Jehová Ñeʼẽ ningo oikove

Mbaʼe mbaʼépa ñanemboʼe Ageo ha Zacarías

ÁÑO 520-pe Jesús ou mboyve, ohasáma 16 áño umi hudío osẽhague Babilóniagui, ha oho jey Jerusalénpe omopuʼã hag̃ua Jehová témplo. Péro ndojapopái gueteri, ha ojeproivi chuguikuéra hembiapo. Upémarõ Jehová omondo proféta Ageo, ha 2 mése rire proféta Zacaríaspe oikuaauka hag̃ua Iñeʼẽ chupekuéra.

Ageo ha Zacarías ojapose peteĩ mbaʼe: omokyreʼỹse umi héntepe oñepyrũ jey hag̃ua hembiapo ha ojapopa pe témplo. Umi hénte opena hesekuéra ha 5 áño haguépe omohuʼã hikuái pe tembiapo. Koʼã proféta heʼivaʼekue oĩ la Bíbliape, umi lívro héravape Ageo ha Zacarías. Ageo ohaipa ilívro 520-pe ha Zacarías 518-pe Jesús ou mboyve. Koʼã proféta orekohaguéicha, ñande jareko avei peteĩ tembiapo omeʼẽva Ñandejára, ha jajapopavaʼerã ko múndo aña oñehundi mboyve. Ko tembiapo hína: japredika pe marandu porã ha ñamboʼe ñande rapichakuérape. Jahechamína mbaʼéichapa ñanemokyreʼỹ Ageo ha Zacarías ohaivaʼekue.

‘PEMAʼẼ PORÃ PEJAPÓVARE’

(Ageo 1:1–2:23)

Ohasa mboyve 112 día, Ageo rupive Jehová omeʼẽ 4 marandu omokyreʼỹva chupekuéra. Primero heʼi: ‘Che, opa mbaʼe Jára chepuʼakapáva, haʼe peẽme pemaʼẽ porã hag̃ua pejapóvare. Tapeho yvytýpe peru yvyra ha pemopuʼã óga pyahu. Pépe che avyʼáta ha ajechaukáta che mimbipápe’ (Ageo 1:​7, 8). Ha umi hénte ohendu chupe. Segundoha omombeʼu Jehová oprometéva: ‘Che róga omimbipáta’ (Ageo 2:7).

Terceroha katu Jehová heʼi ‘umi mbaʼe ojapóva ha oikuaveʼẽva hikuái ikyʼaha’ chupe g̃uarã, haʼekuéra nombaʼapói rupi omopuʼã hag̃ua Ñandejára róga. Péro oñepyrũ guive ombaʼapo Jehovápe g̃uarã, haʼe ‘ovendesi’ chupekuéra. Pe marandu irundyha heʼi Jehová ‘ohunditaha tetãnguéra yvy ári, ha oitytaha yvýre mburuvichakuérape’. Avei omoĩta Zorobabélpe ‘oisãmbyhy hag̃ua’ (Ageo 2:​14, 19, 22, 23).

Porandukuéra:

1:6. Mbaʼérepa koʼápe ojeʼe hoʼuha hikuái víno péro ndokaʼuiha? Koʼápe ningo ohechaukánte saʼitaha pe víno. Jehová novendesíri chupekuéra ha saʼieterei víno oĩ, ha upévarente ojeʼe nomongaʼumoʼãiha avavépe.

2:​6, 7, 21, 22. Mávapa omboryrýi tetãnguérape, ha mbaʼépa oiko upévare? Jehová ‘omboryrýi tetãnguérape’ ha ojapo upéva predikasión rupive. Ojepredikávo hentekuérape ‘umi mbaʼeta’ tetãnguéra orekóva oike Jehová rógape ha omomimbipa. Koʼẽrõitéma Jehová omboryrýita ‘ndahaʼemoʼãi yvy añónte, yvága katu avei’ ha ohundíta ko múndo aña (Hebreos 12:​26, 27).

2:9. Mbaʼérepa ojeʼe pe ‘témplo mokõiha iporãveha pe yma guarégui’? Pe témplo mokõiha opyta areve, Jesús oporomboʼe upépe ha hetave tapicha oho oadora Jehovápe. Pe témplo Salomón omopuʼãvaʼekue opyta 420 áño, 1027 guive 607 peve. Pe ‘témplo mokõiha’ katu opyta 580 áño, 515 guive, oñehundi peve 70-pe Jesús ou rire (Hechos 2:​1-11).

Mbaʼépa ñanemboʼe:

1:​2-4. Oĩramo jepe oñemoĩva ñanderehe japredikahaguére, jasegivaʼerã ‘jaheka Ñandejára rréino’, ñamotenonderangue ñande jaipotáva (Mateo 6:​33, BNP).

 1:​5, 7. Tekotevẽ ‘ñamaʼẽ porã jajapóvare’ ha jajepyʼamongeta jahecha hag̃ua oĩ porãpa Jehová renondépe.

1:​6, 9-11; 2:​14-17. Umi hudío Ageo tiémpope guare heta ombaʼapo ohupyty hag̃ua oipotáva péro saʼi omonoʼõ hikuái hyʼái repykue. Jehová novendesíri chupekuéra nombaʼapoveihaguére itémplore. Ñande ñamotenondevaʼerã Jehová heʼíva ha jaservi meme chupe ñande pyʼaite guive. Ñanemanduʼáke ‘Ñandejára ñanevendesírõ ñañakãrapuʼã’, jepe ndajarekói heta pláta térã mbaʼerepy (Proverbios 10:22).

2:​15, 18. Jehová heʼi umi hudíope omaña porã hag̃ua ojapótavare. Ndoipotái imanduʼa hikuái umi mbaʼe ojapo vai vaʼekuére ymave; oipota guei imanduʼa omopuʼãvaʼerãha pe témplo. Ñande avei ñapensavaʼerã umi mbaʼe porã jajapótavare Ñandejárape g̃uarã.

‘NOĨRI MBARETÉRE, CHE ESPÍRITU RUPIVE’

(Zacarías 1:1–14:21)

Zacarías oñepyrũvo hembiapo omokyreʼỹ umi hudíope ‘oñemboja hag̃ua Jehová rehe’ (Zacarías 1:3). Umi 8 visión orekóva upe rire ohechauka Jehová oipytyvõtaha chupekuéra omopuʼã hag̃ua pe témplo (ehecha pe párte heʼíva “Umi 8 visión orekovaʼekue Zacarías”). Pe témplo oñemopuʼãmbáta ‘ndahaʼéi ñorairõhára térã mbaretére, síno Jehová espíritu rupive’ (Zacarías 4:6). Pe kuimbaʼe hérava Mbaʼe Roky ‘omopuʼãta Ñandejára róga’, haʼe ‘oisãmbyhýta’ ha oikóta saserdóteramo (Zacarías 6:​12, 13).

Betélgui oñemondo peteĩ aty oporandu hag̃ua umi saserdótepe mbaʼéichapa oajunavaʼerã hikuái ogueromanduʼa hag̃ua Jerusalén oñehundihague. Jehová heʼi Zacaríaspe pe ñembyasy oĩva umi cuatro ajúno aja oñekambiataha. Upéva rangue ‘ojevyʼáta’ (Zacarías 7:​2, 8:19). Upéi Zacarías omombeʼu mbaʼépa ojehúta umi tetã ambuépe ha umi proféta japúpe. Omombeʼu avei umi profesía oñeʼẽva Jesús rehe, ha mbaʼéichapa Ñandejára puévlo oĩ porã jeýta (Zacarías 9:1; 12:1).

Porandukuéra:

2:1. Mbaʼérepa peteĩ kuimbaʼe omedi Jerusalén peteĩ pióla reheve? Oiméne upéva heʼise oñemopuʼãtaha peteĩ murálla omoʼã hag̃ua upe táva. Peteĩ ánhel heʼi Jerusalén oñembotuichavetaha ha Jehová oñangarekotaha hesekuéra (Zacarías 2:​3-5).

6:​11-13. Oñemoĩningo saserdóte guasu Josué akãre peteĩ koróna, heʼisépa upéva haʼeha rréi avei? Nahániri, haʼe ndoúi David familiarégui. Omoĩvo pe koróna haʼe orrepresenta pe Mesías oútavape (Hebreos 6:20). Pe profesía oñeʼẽva peteĩ kuimbaʼe héravare “Mbaʼe Roky”, oñekumpli Jesucrístore oikóvo  chugui rréi ha saserdóte yvágape (Jeremías 23:5). Josué ningo saserdóte pe témplo pyahúpe, umi hudío rehehápe ha Jesús katu Saserdóte Guasu yvágape. Haʼe ombaʼapo Jehová adorasión rehehápe.

8:​1-23. Arakaʼépa oñekumpli koʼã 10 profesía oñemombeʼúva koʼápe? Káda párte oñepyrũvo heʼi: “Péicha heʼi Ñandejára Ipuʼakapáva”, ha Jehová opromete ipuévlo oĩtaha pyʼaguapýpe. Oĩ oñekumplíva áño 500 guive Jesús ou mboyve. Péro enterove oñekumpli 1919 guive, térã oñekumpli koʼag̃aite voi. *

8:3. Mbaʼérepa Jerusalénpe oñehenói “táva jeroviaha”? Oñehundi mboyve 607-pe Jerusalén rehe ojeʼe ‘táva ojopýva mboriahu ndive’. Umi hénte iñañaiterei ha umi saserdóte ha proféta katu ijapu (Sofonías 3:1; Jeremías 6:13; 7:​29-34). Péro oñemopuʼã rire pe témplo, umi hénte oadora jey Jehovápe. Upéva hína adorasión ipotĩva. Upévare Jerusalén oñembohéra “táva jeroviaha”.

11:​7-14. Mbaʼépa ojehechauka Zacarías omopẽvo umi yvyra hérava “Jeiko porã” ha “Oñondivepa”? Zacaríaspe oñemondo ‘oñangareko hag̃ua umi ovecha ojejukavaʼerãre’. Koʼãva hína umi hénte oĩ asýva huvicha poguýpe. Péicha Zacarías orrepresenta Jesúspe, oñemondovaʼekue Ñandejára puévlope, péro haʼekuéra oñemoĩ hese. Pe yvyra hérava “Jeiko Porã” heʼise Jehová oipeʼataha pe kompromíso ojapovaʼekue umi hudío ndive ha ndoguerohorymoʼãvéima chupekuéra. Pe yvyra hérava “Oñondivepa” katu heʼise Judá ha Israel noĩmoʼãveimaha oñondive oadora hag̃ua Jehovápe.

12:11. Mbaʼérepa ojeʼe oĩha ojaheʼóva Hadadrimón rehe Meguidó ñúme? Rréi Josías Judaygua omano oñorairõhápe Faraón Egiptoygua Nekó ndive. Upéva oiko “Meguidó ñúme”. Omano rire heta áñore oĩ gueteri ‘ojaheʼóva’ hese (2 Crónicas 35:25). Upéicharõ ‘jaheʼo Hadadrimón rehe’ haʼéne hína pe ñembyasy rréi Josías omanohaguére.

Mbaʼépa ñanemboʼe:

1:​2-6; 7:​11-14. Jehová oguerohory entéro umi oñembyasývape hembiapo vaikuére, ohejáva ojekorrehi chupe, ha oñemoag̃uíva oadora hag̃ua chupe ipyʼaite guive. Péro haʼe nohendúi umi heʼívape chupe: “chepytyvõmína”, ha upéi katu ‘naiñeʼẽrenduséi ha ndoikuaaséi hikuái mbaʼeve’.

4:​6, 7. Pe témplo oñemopuʼãmba ha ndaipóri mbaʼeve ikatúva ojoko umi tembiapo Jehová espíritu omonguʼe rupi umi héntepe. Oimeraẽ provléma jarekóva Jehová servísiope ikatu ñambohovái jajeroviáramo Hese (Mateo 17:20).

4:10. Jehová ojesareko Zorobabel ha ipuévlore ojapo aja itémplo, ha haʼekuéra ojapo  Haʼe oipotaháicha. Upéicha jahecha ndahaʼeiha hasyetereíva jajapo hag̃ua Jehová heʼíva ñaneimperféktoramo jepe.

7:​8-10; 8:​16, 17. Jehová ñandeguerohory hag̃ua tekotevẽ ñanderekojoja, ñandepyʼaporã, japoroporiahuvereko, ha jaʼe añetegua ñande rapichápe.

8:​9-13. Jehová ñanevendesíta ‘ñañehaʼãramo’ jajapo porã pe tembiapo haʼe omeʼẽva ñandéve. Upéicha Ñandejára omeʼẽta ñandéve pyʼaguapy, avei oñangarekóta ñanderehe ha ikatúta ñañemoag̃ui hese.

12:6. Umi ansiáno omotenondéva Jehová puévlo ojajái “tatapýi rendýicha”, upéva heʼise ikyreʼỹvaʼerãha ojapo hag̃ua Ñandejára oipotáva.

13:3. Jahayhuvevaʼerã Jehovápe ha iñorganisasiónpe enterovégui, tahaʼe ñane hénte teete térã ñane amigoite.

13:​8, 9. Hetaiterei vaʼekue umi tapicha oñemoĩva Jehováre, ha haʼe omboyke chupekuéra. Mbovymi oĩ umi ohejáva oñemopotĩ chupekuéra ku tatápe oñemopotĩramoguáicha. Koʼág̃a rupi avei oĩ hetave umi kristiáno guaʼu ha Jehová omboyke chupekuéra. Mbovymi oĩ umi kristiáno ohótava yvágape ‘ohenóiva Ñandejárape’ ha ohejáva haʼe omopotĩ chupekuéra. Haʼekuéra ha umi omoirũva chupekuéra ohechauka ndahaʼeiha heʼi guaʼúnteva ijehe testigo de Jehováha.

Ñanemokyreʼỹ ñambaʼapo meme hag̃ua

Mbaʼéichapa ñanepytyvõ koʼág̃a Ageo ha Zacarías heʼivaʼekue? Ñapensávo mbaʼéichapa omokyreʼỹ hikuái umi hudíope ojapopa hag̃ua Jehová róga, ñanekyreʼỹve japredika meme ha ñamboʼe hag̃ua ñande rapichakuérape.

Zacarías heʼivaʼekue pe Mesías outaha “vurroraʼy ári”, oñetraisionataha chupe “30 pláta pehẽngue” rehe, ha ojejuka rire chupe ‘ijovechakuéra isarambitaha’ (Zacarías 9:9; 11:12; 13:7). Ha jajepyʼamongetávo mbaʼéichapa oñekumpli koʼã profesía omombarete ñande jerovia (Mateo 21:​1-9; 26:​31, 56; 27:​3-10). Jahechávo koʼã mbaʼe jajeroviave Jehová Ñeʼẽre ha umi mbaʼe omeʼẽvare jajesalva hag̃ua (Hebreos 4:12).

[Nóta]

[Rrekuádro oĩva páhina 23-pe]

UMI 8 VISIÓN OREKOVAʼEKUE ZACARÍAS

1:​8-17: Ohechauka pe témplo oñemopuʼãmbataha ha Jerusalén ha ambue táva oĩva Judápe katu oñevendesíta.

1:​18-21: Oñehundíta umi ‘irundy vaka ratĩngue omosarambivaʼekue Judayguápe’. Koʼãva hína umi tetã oñemoĩva Jehová adorasión rehe.

2:​1-13: Ohechauka Jerusalén oñembotuichataha, ha Jehová katu oñangarekóta hesekuéra, oĩramoguáicha “tápia tataguigua Jerusalén jerére”.

3:​1-10: Ohechauka Satanás ndoipotaiha ojejapopa pe témplo; avei ohechauka pe saserdóte guasu Josué ndoʼaiha ipoguýpe ha oñemopotĩha chupe.

4:​1-14: Ohechauka umi provlemaita tuicháva montáñaicha ojeipaitetaha, ha mburuvicha Zorobabel ojapopataha pe témplo.

5:​1-4: Jehová omaldesi umi ojapóvape heta mbaʼe vai ojekastigaʼỹre.

5:​5-11: Ohechauka opataha umi mbaʼe vai oikóva.

6:​1-8: Ohechauka umi ánhel ñanepytyvõtaha ha oñangarekóta ñanderehe.

[Nóta oĩva taʼanga ndive páhina 22]

Mbaʼépa ojaposéraʼe Ageo ha Zacarías?