1, 2. ¿Mbaʼe mbaʼépa ikatu kuri ojoko Marcos ha Timotéope pono ojapo hetave mbaʼe Jehovápe g̃uarã?

 PEẼ ermanokuéra penemitãva, ¿pejaposépa hetave mbaʼe Jehová servísiope? ¿Peipytyvõsevépa ermanokuéra kongregasionpeguápe? Katuete ningo upéicha hína. Igustoiterei jahecha oĩha heta mitãrusu vyʼápe oporoservíva (Sal. 110:3). Péro oiméne rehasa avei heta mbaʼe ijetuʼúva. Por ehémplo, ¿edudápa ejapo hag̃ua hetave mbaʼe Jehová servísiope rekyhyjégui moõpa haʼe nemondóta reservi hag̃ua? ¿Nereñanimáipa reasepta peteĩ asignasión repenságui ndaikatumoʼãiha rejapo porã? Oimérõ péicha, iporã reikuaa ndahaʼeiha ndénte la reñeñandúva péicha.

² Marcos ha Timoteo ohasa vaʼekue koʼã mbaʼe. Haʼekuéra ndoikuaái vaʼekue moõpa Jehová omondóta chupekuéra ha ikatu oime opensa avei ijehe ndaikatupyryiha. Péro haʼekuéra ndoguevíri ha odesidi ojapotaha hetave mbaʼe Jehovápe g̃uarã. Pablo ha Bernabé oinvita vaʼekue Márcospe omoirũ hag̃ua chupekuéra iprimér viáhe de predikasiónpe. Upérõ provávlemente Marcos oiko vaʼekue isýndi peteĩ óga iporãvape (Hech. 12:​12, 13, 25). Péro Marcos oheja la hóga ha oasepta pe invitasión. Primerorã ova Antioquíape, ha upéi omoirũ Pablo ha Bernabépe oho hag̃ua hetave lugár opytávape mombyrymbyry (Hech. 13:​1-5). Timoteo avei provávlemente oiko vaʼekue ituakuérandi Pablo oinvitárõ guare chupe ombaʼapo hag̃ua hendive Jehovápe g̃uarã. Timoteo imitã ha ndorekói vaʼekue experiénsia, upévare ikatu kuri opensa ijehe ndaikatumoʼãiha omoirũ Páblope (ekompara 1 Corintios 16:​10, 11 ha 1 Timoteo 4:12 heʼívare). Upéicharõ jepe Timoteo oasepta vaʼekue Pablo invitasión ha orresivi heta vendisión (Hech. 16:​3-5).

3. a) ¿Mbaʼérepa jaʼekuaa Pablo omombaʼeterei hague Marcos ha Timotéope? (2 Timoteo 4:​6, 9, 11). (Ehecha pe taʼanga). b) ¿Mbaʼe mbaʼépa jahecháta ko artíkulope?

³ Marcos ha Timoteo imitã guive oaprende vaʼekue mbaʼéichapa  oñatende vaʼerã heta rresponsavilidáre kongregasiónpe. Pablo omombaʼeterei vaʼekue chupekuéra, upévare ohechakuaárõ guare omanotamaha oipota vaʼekue mokõivéva oĩ hendive (elee 2 Timoteo 4:​6, 9, 11). ¿Mbaʼéicha rupípa Pablo ohayhuete vaʼekue Marcos ha Timotéope? ¿Mbaʼéichapa peẽ mitãrusukuéra ikatu pesegi iñehemplokuéra? ¿Ha mbaʼéichapa ikatu ideprovécho peẽme umi konsého Pablo omeʼẽ vaʼekue mborayhúpe?

ESEGI MARCOS EHÉMPLO HA VYʼÁPE EPOROSERVI

4, 5. ¿Mbaʼéichapa Marcos ohechauka vaʼekue oserviseha ótrope?

⁴ Jaservi ótrope heʼise ñañehaʼãmbaiteha ñaipytyvõ ñande rapichápe ha jasegi jajapo upéva ijetuʼúramo jepe. Marcos omoĩ vaʼekue ehémplo porã upévape. Por ehémplo Pablo ndoguerahaséirõ guare chupe isegúndo viáhe de predikasiónpe, oiméne Marcos oñedesanima ha oñeñandu vai (Hech. 15:​37, 38). ¿Péro ohejápa rakaʼe Marcos upéva ojoko chupe ha ndoservisevéi ermanokuérape? Ni mbaʼevéicharõ.

⁵ Marcos omoirũ vaʼekue iprímo Bernabépe ha oho oservi ótro lugárpe. Ohasa rire 11 áñorupi, Marcos oipytyvõ vaʼekue Páblope oĩrõ guare kárselpe Rómape (Filem. 23, 24). Apóstol Pablo ningo ovyʼaiterei vaʼekue Marcos oĩ haguére ijykére ha upévare voi heʼi hese ‘tuichaiterei okonsola hague chupe’ (Col. 4:​10, 11).

6. ¿Mbaʼe iporãvapa ohasa Marcos ojeheʼa rupi umi kristiáno ijerovia mbaretévare? (Ehecha pe nóta).

⁶ Marcos ohasa vaʼekue heta mbaʼe porã ojeheʼa rupi umi kristiáno ijerovia mbaretévare. Haʼe oĩ rire un tiémpo Pablo ndive Rómape, oho Babilóniape omoirũ hag̃ua Pédrope. Haʼekuéra ojogueraha porãiterei rupi, Pedro heʼi vaʼekue hese: “Che raʼy, Marcos” (1 Ped. 5:13). Ohasa rupi tiémpo oñondive iñasignasiónpe, oiméne Pedro omombeʼu rakaʼe Márcospe heta mbaʼe Jesús ojapo vaʼekue oĩrõ guare ko yvy ape ári. Upe rire Marcos oskrivi umi mbaʼe pe lívro orekóvape héra ha oĩva la Bíbliape. a

7. ¿Mbaʼéichapa peteĩ ermáno imitãva osegi Marcos ehémplo? (Ehecha pe taʼanga).

⁷ Marcos osegi vaʼekue oservi Jehovápe ha  omoirũ meme umi ermáno ijerovia mbaretévape. ¿Mbaʼéichapa ikatu resegi Marcos ehémplo? Ikatu oime eipota peteĩ priviléhio Jehová organisasiónpe, péro noñemeʼẽi ndéve. Oimérõ upéicha eñehaʼãkena nepasiénsia ha eheka ótra kósa ikatúva rejapo Jehová ha pe kongregasión rehehápe. Jahechamína la ohasa vaʼekue peteĩ ermáno hérava Seung-Woo. Koʼág̃a haʼe oservi de ansiáno, péro imitãvérõ guare oñekompara vaʼekue umi ótro mitãrusúre. Haʼe ohecha vaʼekue oĩha umi ermáno orresivímava priviléhio péro haʼe katu neʼĩra gueteri. Upévare haʼe oñepyrũ opensa ndojeguerekoiha chupe enkuénta. Kon el tiémpo Seung-Woo omombeʼu la oñandúva umi ermáno ijerovia mbaretévape. Peteĩ ansiáno omokyreʼỹ chupe ojapo hag̃ua la ikatúva guive oservi hag̃ua ótrope, sapyʼánte avave ndohechamoʼãiramo jepe la ojapóva. Ko ermáno imitãva osegi upe konsého ha oñepyrũ oipytyvõ umi ermáno ijedávape ha umi oikotevẽvape ajúda oho hag̃ua rreunionhápe. Koʼág̃a haʼe heʼi: “Kon el tiémpo antende mbaʼépa heʼise japoroservi ha avyʼaiterei ikatu haguére aipytyvõ ótrope”.

ESEGI TIMOTEO EHÉMPLO HA EHECHAUKA EPOROHAYHUHA

8. ¿Mbaʼérepa Pablo oiporavo vaʼekue Timotéope omoirũ hag̃ua chupe? (Filipenses 2:​19-22).

⁸ Pablo oikotevẽ vaʼekue omoirũ chupe umi ermáno ipyʼaguasúva. Péicha ikatúta kuri oho jey umi lugár oĩ haguépe umi hénte oñemoĩ mbaretéva hese. Primerorã Pablo oiporavo vaʼekue Sílaspe, haʼe oservíma vaʼekue Jehovápe heta tiémpore (Hech. 15:​22, 40). Upe rire Pablo oiporavo vaʼekue avei Timotéope omoirũ hag̃ua chupe. ¿Mbaʼérepa oipota vaʼekue omoirũ chupe Timoteo? Primero, pórke umi ermáno oikuaáva Timotéope oñeʼẽ porãiterei hese (Hech. 16:​1, 2). Ha avei Timoteo ojepyʼapy vaʼekue ipyʼaite guive la héntere (elee Filipenses 2:​19-22).

9. ¿Mbaʼéichapa Timoteo ohechauka vaʼekue ojepyʼapyha ermanokuérare?

⁹ Oñepyrũ guive oservi Páblondi, Timoteo ohechauka vaʼekue ojepyʼapyveha ótrore opensa rangue ijehénte. Upévare Pablo ohórõ guare Beréagui oheja Timotéope upépe, pórke oikuaa Timoteo oñatende porãtaha umi kristiáno pyahúre (Hech. 17:​13, 14). Upérõ Silas opyta avei Beréape ha Timoteo oiméne oaprende rakaʼe heta mbaʼe chugui. Tiémpo rire Pablo omondo Timotéope haʼeño Tesalónicape omombarete hag̃ua umi ermáno upepeguápe (1 Tes. 3:2). Ohasa rire 15 áñorupi, Timoteo ohayhuvéntema ermanokuérape. Haʼe ontende chupekuéra ha sapyʼánte ‘hasẽ vaʼekue umi hasẽvandi’ (Rom. 12:15; 2 Tim. 1:4). ¿Mbaʼéichapa umi ermáno imitãva ikatu osegi Timoteo ehémplo?

10. ¿Mbaʼéichapa peteĩ ermáno oñehaʼã vaʼekue oñeinteresave ermanokuérare?

¹⁰ Peteĩ ermáno hérava Woo Jae oñehaʼã vaʼekue oñeinteresave ótrore. Imitãvépe haʼe ndoikuaái  vaʼekue mbaʼe rehepa oñeʼẽta umi ermáno ha ermána ijedávandi. Upévare Salón del Réinope oho osaluda chupekuéra ha upéi ojeíma upégui. Peteĩ ansiáno omokyreʼỹ chupe heʼi hag̃ua umi ermánope mbaʼérepa omombaʼe chupekuéra ha avei opensa hag̃ua la ointeresátavare ótrope, péicha ikatúta oñemongetave ermanokuérandi. Woo Jae osegi vaʼekue ko konsého. Koʼág̃a haʼe oservi de ansiáno ha heʼi: “Ifasilvéma chéve añemongeta diferénte ermánondi, tahaʼe imitãva térã ijedáva. Avyʼa ikatu haguére aikuaa umi mbaʼe ohasáva ermanokuéra. Upéicha ikatu aipytyvõ porãve chupekuéra”.

11. ¿Mbaʼéichapa umi ermáno imitãva ikatu oñeinteresave umi ermáno ha ermána kongregasionpeguáre? (Ehecha pe taʼanga).

¹¹ Oimérõ nde peteĩ ermáno imitãva, nde ikatu avei eñehaʼã reñeinteresave ótrore. Umi rreuniónpe eñehaʼã eñemongeta diferénte ermánondi, tahaʼe imitãva térã ijedávandi. Eporandumíkena chupekuéra mbaʼéichapa oiko ha ejapysaka porã hesekuéra. Upéicha reikuaáta mbaʼéichapa ikatu reipytyvõ ermanokuérape. Por ehémplo, ikatu hína peteĩ matrimónio ijedáva nontendepái mbaʼéichapa oipuru vaʼerã pe aplikasión JW Library^®. Térã ikatu oime ndorekói gueteri mávandipa osẽta predikasiónpe. Epensamína: ¿Ndaikatúipa eipytyvõ chupekuéra oipurukuaa hag̃ua iselulár térã itávlet? ¿Ndaikatúipa eñeʼẽ hendivekuéra pesẽ hag̃ua pepredika oñondive? Nembaʼerechakuaáramo ha eipytyvoórõ ótrope, remoĩta hína ehémplo porã kongregasiónpe.

PABLO KONSÉHO IKATU NEPYTYVÕ

12. ¿Mbaʼéichapa Pablo konsehokuéra ikatu ideprovécho umi mitãrusúpe?

¹² Pablo mborayhúpe omeʼẽ vaʼekue Timotéope heta konsého. Umíva oipytyvõta kuri chupe ovyʼa ha oservi porã hag̃ua Ñandejárape (1 Tim. 1:18; 2 Tim. 4:5). Umi konsého ikatu ideprovécho avei ndéve. ¿Mbaʼépa ikatu rejapo upearã? Elee umi mokõi kárta Pablo omondo vaʼekue Timotéope. Eñeimahinami upéva ojeskrivi hague ndéve g̃uarãite ha ehecha mbaʼe konséhopa ideprovéchota ndéve. Jahechamína unos kuánto umi konsého.

13. ¿Mbaʼépa nepytyvõta ndefiél hag̃ua Jehovápe?

¹³ ‘Eñentrena vaʼerã ikatu hag̃uáicha rehechauka readoraha Ñandejárape nde pyʼaite guive’ (1 Tim. 4:7b, nóta). Péicha Pablo heʼi vaʼekue Timotéope tekotevẽha ifiél ha ojapo umi mbaʼe ombovyʼátava Jehovápe. Péro ñandefiél ha jahayhu hag̃ua Jehovápe ñañehaʼãmante vaʼerã. ¿Mbaʼéicha ikatu jajapo upéva? Idióma griégope pe palávra ojetradusíva “eñentrena”, ojepuru vaʼekue oñeñeʼẽ hag̃ua umi deportísta  ojeprepara porãvare peteĩ kompetensiarã. Umi deportísta ojepokuaa vaʼerã ojapo umi mbaʼe oipytyvõtava chupekuéra ogana hag̃ua, ha ndohejái vaʼerã mbaʼeve odistrae chupekuéra. Péicha avei ñande jajepokuaa vaʼerã jajapo umi mbaʼe ñanemoag̃uivétava Jehováre.

14. ¿Mbaʼépa jahupyty vaʼerã jalee jave la Biblia? Emombeʼu peteĩ ehémplo.

¹⁴ Iñimportánte ejepokuaa elee la Biblia káda día. Avei tekotevẽ nemanduʼa la rehupytysévare: Elee vaʼerã la Biblia eñemoag̃uive hag̃ua Jehováre. Por ehémplo la Biblia omombeʼu Jesús oñeʼẽ hague peteĩ governánte imitãva ha irríkovandi, ¿mbaʼépa ikatu reaprende releévo upe istória? (Mar. 10:​17-22). Pe mitãkariaʼy oguerovia vaʼekue Jesús haʼeha pe Mesías, péro ofalta vaʼekue chupe ojeroviave ikatu hag̃uáicha omoirũ Jesúspe. Upéicharõ jepe Jesús ohayhu vaʼekue upe mitãkariaʼýpe. ¿Mbaʼéichapa reñeñandu releévo Jesús oñeʼẽ hague mborayhúpe pe mitãkariaʼýpe? ¿Ndopokóipa nderehe? Jesús ningo oipotaiterei vaʼekue pe mitãkariaʼy odesidi porã ha ovyʼa. La oñandu vaʼekue Jesús upérõ ohechauka Jehová ohayhueterei hague avei pe mitãkariaʼýpe (Juan 14:9). Ejepyʼamongetamína pe rrelátore ha epensa ne situasiónre. Upéi eñeporandu: “¿Mbaʼépa tekotevẽ ajapo añemoag̃uive hag̃ua Jehováre ha aservi porãve hag̃ua ótrope?”.

15. ¿Mbaʼérepa peteĩ ermáno imitãva oñehaʼã vaʼerã omoĩ ehémplo porã? Emombeʼu peteĩ ehémplo. (1 Timoteo 4:​12, 13).

¹⁵ “Remoĩ vaʼerã ehémplo iporãva umi ifiélvape” (elee 1 Timoteo 4:​12, 13). Pablo omokyreʼỹ vaʼekue Timotéope oñehaʼã hag̃ua olee ha omboʼe porã. Péro ndahaʼéi upévante. Heʼi avei Timotéope oñehaʼã vaʼerãha oreko umi kualida porã, por ehémplo oporohayhu, ojerovia ha hekoporã vaʼerãha. ¿Mbaʼérepa? Pórke la jajapóva iñimportanteve hína pe jaʼévagui. Epensamíntena rejapotaha peteĩ diskúrso emokyreʼỹ hag̃ua ermanokuérape opredikave hag̃ua. Katuete ningo ifasilvéta ndéve reñeʼẽ upe témare oimérõ eñehaʼãmbaite reikóvo epredikave hag̃ua. Umi nerendúva ohecháramo ne ehémplo porã ojaposevéta avei la eréva (1 Tim. 3:13).

16. a) ¿Mbaʼe mbaʼépepa ikatu mitãrusukuéra peñehaʼã pemoĩ ehémplo iporãva? b) ¿Mbaʼéichapa peteĩ ermáno imitãva ikatu omoĩ ehémplo iporãva umi mbaʼe heʼívape?

¹⁶ Ohechaukaháicha 1 Timoteo 4:​12, Pablo omensiona vaʼekue mbaʼe mbaʼépepa peteĩ mitãrusu omoĩ vaʼerã ehémplo porã. Iporãitereíta ningo restudiáramo peteĩteĩ umíva. Por ehémplo ñamoĩ chupe reñehaʼãtaha emoĩ ehémplo iporãva “umi mbaʼe erévape”. Epensamína mbaʼépa ikatu ere eporomokyreʼỹ hag̃ua. Oimérõ reiko gueteri nde sy ha nde túandi, ¿mbaʼérepa nereñehaʼãi reagradeseve chupekuéra umi mbaʼe ojapóvare? Ha opa rire umi rreunión, ¿ndaikatúipa ere peteĩ ermáno térã ermánape mbaʼépa ndegusta kuri la iñasignasiónpe? Avei ikatu ekomenta ne ñeʼẽtépe ha ani eleénte. Eñehaʼãramo emoĩ ehémplo porã umi mbaʼe erévape, “enterove ohechakuaáta reñakãrapuʼãha rehóvo” (1 Tim. 4:15).

17. ¿Mbaʼépa oipytyvõta umi mitãrusúpe ohupyty hag̃ua umi méta iporãva Jehová servísiope? (2 Timoteo 2:22).

¹⁷ “Ediparáke umi mbaʼe ogustávagui mitãrusukuérape, upéva rangue eñehaʼã ndehústo” (elee 2 Timoteo 2:22). Pablo heʼi vaʼekue Timotéope omboyke hag̃ua umi mbaʼe ikatúva ojoko chupe iservísiope térã ombyai iñamista Jehovándi. Ikatu oime nde rehechakuaa oĩha heta mbaʼe ndahaʼéiva katuete la ivaíva, péro hoʼupa hína ndehegui ne tiémpo ha ndaikatúi ejapo hetave mbaʼe Jehovápe g̃uarã. Por ehémplo epensamína mboy tiémpopa epraktika peteĩ depórte, eipuru Internet térã ehuga umi videohuégo. ¿Ndaikatúipa hína eipuru upe tiémpo ejapo hag̃ua hetave mbaʼe Jehovápe g̃uarã? Epensamíntena: Ikatu hína ejeofrese  eipytyvõ hag̃ua ojejapo jave mantenimiénto Salónpe térã epredika hag̃ua karríto reheve. Eñehaʼãramo epartisipa koʼã mbaʼépe, erekóta hetave amígo nepytyvõtava ehupyty hag̃ua umi méta iporãva.

REVYʼAITEREÍTA RESERVÍRAMO ÓTROPE

18. ¿Mbaʼérepa ikatu jaʼe Marcos ha Timoteo ovyʼaiterei hague?

¹⁸ Marcos ha Timoteo heta ojesakrifika vaʼekue oservi porãve hag̃ua ótrope. Upévare haʼekuéra ohasa vaʼekue heta mbaʼe iporãva ha ovyʼaiterei (Hech. 20:35). Por ehémplo, Marcos oviaha vaʼekue mombyrymbyry heta lugárpe oipytyvõ hag̃ua umi ermáno ha ermánape. Avei haʼe oskrivi umi mbaʼe Jesús ohasa vaʼekue oĩrõ guare ko yvy ape ári, ha la omombeʼúva igustoiterei voi. Timoteo katu oipytyvõ vaʼekue Páblope oñeforma hag̃ua heta kongregasión ipyahúva, ha avei omokyreʼỹ hag̃ua umi ermanokuérape. Ajépa oiméne Jehová ovyʼaite ohechávo umi sakrifísio ojapo vaʼekue Marcos ha Timoteo oservi porãve hag̃ua chupe.

19. ¿Mbaʼérepa umi imitãva ojagarra vaʼerã ensério pe konsého Pablo omeʼẽ vaʼekue Timotéope, ha mbaʼépa ohupytýta hikuái ojapóramo upéva?

¹⁹ Umi mbaʼe Pablo oskrivi vaʼekuére ikártape jahechakuaa ohayhueterei hague Timotéope. Péro avei umi kárta Pablo oskrivi vaʼekue ohechauka porã mbaʼéichapa Jehová ohayhueterei umi mitãrusúpe. Haʼe ningo oipotaiterei evyʼa eservívo chupe. Upévare ejagarrákena ensério entéro umi konsého Pablo omeʼẽ vaʼekue mborayhúpe, ha avei eñehaʼã erekove pe deséo eservi hag̃ua ótrope. Péicha rejapóramo revyʼáta koʼág̃ama voi, ha ikatúta ‘eñakarama hatã pe jeikove añetetévare’ (1 Tim. 6:​18, 19).