Jehová ñanemombarete ijespíritu rupive

“Oñemeʼẽta peẽme puʼaka, ou vove pende ári pe espíritu sánto.” (HECH. 1:8, ÑÑB)

1, 2. Mbaʼépa Jesús opromete hemimboʼekuérape ha mbaʼérepa oikotevẽta hikuái upéva?

JESÚS oikuaa porã vaʼekue hemimboʼekuéra ndaikatumoʼãiha ijeheguínte ojapo opa mbaʼe heʼivaʼekue chupekuéra. Haʼe ohechakuaa oikotevẽtaha hikuái pe puʼaka Jehová omeʼẽva. Mbaʼérepa? Tuichaitereígui upe tembiapo ohejavaʼekue chupekuéra, oĩtagui oñemoĩ mbaretéva hesekuéra ha iñimperfékto rupi hikuái. Upévare oho mboyvemi yvágape, Jesús opromete hemimboʼekuérape: ‘Opáichavo oñemeʼẽta peẽme puʼaka, ou vove pende ári pe espíritu sánto, ha pemoherakuãta che réra Jerusalénpe, Judea, Samaria ha ko yvy tuichakuére’ (Hech. 1:8).

² Ko promésa oñepyrũ oñekumpli Pentecostés áño 33-pe, Jesús remimboʼekuérape oñemeʼẽrõ guare pe puʼaka espíritu sánto rupive. Ha upéicha rupi Jerusalén tuichakuére opredika hikuái. Avave ndaikatúi ojoko chupekuéra! (Hech. 4:20.) Upe guive, ha ‘og̃uahẽ meve pe ára paha’, opavave jaservíva Jehovápe jahechakuaa ñaikotevẽtereiha pe puʼaka Ñandejára omeʼẽva (Mat. 28:20, NM).

3. a) Mbaʼépa espíritu sánto ha puʼaka? b) Mbaʼéichapa ñanepytyvõ pe puʼaka omeʼẽva Jehová?

³ Jesús oprometevaʼekue hemimboʼekuérape: “Oñemeʼẽta peẽme puʼaka, ou vove pende ári pe espíritu sánto”. Aníkena ñapensa puʼaka ha espíritu sánto peteĩchanteha. Espíritu sánto ningo haʼe pe mbarete Ñandejára oiporúva ojapo hag̃ua hembipota. Puʼaka katu pe katupyry jajapo hag̃ua peteĩ mbaʼe (Diccionario Estudio Salamanca-Octaedro). Pe puʼaka ikatu jareko ñandepype jaiporu hag̃ua tekotevẽ jave. Ñantende porã hag̃ua ñambojojami peteĩ mbaʼére. Espíritu sánto ñambojojakuaa pe elektrisida ojeporúvare ojekarga hag̃ua peteĩ vatería ha puʼaka katu pe vatería kárga rehe. Pe puʼaka Jehová omeʼẽva ñandéve ijespíritu sánto rupive ñanembokatupyry ñakumpli hag̃ua ñaprometevaʼekue ñañemeʼẽrõ guare chupe ha ñanepytyvõ ñamboyke hag̃ua umi mbaʼe ikatúva ñanemomombyry chugui (elee Miqueas 3:8 ha Colosenses 1:29).

4. Mbaʼépa ñahesaʼỹijóta ko artíkulope ha maʼerãpa?

⁴ Mbaʼéichapa jahechauka pe puʼaka oñemeʼẽva ñandéve espíritu sánto rupi? Ha mbaʼépa ikatu jajapo upéva rupive? Ñañehaʼãramo jepe ñaneñeʼẽrendu Ñandejárape jahasa heta mbaʼe ijetuʼúvare Satanás oñemoĩ rupi ñanderehe, ñaneimperfékto ha jaikógui ko múndo añáme. Péro tekotevẽterei jagueropuʼaka koʼã mbaʼe, upéicharõmante akóinte japredikáta, ñaneñeʼẽrendúta Jehovápe ha ñaime porãta hendive. Koʼág̃a jahecháta mbaʼéichapa pe espíritu sánto ñanepytyvõ ani hag̃ua jaʼa Satanás ñuhãme, ñanekaneʼõ térã nañanekyreʼỹvéi.

Puʼaka ñambohovái hag̃ua Satanás ñuhã

5. Mbaʼéichapa ñanepytyvõta pe ñemboʼe?

⁵ Jesús heʼi hemimboʼekuérape ojerure hag̃ua Ñandejárape: ‘Ani reheja roʼa mbaʼe vaípe ha orepeʼamína aña poguýgui’ (Mat.  6:13, NM). Jehová ndohejareimoʼãi umi hembiguái ojerurévape ko mbaʼe. Upe rire Jesús heʼi jey ‘Ñande Ru yvagapegua omeʼẽtaha espíritu sánto umi ojerurévape chupe’ (Luc. 11:13, NM). Ajépa tuichaite ñandepyʼaguapy jaikuaávo Ñandejára ñanepytyvõha ijespíritu rupive jaiko hag̃ua haʼe oipotaháicha! Kóva ndeʼiséi Jehová ndohejamoʼãiha jajepyʼaraʼã (1 Cor. 10:13). Heʼise uvei ñañemboʼevaʼerãha Jehovápe ñande pyʼaite guive Satanás ñandepyʼaraʼã jave (Mat. 26:42).

6. Mbaʼépa oiporuvaʼekue Jesús omboyke hag̃ua Satanás oikuaveʼẽva chupe?

⁶ Jesús pyʼỹinte oiporuvaʼekue Ñandejára Kuatiañeʼẽme heʼíva ombohovái hag̃ua Satanáspe, upéicha jahecha haʼe oikuaa porã hague mbaʼépa heʼi upépe. Pór ehémplo heʼivaʼekue Satanáspe: ‘Ñandejára Kuatiañeʼẽme heʼi [...]. Ñandejára Kuatiañeʼẽme ningo heʼi avei [...]. Tereho koʼágui Satanás! Ñandejára Kuatiañeʼẽme heʼi voi: “Ñandejára Jehovápe añoite readora ha remombaʼeguasuvaʼerã”’. Jesús ohayhúgui Jehovápe ha omombaʼégui Iñeʼẽ omboyke umi mbaʼe Satanás oikuaveʼẽva chupe (Mat. 4:1-10, NM). Satanás ohechávo ndaikatuiha omoñuhã Jesúspe, ohopa hese upégui.

7. Mbaʼéichapa la Biblia ñanepytyvõ ñamboyke hag̃ua Satanás ñuhã?

⁷ Jesús oiporúramo Ñandejára Kuatiañeʼẽme heʼíva ombohovái hag̃ua Satanáspe, koʼýte ñande jajapovaʼerã avei upéicha. Ñamboyke hag̃ua Satanáspe ha umi ñuhã oiporúva, tekotevẽ jaikuaave la Biblia heʼíva ha jaiko upépe heʼiháicha. Heta oĩ ojapóva upéicha ostudia rire la Biblia ha ohechakuaa rire mbaʼeichaitépa ñanepytyvõ jajapóramo Jehová heʼíva. Añetehápe Ñandejára Ñeʼẽ ipuʼaka, ikatu oikuaauka umi ‘ñane remiandu ha ñande pyʼapy rembipota’ (Heb. 4:12). Avei jalee meméramo la Biblia ha jajepyʼamongetárõ hese jahechakuaáta Jehová katuete okumpliha iñeʼẽ (Dan. 9:13). Jaikuaa rupi la Biblia ipuʼakaha ñañemotiempovaʼerã jajepyʼamongeta hag̃ua umi téysto ñanepytyvõtavare ñanekangyhápe.

8. Mbaʼe rupivépa Jehová omeʼẽ ñandéve ijespíritu sánto?

⁸ Jesús ombohovái Satanáspe ‘henyhẽ rupi espíritu sántogui’, ndahaʼéi oikuaa porãguinte Ñandejára Kuatiañeʼẽme heʼíva (Luc. 4:1). Upéicha avei ñande ñanembarete ha ñandekatupyryvéta ñañemoag̃uíramo Jehováre. Mbaʼéichapa ikatu jajapo upéva? Jaiporupaitévo opa mbaʼe Jehová omeʼẽva ñandéve ñanerenyhẽ hag̃ua espíritu sántogui, umíva apytépe, la Biblia, ñemboʼe ha pe kongregasión (Sant. 4:7, 8). Heta ermáno ohechakuaa oipytyvõitereiha chupekuéra oiporu hetáramo itiémpo Jehová servísiope. Heʼi oipytyvõha chupekuéra opensa hag̃ua umi mbaʼe iporã ha omombaretétavare ijerovia.

9, 10. a) Mbaʼeichagua ñuhãpa Satanás oiporuve nde reikohárupi? b) Mbaʼéichapa jajepyʼamongeta ha ñañemboʼéramo ikatu ñanepytyvõ ñambohovái hag̃ua Satanás ñuhã, koʼýte ñanekaneʼõ jave?

⁹ Ñapensamína umi mbaʼe ikatúvare ñanemoñuhã. Oiméramo ñamendáva, ñamañasépa sapyʼánte peteĩ ndahaʼéivare ñane ména térã ñane rembireko? Térã ndahaʼéiramo ñamendáva ha ñaneinvitárõ peteĩ ndahaʼéiva testígo ñasẽ hag̃ua hendive, hasýpa ñandéve ñamboyke hag̃ua upéva? Osẽramo umi taʼanga tieʼỹ jahecha jave téle térã jaiporu jave Internet, japytápa ñamaña hese? Ñamboyke hag̃ua koʼã mbaʼe tekotevẽ ñapensa raẽ mbaʼépa ikatu oiko ñanderehe: nañañatendéiramo, mbeguekatúpe ikatu jajapo umi mbaʼe ivaivéva Jehová renondépe (Sant. 1:14, 15). Ñapensavaʼerã avei mbaʼéichapa oñeñandúta Jehová, pe kongregasión ha ñane familiakuéra nañaneñeʼẽrendúiramo. Péro jajapóramo Jehová léi heʼíva javyʼáta ha ñandepyʼaguapýta (elee Salmo  119:37 ha Proverbios 22:3). Jahasa jave koʼãichagua jepyʼaraʼã rehe, jajerurékena Jehovápe tañanepytyvõ ñambohovái hag̃ua.

¹⁰ Pe ñuhã Satanás omoĩvaʼekue Jesúspe ñanemboʼe avei peteĩ mbaʼe iñimportantetereíva. Upérõ ojapóma 40 día Jesús ndokaruvéi hague, ha Satanás ohechakuaa opyta porãtaha chupe upéva omoñuhã hag̃ua Jesúspe (Luc. 4:13). Upéicha avei koʼág̃a Satanás ojapo ñanderehe: oheka moõpa ñanekangyve ñanemoñuhã hag̃ua. Upévare tekotevẽterei akóinte ñamombarete ñande jerovia Jehováre. Ha koʼýte ñanekaneʼõ térã nañanekyreʼỹvéiramo jajerurevaʼerã Jehovápe toñangareko ñanderehe ha tomeʼẽ ñandéve ijespíritu (2 Cor. 12:8-10).

Puʼaka ani hag̃ua ñanekaneʼõ ha nañanekyreʼỹvéi

11, 12. a) Mbaʼérepa heta tapicha naikyreʼỹvéi koʼág̃a rupi? b) Mbaʼépa ñanemombaretéta nañanekyreʼỹvéi jave?

¹¹ Ñaneimperfékto rupi sapyʼánte nañanekyreʼỹvéi ha koʼýte jaikógui peteĩ tiémpo ijetuʼuetereívape (2 Tim. 3:1-5). Hiʼag̃ui ag̃uivévo Armagedón hetave provléma oĩ, umíva apytépe ijetuʼuve jahupyty hag̃ua ñane remikotevẽ, oĩ oñembyasýva ha hetave mbaʼe. Ndareíri ningo hetápe ijetuʼuve koʼág̃a rupi oñangareko porã hag̃ua hogayguakuérare. Hetágui umi mbaʼe ñandejopýva sapyʼánte ñanekaneʼõma. Oiméramo nde reñeñandu upéicha, mbaʼépa nepytyvõta regueropuʼaka hag̃ua?

¹² Aníkena nderesarái Jesús opromete hague oñemeʼẽtaha ñandéve peteĩ ñanepytyvõvaʼerã: pe espíritu sánto (elee Juan 14:16, 17). Ndaipóri ningo imbaretevéva pe espíritu sántogui. Upéva rupive Jehová omeʼẽ ñandéve “hetaiteve mbaʼe” ñanemombarete ha ñanepytyvõtava ñambohovái hag̃ua oimeraẽ mbaʼe (Efe. 3:20). Apóstol Pablo heʼi avei pe espíritu sánto rupive oñemeʼẽha ñandéve puʼaka ñanemombaretéva ‘opáguio jajejopy vaíramo jepe’ (2 Cor. 4:7, 8). Añetehápe Jehová ndeʼíri oipeʼapaitetaha koʼág̃a umi mbaʼe ñandejopýva, péro opromete ñandéve ijespíritu sánto rupive ñanemombaretetaha ñaikotevẽ jave (Fili. 4:13).

13. a) Mbaʼépa oipytyvõ Stéphaniepe ombohovái hag̃ua pe jehasa asy? b) Reikuaápa nde peteĩ ohasáva koʼãichagua mbaʼére avei?

¹³ Jahechamína Stephanie ohasavaʼekue. Haʼe ningo precursora regular ha oreko 19 áño. Oguerekórõ guare 12 áño ou iderráme ha umi doktór heʼi chupe orekoha tumór  iñakãme. Upe guive dos vésema ojopera ha osegi tratamiénto péro upe rire dos vése iderráme jey ha upéicha rupi ou ndohechaporãvéi ha ndaikatuvéi omonguʼe porã pe hete ijasu gotyogua. Umi mbaʼe omokangyeterei Stéphaniepe, upéicharamo jepe oñemohemby ojapo hag̃ua umi mbaʼe iñimportantevéva chupe g̃uarã, umíva apytépe, oho rreunionhápe ha opredika. Haʼe ohechakuaa mbaʼéichapa Jehová omombarete chupe ogueropuʼaka hag̃ua. Pór ehémplo, noñeñanduporãi jave, umi ermáno rembiasakue osẽva ñane puvlikasiónpe tuicha ombopyʼaguapy chupe. Heta ermáno omokyreʼỹ Stéphaniepe oguerahaukávo chupe kárta ha oñemongetávo hendive oñepyrũ mboyve ha opa rire umi rreunión. Avei umi oikuaasevéva la Biblia omboʼéva oho Stephanie rógape ostudia hag̃ua hendive. Koʼã mbaʼére haʼe oagradese Jehovápe ha heʼi Salmo 41:3, pe téysto ogustavéva chupe, oñekumpliha hese.

14. Mbaʼépa ndajajapoivaʼerã ñanekaneʼõ ha jajejopy jave ha mbaʼérepa?

¹⁴ Ñanekaneʼõ térã oĩramo heta mbaʼe ñandejopýva, ikatu ñaimoʼã ñañeñandu porãvetaha saʼivénte jaiporúramo ñane tiémpo jastudia hag̃ua ñaneañohápe ha ñande rogayguándi térã japredika ha jaha hag̃ua rreunionhápe. Péro tuichaiterei jajavy ñapensáramo upéicha. Mbaʼérepa? Umíva rupive ningo Jehová omeʼẽ ñandéve ijespíritu sánto, ñanemokyreʼỹ ha ñanemombarete (elee Mateo 11:28, 29). Ajépa sapyʼánte ñanekaneʼõ jahávo rreunionhápe, péro opa rire tuicha ñanekyreʼỹ ha ñanembarete jey. Haʼetevaicha voi ku ñandepyahuete jeýva!

15. a) Heʼípa Jehová natekotevẽiha ñañehaʼã ñaneñeʼẽrendu hag̃ua chupe? Eiporu umi téysto rembohovái hag̃ua. b) Mbaʼépa opromete ñandéve Ñandejára ha mbaʼépa ikatu ñañeporandu?

¹⁵ Ko mbaʼe ndeʼiséi ndaijetuʼumoʼãiha jaiko Jesús remimboʼéramo. Ñañehaʼãmbaitevaʼerã katu akóinte ñaneñeʼẽrendu hag̃ua Jehovápe (Mat. 16:24-26; Luc. 13:24). Ha ñanekaneʼõramo, Jehová omeʼẽta ñandéve puʼaka ijespíritu rupive. Pe proféta Isaías heʼi: ‘Umi ojeroviáva Jehováre imbarete jeýne ha ágilaicha ovevéne. Ijukuʼaʼỹre oñaníne ha oguatáne ikaneʼõʼỹre’ (Isa. 40:29-31). Upévare ikatu ñañeporandu: mbaʼérepa oĩ heʼíva ñanemokaneʼõitereiha umi mbaʼe jajapóva Jehovápe g̃uarã?

16. Mbaʼépa ñamboykevaʼerã ani hag̃ua ñanekaneʼõ ha ñañeñandu vai?

¹⁶ Ñandejára Ñeʼẽ ñanemokyreʼỹ jaikuaa porã hag̃ua mbaʼépa pe iñimportantevéva (Fili. 1:10). Apóstol Pablo ombojoja kristianokuéra rekove peteĩ karrérare ha omeʼẽ ko konsého: ‘Jaheja opa umi mbaʼe ñandejokóva ha ñañani kaneʼõʼỹre pe karréra jarekóva ñane renonderã’ (Heb. 12:1, ÑÑB). Koʼápe Pablo ñanemboʼe ñamboykevaʼerãha umi mbaʼe naiñimportánteiva. Ikatu oime hetáma voi ñane rembiapo ha jajaposevénte ambue mbaʼe, upévare ñanekaneʼõ ha ñañeñandu vai. Upéicharõ iporã ñañeporandumi: “Ambaʼapoitereipaʼaína? Aha pyʼỹipa de vakasión? Aiporu hetápa che tiémpo vyʼarã rapykuéri?”. Ñanearandu ha ñaneakãguapýramo jahechakuaáta moõ pevépa ikatúta jajapo ñane rembiapo ha ñamboykéta umi mbaʼe naiñimportánteiva.

17. Mbaʼérepa ikatu avei oĩ kristiáno sapyʼánte naikyreʼỹvéiva ha mbaʼépa ikatu oipytyvõ chupekuéra?

¹⁷ Ikatu avei oĩ kristiáno naikyreʼỹvéiva  heta tiémporema ohaʼarõgui oñehundi ko múndo aña (Pro. 13:12). Mbaʼépa ikatu omokyreʼỹ jey chupekuéra? Habacuc 2:3 heʼíva: ‘Nog̃uahẽiramo gueteri ára oiko hag̃ua ko rehecháva, katuete oikóta. Hiʼaréramo ehaʼarõnte, ág̃a hiʼaraitépe og̃uahẽta’. Jahechaháicha, Jehová voi opromete hiʼaraitépe oñehunditaha ko múndo aña.

18. a) Mbaʼe promésapa nemokyreʼỹ? b) Mbaʼépa jahecháta pe artíkulo oúvape?

¹⁸ Enterove jaservíva Jehovápe jaipotaitereíma opa umi mbaʼe ñanemokangy ha ñanembohasa asýva, ha og̃uahẽ pe ára enterove ñandepyahu jeytaha (Job 33:25). Koʼág̃ama voi pe espíritu sánto ikatu ñanemombarete ha ñanemokyreʼỹ jajapo meméramo umi mbaʼe Jehová oguerohorýva (2 Cor. 4:16; Efe. 3:16). Aníkena jaheja mbaʼeve ñanemokangy ha ndajahupytýi umi mbaʼe porãita ñaneraʼarõva. Ñanemanduʼavaʼerã umi provléma, tahaʼe jepyʼaraʼã, kaneʼõ ha umi mbaʼe ñanemokangýva opataha og̃uahẽ vove Ñandejára múndo pyahu. Pe artíkulo oúvape jahecháta mbaʼéichapa pe espíritu sánto ñanemombarete jagueropuʼaka hag̃ua jajepersegi térã ñandejopy jave ñande rapichakuéra ha ambue provléma ikatúva jahasa.

Mbaʼéichapa rembohováita?

• Mbaʼéichapa ñanemombarete jaleéramo la Biblia?

• Mbaʼéichapa ñanepytyvõta ñañemboʼe ha jajepyʼamongetáramo?

• Mbaʼépa ñamboykevaʼerã ani hag̃ua ñanekaneʼõ ha nañanekyreʼỹvéi?

[Porandu ñahesaʼỹijóva]

[Nóta oĩva taʼanga ndive páhina 24]

Umi rreunión omombarete ñande jerovia