Mbaʼéichapa pemboʼevaʼerã mitãnguérape? Mbaʼépa iporãve pejapo

“Ani nderesarái arakaʼeve koʼã [mandamiéntogui] che ameʼẽva ndéve koʼág̃a. Ehekomboʼe umíva rehe nde raʼykuérape, nemanduʼa hese manterei chupekuéra, nde rógape, tape rehe, reñenonguévo ha repuʼãnguévo.” (DEUTERONOMIO 6:6, 7)

SAPYʼÁNTE tuvakuéra ndoikuaái mbaʼéichapa omboʼéta ifamília, péro oheka jave oipytyvõvaʼerã chupekuéra, ojuhu hetaiterei konsého ha ndoikuaavéima mavaitévapa osegíta. Avei ihénte ha iñamigokuéra oñemoñeʼẽ chupekuéra. Umi lívro, rrevísta ha Internétpe oñemoĩ heta informasión tuvakuérape g̃uarã ha heta vése umi konsého ojoavypa.

La Biblia katu heʼi tuvakuérape mbaʼépa omboʼevaʼerã ifamíliape ha avei mbaʼéichapa ojapovaʼerã upéva. Pe téysto oĩva yvate ohechauka tuvakuéra ohekavaʼerãha oportunida oñeʼẽ hag̃ua káda día Ñandejárare umi mitãme. Ko artíkulope jahecháta irundy konsého oñeguenohẽva la Bíbliagui oipytyvõmava hetaiterei sy ha túvape.

1. Peiporu Ñandejára rembiapokue pemboʼe hag̃ua chupekuéra. Apóstol Pablo ohaivaʼekue: “Umi mbaʼe [...] Ñandejára reheguáva ojehechaʼỹva, ikatu ojehecha umi mbaʼe haʼe ojapovaʼekue rupi. Pe ipuʼaka apyraʼỹ ha pe heko marangatuete, ojehecha porã ko yvy ojejapo ypy guive” (Romanos 1:20, BNP). Tuvakuéra oipytyvõvaʼerã ifamíliape ohechakuaa hag̃ua oĩha Ñandejára. Upearã ikatu ojesareko hendivekuéra umi mbaʼe porãita haʼe ojapovaʼekuére ha omokyreʼỹ chupekuéra opensa hag̃ua mbaʼépa oaprende hikuái Ñandejáragui.

Jesús oiporuvaʼekue Ñandejára rembiapokue omboʼe hag̃ua hemimboʼekuérape. Pór ehémplo heʼi: ‘Pemañamíntena umi guyráre, haʼekuéra noñemitỹi ha nomonoʼõi. Ndoguerekói galpón ombyaty hag̃ua hembiʼurã, péro Itúva yvagapegua omongaru chupekuéra. Peẽ ningo pevalevehína umi guyrágui!’ (Mateo 6:26, NM). Péicha Jesús ohechauka mbaʼeichaitépa Jehová ohayhu ha oiporiahuvereko yvyporakuérape, avei oipytyvõ chupekuéra ojepyʼamongeta hag̃ua koʼã mbaʼére.

Omboʼe hag̃ua peteĩ mbaʼe iñimportánteva, rréi Salomón omombeʼu mbaʼéichapa Ñandejára ojapo porã umi tahýipe: “Nde neateʼỹva, tereho tahýi raitýpe, emaña hesekuéra, ha nearandúta. Haʼekuéra ndahuvichái, ndaipóri uru hiʼarikuéra,  térã chupekuéra omoakãva. Ára hakúpe ha oñemonoʼõ aja kóga, ombyaty hembiʼurã” (Proverbios 6:6-8). Ko ehémplo rupive Salomón ohechauka tekotevẽha jaikuaa mbaʼépa jahupytyse ha ñañehaʼã upéva rehehápe.

Mbaʼéichapa peẽ tuvakuéra ikatu pehaʼanga Jesús ha Salomónpe pemboʼéta jave pene famíliape? Primero, peporandukuaa umi mitãme mbaʼeichagua mymba térã plántapa ogustave chupekuéra. Segundo, peheka informasión oñeʼẽva umívare. Ha tercero, peñemongeta hendivekuéra peikuaa hag̃ua mbaʼépa oaprende hikuái Ñandejáragui.

2. Pehendukuaákena Jesús ojapo haguéicha. Opa mbaʼe Jesús heʼivaʼekue oikove aja ko yvy ape ári iñimportanteterei ha ndaiporichéne ambue tapicha ombojojáva chupe. Upéicharõ jepe, haʼe oñemotiémpo ombaʼeporandu hag̃ua umi héntepe oikuaaségui mbaʼépa opensa ha oñandu hikuái (Mateo 17:24, 25; Marcos 8:27-29). Péicha avei tuvakuéra omboʼevaʼerã ifamíliape heta mbaʼe iñimportánteva ha upearã iporãta ohaʼangáramo Jesúspe ha omokyreʼỹ chupekuéra heʼi hag̃ua mbaʼépa opensa.

Péro mbaʼépa ikatu ojapo tuvakuéra ifamília naiñeʼẽrendúi térã nontendepyaʼéiramo peteĩ mbaʼe? Ohechavaʼerã hikuái mbaʼéichapa Jesús otratavaʼekue umi hemimboʼépe. Haʼekuéra pyʼỹinte oiko vai ha nontendéi mbaʼérepa tekotevẽ hekomirĩ. Upéicharõ jepe, Jesús ipasiénsia ha akóinte omokyreʼỹ chupekuéra ani hag̃ua oñemombaʼeguasu (Marcos 9:33, 34; Lucas 9:46-48; 22:24, 25). Sy ha túva ohaʼangáva Jesúspe ipasiénsia ohekomboʼe hag̃ua ifamília, ha tekotevẽrõ omboʼe jey jey chupekuéra peteĩ mbaʼe oaprende porã peve hikuái.

3. Pemboʼe pene ehémplo rupive. Tuvakuéra imanduʼavaʼerã Pablo ohaivaʼekuére umi kristiáno Romayguápe: “Nde reporomboʼéva, mbaʼe rehépa nde voi nereñehekomboʼéi? Nde eréramo nañamondaivaʼerã, mbaʼe rehépa nde remonda?” (Romanos 2:21, JMP).

Ajépa iporãite ko konsého! Umi mitã ohendúramo jepe ituvakuéra heʼíva, ohechave mbaʼépa ojapo hikuái. Upévare haʼekuéra voi ojapóramo umi mbaʼe ojeruréva ifamíliape, umi mitã ojaposevéta ojeʼéva chupekuéra.

4. Pemboʼekena chupekuéra michĩ reheve. Timoteo omoirũvaʼekue apóstol Páblope ohórõ guare opredika ambue tetã rupi, ha umi ermáno oikuaáva chupe oñeʼẽ porã hese (Hechos 16:1, 2). Mbaʼéicha rupípa? Isy ha ijavuéla ningo omboʼevaʼekue chupe ‘imitã guive’ umi mbaʼe oĩva ‘Ñandejára Kuatiañeʼẽ Marangatúpe’. Haʼekuéra ndahaʼéi oleénteva Timotéope, síno oipytyvõ chupe ontende hag̃ua Ñandejára Ñeʼẽ (2 Timoteo 1:5; 3:14, 15).

Mbaʼépa penepytyvõta

Testígo de Jehová ojapo heta puvlikasión oipytyvõtava tuvakuérape omboʼe hag̃ua ifamíliape Ñandejára Ñeʼẽ. Oĩ lívro ojejapóva umi mitã michĩvape g̃uarã, ha oĩ avei umi oipytyvõva tuvakuérape oñemongeta hag̃ua ifamília okakuaáva ndive ohóvo. *

Peñeʼẽ hag̃ua umi mitãme Ñandejárare, tekotevẽ pembohovaikuaa heta mbaʼe haʼekuéra ikatúva oporandu. Pór ehémplo, mbaʼépa pejéta chupekuéra oporandúramo peẽme: “Mbaʼérepa Ñandejára oheja jahasa asy? Mbaʼépa ojapóta ko yvýgui, térã mbaʼépa oiko umi omanóvagui?”. Testígo de Jehová katuete ombohováita peẽme koʼã porandu ikatu hag̃uáicha peẽ ha pene família peñemoag̃ui Ñandejárare (Santiago 4:8).

[Nóta]