1, 2. ¿Mbaʼéichapa Jesús oipytyvõ idisipulokuérape pe orresusita hague díape?

PE DÍA Jesús orresusita haguépe, mokõi idisípulo oguata ohóvo peteĩ puévlo gotyo, opytáva 11 kilómetrorupi Jerusaléngui. Haʼekuéra ndoikuaái rupi Jesús oikove jeýma hague, oñembyasy gueteri umi mbaʼe oiko vaʼekuére. Péro peichaháguinte Jesús ojaparese chupekuéra ha okonsola umi idisípulope ohokuévo pe tapére. ¿Mbaʼéichapa ojapo upéva? “Omyesakã chupekuéra Ñandejára Ñeʼẽme heʼíva hese. Oñepyrũ Moisés ohai vaʼekuégui ha enterove umi Proféta kuatiañeʼẽgui.” (Luc. 24:13-15, 27.) Oiméne ovyʼaite hikuái Jesús omyesakã porãvo chupekuéra Ñandejára Ñeʼẽ (Luc. 24:32).

² Upe kaʼarúpe umi mokõi disípulo ou jey Jerusalénpe. Upéi ojotopávo umi apóstol ndive, omombeʼu chupekuéra mbaʼépa oiko kuri, ha upe javete Jesús ojaparese jey upépe enterovévape. Umi apóstol tuichaiterei oñemondýi ha ndogueroviapái hikuái haʼéne hag̃ua Jesús la ojechaukáva chupekuéra. Péro la Biblia omombeʼu mbaʼépa haʼe ojapo okonvense hag̃ua umi disípulope: “Oipytyvõ chupekuéra ontende porã hag̃ua Ñandejára Ñeʼẽ heʼíva” (Luc. 24:45).

3. a) ¿Mbaʼépa ikatu ñanedesanima ñambaʼapo meméramo jepe Jehová servísiope? b) ¿Mbaʼépa ñanepytyvõta jasegi hag̃ua javyʼa jaservívo Jehovápe?

 ³ Sapyʼánte ñande avei ikatu ñañembyasy, oiko haguéicha Jesús disipulokuérare. Ikatu hína ñambaʼapo meme jaikóvo Jehová servísiope, péro umi hénte nomombaʼéi ñane predikasión, ha upéva ñanedesanima (1 Cor. 15:58). Sapyʼánte umi persóna ostudiáva ñanendive ndoprogresái, térã odesidi oheja Jehovápe. Oikóramo upéva, ¿mbaʼépa ñanepytyvõta jasegi hag̃ua javyʼa Jehová servísiope? Tuicha ñanemokyreʼỹta ñantende porãramo mbaʼépa heʼise umi ehémplo Jesús oipuru vaʼekue. Ñahesaʼỹijomína mbohapy ehémplo, ha jahecha mbaʼépa ñaaprende koʼãvagui.

4. ¿Mbaʼépa heʼise pe ehémplo oñeʼẽva pe chokokue okévare?

⁴ (Elee Marcos 4:26-29.) ¿Mbaʼépa heʼise pe ehémplo oñeʼẽva pe chokokue okévare? Pe chokokue orrepresenta káda uno umi opredikávape pe marandu porã. Pe semílla katu haʼe hína pe mensáhe oñeʼẽva pe Rréinore ha oñemog̃uahẽva umi hénte ipyʼaporãvape. Pe chokokue ningo jepiveguáicha “oke pyharekue ha opuʼã arakuépe”. Péro haʼe oñotỹ rire pe semílla, ohasa vaʼerã peteĩ tiémpo og̃uahẽ meve pe kosécha tiémpo, ha upe aja pe semílla “heñói ha okakuaa” mbeguekatu ‘ijeheguínte’. Péicha avei umi persóna mbeguekatúpe oprogresa espirituálmente. Peteĩ persóna oprogresáva ha odesidi oservi Ñandejárape, haʼete ku okakuaa porã ha hiʼáva oñemeʼẽ vove Jehovápe ha ojevautisa.

5. ¿Maʼerãpa Jesús oipuru pe ehémplo oñeʼẽva pe chokokue okévare?

⁵ ¿Maʼerãpa Jesús oipuru ko ehémplo? Haʼe omoĩ ko ehémplo ikatu hag̃uáicha ñantende Jehová añoite ikatuha omoheñói pe añetegua umi hénte ipyʼaporãva korasõme (Hech. 13:48; 1 Cor. 3:7). Ñande ñañotỹ pe semílla ha jarrega, péro ndaikatúi ñamboapura okakuaa hag̃ua. Oikoháicha pe chokokuére, ñande ndajaikuaái mbaʼéichapa heñói hína pe semílla. Heta vése oiko upéva ñande jasegi aja jajapo ñane rembiapo jepiveguáicha. Péro ohasávo pe tiémpo, pe mensáhe ikatu heñói pe persóna korasõme ha oiko chugui peteĩ disípulo ñanemoirũva pe koséchape (Juan 4:36-38).

6. ¿Mbaʼépa iñimportánte jahechakuaa umi estudiánte de la Bíbliare?

⁶ ¿Mbaʼépa ñaaprende ko ehémplogui? Primero, ñaaprende ñande ndaikatuiha jadesidi mbaʼéichapa oprogresa vaʼerã peteĩ estudiánte de la Biblia. Jahechakuaáramo heta mbaʼe nodependeiha ñanderehe, ndajaikomoʼãi ñamboapura pe persónape ojevautisa hag̃ua. Jajapóramo jepe opa ikatúva ñaipytyvõ hag̃ua chupe, ñaneumílde vaʼerã ha ñarrekonose odependeha hese oñemeʼẽ hag̃ua Jehovápe. Haʼete odesidi vaʼerã upéva ipyʼaite guive ohayhu rupi Ñandejárape. Jehová ndoipotái voi ñañemeʼẽ oĩgui ñandeovligávante (Sal. 51:12; 54:6; 110:3).

7, 8. a) ¿Mbaʼépa ñaaprende avei pe chokokue okévagui? Emoĩ peteĩ ehémplo. b) ¿Mbaʼépa ñanemboʼe Jehová ha Jesúsgui ko ehémplo?

⁷ Segundo, ñantende porãramo ko ehémplo, ñanepytyvõ ani hag̃ua ñañedesanima ñepyrurã ndoprogresáirõ umi hénte ostudiáva ñanendive. Tekotevẽ ningo ñanepasiénsia (Sant. 5:7, 8). Oiméramo jajapo opa ikatúva ñaipytyvõ hag̃ua pe estudiántepe, péro pe semílla naheñóiri ipyʼapýpe, ndeʼiséi nañamboʼeporãi hague chupe. Jehová oheja pe semílla heñói umi iñumíldeva korasõme ha oĩva dispuésto okambia hag̃ua (Mat. 13:23). Upévare ndovaléi ñapensa umi hénte okambiáramo añoite jajapo porãha ñane rembiapo. Jehová ndeʼíri jajapo porãha ñande servísio umi hénte ñanerendu haguérente, síno ñañehaʼãgui  ñande pyʼaite guive jajapo porã ñane rembiapo (elee Lucas 10:17-20 ha 1 Corintios 3:8).

⁸ Tercero, heta vése ñande ndajahechakuaái umi persóna okambiáma hague. Por ehémplo, peteĩ matrimónio ostudiáva la Biblia peteĩ misionérondi, heʼi osẽsemaha hikuái opredika. Péro pe ermáno heʼi chupekuéra opoi vaʼerãha pe sigarríllogui ikatu hag̃uáicha okumpli umi rrekisíto vívliko. Upévo pe matrimónio omombeʼu chupe ojapomaha unos kuánto mése opoi hague upe vísio. ¿Mbaʼépa omomýi chupekuéra oheja hag̃ua upéva? Haʼekuéra oaprende kuri Jehová ndoguerohoryiha umi hovamokõivape, ha ohechataha chupekuéra opitáramo ñemiháme jepe. Upémarõ mokõivéva heʼi la osegítaramo opita, ndoguerokañymoʼãiha pe misionérogui. Haʼekuéra ohayhúma ohóvo Jehovápe ha upéva oipytyvõ chupekuéra opoiete hag̃ua pe sigarríllogui. Pe misionéro ndohechakuaáiramo jepe, ko matrimónio oprogresáma kuri espirituálmente.

9. ¿Mbaʼépa heʼise pe ehémplo oñeʼẽva pe rred tuichaitereívare?

⁹ (Elee Mateo 13:47-50.) ¿Mbaʼépa heʼise pe ehémplo oñeʼẽva pe rred tuichaitereívare? Jesús ohechauka vaʼekue pe predikasión ojejapóva ko yvy tuichakuére ojoguaha peteĩ rred tuichaitereívape ojeitýva pe márpe. Peteĩ rred tuichávape ningo oñeguenohẽ “opaichagua pira”. Péicha avei, ñane predikasión rupive oñeinvita hetaiterei persóna opaichaguápe oaprende hag̃ua pe añetegua (Is. 60:5). Upévare jahecha káda áño heta hetaveha umi ohóva asambléa ha Konmemorasiónpe. Heta koʼã persóna ojogua umi ‘pira iporãvape’ ha oike hikuái pe kongregasión kristiánape. Péro oĩ avei umi pira “ndovaléiva”, ha umívape Jehová ndoaseptái.

10. ¿Maʼerãpa Jesús oipuru pe ehémplo oñeʼẽva pe rred tuichaitereívare?

¹⁰ ¿Maʼerãpa Jesús oipuru ko ehémplo? Pe ehémplo ohechauka ojeporavoha umi “pira iporãva” ha oñemomboha umi “ndovaléiva”. Upéva noñeʼẽi pe huísio ojejapótavare pe jehasa asy guasúpe, síno ohechauka umi mbaʼe oikóva hína koʼã ára pahápe. Jesús ohechauka vaʼekue naentéroi ohendúva pe marandu porã oñemoag̃uitaha Jehováre. Oĩ heta ohóva jepi rreunionhápe térã ostudiáva la Biblia ñanendive, péro ndojagarraséi mbaʼeveichagua kompromíso (1 Rey. 18:21). Ótro katu oñemomombyry pe kongregasióngui. Oĩ avei heta mitãrusu ha mitãkuña michĩ guivéma ituvakuéra omboʼéva chupekuéra pe añetegua, upéicharõ jepe ndohayhúi Jehová léi. Tahaʼe haʼeháicha, Jesús ohechauka káda uno odesidi vaʼerãha mbaʼépa ojapóta. Umi odesidíva ojapo pe iporãva, oĩta hína umi “mbaʼe iporãva” apytépe, térã umi Jehová oguerohorýva apytépe (Ageo 2:7, NM).

11, 12. a) ¿Mbaʼéichapa ñanepytyvõ pe ehémplo oñeʼẽva pe rred tuichaitereívare? b) ¿Mbaʼépa ñanemboʼe Jehová ha Jesúsgui ko ehémplo?

¹¹ ¿Mbaʼéichapa ñanepytyvõ pe ehémplo oñeʼẽva pe rred tuichaitereívare? Ñantendéramo mbaʼépa ñanemboʼese ko ehémplo, ndajaikomoʼãi jajepyʼapyeterei térã ñañeñandu vai peteĩ estudiánte térã peteĩva ñane família ndoaseptáiramo pe añetegua. Ñañehaʼãramo jepe ñaipytyvõ enterovépe, káda únoma odesidi vaʼerã oaseptátapa térã nahániri. Ndahaʼéi ningo peteĩ persóna ostudia haguérente la Biblia, térã michĩ guive ituvakuéra omboʼégui chupe pe añetegua, oikótamava chugui Jehová amígo. Amo ipahápe ningo Jehová onohẽmbatante voi hína ipuévlogui umi noñemoĩséivape igoviérno poguýpe.

¹² ¿Heʼisépa upéva umi ohejáva Ñandejára organisasión ndaikatuveimaha ou jey kongregasiónpe? Ha oiméramo peteĩ  persóna noñemeʼẽi gueteri Jehovápe, ¿ojeʼétapa hese haʼeteha pe pira “ndovaléiva”? Nahániri. Pe okẽ oĩta gueteri aviérto chupekuéra g̃uarã oñepyrũ peve pe jehasa asy guasu. Haʼete ku Jehová heʼíva chupekuéra: “Peju jey chendive ha che aiméta penendive” (Mal. 3:7). Jesús avei omyesakã porã upéva omoĩvo ótro ehémplo oñeʼẽva peteĩ taʼýra ofalla vaʼekuére (elee Lucas 15:11-32).

13. ¿Mbaʼépa heʼise pe ehémplo oñeʼẽva pe taʼýra ofalla vaʼekuére?

¹³ ¿Mbaʼépa heʼise pe ehémplo oñeʼẽva pe taʼýra ofalla vaʼekuére? Pe túva oporoporiahuverekóva orrepresenta Jehovápe, ñande Ru yvagapegua ñanderayhuetéva. Pe taʼýra ojerure vaʼekue iñerénsia ha oho ohundipa rei, orrepresenta umi oñemomombyrývape kongregasióngui. Ha ojapóvo péicha haʼete ku ‘ohóva mombyry, tetã ambuépe’, térã Satanás múndope oĩva mombyry Jehovágui (Efes. 4:18; Col. 1:21). Péro oĩ upe rire orrekonoséva ojavy hague ha ojapo ikatúva guive oñemboja jey hag̃ua Jehová organisasiónre. Ñandejára vyʼápe operdona peichagua persóna iñumílde ha oñarrepentívape (Is. 44:22; 1 Ped. 2:25).

14. ¿Maʼerãpa Jesús oipuru pe ehémplo oñeʼẽva pe taʼýra ofalla vaʼekuére?

¹⁴ ¿Maʼerãpa Jesús oipuru ko ehémplo? Ohechauka hag̃ua Jehová oipotaitereiha oñemoag̃ui jey hese umi oñemomombyry vaʼekue kongregasióngui. Pe túva Jesús oñeʼẽ hague pe ehémplope arakaʼeve ndoperdéi la esperánsa itaʼýra ou jeytaha. Upéi, peteĩ día ohechávo itaʼýra ou jeyha, “oĩ aja gueteri mombyry”, apúrope ojeprepara orresivi hag̃ua chupe. Umi oñemomombyrýva Jehovágui ojepyʼamongetáramo ko ehémplore, katuete omomýita chupekuéra pyaʼe oñemboja jey hag̃ua hese. Ikatu ningo ikangy, otĩ ha ijetuʼu chupekuéra ou jey hag̃ua, péro oñehaʼãramo, katuete ohupytýta heta mbaʼe porã. Jaikuaaháicha, yvágape jepe ningo ojevyʼa peteĩ ofalla vaʼekue oñemboja jeýramo kongregasiónre (Luc. 15:7).

15, 16. a) ¿Mbaʼéichapa ñanepytyvõ pe ehémplo oñeʼẽva pe taʼýra ofalla vaʼekuére? Emombeʼu umi ehémplo. b) ¿Mbaʼépa ñanemboʼe Jehová ha Jesúsgui ko ehémplo?

¹⁵ ¿Mbaʼéichapa ñanepytyvõ pe ehémplo oñeʼẽva pe taʼýra ofalla vaʼekuére? Ñanepytyvõ jasegi hag̃ua Jehová ehémplo. Ndovaléi ningo ‘ñañembohustoiterei’ ha ndajarresivíri  umi oñarrepentívape. Jajapóramo upéicha japyta vaietereíta Jehová renondépe (Ecl. 7:16, NM). Avei ñaaprende ndovaleiha ñapensa pe oñemomombyry vaʼekue naipohãveimaha, síno jahecha vaʼerã chupe peteĩ ‘ovecha okañývaicha’ (Sal. 119:176). Jajuhúrõ peteĩ persóna oñemomombyry vaʼekue kongregasióngui, péro noĩriva expulsádo, ñaipytyvõ vaʼerã chupe oñemoag̃ui jey hag̃ua Jehováre. Jaavisa vaʼerã pyaʼe porã umi ansiánope ikatu hag̃uáicha haʼekuéra avei oipytyvõ chupe. Péicha jahechaukáta ñanearanduha ha jasegiha Jesús ñanemboʼéva pe ehémplo rupive.

¹⁶ Jahechamína mbaʼépa heʼi “umi taʼýra ofalla vaʼekue” ha upéi ou jeýva. Koʼã ermáno oagradeseterei Jehová oiporiahuvereko haguére chupekuéra ha avei pe kongregasión oipytyvõ haguére chupekuéra. Peteĩ ermáno oĩ vaʼekue 25 áño expulsádo, heʼi: “Aju jey guive, koʼẽ koʼẽre avyʼave ha ‘chepiroʼy’ ahechakuaágui Jehová oĩ jeyha chendive (Hech. 3:19). Enterovénte chepytyvõ ha ohechauka chéve cherayhuha. Koʼág̃a ae areko peteĩ família espirituál neporãva”. Ótra ermána imitãva oñemomombyry kuri Jehovágui cinco áñore. Haʼe heʼi ou jey rire: “Ndaikuaái ningo ni mbaʼéichapa amombeʼúta pe añandu vaʼekue umi ermáno ohechaukárõ guare chéve cherayhuha. Avyʼaiterei aime jey haguére Jehová organisasiónpe”.

17, 18. a) ¿Mbaʼépa ñaaprende umi mbohapy ehémplo ñahesaʼỹijo vaʼekuégui? b) ¿Mbaʼépa jajedesidi vaʼerã jajapo?

¹⁷ ¿Mbaʼépa ñaaprende umi mbohapy ehémplogui? Primero, ñande ndaikatúi jajopy avavépe oprogresa hag̃ua espirituálmente. Upéva odepende Jehováre. Segundo, ani ñaimoʼã umi ohóva guive rreunionhápe térã ostudiáva guive la Biblia oservitamaha Jehovápe. Tercero, ani ñapensa umi oñemomombyry vaʼekue kongregasióngui naipohãveimaha térã noñemoag̃uimoʼãveimaha Ñandejárare. Ha ou jeýrõ hikuái, jarresivi porã vaʼerã chupekuéra ñande Ru ñanderayhuetéva ojapoháicha.

¹⁸ Ñañehaʼãkena káda uno jaheka konosimiénto, entendimiénto ha arandu. Jalee jave umi ehémplo Jesús omoĩ vaʼekue, ñañeporandu vaʼerã mbaʼépa heʼise, maʼerãpa oñemoĩ la Bíbliape, mbaʼéichapa ikatu ñanepytyvõ umi ehémplo ha mbaʼépa ñanemboʼe Jehová ha Jesúsgui. Péicha jajapóramo, ñantendéta mbaʼépa heʼise pe Mboʼehára Guasu heʼi vaʼekue.