Ñañehaʼãkena jaikuaave Jehová organisasión

KO ARAPÝPE ningo jahecha hetaiterei mbaʼe porã Jehová ojapovaʼekue. Umi célula michĩ mimíva guive umi galaxia ndetuichapa jepéva peve jahecha ojapo hague opa mbaʼe hendápe porã ha tekotevẽhaichaite. Ha ndajahecharamói upéva, ñande Apohare ndojapói voi mbaʼeve ‘sarambikuépe’ (1 Cor. 14:33, JMP). Umi mbaʼe Jehová omoĩva ñamombaʼeguasu hag̃ua chupe iporãiterei avei. Jehová organisasión ningo tuichaiterei, chupe omombaʼeguasu peteĩ ñeʼẽme hetaiterei ánhel ha yvypóra iñarandúva ha ikatúva oiporavo mbaʼépa ojapóta. Aje piko iporãite upéva!

Yma Jerusalén orrepresentavaʼekue Jehová organisasión oĩva ko yvy ape ári, upépe oĩ pe témplo ha pe rréi Jehová oiporavovaʼekue. Peteĩ Israelgua oikovaʼekue tembiguáiramo Babilóniape ohechauka mbaʼeichaitépa ohayhu ko táva marangatu heʼívo: ‘Che kũ toja che apekũ rehe nachemanduʼáiramo nderehe, ha namoĩrirõ Jerusalénpe tenondete opa umi mbaʼe chembovyʼávagui.’ (Sal. 137:6).

Ndépa rehayhu avei upéicha Jehová organisasión? Revyʼápa reime haguére upépe? Oikuaápa ne familiakuéra mbaʼéichapa oñepyrũ ha ombaʼapo Jehová organisasión ko yvy arigua? Omombaʼépa hikuái oĩ haguére Jehovápe omombaʼeguasúva apytépe? (1 Ped. 2:17). Mbaʼépa ikatu pejapo pehayhu ha pemombaʼeve hag̃ua Jehová organisasión? Pejapóramo koʼã mbaʼe ñahesaʼỹijótava koʼág̃a peñembyaty vove pestudia hag̃ua pende rogayguándi penepytyvõta katuete.

Eñeʼẽ chupekuéra umi mbaʼe oikovaʼekuére yma

Káda áño umi Israelgua oñembyatyvaʼekue ifamiliakuéra ndive paskuarã. Ha ojeʼe ypýrõ guare pe páskua ojejapovaʼerãha, Moisés heʼi: ‘Koʼẽramo ára nde raʼy oporandúrõ ndéve mbaʼépa heʼise koʼã mbaʼe, eréta ichupe: “Ñandejára oreguenohẽvaʼekue pyapy mbaretépe Egíptogui, tembiguái rekógui”’ (Éxo. 13:14). Upeichaite, umi túva oñehaʼãmbaitevaʼerã ani hag̃ua opyta tesaráipe umi mbaʼe Jehová ojapovaʼekue hembiguaikuéra rehehápe. Ha katuete ningo heta oĩvaʼekue iñeʼẽrendúva Moisés heʼivaʼekuépe, upéicha rupi peteĩ salmísta oñemboʼe péicha: ‘Ñandejára, rohendu ore rukuéra ypykue jurúgui, umi mbaʼeta rejapovaʼekue haʼekuéra oikovéramo guare.’ (Sal. 44:1).

Koʼág̃a rupi ikatu oĩ mitãrusu ha mitãkuña opensáva ymaiterei guaremaha umi mbaʼe oikovaʼekue Jehová organisasiónpe umi 100 áño ohasavaʼekuépe. Mbaʼépa ikatu rejapo ne família oikuaa ha omombaʼeve hag̃ua umi mbaʼe oikovaʼekue yma? Oĩ túva oiporúva Anuario, pe lívro Los testigos de Jehová, proclamadores del Reino de Dios, umi ermáno rembiasakue osẽva ñande rrevistakuérape ha ambue mbaʼe oñeʼẽva Jehová organisasión rehe, umíva apytépe pe DVD pyahu oñeʼẽva Jehová puévlo koʼag̃agua rehe. Avei umi vidéo ohechaukáva mbaʼéichapa Alemania nazi ha Unión Soviéticape ojejopy vai vaʼekue ñane ermanokuérape, katuete penepytyvõta pejerovia hag̃ua Jehováre pehasa asýramo jepe. Mbaʼérepa nerehesaʼỹijói koʼãichagua informasión reñembyaty vove restudia hag̃ua nde rogayguándi? Upéicha imbaretevéta ne família jerovia ha oipytyvõta chupekuéra akóinte iñeʼẽrendu hag̃ua ojejopy vaíramo jepe.

Jahechakuaavaʼerã avei umi istória ikatuha pyaʼeterei omonguerái mitãnguérape. Upévare tekotevẽ remeʼẽ chupekuéra hembiaporã.  Mbaʼéichapa ikatu rejapo upéva? Ere ne famíliape toiporavo peteĩ tetã ogustavéva chupekuéra ha toheka informasión ohechaukáva mbaʼéichapa ojepredika ypy vaʼekue upe tetãme, upe rire haʼekuéra ikatu omombeʼu oaprendevaʼekue peñembyaty jave pestudia hag̃ua. Oĩramo pene kongregasiónpe peteĩ ermáno heta áñorema oservíva Jehovápe, ikatu peinvita chupe ostudia hag̃ua penendive peteĩ pyhare. Ere ne famíliape tombaʼeporandu ko ermánope omombeʼu hag̃ua hembiasakue. Ikatu avei ejerure chupekuéra odivuha hag̃ua peteĩ sukursál oñemopuʼãrõ guare, peteĩ aty guasu ouhápe ermáno ambue tetãyguáva, ojeporúrõ guare gramófonos predikasiónpe, térã ambue mbaʼe oikovaʼekue Jehová organisasiónpe.

Mbaʼéichapa ombaʼapo Jehová organisasión

Apóstol Pablo ombojoja pe kongregasión ñande retére. Haʼe heʼi: ‘Opa mbaʼe hendápe oĩ porãmba ha ojoajupa ojuehe. Ha opa mbaʼe oiko porãvo pe oĩháme, okakuaa ohóvo mborayhúpe’ (Efe. 4:16). Jaikuaavévo mbaʼeichaitépa Ñandejára ñandeapovaʼekue, ñamombaʼeve chupe. Upéicha avei jastudiáramo mbaʼéichapa ombaʼapo Jehová kongregasión ko múndo tuichakuére, ñamombaʼevéta ‘Ñandejára arandu ojehecháva opa mbaʼére’ (Efe. 3:10).

Jehová omombeʼu ñandéve heta mbaʼe iñorganisasión yvagapeguágui. Pór ehémplo umi mbaʼe ojehechaukavaʼekue apóstol Juánpe. Ñepyrurã Jehová oikuaauka itaʼýrape. Upe rire ‘Jesucristo oikuaaukavaʼekue koʼã mbaʼe hembiguái Juánpe hiʼánhel rupive ha Juan omombeʼu opa umi mbaʼe ohechavaʼekue’ (Rev. 1:1, 2, BNP). Jehová ningo oikuaauka ñandéve mbaʼéichapa ombaʼapo iñorganisasión yvagapegua, koʼýte upéicharõ oipotáta jaikuaa porã iñorganisasión yvy arigua.

Ñamoĩ chupe pe superintendénte de sirkuíto ovisitataha pene kongregasión. Mbaʼérepa nerehesaʼỹijói ne família ndive mbaʼe mbaʼépa ojapo koʼã ermáno, mbaʼe vendisiónpa ohupyty ha mbaʼéichapa ñanepytyvõ hikuái? Ikatu avei pehesaʼỹijo koʼã porandu: Mbaʼérepa iñimportánte ñameʼẽ ñane infórme? Moõguipa oñeguenohẽ pe pláta oñemantene hag̃ua Jehová organisasión? Mbaʼe mbaʼépa ojapo pe Cuerpo Gobernante ha mbaʼéichapa omeʼẽ ñandéve pe tembiʼu hiʼoraitépe?

Mbaʼépepa ñanepytyvõta jaikuaa porãramo mbaʼéichapa ombaʼapo Jehová organisasión ko yvy arigua? Mbohapy hendáicha: Ñamombaʼevéta ñane ermanokuéra ombaʼapo kyreʼỹvape ñanderehehápe (1 Tes. 5:12, 13). Ñanemomýita akóinte ñaneñeʼẽrendu hag̃ua (Hech. 16:4, 5). Ha jajeroviavéta umi ñanemoakãvare, jaikuaágui haʼekuéra ojapoha opa mbaʼe Ñandejára Ñeʼẽme heʼiháicha (Heb. 13:7).

Pehecha mbaʼéichapa iporã Jehová organisasión

‘Peguata Jerusalén jerekue rehe, ha pejerepa hese, peipapa hóga yvate imbaretéva. Pemaña porã imurálla yvate rehe, ha pehecha umi hóga guasu, pemombeʼu hag̃uáicha pene ñemoñarekuérape’ (Sal. 48:12, 13, ÑÑB). Péicha ko salmísta omokyreʼỹ umi Israelguápe oho hag̃ua Jerusalénpe ha ohecha upe táva. Mbaʼeichaitépa oiméne ovyʼarakaʼe hikuái oviahávo ko táva marangatúpe ofesteha hag̃ua umi arete ojejapóva káda áño. Upépe ningo haʼekuéra ikatu ohecha pe témplo neporãmba jepéva ha ndahesaraivéima chugui. Opa mbaʼe ohechávante iporãiterei, ajeve voi ningo omombeʼuse hikuái ‘iñemoñarekuérape’.

Ñapensamína pe rréina Sebaygua rehe, haʼe ningo ndogueroviapaivaʼekue umi mbaʼe porãita ojeʼevaʼekue chupe Salomón goviérnore ha mbaʼeichaitépa haʼe iñarandu. Mbaʼéicha rupípa ogueroviáraʼe upe rire umi mbaʼe? Haʼe voi heʼi: ‘Che ndagueroviaseivaʼekue iñeʼẽnguéra aju peve ahecha che resa tee rupi’ (2 Cró. 9:6, ÑÑB). Añetehápe umi mbaʼe jahecháva opokove ñanderehe.

Mbaʼéichapa ikatu reipytyvõ ne famíliape ohecha hag̃ua mbaʼeichaitépa iporã Jehová organisasión? Oiméramo nde róga namombyrýi Betélgui, iporãta peho pevisita peikuaave  hag̃ua. Jahechamína Mandy ha Bethany ohasavaʼekue. Haʼekuéra ningo okakuaavaʼekue 1.500 kilometrohápe pe Betel hetãme oĩvagui, upéicharamo jepe pyʼỹinte itúva ha isy ogueraha chupekuéra ohecha hag̃ua, koʼýte imitãkuñame hikuái. Haʼekuéra heʼi: “Roikuaa mboyve Betel ropensavaʼekue umi ijedávante ombaʼapoha upépe ha iserioitereiha. Péro añetehápe rohecha heta ipyahúvape, vyʼápe ombaʼapóva Jehovápe g̃uarã. Rohechakuaa avei Jehová organisasión tuichaitereiha. Roho jave rovisita Betel orekyreʼỹve rojúvo”. Mandy ha Bethany ohecha mbaʼéichapa ombaʼapo Jehová organisasión ha upéva omomýi chupekuéra ojapo hag̃ua iprekursorádo, upe rire oñeinvita koʼã ermánape ombaʼapo hag̃ua Betélpe peteĩ tiémpore.

Koʼág̃a rupi ikatu jahecha mbaʼéichapa ombaʼapo Jehová organisasión jaiporúvo peteĩ mbaʼe umi Israelgua ndorekoivaʼekue. Umi áño ohasavaʼekuépe ojejapo videosínta ha DVD oñeʼẽva Jehová organisasión rehe, umíva apytépe, Hasta los cabos de la Tierra, Los testigos de Jehová: organizados para predicar las buenas nuevas, Toda nuestra asociación de hermanos ha Unidos gracias a la enseñanza divina. Pehechávo mbaʼeichaitépa ombaʼapo umi betelíta, misionéro, umi ermáno oipytyvõva oiko jave sarambi ha umi opreparáva aty guasurã, katuete pehayhuvéta opaite ñane ermáno oĩvape ko yvy tuichakuére.

Añetehápe ningo ñane kongregasión tuicha ñanepytyvõ akóinte japredika hag̃ua ha ñanemombarete ñaikotevẽ jave. Upéicharamo jepe, ñañemotiempovaʼerã jajepyʼamongeta hag̃ua ñane família ndive ‘umi ermáno oĩvare opárupi ko yvy ape ári’. Upéva ñanepytyvõta imbareteve hag̃ua ñande jerovia ha javyʼa hag̃ua ñaime haguére Jehová organisasiónpe (1 Ped. 5:9, BNP).

 [Nóta oĩva taʼanga ndive páhina 18]

Iporã jaikuaave Ñandejára organisasión

Hetaiterei mbaʼe ningo oĩ ñanepytyvõtava jaikuaave hag̃ua umi mbaʼe oikovaʼekue Jehová organisasiónpe ha mbaʼéichapa ombaʼapo. Umi porandu oñemoĩva ikatu ñanepytyvõ upearã:

Mbaʼéichapa oñepyrũvaʼekue umi superintendénte viahánte rembiapo? (Los testigos de Jehová, proclamadores del Reino de Dios, páhina 222 guive 228 peve).

Mbaʼérepa iporãitevaʼekue pe “Día de los hijos” ojejapovaʼekue asamblea teocrática 1941-pe? (Los testigos de Jehová, proclamadores del Reino de Dios, páhina 86 ha 88.)

Mbaʼépa ojapo pe Cuerpo Gobernante odesidi hag̃ua peteĩ mbaʼe? (“Testimonio cabal” del Reino de Dios, páhina 108 guive 114 peve.)