Ki sa k vin nan lespri w lè w tande mo “apokalips” la? Petèt ou gendwa ap panse ak yon gwo katastwòf ki elimine tout sa k vivan sou tè a. Gen moun ki panse pa ret anpil tan pou yon katastwòf konsa frape tout tè a. Sitou lè y ap li yon seri nouvèl tankou sa ki parèt pi ba yo:

•   “Li posib pou gen yon gè nikleyè, kit se planifye yo te planifye l, kit se pa erè, oswa tou senpleman paske youn mal konprann lòt.” — Bulletin of the Atomic Scientists.

•   “Pandan dis ane ki sot pase yo, katastwòf k ap fèt toupatou sou tè a depase sa ki te konn fèt yo lontan. Pami yo, nou ka site siklòn, dife, sechrès, koray ki nan lanmè yo k ap pèdi koulè yo, gwo chalè ak inondasyon.” — National Geographic.

•   “Depi plizyè dizèn ane, kantite krikèt ki anvayi kontinan Afrik la vin pi plis e yo fè plis dega lontan.” — The Associated Press.

 Èske pral gen yon apokalips kote tout tè a pral detwi? Ki sa Bib la di?

 Non. Labib, Pawòl Bondye a, ban nou asirans tè a ap rete pou toutan (Eklezyas 1:4). Bondye pap detwi tè a li te kreye a. Men, okontrè, li pral “detwi moun k ap detwi tè a”. — Revelasyon 11:18.

 Selon Bib la, “monn” Bondye pral detwi a se tout moun ki meprize Bondye e ki chwazi fè sa yo vle. Bondye pral detwi yon monn kote moun yo pa “gen respè pou Bondye”, menm jan li te fè sa nan epòk Noye a. — 2 Pyè 2:5; 3:7.

 Selon 1 Jan 2:17, “monn nan ap pase, e dezi li genyen ap pase tou”. Vèsè sa a montre Bondye se pa tè a li pral detwi, men se moun ki kontinye fè sa ki pa bon li pral detwi.

 Bib la pa di nou egzakteman ki lè lafen an ap rive (Matye 24:36). Men, li fè konnen lafen an toupre rive. Men sa Bib la anonse:

•   Gen yon seri gwo evènman tankou lagè, rate manje, epidemi maladi, ak gwo tranblemanntè ki t ap fèt “nan yon zòn apre yon lòt”. — Matye 24:3, 7, 14; Lik 21:10, 11; Revelasyon 6:1-8.

•   Moun yo an jeneral, t ap aji yon fason ki egoyis anpil. Pa egzanp, yo t ap “renmen lajan”, yo t ap “engra” e yo t ap “san metriz”. — 2 Timote 3:1-5.

 Anpil moun dakò depi ane 1914, kondisyon ki gen nan monn nan koresponn ak sa Bib la te anonse yo e yo montre lafen an toupre rive. Pou w jwenn plis enfòmasyon, gade atik “Ki sa kwonoloji ki nan Bib la fè konprann konsènan ane 1914 la?” ak “Ki sa ki siy ‘dènye jou yo’ oswa ‘tan lafen an’?”

 Mo grèk lè yo tradui l yo mete “apokalips” pou li nan Bib la, vle di “dekouvri” oswa “devwale”. Byen souvan, yo sèvi ak mo sa a pou montre y ap fè konnen enfòmasyon ki kache. Bib la pale tou de “moman Seyè Jezi ap parèt” oswa, apokalips Seyè Jezi. Sa te fèt lè yo te fè konnen Jezi se sila a ki gen pouvwa pou l retire tout mechanste sou tè a e pou l rekonpanse moun k ap adore Bondye yo. — 2 Tesalonisyen 1:6, 7; 1 Pyè 1:7, 13.

 Yo rele dènye liv ki nan Bib la Apokalipsis, oswa Revelasyon, paske li anonse sa k pral rive alavni (Revelasyon 1:1). Liv sa a gen bon nouvèl ak yon mesaj espwa ladan l (Revelasyon 1:3). Li montre Bondye pral elimine tout enjistis e li pral fè tè a tounen yon paradi. Lè sa a, lèzòm pap gen doulè ankò, yo pap soufri e yo pap mouri. — Revelasyon 21:3, 4.

 Èske w ta renmen aprann plis sou bèl pwomès sa yo ki nan Bib la? Temwen Jewova yo ofri tout moun pou yo etidye Labib gratis avèk yo e etid sa a kapab ede w tou. Sa w panse si w ta kontakte yo jodi a?