Peẽ imitãva, pehechaukákena pejeroviaveha pehóvo

‘Ejepyʼamongetákena koʼã mbaʼére ha ejapo upéicha opavave ohechakuaa hag̃ua rejeroviaveha rehóvo.’ (1 TIM. 4:​15, BNP.)

1. Mbaʼépa Ñandejára oipota umi imitãva ojapo?

 RRÉI Salomón ohaivaʼekue: ‘Evyʼáke nde mitãrusu, nemitã aja, ha terevyʼaite nde kariaʼy aja’ (Ecl. 11:​9, ÑÑB). Koʼápe heʼíva ohechauka porã Jehová oipotaha revyʼa. Péro ndahaʼéi nemitã ajánte, rekakuaapa rire avei oipota revyʼa. Jahecha jepi avei heta imitãva tuichaiterei ojavyha ha oikove aja entéro ohasa asy upe haguére. Pór ehémplo, Ñandejára rembiguái Job jepe heʼivaʼekue: ‘Chemitãrusúpe che rembiapo vaikue cherupyty koʼág̃a’ (Job 13:​26, ÑÑB). Añetehápe ningo ndepyahu aja, heta mbaʼe iñimportánteva redesidivaʼerã. Upévare naneakãguapýiramo, ikatu resẽ vai, nderevyʼavéi ha repyta umi provléma nembohasa asýtava reheve (Ecl. 11:10).

2. Mbaʼépa heʼi la Biblia oipytyvõtaha umi imitãvape iñakãguapy hag̃ua?

² Mbaʼépa nepytyvõta neakãguapy hag̃ua? Apóstol Pablo ningo ohaivaʼekue umi  Corintoyguápe kóicha: ‘Ani pepensa mitãicha. Pepensa katu okakuaapavaʼekuéicha’ (1 Cor. 14:​20, BNP). Péicha rehechakuaa rejapóramo koʼápe heʼíva, repensa ha rejepyʼamongetáramo peteĩ kakuaáicha, hasyvéta rejavy hag̃ua tuichaiterei.

3. Mbaʼépa rejapovaʼerã rejeroviave hag̃ua rehóvo Ñandejárare?

³ Nemanduʼákena reñehaʼãmbaitevaʼerãha rejeroviave hag̃ua rehóvo Ñandejárare. Pablo heʼivaʼekue Timotéope: ‘Aníke avave ndeapoʼi nemitã haguére, reikovaʼerã uvei ehémploramo umi Jesús rehe ojeroviávape, ne ñeʼẽme, nde rekópe, ne mborayhúpe, nde jerovia ha nde rekojoheipyrépe. Elee meme, eñemoñeʼẽ ha eporomboʼe. Ejepyʼamongetákena koʼã mbaʼére ha ejapo upéicha opavave ohechakuaa hag̃ua nde rejeroviaveha rehóvo’ (1 Tim. 4:​12-15, BNP). Upéicharõ, nde mitãrusu rejeroviavevaʼerã rehóvo opavave ohechakuaa hag̃ua.

Mbaʼépa heʼise ‘rejeroviave rehóvo’?

4. Mbaʼépa heʼise ‘rejeroviave rehóvo’?

⁴ Pe ñeʼẽ ojeporúva griégope ojeʼe hag̃ua ‘rejeroviave rehóvo’, ikatu avei heʼise “reñakãrapuʼã”, “reho tenonde gotyo” térã “emoporãve”. Apóstol Pablo heʼi Timotéope omoporãve hag̃ua iñeʼẽ, heko, imborayhu, ijerovia ha omboʼéva. Haʼe ningo ehémplo vaʼerã hapichakuérape. Upévare iñimportanteterei Timoteo oñehaʼãmbaite oñakãrapuʼã térã ojeroviave ohóvo.

5, 6. a) Mboy áño guivépa Timoteo ohechaukamavaʼekue ojeroviaveha ohóvo? b) Mbaʼéichapa koʼág̃a rupi umi imitãva ikatu osegi Timoteo ehémplo?

⁵ Apóstol Pablo ningo oñemoñeʼẽvaʼekue Timotéope upe áño 61 ha 64 rupi. Ha Timoteo ningo upérõ peteĩ superintendénte ikatupyrýmava. Haʼe ningo imitã guive ohechauka ojeroviaveha ohóvo Ñandejárare. Ha pe áño 49 térã 50 rupi Timoteo oiméne orekóma veinte áño. Ha umi ermáno Listra ha Iconioygua ohechakuaa hese ojeroviaveha ohóvo, upévare “oñeʼẽ porã hese” hikuái (Hechos 16:​1-5). Upe tiémpope avei apóstol Pablo ogueraha chupe hendive opredika hag̃ua tetã ambue rupi. Haʼe ohechakuaa avei Timoteo ojeroviaitereiha Ñandejárare. Upévare upe rire omondo chupe Tesalónicape, okonsola ha omokyreʼỹ hag̃ua ermanokuérape (jaleemína 1 Tesalonicenses 3:​1-3, 6). Jahechaháicha, Timoteo imitã guive ohechauka ojeroviaveha ohóvo Ñandejárare.

⁶ Ndékena eñehaʼã avei rejapo heta mbaʼe porã. Péicha ojekuaáta nderehe oikohahína ndehegui peteĩ kristiáno ikatupyrýva ha oiporukuaáva la Biblia oporomboʼe hag̃ua. Jesús ningo orekórõ guare doce áño ‘iñarandumavaʼekue ohóvo’ (Luc. 2:52). Ko artíkulope ñahesaʼỹijóta mbaʼéichapa ikatu rehechauka rejeroviaveha rehóvo: 1) rembohováivo provléma, 2) oiméramo remendaséma ha 3) reñehaʼãvo ndekatupyryve predikasiónpe (1 Tim. 4:6).

Embohovái ‘akãguapýpe’ opaichagua provléma

7. Mbaʼéichapa oñeñandu peteĩ mitãkuña ohasa haguére peteĩ mbaʼe ijetuʼúva?

⁷ Peteĩ ermána orekóva 17 áño héra Carol ha heʼi: “Sapyʼánte ningo pyharevete apuʼã chekangyeiterei ha ambyasy voi apáy hague”. * Mbaʼérepa oñeñandu vaiete Carol? Pórke haʼe orekórõ guare diez áño isy ha itúva ojopoi. Ha Carol oho oiko isy ndive, péro isy ndoikói la Bíbliape heʼiháicha. Ikatu ningo nde avei rehasareína peteĩ mbaʼe ijetuʼúva ha haʼetévaicha voi naipohãvéimava.

8. Mbaʼe ijetuʼúvapa ombohovaivaʼekue Timoteo?

⁸ Timoteo avei ombohovaivaʼekue heta mbaʼe ijetuʼúva oservi aja entéro Jehovápe. Pór ehémplo ‘pyʼỹi hasy, oñandúgui ipyʼa’ (1 Tim. 5:​23, BNP). Ha amalisia hiʼotĩ avei. Mbaʼérepa jaʼe upéva? Pablo omondovaʼekue Timotéope umi Corintoygua rendápe osolusiona hag̃ua peteĩ provléma omoñepyrũvaʼekue umi ermáno ndorrespetáiva Páblope. Ha  ojerure chupekuéra oipytyvõ hag̃ua Timotéope oĩ hag̃ua “pyʼaguapýpe” ijapytepekuéra (1 Cor. 4:17; 16:​10, 11).

9. Mbaʼeichaguápa peteĩ iñakãguapýva, ha mbaʼépa ojapo umi neʼĩrava gueteri iñakãguapy?

⁹ Apóstol Pablo oipytyvõ hag̃ua Timotéope, heʼi chupe: ‘Pe espíritu Ñandejára omeʼẽva ñandéve niko ndahaʼéi jakyhyje hag̃ua avavégui, ñanemombarete hag̃ua katu, ha japorohayhu ha ñaneakãguapy hag̃ua’ (2 Tim. 1:7). Peteĩ ‘iñakãguapýva’ ningo opensa porã umi mbaʼe ojapótavare. Ha upéva ningo ndéve nepytyvõta avei rembohovái porã hag̃ua umi mbaʼe vai rehasátava jepe. Ha ñambyasýramo jepe oĩ heta mitãrusu ha mitãkuña neʼĩrava gueteri iñakãguapy ha oimeraẽ mbaʼénte ojapo. Iprovléma jave ndoikuaái mbaʼéichapa osolusionáta, upévare pyhareve guive kaʼaru peve ni nosẽi hupágui térã ohecha téle, ojedroga ha omokõ, oho umi fiestahárupi ỹrõ katu hekovai. Péro ñande kristianokuérape ningo ojeʼe ‘japoi hag̃ua ñande rete rembipota vaígui ha avei ko yvy arigua rembipota vaígui, ha jaiko hag̃ua akãguapýpe, tekojojápe ha ñemomirĩme ko ára kóvape’ (Tito 2:​12, ÑÑB).

10, 11. Mbaʼérepa ikatu jaʼe ñaneakãguapýramo jajeroviavetaha jahávo Jehováre?

¹⁰ La Biblia heʼi “mitãrusukuérape iñakãguapy hag̃ua” (Tito 2:6). Rejapo hag̃ua koʼápe heʼíva reñemboʼevaʼerã Jehovápe ha rejerovia haʼe nemombaretetaha rembohovái hag̃ua ne provlemakuéra (jaleemína 1 Pedro 4:7). Rejeroviavaʼerã nde pyʼaite guive pe ‘mbarete Ñandejára omeʼẽvare’ (1 Ped. 4:11).

¹¹ Carol ningo iñakãguapy ha oñemboʼe Jehovápe. Upéva oipytyvõkuri chupe ombohovái hag̃ua iprovléma. Haʼe heʼi: “Che sy ningo hekovaieterei ha añehaʼãmbaitevaʼerã ambohovái hag̃ua upéva. Ijetuʼueterei ningo chéve ajapo hag̃ua Ñandejára heʼíva, péro tuicha chepytyvõ añemboʼévo Jehovápe. Aikuaa Haʼe oĩha chendive, ha ndakyhyjevéima mbaʼevégui”. Aníkena nderesarái umi mbaʼe vai rehasáva ikatuha nemombareteve ha nepytyvõ nderekoporãve hag̃ua (Sal. 105:​17-19; Lam. 3:27). Rehasa jave oimehaichagua mbaʼe vai, Ñandejára nanderejamoʼãi. Haʼe ningo ‘akóinte nepytyvõta’ (Isa. 41:​10, ÑÑB).

Oiméramo remendaséma

12. Mbaʼérepa umi omendaséva opensa porã vaʼerã Proverbios 20:​25-pe heʼívare?

¹² Oĩ ningo umi kuñataĩ ha kariaʼy ojapuráva omenda hag̃ua. Ha ojapo upéicha ndovyʼáigui, oñeñandúgui haʼeño, ndoikuaáigui rei mbaʼépa ojapóta térã hetágui hógape provléma. Péro la ñemenda ningo ndahaʼeihína vyrorei. Yma ningo oĩ avei opensa porãʼỹre oprometéva Ñandejárape ojapotaha peteĩ mbaʼe (jaleemína Proverbios 20:25). Ha koʼág̃a rupi oĩ avei kariaʼy ha kuñataĩ nopensáiva tuicha mbaʼeha la ñemenda ha  oñehaʼarõha chuguikuéra heta mbaʼe. Ha upéi tardéma ohechakuaa hikuái umi mbaʼe.

13. a) Mbaʼépa oñeporanduvaʼerã umi omendaséva? b) Moõpa ikatu retopa umi konsého iporãva?

¹³ Oimérõ remendaséma, iporã reñeporandumi: “Mbaʼére piko amendase? Mbaʼépa chéve g̃uarã la ñemenda? Aiporavo porã piko hína che rembireko térã che menarã? Mbaʼépa ikatu ajapo roiko hag̃ua vyʼápe oñondive?”. Pe “tembiguái jeroviaha ha iñarandúva” oguenohẽma heta artíkulo oñeʼẽva ñemendáre ha nepytyvõtava redesidi porã hag̃ua (Mat. 24:​45-47). * Relee vove umi artíkulo, ejepyʼamongeta umi konsého omeʼẽvare ha ejapo Jehová heʼirõguáicha ndéve. Ha ‘aníkena nderovatavy ku kavaju térã mburikáicha’ (Sal. 32:​8, 9). Ehechauka guei neakãguapyha ha reikuaa porãha mbaʼépa heʼise la ñemenda. Ha repensáramo ikatumaha reiporavo ne rembireko térã ne menarã, ehechaukákena nderekopotĩha (1 Tim. 4:12).

14. Mbaʼérepa iñimportánte avei ñamenda rire jajapo akãguapýpe opa mbaʼe?

¹⁴ Péro iñimportánte avei ñamenda rire jajapo akãguapýpe opa mbaʼe. Pe kristiáno omendáva ningo oñehaʼãvaʼerã ‘okakuaapa ha ityarõmba ojogua peve Crístope’. Upéva heʼise oñehaʼãvaʼerãha oiko kristianoitéicha (Efe. 4:​11-14). Cristo ningo ehémplo ñandéve g̃uarã, haʼe ‘ndohekaivaʼekue vyʼa ijupe g̃uarãnte’ (Rom. 15:​3, JMP). Ha upéicha avei peteĩ ogapýpe ojeiko porã hag̃ua, ména ha tembireko nopensaivaʼerã ijehénte, ohechakuaavaʼerã mbaʼépa oikotevẽhína pe iñirũmi (1 Cor. 10:24). Pe ména ningo omotenondevaʼerã hembirekópe ogustáva ha ohayhuvaʼerã chupe. Pe tembireko katu oñemoĩvaʼerã iména poguýpe Jesús oñemoĩháicha Itúva poguýpe (1 Cor. 11:3; Efe. 5:25).

“Akóintekena emoherakuã pe marandu porã”

15, 16. Mbaʼépa rejapovaʼerã rejeroviave hag̃ua rehóvo?

¹⁵ Apóstol Pablo heʼi Timotéope: ‘Ñandejára ha Cristo Jesús rérape ajerure jey jey ndéve remombeʼu hag̃ua pe marandu porã. Ha emoherakuãkena ijahápe ndéve’. Upéi heʼive: ‘Akóintekena emoherakuã pe marandu porã, ha ejapopa porã ne rembiapo oñemeʼẽva ndéve Ñandejára rembiguáiramo’ (2 Tim. 4:​1, 2, 5). Ha Timoteo ojapo hag̃ua upéva ‘oñehekomboʼe porã vaʼerã’ ojeroviave hag̃ua ohóvo (jaleemína 1 Timoteo 4:6).

¹⁶ Mbaʼépa nde rejapovaʼerã ‘reñehekomboʼe  porã’ ha rejeroviave hag̃ua rehóvo? Apóstol Pablo ohai: ‘Elee meme, eñemoñeʼẽ ha eporomboʼe. Ejepyʼamongeta koʼã mbaʼére ha eñehaʼã rejapo upéicha’ (1 Tim. 4:​13, 15, BNP). Upévare, rejeroviasevéramo rehóvo rehesaʼỹijo meme vaʼerã Ñandejára Ñeʼẽ. Ha ojeʼévo ndéve ‘eñehaʼã rejapo upéicha’, heʼise rejapovaʼerãha opa ikatumíva. Ndépa rejepokuaareína rehesaʼỹijo la Biblia? Reñehaʼãmbaitépa ‘reikuaa umi mbaʼe hypyʼũvéva Ñandejára rehegua’? (1 Cor. 2:10.) Térãpa ndekaigue rejapo hag̃ua koʼã mbaʼe? Reñehaʼãramo rehecháta mbaʼeichaitépa nepytyvõ umi mbaʼe rehesaʼỹijóva (jaleemína Proverbios 2:​1-5).

17, 18. a) Mbaʼépepa reñembokatupyryvaʼerã? b) Mbaʼépa rejapovaʼerã nekyreʼỹ hag̃ua predikasiónpe Timotéoicha?

¹⁷ Peteĩ mitãkuña hérava Michelle ningo prekursóra, ha haʼe heʼi: “Chekatupyry hag̃ua predikasiónpe, añemotiémpo astudia hag̃ua ha ndafaltái rreunionhápe. Upéva chepytyvõ añemoag̃uive hag̃ua Jehováre”. Nde avei rejapóramo prekursorádo nepytyvõta reiporukuaave hag̃ua la Biblia predikasiónpe ha rejeroviave hag̃ua rehóvo. Eñehaʼãmbaitékena relee porã ha rekomenta hendaitépe rreunionhápe. Ehechauka neakãguapyha ejapo porãvo umi ne rembiaporã oñemeʼẽva ndéve Eskuéla jaiporukuaa hag̃ua la Bíbliape. Eñehaʼãkena reporomboʼe porã ha reiporu umi informasión oñemoĩva.

¹⁸ “Emoherakuã pe marandu porã” heʼise ndekatupyryvaʼerãha ha reipytyvõ nde rapichakuérape ojesalva hag̃ua. Upearã tekotevẽta eñehaʼãmbaite ‘reporomboʼekuaa’ (2 Tim. 4:2). Avei umi ermáno ikatupyryvéva nemboʼéta repredikakuaa hag̃ua, Pablo omboʼe haguéicha Timotéope (1 Cor. 4:17). Pablo ningo heʼi voi umi Tesalonicayguápe ohayhuetereiha chupekuéra. Ha upévare omboʼe Ñandejára rembipota ha oñemeʼẽmbaite oipytyvõ hag̃ua chupekuéra (1 Tes. 2:8). Upéicha rupi Timoteo osegi apóstol Pablo ehémplo ojepyʼapy hapichakuérare ha ‘oipytyvõ marandu porã ñemoherakuãme’ (jaleemína Filipenses 2:​19-23). Ha ndépa reñehaʼãmbaite avei repredika Pablo ha Timotéoicha?

Rejeroviavéramo rehóvo revyʼavéta

19, 20. Mbaʼérepa javyʼa jajeroviavéramo jahávo?

¹⁹ Ndahaʼéi ningo péicha péichante rejeroviátamava Jehováre nde pyʼaite guive. Péro heta nde rapichápe reipytyvõta nepasiénsia ha eñehaʼãramo reporomboʼe porãve (2 Cor. 6:10). Ha upéva nembovyʼaitereíta (1 Tes. 2:19). Peteĩ prekursór hérava Fred heʼi: “Koʼág̃a rupi añemotiempove aipytyvõ hag̃ua che rapichakuérape. Ha ndareíri la Biblia heʼi javyʼaveha ñameʼẽvo ñande rapichápe, ñandéve oñemeʼẽrõguágui”.

²⁰ Peteĩ prekursóra hérava Daniela ovyʼaiterei ojeroviave haguére. Haʼe heʼi: “Koʼág̃a aikuaa porãvégui Jehovápe, añemoag̃uivéma hese. Ñañehaʼãmbaitéramo ñaime porã Jehová renondépe ningo añetehápe javyʼa”. Yvyporakuéra ningo nameméi ohechakuaa hapicha ojeroviaveha ohóvo, péro Jehová katuete ohecha ha omombaʼeterei upéva (Heb. 4:13). Ha nde ningo ikatu hína remombaʼeguasu Jehovápe. Upévare akóintekena eñehaʼã rehechauka rejeroviaveha rehóvo ha embovyʼa ñande Ru yvagapeguápe (Pro. 27:11).

[Nóta]

Jahechami nemanduʼápa

• Mbaʼépa heʼise ‘rejeroviave rehóvo’?

• Mbaʼéichapa ikatu rehechauka rejeroviaveha rehóvo...

... rembohováivo opaichagua provléma?

... oiméramo remendaséma?

... predikasiónpe?

[Porandu ñahesaʼỹijóva]

[Nóta oĩva taʼanga ndive páhina 15]

Reñemboʼéramo rembohovái porãvéta ne provlemakuéra

[Nóta oĩva taʼanga ndive páhina 16]

Mbaʼépa ikatu ojapo umi imitãva oporomboʼe porãve hag̃ua?