An 1945, lè Dezyèm Gè mondyal la te fini, pifò kote ann Almay te kraze. Vil yo te kraze, lekòl yo te vid, lopital yo pa t an sèvis e bonm ki pa t eksploze te gaye toupatou. Mete sou sa, pa t gen ase manje pou tout moun, sa ki te lakòz pri manje yo wo anpil. Pa egzanp, yon moun t ap depanse sa l te touche pandan sis semèn anviwon pou l achte 1 liv bè nan mache nwa!

 Pami moun sitiyasyon sa yo te afekte, gen plizyè santèn Temwen Jewova ki te pase plizyè ane nan prizon ak nan kan konsantrasyon pou lafwa yo. An 1945, lè yo te lage yo, se rad prizon ki te sou yo a sèlman yo te posede. Gen lòt Temwen ki te pèdi kay yo ak lòt bagay yo te genyen. Gen kèk ladan yo ki te tèlman ap soufri grangou, yo te konn endispoze pandan reyinyon yo.

 Temwen Jewova nan lòt pati sou tè a te reyaji byen vit pou yo fè yo jwenn manje ak rad yo te bezwen ann ijans. Frè yo nan syèj mondyal la Ozetazini te mande biwo filyal ki nan vil Bèn nan, nan peyi Laswis, pou yo ede frè ann Almay yo. Nathan Knorr, yon reprezantan syèj mondyal la, te vizite Ewòp pou l te ka kowòdone travay pote sekou a e pou l te fè l mache pi vit.

 Temwen nan peyi Laswis yo te bay anpil manje, rad ak kòb. Yo te voye bagay yo nan vil Bèn, kote yo te separe yo epi fè pake anvan yo voye yo ann Almay. Temwen nan lòt peyi, san wete Lasyèd, Kanada ak Etazini, te bay èd yo tou nan travay sekou a, sa ki te bon nonsèlman pou Temwen ann Almay yo, men tou pou anpil lòt Temwen nan peyi ann Ewòp ak ann Azi ki te kraze akoz gè a.

 Nan espas kèk mwa, filyal peyi Laswis te voye kafe, lèt, sik, sereyal, fwi seche, legim ansanm ak vyann ak pwason nan bwat. Yo te voye lajan tou.

 Mete sou sa, yo te voye senk tòn rad. Te gen rad pou fredi, rad pou fi ak kostim pou gason. Men sa Toudegad 15 janvye 1946 la te fè konnen: “Frè yo pa t bay nenpòt kalite bagay, yo te bay pi bon bagay yo te genyen yo. Yo te fè gwo sakrifis pou yo ede frè yo ann Almay.”

 Epitou, yo te bay prèske 1 000 pè soulye, e frè yo te verifye si yo an bon eta anvan yo voye yo ale. Frè ak sè nan Wiesbaden, nan peyi Almay, ki te resevwa bagay sa yo te sezi wè tout kalite bagay yo te voye e jan yo te bon kalite. Men sa yon Temwen te di: “L ap difisil pou n jwenn yon magazen ann Almay ki gen tout bagay bon kalite sa yo.”

 Yo te kontinye voye sekou ale ann Almay jis out 1948. Antou, sa Temwen nan peyi Laswis yo te voye bay frè ann Almay yo te plen 444 gwo bwat, e yo te peze 25 tòn. Jan nou te di sa, se pa Temwen nan peyi Laswis yo sèlman ki te voye èd. Men, pami peyi ki te voye èd yo, yo te youn nan peyi ki gen mwens moun. Nan epòk la, Laswis te gen sèlman 1 600 Temwen!

 Jezi Kris te di: “Tout moun ap konnen nou se disip mwen si nou gen lanmou nan mitan nou.” ​(Jan 13:34, 35). Lanmou te pouse pèp Jewova a bay sa yo te genyen ki te pi bon, yo pa t annik bay sa yo pa t bezwen (2 Korentyen 8:1-4). Nan yon lèt frè Zirik yo te voye, yo te di gen “yon kantite frè ki pa t gen pwovizyon pou tèt yo, men ki te vle ede, ki te bay kat gouvènman an te ba yo pou y achte manje ak ti kòb yo te genyen”.

 Pèp Jewova a ann Almay te reprann li byen vit apre yo te fin sibi pèsekisyon e apre tout dega gè a te lakòz. Youn nan rezon yo se èd byen òganize yo te jwenn nan men kwayan parèy yo ki te demontre yon lanmou sensè ki pouse yo fè sakrifis.