl la. Lè sa a, peyi sa a ap vin eritaj nou devan Jewova+.
23 Men, si nou pa fè sa, n ap peche kont Jewova. Lè sa a, nou mèt konnen n ap peye pou peche nou fè a.
24 Konsa, nou mèt bati vil pou pitit nou yo e nou mèt fè patiraj pou bèt nou yo+, men nou dwe respekte pwomès nou fè a.”
25 Desandan Gad yo ak desandan Ribenn yo di Moyiz: “Nou menm sèvitè w yo, n ap suiv egzakteman lòd ou menm, mèt nou an, ban nou.
26 Pitit nou yo, madanm nou yo, twoupo bèt nou yo ak tout bèt nou gen lakay nou yo ap ret la nan vil Galaad yo+,
27 men, nou menm sèvitè w yo, tout gason ki gen zam yo, n ap travèse pou n al fè lagè devan Jewova+, jan ou menm, mèt nou, ou di nou an.”
28 Se konsa, Moyiz te bay Eleyaza, prèt la, ak Jozye, pitit gason Noun nan, ak chèf fanmi nan tribi Izrayèl yo yon lòd konsènan mesye sa yo.
29 Moyiz te di yo: “Si desandan Gad yo ak desandan Ribenn yo travèse Rivyè Jouden an avèk nou, chak gason ak zam nan men yo pou yo fè lagè devan Jewova, e peyi a vin anba men nou, lè sa a n ap ba yo peyi Galaad kòm eritaj+.
30 Men, si yo pa pran zam yo pou yo travèse avèk nou, ebyen y ap abite nan mitan nou nan peyi Kanaran.”
31 Lè sa a, desandan Gad yo ak desandan Ribenn yo reponn: “Nou menm sèvitè w yo, se sa Jewova di nou n ap fè.
32 N ap pran zam nou e n ap travèse devan Jewova pou n al nan peyi Kanaran+, men se tèritwa ki nan direksyon lès Rivyè Jouden an nou dwe gen kòm eritaj.”
33 Se konsa, Moyiz bay desandan Gad yo ak desandan Ribenn yo+ ak moun ki nan demi tribi Manase+ ki te yon pitit gason Jozèf, wayòm Siyon an+, wa Amorit yo, ansanm ak vil ak tèritwa ki ozalantou l yo e li ba yo wayòm Òg la+, wa Bazan an, ansanm ak vil ak tèritwa ki ozalantou l yo.
34 Epi, desandan Gad yo bati* Dibon+, Atawòt+, Awoyè+,
35 Atwòtsofan, Jazè+, Jogbeya+,
36 Bètnimra+ ak Bètaran+, yon seri vil ki te byen pwoteje, e yo te fè patiraj an wòch pou mouton yo.
37 Desandan Ribenn yo te rebati Esbon+, Eleyale+, Kiryatayim+,
38 Nebo+ ak Baalmeyon+. Yo te chanje non vil sa yo. Yo te rebati Sibma tou. Yo te bay tout vil yo te rebati yo lòt non.
39 Desandan Maki yo+, yon pitit gason Manase, te mache sou peyi Galaad, yo te pran peyi a e yo te detwi Amorit yo ki te abite ladan l.
40 Epi, Moyiz bay desandan Maki yo, pitit gason Manase a, Galaad e yo te vin abite ladan l+.
41 Epi, Jayi, yon pitit gason Manase, te mache sou ti vil ki gen tant yo te genyen yo, li te pran yo e li te vin rele yo Avòtjayi*+.
42 Annapre, Noba te mache sou vil Kenat ak vil ki ozalantou l yo e ki sou kont li yo, epi li te pran yo. Li te bay Kenat pote non Noba, pwòp non pa l.
