Mateo 6:1-34
6 “Peñatendéke ani pejapo iporãva pejechauka hag̃uánte,+ upéicha pejapóramo pende Ru oĩva yvágape napenevendesimoʼãi.
2 Upévare peipytyvõ jave umi oikotevẽvape, ani peiko pemombeʼu opárupi* ojapoháicha umi hovamokõiva. Haʼekuéra ojapo upéicha umi kállere ha sinagogahárupi oipotágui oñembotuicha chupekuéra. Añetehápe haʼe peẽme, la hénte ombotuicha umichagua persónape, péro upévantema la prémio orresivítava hikuái.
3 Péro peẽ peipytyvõ jave umi oikotevẽvape, pejapo vaʼerã avave oikuaaʼỹrente.
4 Umi mbaʼe porã pejapo vaʼerã kirirĩháme. Péicha pende Ru ohecháva opa mbaʼe,* penevendesíta.+
5 Avei peñemboʼe jave ndapejapói vaʼerã ojapoháicha umi hovamokõiva.+ Haʼekuéra oĩ jave umi sinagogahárupi oñemboʼy voi oñemboʼe hag̃ua, ha ojechauka hag̃ua osẽ oñemboʼe umi kálle prinsipál eskínare.+ Añetehápe haʼe peẽme, haʼekuéra ovyʼa umi hénte ohecha haguére chupekuéra, péro upévantema la prémio orresivítava hikuái.
6 Péro peẽ peñemboʼéta jave, peike vaʼerã pende kotýpe ha pemboty pene rokẽ, upéi peñemboʼe pende Ru oĩvape yvágape.*+ Upéicha pende Ru ohecháva opa mbaʼe,* penevendesíta.
7 Peñemboʼe jave ani perrepeti jey jey peteĩ mbaʼénte, ojapoháicha umi hénte ndoikuaáiva Ñandejárape.* Haʼekuéra oimoʼã oñemboʼe puku haguére Ñandejára ohendutaha chupekuéra.
8 Aníkena pejapo haʼekuéra ojapoháicha, pórke pende Ru oĩva yvágape oikuaáma voi mbaʼépa peikotevẽ+ pejerure mboyve jepe chupe.
9 Peẽ peñemboʼe vaʼerã péicha:+
‘Ore Ru reiméva yvágape, toñembotuicha*+ nde réra.+
10 Tou ne Rréino,+ tojejapo ne volunta+ ko yvy ape ári ojejapoháicha yvágape.*+
11 Emeʼẽna oréve ore rembiʼurã* koestediarã.+
12 Oreperdonamína ropeka haguére* ore roperdonaháicha avei umi opekávape ore kóntrape.*+
13 Ani reheja roʼa ñuhãme,+ síno oresalva Satanásgui’.*+
14 Peẽ peperdonáramo pende rapichápe hembiapo vai, pende Ru oĩva yvágape peneperdonáta avei.+
15 Péro napeperdonáiramo pende rapichápe hembiapo vai, pende Ru oĩva yvágape noperdonamoʼãi avei pene rembiapo vai.+
16 Peajuna jave,+ ani peiko penderova ñembyasy guaʼu ojapoháicha umi hovamokõiva. Haʼekuéra ojapo upéicha umi hénte ohecha hag̃ua oajunaha hikuái.+ Añetehápe haʼe peẽme, haʼekuéra ovyʼa umi hénte ohecha haguére chupekuéra, péro upévantema la prémio orresivítava hikuái.
17 Peẽ katu peajuna jave pejovahéi porã vaʼerã ha pemona aséite perfumádo pene akãre.*
18 Péicha pende rapichakuéra ndohechakuaamoʼãi peajunaha, péro pende Ru oĩva yvágape* ohecháta. Ha pende Ru ohecháva opa mbaʼe,* penevendesíta.
19 Anive pembyaty tesóro ko yvy ape ári,+ pórke ikatu havẽmba ha hoʼupa vícho pendehegui, térã ikatu umi mondaha ou ha omondapa pendehegui.
20 Upéva rangue, pembyaty tesóro yvágape.+ Upépe nahavẽmoʼãi, ndoʼumoʼãi vícho+ ha umi mondaha ndoikemoʼãi ogueraha pendehegui.
21 Pórke pende tesóro oĩháme, upépe oĩta avei pene korasõ.
22 Pende resa ningo peteĩ lámpara ohesapéva pende rete.+ Upévare, pende resa ojesarekóramo umi mbaʼe iporãvare añoite,* pende rete kompletoite avei omimbipáta.
23 Péro pende resa omañáramo pende jerére ha iñenvidióso,*+ pende rete kompletoite oĩta pytũmbýpe. Añetehápe, pe lus reguerekóva omoypytũramo ohesape rangue, ¡upépe pende rete kompletoite oikótama pytũmbyetépe!
24 Avave ndaikatúi oservi esklávoramo mokõi patrónpe. Pórke peteĩme ohayhúta ha pe ótrore katu ndaijaʼemoʼãi,+ térã peteĩre ojepokuaavéta ha pe ótrope katu odespresiáta. Upéicha avei, peẽ ndaikatúi peservi Ñandejárape ha avei peiko pláta rapykuéri.+
25 Upévare che haʼe peẽme: anive pejepyʼapyeterei pendejehe,*+ peikuaaségui mbaʼépa pekarúta térã perekótapa y peʼu hag̃ua, térã peikuaaségui mbaʼépa pemondéta.+ ¿Ndovalevéi piko pende rekove* pe tembiʼúgui, ha pende rete umi aógui?+
26 Pemaña porãmína umi guyra ovevévare pe yvágare.+ Haʼekuéra noñemitỹi, nomonoʼõi ha nombyatýi hembiʼurã galpónpe,* péro pende Ru oĩva yvágape omongaru chupekuéra. ¿Ndapevalevéi piko peẽ chuguikuéra?
27 ¿Máva piko pende apytépe ikatúta oikove pukumie* ojepyʼapy haguére?+
28 ¿Mbaʼére piko peikóta pejepyʼapy avei aóre? Pemañamíntena umi lírio oĩvare pe ñúre, mbaʼéichapa okakuaa, haʼekuéra nombaʼapói ni ndojapói ijaorã.
29 Péro che haʼe peẽme, ni Salomón+ haʼéramo guare pe rréi iplatavéva, noñemondéi vaʼekue haʼekuéraicha.
30 Ñandejára péicha omonde porãramo umi yvoty okakuaávape pe ñúre, koestedía okakuaáva ha koʼẽrõ oñemombóva tatápe,* ¿mbaʼéicha piko upéicharõ pejeroviaʼiete ha ndapehechakuaái koʼytevéntema haʼe omeʼẽtaha peẽme pende aorã?
31 Upévare, aníkena núnka pejepyʼapyeterei+ ha peje: ‘¿Mbaʼéiko la roʼútava?’, térã ‘¿rorekóta piko y roʼu hag̃ua?’, térã, ‘¿mbaʼe piko romondéta?’.+
32 Koʼã mbaʼe rapykuéri ningo oiko tarovaite umi hénte ndoikuaáiva Ñandejárape.* Péro pende Ru oĩva yvágape oikuaa voi peẽ peikotevẽha entéro koʼã mbaʼe.
33 Pemotenonde meméke Ñandejára Rréino ha umi mbaʼe haʼe heʼíva iporãha,* ha entéro koʼã mbaʼe oñemeʼẽta avei peẽme.+
34 Upévare, ani peñekevrantaiterei la ikatúvare oiko koʼẽrõ,+ pórke koʼẽrõ oĩta voi hína ótra kósa pejepyʼapy hag̃ua. Ovaléma voi umi provléma káda día oñembohovái vaʼerã”.
Nóta
^ Griégope: “ani pembopu trompéta”.
^ Griégope: “omañáva ñemiháme”.
^ Térã: “pende Ru avave ndaikatúivape ohecha”.
^ Griégope: “omañáva ñemiháme”.
^ Griégope: “umi hénte ótro tetãygua”.
^ Térã: “tojehecha sagrádoramo, toñesantifika”.
^ Térã: “tojejapo ne volunta yvágape ha ko yvýpe”.
^ Griégope: “pan”.
^ Griégope: “Oreperdonamína la rodevéva”.
^ Griégope: “odevévape oréve”.
^ Griégope: “añágui”.
^ Umi judío omoĩ vaʼekue aséite iñakãre oñemoporã hag̃ua.
^ Térã: “pende Ru avave ndaikatúivape ohecha”.
^ Griégope: “omañáva ñemiháme”.
^ Térã: “noĩriramo dividído”.
^ Griégope: “iñañáramo”.
^ Térã: “pene álma”.
^ Térã: “pene álmare”.
^ Térã: “sílope”.
^ Griégope: “tatakuápe”.
^ Griégope: “umi tetã”.
^ Griégope: “ihustísia”.
