Japorohayhúramo arakaʼeve nañasẽvaimoʼãi

‘Pe mborayhu oaguanta opa mbaʼe. Pe mborayhu ndopamoʼãi arakaʼeve.’ (1 COR. 13:​7, 8, NM.)

1. a) Mbaʼépa ojeʼe jepi pe mborayhúre? b) Mbaʼépa koʼág̃a rupi la hénte ohayhuve?

 ÑANDE yvypóra ningo ñaikotevẽ pe mborayhúre ha heta mbaʼe ojeʼe hese. Hetaiterei purahéi, novéla ha pelíkulape ningo oñemomorã pe mborayhu ha ojehechauka ndaijojahaiha. Péro ko ára pahápe hasy jatopa hag̃ua yvypóra ohayhúva Ñandejárape ha hapichakuérape. Ñandejára Ñeʼẽme heʼi voi oĩtaha ‘opensáva ijehénte, ohayhuetereíva pirapire ha ohekáva vyʼarãnte ohekarangue Ñandejárape’ (2 Tim. 3:​1-5).

2. Mbaʼépa heʼi ñandéve Ñandejára Ñeʼẽ?

² Enterove ningo ikatu japorohayhu ha Ñandejára Ñeʼẽ heʼi ñañeñangareko hag̃ua ani jahayhu umi mbaʼe hekopeguaʼỹva. Heʼi avei mbaʼépa ikatu oiko ñanderehe nañañeñangarekóiramo (1 Tim. 6:​9, 10). Ñanemanduʼamíntena apóstol Pablo angirũ Demas rehe. Haʼe ningo ohayhuetereivaʼekue opa mbaʼe oĩva ko  múndope (2 Tim. 4:10). Ha apóstol Juan oñemoñeʼẽ avei ñandéve upéva rehe (jaleemína 1 Juan 2:​15, 16). Péicha jahechakuaa ndaikatuiha jahayhu ko múndo oñehundítavape ha jaʼe avei jahayhuha Ñandejárape ha opa mbaʼe oúva chugui.

3. Mbaʼérepa ñañeñangarekovaʼerã ha mbaʼépa iporã ñañeporandumi?

³ Ñande ningo ndajaikói ko múndope ojeikoháicha péro jaiko umi hénte ndoikuaáiva mbaʼépa heʼise pe mborayhu apytépe. Upévare ñañeñangarekovaʼerã ani hag̃ua oiko ñanderehe upéva. Iporã avei ñañeporandumi: Máva mávapepa ahayhuvaʼerã? Mbaʼéichapa ikatu ahechauka pe mborayhu oaguantáva ha ndopamoʼãiva arakaʼeve? Mbaʼépa ahupytýta koʼág̃a ha amo gotyove avei ahechaukáramo peichagua mborayhu? Jahechamína mbaʼépa heʼi Ñandejára koʼã mbaʼére ikatu hag̃uáicha jajapo.

Jahayhúkena Ñandejárape

4. Mbaʼéichapa ikatu jahayhu hayhuve Ñandejárape?

⁴ Ñande kristianokuéra ñañehaʼãvaʼerã jahayhu hayhuve Ñandejárape. Pór ehémplo, ñamongakuaa hag̃ua peteĩ kóga ningo japreparavaʼerã hendag̃ua ha upéi ñañotỹ pype pe semílla (Heb. 6:7). Upéicha avei japreparavaʼerã ñane korasõ, upéi ñañotỹ pype Ñandejára Ñeʼẽ heʼíva ha upéicha ñamongakuaa ñane mborayhu Jehováre. Upéva jajapo hag̃ua niko ñahesaʼỹijo porã vaʼerã la Biblia ha jaikuaa porãve Jehovápe (Col. 1:10). Tuicha ñanepytyvõta avei ndajafaltáiramo rreunionhápe ha ñakomenta. Upévare iporã ñañeporandumi: “Añehaʼãpa aikóvo aikuaa porãve hag̃ua Ñandejára Ñeʼẽ heʼíva?” (Pro. 2:​1-7).

5. a) Mbaʼe rehépa jahechakuaa mbaʼeichaguápa Jehová? b) Mbaʼéichapa reñeñandu rehechakuaávo Jehová hekojoja, iñarandu ha ipoderosoha?

⁵ La Biblia rupive ningo Jehová omombeʼu ñandéve mbaʼeichaguápa haʼe. Upévare ñahesaʼỹijóramo la Biblia jahayhuvéta Jehovápe jaikuaágui haʼe hekojoja, iñarandu, ipoderóso ha oporohayhuetereiha. Jahechakuaa ningo Jehová hekojojaha ñahesaʼỹijóvo umi mbaʼe haʼe ojapóva ha heʼíva ñandéve jajapo hag̃ua (Deu. 32:4; Sal. 19:7). Jahechakuaa avei Jehová iñaranduetereiha jajepyʼamongetávo hembiapokue porãitáre (Sal. 104:24). Ko univérsore katu jahechakuaa mbaʼeichaitépa Jehová ipoderóso ha hetaiterei mbaʼe ijojahaʼỹva ojapo (Isa. 40:26).

6. Mbaʼéichapa Jehová ohechauka ñanderayhuha ha mbaʼépa ñande jajapovaʼerã?

⁶ Péro mbaʼépa jaʼekuaa Ñandejára mborayhúre? Jehová ningo enterovépe ohechaukase ohayhuha. Haʼe ohayhúgui voi opavavépe omeʼẽ heta mbaʼe porã. Pór ehémplo, omeʼẽ Itaʼýra rekove osalva hag̃ua yvyporakuérape (jaleemína Romanos 5:8). Ha enterove yvypórape ikatu upéva ovenefisia, péro upearã ñande avei jahayhuvaʼerã Jehovápe ha jajerovia Itaʼýra Jesús rehe (Juan 3:​16, 36). Ñande ningo jahayhuvaʼerã voi Jehovápe ombou haguére Itaʼýra ojesakrifika ha ñandepeʼa hag̃ua pekádo poguýgui.

7, 8. a) Mbaʼéichapa ikatu jahechauka jahayhuha Jehovápe? b) Mbaʼéicha javépa ñande jasegi japredika?

⁷ Mbaʼéichapa ikatu jahechauka jahayhuha Jehovápe ha jaagradeseha chupe opa mbaʼe ojapovaʼekuére? La Biblia ombohovái  ñandéve: ‘Jahayhu Ñandejárape heʼise jajapo haʼe heʼíva, ha upéva ndaipohýiri’ (1 Juan 5:3). Péicha jahecha jahayhúramo Ñandejárape jajaposetaha haʼe heʼíva. Upévare ñande ñañeʼẽ la héntepe Jehováre ha umi mbaʼe ojapótavare ogoverna vove ko yvy. Ha upéva oipytyvõ opavave ñanerendúvape. Avei kyreʼỹme jajapóramo upéva jahechauka jahayhu ha ñaneñeʼẽrenduha Ñandejárape ñane ñeʼã mbytete guive (Mat. 12:34).

⁸ Heta ningo oĩ nohenduséiva pe marandu porã ha oĩ voi katu ndoikuaaséiva mbaʼeve. Upéicharõ jepe ñande jasegi ñane ermanokuérandi japredika ha ñamboʼe Ñandejára Ñeʼẽ. Ñañehaʼã jajapo porã ñane rembiapo ha ñaneñeʼẽrendu opa mbaʼe Jehová heʼívape (2 Tim. 4:5).

Jahayhúkena Jesucrístope

9. Mbaʼe mbaʼépa ohasavaʼekue Jesús ha mbaʼérepa ogueropuʼaka umíva?

⁹ Jahayhúgui Ñandejárape jahayhu avei Itaʼýrape. Péro mbaʼérepa ikatu avei jahayhu Jesúspe? Heta mbaʼére. Ndajahecháiramo jepe chupe, heta mbaʼe ikatu jaikuaa chugui ha upéicha koʼẽ koʼẽre jahayhuvéta chupe (1 Ped. 1:8). Mbaʼe mbaʼépa ohasavaʼekue Jesús? Haʼe ningo iñeʼẽrendúramo jepe Ñandejárape oĩvaʼekue heta oñeʼẽrei ha ndaijaʼéiva hese, opersegi, ojaʼo ha heta ombohasa asýva chupe (jaleemína Juan 15:25). Ha umíva ningo Jesús ogueropuʼakapa ohayhúgui Itúva Jehovápe. Ha ñandéve ñanderayhúgui avei omano ñanderehehápe ha upéicha ñandesalva (Mat. 20:28).

10, 11. Mbaʼépa ñañehaʼãvaʼerã jajapo Jesús ñanderayhu haguére?

¹⁰ Jajepyʼamongetáramo opa mbaʼe Jesús ojapovaʼekuére ñamombaʼevéta upéva ha jahayhuvéta chupe. Ñande ningo ñamoirũ Jesúspe ha upévare japorohayhuvaʼerã haʼéicha. Upéicharõmante jasegíta japredika haʼe heʼi haguéicha ha ñaipytyvõ la héntepe oservi hag̃ua Jehovápe (Mat. 28:​19, 20).

¹¹ Jesús ningo ohayhueterei yvyporakuérape. Upévare ñande ñañehaʼãvaʼerã jajapo ñane rembiapo haʼe omeʼẽvaʼekue ñandéve og̃uahẽ mboyve huʼãme ko ára paha (jaleemína 2 Corintios 5:​14, 15). Jesús ningo oporohayhúgui ojapo opa mbaʼe tekotevẽva oñekumpli hag̃ua Jehová rembipota yvyporakuérape g̃uarã. Ha ñande avei jajapo porãta Jehová rembipota jasegíramo Jesús ehémplo. Ha upearã tekotevẽ jahayhu hayhuve Jehovápe (Mat. 22:37). Jajapóramo umi mbaʼe Jesús omboʼe ha heʼivaʼekue jahechaukáta jahayhuha chupe. Ha toiko la oikóva ñadefendéta Jehová sãmbyhy Jesús ojapo haguéicha (Juan 14:​23, 24; 15:10).

Jaguatákena mborayhu rapére

12. Mbaʼépa apóstol Pablo heʼisevaʼekue oñeʼẽrõ guare pe “tape iporãvévare”?

¹² Apóstol Pablo ningo osegivaʼekue Jesús ehémplo, upévare haʼe ikatu vaʼekue heʼi umi Corintoyguápe osegi hag̃ua iñehémplo (1 Cor. 11:1). Pablo omokyreʼỹ chupekuéra ohupyty hag̃ua umi mbaʼe porã Ñandejára omeʼẽva upe tiémpope. Pór ehémplo pe milágro rupive oñeʼẽ hag̃ua ambue idiómape ha omonguera hag̃ua hasývape. Omokyreʼỹ avei chupekuéra ojapo hag̃ua peteĩ mbaʼe ijojahaʼỹva. Ha heʼi  voi chupekuéra: “Che ahechaukáta peẽme peteĩ tape iporãvéva” (1 Cor. 12:31). Upe rire Pablo heʼívare jahechakuaa oñeʼẽ hague mborayhúre. Péro mbaʼérepa pe mborayhu haʼe pe tape iporãvéva? Jaikuaa hag̃ua jahechavaʼerã apóstol Pablo heʼivaʼekue upe rire (jaleemína 1 Corintios 13:​1-3). Ñandejára espíritu rupive haʼe ohechauka ñandekatupyry ha jajapóramo jepe heta mbaʼe porã ndovalemoʼãiha ñandéve mbaʼeverã ndajajapóiramo mborayhúpe.

13. a) Mbaʼe téystopa oñemoĩ 2010-pe g̃uarã? b) Mbaʼérepa ikatu jaʼe ‘pe mborayhu ndopamoʼãiha arakaʼeve’?

¹³ Apóstol Pablo ningo omombeʼu mbaʼe mbaʼépa heʼise pe mborayhu ha mbaʼépa ndeʼiséi (jaleemína 1 Corintios 13:​4-8). Upévare iporãta jajepyʼamongetami jajapopañaína ko téystope heʼiháicha. Péro koʼág̃a ñahesaʼỹijóta pe versíkulo 7 opakuetévo heʼíva ha oñepyrũvo pe versíkulo 8. Upépe heʼíva oñemoĩ téysto áño 2010-pe g̃uarã: ‘Pe mborayhu oaguanta opa mbaʼe. Pe mborayhu ndopamoʼãi arakaʼeve’. Pe versíkulo 8 ningo omombeʼu yma pe kongregasión ypykuépe espíritu sánto rupive ikatu hague oñeñeʼẽ ambue idiómape, ojeprofetisa ha ojejapo hetave mbaʼe porã. Apóstol Pablo ningo heʼi koʼã milágro opa vaʼerãha péro pe mborayhu ndopamoʼãiha. Mbaʼérepa? Jaikuaa ningo Jehová voi haʼeha pe mborayhu ha oikoveha opa árare. Upévare ‘pe mborayhu ndopamoʼãi arakaʼeve’. Ha akóinte Jehová ohechaukáta upéva (1 Juan 4:8).

‘Oaguanta opa mbaʼe’

14, 15. a) Mbaʼépa ñanepytyvõta ñaaguanta hag̃ua opa mbaʼe? b) Mbaʼérepa peteĩ ermáno Alemaniaygua osegi ojerovia Jehováre?

¹⁴ Mbaʼépa ñanepytyvõta ñaaguanta hag̃ua opa mbaʼe? Tuicha ñanepytyvõta jajoayhúramo Ñandejára Ñeʼẽme heʼiháicha. Upéva ndeʼiseihína ñameʼẽmbataha jarekomívante pe marandu porã rehehápe. Ñaime voi katu ñameʼẽ hag̃uáicha ñande rekove jepe ñamoirũ hag̃ua rehehápe Jesúspe (Luc. 9:​24, 25). Upéicha ojapovaʼekue umi Testígo oĩvaʼekue kárselpe, umi campo de concentración ha umi lugár oñembaʼapo pohyihápe. Upéva oiko pe segunda gérra mundiálpe ha osegi upe rire avei.

¹⁵ Pór ehémplo Wilhelm, peteĩ ermáno Alemaniayguápe ojeʼe ojefusilataha chupe osegi haguére ojerovia Jehováre. Upémarõ haʼe ohai peteĩ kárta ifamiliakuérape ha heʼi: “Opa mbaʼe ári jahayhuvaʼerã Ñandejárape oipota haguéicha ñande Ruvicha Jesucristo. Jajepytaso mbaretéramo ijykére, heta mbaʼe porã omeʼẽta ñandéve”. Tiémpo rire peteĩ hogaygua omombeʼu ko rrevístape mbaʼéichapa ogueropuʼakavaʼekue hikuái heta mbaʼe ijetuʼúva: “Che ha che rogaygua ningo akóinte roñehaʼã romotenonde Ñandejárape”. Upéicha heʼi avei heta ermáno koʼág̃a oĩvahína kárselpe Armenia, Corea del Sur ha Eritréape. Haʼekuéra ningo akóinte ohayhu Jehovápe ipyʼaite guive.

16. Mbaʼépa ohasavaʼekue ñane ermanokuéra Malauigua?

¹⁶ Heta hendápe ningo opaicharei ojejopy ermanokuérape anive hag̃ua oservi Jehovápe. Maláuipe ningo veintiséis áño pukukue pe goviérno oproivi ermanokuéragui umi mbaʼe ojapóva Jehovápe g̃uarã. Opersegi ha omaltrata vaipa chupekuéra. Upéicharõ jepe ñane ermanokuéra ogueropuʼaka umi mbaʼe ha osẽ porã. Haʼekuéra ningo 18.000 oĩvaʼekue pe goviérno oñepyrũrõ guare opersegi chupekuéra ha 30 áño haguépe katu 38.393 oĩ hikuái. Ha heta tetã rupi ningo oiko avei upéicha.

17. Mbaʼépa ohasa ermanokuéra ha mbaʼéichapa ogueropuʼaka hikuái?

 ¹⁷ Ijetuʼu ningo jagueropuʼaka oĩ jave oñemoĩva ñanderehe jaservi haguére Jehovápe. Ha koʼýte ijetuʼu oñemoĩramo ñanderehe ñande rogaygua ha ñane hentekuéra. Jesús ningo heʼivaʼekue voi oikotaha upéicha ha heta ermáno ohecha mbaʼéichapa oñekumpli upéva (Mat. 10:​35, 36). Oĩ mitãrusu ha mitãkuña oservi haguére Jehovápe omaltratáva chupe ituvakuéra. Oĩ katu upévare oñemosẽva chupe hógagui ha oho oiko umi ermáno imbaʼeporãva rógape. Ha oĩ avei umi ermáno omboyketéva voi chupe ihentekuéra. Mbaʼéicha piko ogueropuʼaka hikuái koʼã mbaʼe? Ohayhúgui Jehovápe, Jesúspe ha ermanokuérape (1 Ped. 1:22; 1 Juan 4:21).

18. Mbaʼérepa umi omendáva oikotevẽ ‘pe mborayhu opa mbaʼe ogueropuʼakáva’?

¹⁸ Heta situasiónpe ningo oñekotevẽ ‘pe mborayhu ogueropuʼakáva opa mbaʼe’. Pór ehémplo umi omendáva oikotevẽ upeichagua mborayhúre. Ména ha tembireko oservíva Jehovápe ningo ojapovaʼerã Jesús heʼivaʼekue koʼápe: ‘Yvyporakuéra ndoipeʼaivaʼerã ojuehegui Ñandejára ombojoajuvaʼekue’ (Mat. 19:​6, JMP). Ha ohasa jave hikuái heta mbaʼe ijetuʼúvare, imanduʼavaʼerã Jehová ombojoaju hague hekovekuéra (1 Cor. 7:28). La Bíbliape ningo heʼi voi ‘pe mborayhu ogueropuʼakaha opa mbaʼe’. Upévare ména ha tembireko ojoayhúramo péicha, ndahasyivéta chupekuéra osegi hag̃ua oñondive ha akóinte ojoayhu hag̃ua (Col. 3:14).

19. Mbaʼépa ojapo Ñandejára siervokuéra oiko jave sarambi?

¹⁹ Pe mborayhu ningo ñanepytyvõ avei jagueropuʼaka hag̃ua oiko jave sarambi. Pór ehémplo, pe yvyryrýi ojapórõ guare sarambi Perúpe sur gotyo ha oúrõ guare yvytu atã hérava Katrina golfo de Méxicope heta ermánogui oñehundi hóga ha umi mbaʼe orekomíva. Péro ermanokuéra oparupigua oguerahauka chupekuéra umi mbaʼe oikotevẽva. Oĩ avei heta ohóva oipytyvõ oñemopuʼã jey hag̃ua chupekuéra hóga ha oñemyatyrõ hag̃ua umi Salón del Reino. Péicha jahecha mbaʼéichapa Jehová siervokuéra ojoayhu ha oñangareko ojuehe (Juan 13:​34, 35; 1 Ped. 2:17).

“Pe mborayhu ndopamoʼãi arakaʼeve”

20, 21. a) Mbaʼérepa pe mborayhu haʼe pe tape iporãvéva? b) Mbaʼérepa akóinte jaguatase mborayhu rapére?

²⁰ Jehová organisasiónpe ningo jajuhu heta ehémplo ohechaukáva pe mborayhu haʼeha pe tape iporãvéva. Pe mborayhu ningo ndaijojahái. Ndareíriko apóstol Pablo heʼivaʼekue pe kongregasión oñemopyenda mbarete rire ndaiporiveimaha pe espíritu sánto rupive oprofetisáva, oñeʼẽva ambue idiómape ha ojapóva milágro. Péro haʼe heʼi avei: ‘Koʼág̃a opyta pe jerovia, esperánsa ha mborayhu. Ha pe tuichave mbaʼéva koʼã mbohapy apytégui haʼehína pe mborayhu’ (1 Cor. 13:13).

²¹ Koʼẽrõitéma umi mbaʼe jagueroviáva ha umi mbaʼe porã ñahaʼarõva oñekumplipáta Ñandejára múndo pyahúpe ha natekotevẽmoʼãvéima jajerovia umívare. Péro mbaʼépa oikóta pe mborayhúgui? Pe mborayhu ningo ndopamoʼãi arakaʼeve. Jahupyty vove jeikove opaveʼỹva jaikuaa porãvéta jahávo Ñandejára mborayhu. Upévare ñañehaʼãkena jajapo Ñandejára rembipota ha jaguata pe mborayhu rapére, upéva niko ndopamoʼãi arakaʼeve. Jajapóramo upéicha jaikovéta opa ára g̃uarã (1 Juan 2:17).

Ñambohovaimína koʼã porandu

• Mbaʼérepa ñañeñangarekovaʼerã ani hag̃ua jahayhu umi mbaʼe hekopeguaʼỹva?

• Mbaʼépa ikatu jagueropuʼaka pe mborayhu rupive?

• Mbaʼérepa ikatu jaʼe pe ‘mborayhu ndopamoʼãiha arakaʼeve’?

[Porandu ñahesaʼỹijóva]

[Komentário oĩva páhina 27-pe]

Téysto áño 2010-pe g̃uarã: ‘Pe mborayhu oaguanta opa mbaʼe. Pe mborayhu ndopamoʼãi arakaʼeve’ (1 Cor. 13:​7, 8).

[Nóta oĩva taʼanga ndive páhina 25]

Jahayhúgui Ñandejárape ñamombeʼu pe marandu porã

[Nóta oĩva taʼanga ndive páhina 26]

Pe mborayhu oipytyvõ umi ermáno Malauiguápe ogueropuaʼaka hag̃ua heta mbaʼe