ÑANEMBOVYʼAITEREI jahechávo mbaʼéichapa heta testígo de Jehová omohenda porã hembiapokuéra opredikave hag̃ua (Mat. 6:22). ¿Mbaʼépepa okambia hikuái ha mbaʼépa ohasa? Jaikuaa hag̃ua, jahechami umi ermáno oservíva Méxicope rembiasakue.

Dustin ha Jassa ningo Estados Unidosgua ha enero 2007-pe omenda hikuái. Upe riremínte ohupyty hikuái peteĩ mbaʼe aretéma oipotáva: ojogua peteĩ várko ha oiko pype. Oiko hikuái ag̃uiete Astóriagui (Oregón, Estados Unidos), peteĩ puévlo iporã ha opytávape ag̃uiete oséano Pacíficogui, ijerére oĩ umi kaʼaguy ha sérro ojahoʼíva chupe niéve. Dustin heʼi: “Ñamañaha gotyonte jahecha mbaʼeichaitépa iporã upe lugár”. Dustin ha hembireko ojerovia Jehováre ha opensa ovalemaha umi mbaʼe ojapóva chupe g̃uarã. Oiko hikuái peteĩ várko orekóvape 8 métro rupi ha ombaʼapo mimi oñemantene hag̃ua, oho hikuái rreunionhápe peteĩ kongregasión oñeʼẽvape ótro idióma ha ojapo jepi avei iprekursorádo auxiliár. Péro tiémpo rire ohechakuaa hikuái tuicha ojavyha ha ikatuha gueteri ojapove. Dustin heʼi: “Rombaʼapove rangue kongregasiónpe, rohasa heta tiémpo romyatyrõ hag̃ua ore várko. Rohechakuaa rokambia vaʼerãha romotenonde hag̃ua Jehová servísio”.

 Jassa omombeʼu: “Che aiko vaʼekue Méxicope amenda mboyve, upépe aha pe kongregasión ingléspe. Avyʼa kuri upe kongregasiónpe ha hiʼãiterei vaʼekue chéve aha jey”. Dustin ha Jassa ojapo jave pe Aty Jastudia Hag̃ua Ñande Rogayguándi, oñepyrũ olee umi ermáno rembiasakue omombeʼúva ohoha oservi ótro lugárpe ha ojuhu heta ohenduséva pe marandu porã. Upéva omokyreʼỹ chupekuéra oservi hag̃ua ótro tetãme (Juan 4:35). Dustin heʼi: “Oréve hiʼãiterei avei rovyʼa haʼekuéraicha”. Upéi umi iñamígo oikóva Méxicope omombeʼúvo chupekuéra oñekotevẽha maranduhárare peteĩ grúpo oñepyrũ ramóvape, odesidi oho hikuái. Koʼã ermáno oheja itraváho, ovende ivárko ha ova Méxicope.

Dustin ha Jassa oiko peteĩ puévlo héravape Tecomán, opytáva avei ag̃ui océano Pacíficogui, 4.300 kilómetro rupi sur gotyo Astóriagui. Dustin heʼi: “Roiko vaʼekue peteĩ lugár ipiroʼy asy ha ojerévape hese sérro, koʼápe katu hakueterei ha mombyry peve jahecha umi limonty”. Ñepyrũrã ndotopái hikuái itravahorã ha saʼi ipláta, upéicha rupi káda día dos vése hoʼu hikuái kumanda arrós. Jassa heʼi: “Orekuerái jave upévagui, umi ostudiáva orendive la Biblia omeʼẽ oréve mángo, pakova, mamón ha atyraite limón”. Tiémpo rire Dustin ha Jassa otopáma itravahorã. Ombaʼapo hikuái peteĩ eskuéla omboʼéva ndive idióma Internet rupive. Upe eskuéla oĩ Taiwánpe. Ha pe pláta oganamíva oipytyvõ chupekuéra oñemantene hag̃ua.

¿Ovyʼápa koʼã ermáno ojapo haguére péicha? Haʼekuéra heʼi: “Rovyʼaiterei rova haguére koʼápe. Roñeñandu porãiterei, rohechakuaa roñemoag̃uiveha ojuehe ha avei Jehováre. Káda día rojapo heta mbaʼe oñondive: rojeprepara rreunionrã, ropredika ha roñemongeta mbaʼéichapa ikatu roipytyvõ umi ostudiávape la Biblia orendive. Avei ndorojepyʼapyvéima ymave guaréicha”. Dustin ha Jassa heʼive upe rire: “Koʼág̃a ramo rohechakuaa añeteteha Salmo 34:8 heʼíva: ‘Peñehaʼã ha pehecháta Ñandejára imbaʼeporãha’”.

Amo 2.900 rasa ermána ha ermáno soltéro ha omendáva, orekóva éntre 20 ha 30 áño, oñekuaveʼẽ oservi hag̃ua Méxicope oñekotevẽvehápe maranduhárare. ¿Mbaʼérepa hetaite Testígo ojapo koʼã mbaʼe? Koʼã ermáno omombeʼu mbohapy mbaʼe omomyiha chupekuéra. ¿Mbaʼe mbaʼépa umíva?

Ohayhúgui Jehovápe ha hapichakuérape. Leticia, peteĩ ermána ojevautisa vaʼekue orekórõ guare  18 áño heʼi: “Che aikuaa añemeʼẽvo Jehovápe aservi vaʼerãha chupe che pyʼaite guive ha che álma rugua guive. Upévare aiporuseve vaʼekue che tiémpo ha che mbaretekue ahechauka hag̃ua ahayhuha chupe” (Mar. 12:30). Hermilo ou kuri omenda Leticia rehe, ha haʼe orekórõ guare 20 áño arimi oho kuri oservi oñekotevẽvehápe maranduhárare. Haʼe heʼi: “Che ahechakuaa, jahechauka hag̃ua jahayhuha ñande rapichakuérape ñaipytyvõ vaʼerãha chupekuéra oikuaa hag̃ua Ñandejárape, ndaipóri ningo iporãvéva upévagui” (Mar. 12:31). Hermilo oiko vaʼekue Monterréype ha ombaʼapo peteĩ vánkope. Oiko porã vaʼekue, péro ohejapaite umi mbaʼe ha oho oiko peteĩ puevloʼípe.

Ovyʼa ha oñeñandu porãve. Ojevautisa riremínte, Leticia omoirũ peteĩ prekursóra ikatupyrývape opredika hag̃ua un mes peteĩ puévlo opytávape mombyry. Leticia omombeʼu: “Ahecharamoiterei mbaʼéichapa umi hénte omombaʼe pe marandu porã ha upéva chembovyʼaiterei. Ohasávo pe un mes, haʼe chejupe: ‘¡Péicha ningo che aikose!’”. Upéicha oiko avei Essly rehe, peteĩ ermána soltéra orekóva 20 áño arimi, ohecha rire mbaʼéichapa ovyʼa umi ermáno oservíva oñekotevẽvehápe. Omohuʼãrõ guare ikoléhio haʼe oikuaa kuri heta ermáno ha ermána oservívape péicha. Haʼe omombeʼu: “Ahechávo hovarekuéra mbaʼéichapa ovyʼa hikuái, aservise avei haʼekuéraicha”. Ha heta ermána ojapo Essly ojapo haguéicha. Por ehémplo Méxicope oĩ 680 rasa ermána soltéra oservíva hína oñekotevẽvehápe maranduhárare. ¡Ajépa ehémplo porãite umi mitãrusu, mitãkuña ha kakuaápe g̃uarã!

Oiporu porã hag̃ua hekove. Essly omohuʼãrõ guare ikoléhio oñekuaveʼẽ chupe peteĩ véka universidápe. Heta hapicha ijavegua heʼi chupe ani hag̃ua ojavy upéva, ikatu hag̃uáicha oreko peteĩ profesión, ojogua iveikulorã ha oviaha hag̃ua opárupi. Péro Essly ndojapói upéva. Haʼe heʼi: “Heta che amígo kongregasionpegua oho umíva rapykuéri ha ahechakuaa noñehaʼãveimaha hikuái ohupyty mbaʼeve Jehová servísiope. Avei upéicha ojeheʼave hikuái ko múndore, ojepyʼapy ha ndovyʼái. Che katu chemitã reheve aaprovechase ajapo hag̃ua opa ikatúva Jehová servísiope”.

Essly otermina rire ikoléhio osegi peteĩ estúdio mbykymívante ikatu hag̃uáicha oñemantene ha ojapo iprekursorádo, upéi ova peteĩ lugár oñekotevẽvehápe maranduhárare. Ha ndahaʼéi upéva añónte, oñehaʼã avei oaprende mokõi idióma indíhena: otomí ha tlapaneco. Opensávo umi tres áño  ohasávare predikasiónpe upe lugárpe, Essly heʼi: “Añeñandu porãiterei ha ahechakuaa aiporu porãha che rekove aservívo ko lugár oñekotevẽvehápe maranduhárare. Ha iporãveha, koʼág̃a añandu añemoag̃uiveha Jehováre ha arekoha chupe che amígoramo”. Phillip ha Racquel, orekóva 30 áño rasami opensa avei upéicha. Ko matrimónio Estados Unidosgua heʼi: “Ko múndo ningo pyaʼeterei okambia ohóvo ha oĩ ndoikuaáiva mbaʼépa ojapóta. Péro ore ropredikávo umi lugár rojuhuhápe gueteri heta tapicha ohenduséva pe marandu porã, rovyʼaiterei. ¡Añetehápe roñeñandu porãiterei!”.

Heta mbaʼe ijetuʼúva ningo ikatu ñambohovái jaháramo jaservi umi lugár oñekotevẽvehápe maranduhárare. Por ehémplo, ikatu ijetuʼu ñandéve ñañemantene hag̃ua. Upearã ñaime vaʼerã jajapo hag̃uáicha oimeraẽ mbaʼe ha jajepokuaa hag̃ua upe lugárpe. Verónica, peteĩ prekursóra katupyry heʼi: “Peteĩ lugárpe aservírõ guare, aprepara ha avendémi tembiʼu ivaratomíva, ótro hendápe katu ajohéi ao ahéno ha aikytĩ akãrague. Koʼág̃a katu amopotĩ óga ahéno ha amboʼe umi túva ha sy primerísope mbaʼéichapa oñekomunika vaʼerã ifamília ndive”.

Sapyʼánte ijetuʼu jajepokuaa hag̃ua umi kostúmbre térã kultúra ahénore, koʼýte jahávo jaiko umi komunida indíhenape mombyryvehápe. Upéicha oiko vaʼekue Phillip ha Racquel rehe ohórõ guare oservi oĩhápe umi oñeʼẽva náhuatl. Phillip heʼi: “Ore kostúmbre ningo tuichaiterei idiferénte chuguikuéra”. Péro ¿mbaʼépa ojapo hikuái ojepokuaa hag̃ua? Phillip omombeʼu: “Roñehaʼã rohecha umi mbaʼe porã ojapóva umi náhuatl, rohecha mbaʼéichapa haʼekuéra ojogueraha porã hogapýpe, isinséro ha imbaʼeporã oñondive”. Racquel heʼi: “Heta mbaʼe roaprende chuguikuéra roikóvo hendivekuéra ha roservi Jehovápe umi ermáno náhuatl ndive”.

Ikatu oime reservise reína umi lugár mombyryvehápe ha oñekotevẽvehápe maranduhárare. Péro ¿mbaʼépa ikatu rejapo reñembosakoʼíma hag̃ua? Umi ermáno oservímava heta áñore umichahápe heʼi: reva mboyve rejepokuaáma vaʼerã ereko umi mbaʼe reikotevẽmívante ha evyʼa umívare (Filip. 4:11, 12). ¿Mbaʼépa ikatu rejapove? Leticia heʼi: “Ndajagarrái vaʼekue umi traváho chejopýtava apyta hag̃ua areterei peteĩ lugárpe. Che arekose liverta ava hag̃ua oimeha óra ha oimehápe”. Hermilo heʼi: “Aaprende ajohei ao, aplancha ha akosina”. Verónica katu heʼi: “Aikórõ guare che túva, che sy ha che ermanokuérandi, amopotĩ vaʼekue ore róga, aaprende aprepara umi tembiʼu isáno ha ivarátova, avei añehaʼã aiporukuaa che pláta”.

Levi ha Amelia ningo Estados Unidosgua ha ojapóma 8 áño omenda hague. Haʼekuéra heʼi tuicha oipytyvõ hague chupekuéra omombeʼu porãvo Jehovápe ohoseha oservi hikuái Méxicope. Levi heʼi: “Ropensa porã mboýpa roikotevẽta roho hag̃ua roservi 1 áño ótro tetãme ha upéi rojerure Jehovápe ohupytykami hag̃ua oréve upéva”. Tiémpo riremínte orekóma hikuái pe pláta oikotevẽtava ha ensegída ova hikuái. Levi omombeʼu: “Jehová ombohovái oréve ore ñemboʼe, koʼág̃a oreháma rojapo vaʼerã ore párte”. Amelia Heʼi: “Ore ropensa kuri 1 áñonte ropytataha, péro ojapóma 7 áño roju hague ha ni noropensái rohóvo koʼágui. Koʼápe roñandu Jehová oĩha ore ykére ha káda día rohecha mbaʼéichapa haʼe imbaʼeporã orendive”.

Adam ha Jennifer omombeʼu avei mbaʼéichapa oipytyvõ chupekuéra oñemboʼévo Jehovápe. Haʼekuéra ningo Estados Unidosgua ha oservi Méxicope kongregasión ingléspe. Adam ha Jennifer heʼi: “Ani pehaʼarõ oñepresenta raẽ peẽme peteĩ oportunida. Pemombeʼu porãnte vaʼerã Jehovápe peserviseha ambue lugár oñekotevẽvehápe ha peñehaʼã pejapo. Peiko umi mbaʼe peikotevẽmívarente, peskrivi pe sukursál oĩvape pe tetã pehosehápe peservi ha pekalkula porã rire mboýpa peikotevẽta, pejapo tekotevẽva pehupyty hag̃ua upéva”. * Jajapóramo upéicha, jahecháta hetaiterei mbaʼe ikatuha jajapove Jehová servísiope, javyʼa ha jahupytýta heta mbaʼe porã.