1, 2. a) ¿Mbaʼérepa umi omenda ramóva ojerovia vaʼerã Jehováre? (Salmo 37:3, 4). b) ¿Mbaʼépa jahecháta ko artíkulope?

¿NDÉPA remenda potaite hína, térã ramónte remenda hague? Oiméramo upéicha, nde katuete reikose vyʼápe pe persóna rehayhuetévandi. Jaikuaaháicha, umi omendáva ningo ombohovái heta mbaʼe ijetuʼúva ha oĩ avei heta mbaʼe iñimportánteva odesidi vaʼerã hikuái. ¿Mbaʼépa ikatu pejapo pejecha jave umichagua situasiónpe? Iñimportánte hína mbaʼéichapa pembohovái umíva, pórke upévare odepende hína oimépa pevyʼáta térãpa ndapevyʼamoʼãi la pene matrimóniope. Pejeroviáramo Jehováre pedesidi porãta, imbaretéta la pene matrimónio ha katuete pevyʼavéta. Péro umi ndorekóiva enkuénta la Jehová heʼíva oike heta akãrasýpe, oreko heta provléma ha ndovyʼái (elee Salmo 37:3, 4).

² Ko artíkulo ojejapóramo jepe umi omenda ramóvape g̃uarã, koʼápe oñeñeʼẽta umi provléma ombohováivare entéro matrimónio. Ohechaukáta mbaʼe mbaʼépa ikatu ñaaprende unos kuánto kuimbaʼe ha kuña oñeñeʼẽvagui la Bíbliape. Umi leksión ñaaprendétava chuguikuéra ideprovéchota ñandéve heta mbaʼépe, umíva apytépe ñane matrimóniope. Ha jahecháta avei mbaʼépa ikatu ñaaprende umi matrimónio koʼag̃aguágui.

3, 4. ¿Mbaʼeichagua situasión ijetuʼúvapa ikatu hína ombohovái umi omenda ramóva?

³ Heta hénte omokyreʼỹ umi omenda ramóvape oiko hag̃ua umi ótro hénte oikoháicha. Por ehémplo, ituakuéra térã ipariénte  ikatu omboliga chupekuéra pyaʼe voi ifamília hag̃ua hikuái. Térã ikatu umi iñamígo térã ihentekuéra iñintensión porãva omokyreʼỹ chupekuéra ojogapo hag̃ua ha ojogua hag̃ua heta kósa porã porã.

⁴ Noñatendéiramo, peteĩ matrimónio ikatu hína odesidi vai ha upéicha rupi oike heta déudape. Ha upéi pe ména ha tembireko ombaʼapovéma vaʼerã opagapa hag̃ua umi déuda. La itravahokuéra oñepyrũtama hoʼupa chuguikuéra itiémpo ha upéicha rupi ndaikatumoʼãvéima ojapo ijestúdio personál, ijestúdio de família ni osẽ predikasiónpe. Pe matrimónio ikatu voi oñepyrũ ofalta rreunionhápe ojaposégui óra éxtra itravahohápe ikatu hag̃uáicha oganave hikuái térã ani hag̃ua operde itravahokuéra. Ojapóramo upéicha, haʼekuéra ojavýta hína hetaiterei oportunida porã ojapove hag̃ua Jehová servísiope.

5. ¿Mbaʼépa ikatu peaprende Claudio ha Marisa ehémplogui?

⁵ Jaikóramo ñandeplatapota ha jarekose umi lúho katuetei ndajavyʼamoʼãi, ha oĩ heta experiénsia ohechaukáva upéva. Por ehémplo jahechamína mbaʼépa oaprende vaʼekue Claudio ha Marisa. * Omenda ramóme, mokõivévante ojeity vaʼekue traváhope oiko porãségui hikuái. Péro upéva nombovyʼái chupekuéra. Claudio heʼi: “Ore ningo roreko rasapa vaʼekue entéro mbaʼe, péro ndororekói ni peteĩ méta Jehová servísiope. Ha legálmente roiko rojepyʼapyháre ha ndaigústoi oréve mbaʼeve”. Peẽ ningo oiméne pehechakuaáma avei umi mbaʼerepy ni michĩmi nañanembovyʼaiha. Oiméramo upéva la pene situasión, aníkena peñedesanima. Umi ehémplo porã ñaanalisátava tuichaiterei penepytyvõta pejapo hag̃ua umi kámbio tekotevẽva. Ñepyrũrã jahechamíta mbaʼépa umi ména ikatu oaprende rréi Jehosafátgui.

6. ¿Mbaʼéichapa rréi Jehosafat osegi vaʼekue pe konsého oĩva Proverbios 3:5, 6-pe ombohováirõ guare peteĩ provléma ijetuʼúva?

⁶ Menakuéra, ¿peẽmepa sapyʼánte pendedesahusiáma entéro umi rresponsavilida perekóva? Oiméramo upéicha, tuicha penepytyvõta rréi Jehosafat ehémplo. Haʼe rupi rréi, Jehosafat oreko vaʼekue la rresponsavilida oñangarekóvo peteĩ nasión kompletoitére. ¿Mbaʼépa haʼe ojapo okumpli porã hag̃ua upe rresponsavilida tuichaitéva? Haʼe ningo ojapo vaʼekue opa ikatúva oprotehe hag̃ua pe puévlope. Por ehémplo omopuʼã vaʼekue umi lugár isegúro porãva umi siuda de Judápe, ha ombyaty peteĩ ehérsito oĩháme mas de un millón soldádo (2 Crón. 17:12-19). Péro upéi Jehosafat ombohovái peteĩ provléma ijetuʼuetereíva. Peteĩ ehérsito tuichaitereíva oĩháme umi ammonita, moabita ha umi kuimbaʼe oikóva Seír montañakuérare oamenasa chupe, ifamíliape ha pe puévlo kompletoitépe (2 Crón. 20:1, 2). ¿Mbaʼépa ojapo raʼe rréi Jehosafat? Haʼe ojerure Jehovápe oipytyvõmi ha omombaretemi hag̃ua chupe. Upéicha  okumpli la heʼíva Proverbios 3:5, 6 (elee). Jehosafat ningo oñemboʼe vaʼekue Jehovápe ipyʼaite guive, ha upéva jatopa 2 Crónicas 20:5-12-pe. Upe ñemboʼe ohechauka porãiterei mbaʼeichaite pevépa haʼe ojerovia Jehováre. ¿Mbaʼéichapa Jehová ombohovái raʼe chupe iñemboʼe?

7. ¿Mbaʼéichapa Jehová ombohovái Jehosafat ñemboʼe?

⁷ Jehová ojevale vaʼekue peteĩ levita héravare Jahaziel oñeʼẽ hag̃ua Jehosafátpe, ha heʼi chupe: “Peñemoĩnte pende lugárpe ha pepytaite upépe, ha pehecháta mbaʼéichapa Jehová pendesalva” (2 Crón. 20:13-17). ¡Ajépa iñextrañoite la ojapo vaʼerã hikuái oñorãirõ hag̃ua! Péro koʼã instruksión ningo ndoúi vaʼekue peteĩ persóna reíguinte, síno Jehovaitégui voi. Jehosafat ojerovia Ñandejárare ipyʼaite guive ha ojapo umi mbaʼe ojeʼéva chupe. Haʼe ha umi hénte osẽrõ guare ojotopa hag̃ua iñenemigokuérandi, haʼe nomoĩri umi soldádo ivalevévape pe ehérsito fréntepe. Upéva rangue, haʼe omoĩ umi kuimbaʼe oĩva armaʼỹ reheve opurahéi hag̃ua ohóvo henonderãkuéra. Péro Jehová nodesepsionái isiérvo Jehosafátpe ha ohundipaite umi iñenemigokuérape (2 Crón. 20:18-23).

8. ¿Mbaʼépa umi menakuéra ikatu oaprende rréi Jehosafat ehémplogui?

⁸ Menakuéra, ¿mbaʼépa ikatu peaprende Jehosafat ehémplogui? Peẽ ningo pereko la rresponsavilida peñangarekóvo pene famíliare, peprotehe ha pemantene vaʼerã chupekuéra. Peẽ pembohovái jave peteĩ situasión ijetuʼúva, a lo mehór pepensa peneañónte ikatutaha pesolusiona upe provléma. Péro aníkena pejerovia pendejehe upéicha jave. Upéva rangue, peñemboʼe Jehovápe peneañoháme ha upe rire peñemboʼe avei pene rembirekóndi pende pyʼaite guive. Peheka la Bíbliape ha umi puvlikasionkuérape umi konsého penepytyvõtava pene situasiónpe, ha upéi pesegi umíva. Algúnope ikatu ndogustái umi mbaʼe pedesidíva ha upévare heʼi peẽme pendevyroitereiha. Haʼekuéra ikatu heʼi peẽme pe pláta ha umi kósa materiál añoite la oprotehétava pene famíliape. Péro penemanduʼákena rréi Jehosafat ehémplore. Haʼe ningo ojerovia vaʼekue Jehováre ha ohechauka upéva umi mbaʼe ojapóvare. Jehová ndohejareíri vaʼekue upe isiérvo ifieletévape, ha peẽme avei napenderejamoʼãi asy (Sal. 37:28; Heb. 13:5). ¿Péro mbaʼépa ikatu ojapove peteĩ paréha ikatu hag̃uáicha ovyʼa hikuái imatrimóniope?

9. ¿Mbaʼépa ikatu jaʼe proféta Isaías ha hembirekóre?

⁹ Proféta Isaías ha hembirekópe g̃uarã Jehová servísio haʼe vaʼekue la iñimportantevéva. Isaías ningo haʼe vaʼekue Jehová proféta ha provávlemente hembireko oreko vaʼekue avei peichagua asignasión. Upéicha rupi ojeʼe hese “pe profetísa” (Is. 8:1-4). Isaías ha hembireko omotenonde vaʼekue oñondive Jehová servísio. ¡Ajépa iporãite la iñehémplo entéro matrimóniope g̃uarã!

10. ¿Mbaʼéichapa oipytyvõta umi matrimóniope ostudiáramo umi profesía bíblica?

¹⁰ ¿Mbaʼéichapa koʼág̃arupi umi matrimónio ikatu osegi Isaías ha hembireko ehémplo? Ojapóvo opa ikatúva Jehová servísiope. Haʼekuéra ikatu omombarete ijerovia Jehováre ostudiávo oñondive umi profesía bíblica, ha ohechávo mbaʼéichapa umíva siémpre oñekumpli (Tito 1:2). * Ikatu ojepyʼamongeta hikuái ha ohecha mbaʼéichapa ikatu opartisipa oñekumpli hag̃ua umi profesía oĩva la Bíbliape,  por ehémplo pe profesía Jesús omeʼẽ vaʼekue heʼíva ojepredika vaʼerãha ko yvy tuichakuére og̃uahẽ mboyve pe fin (Mat. 24:14). Amáske peteĩ matrimónio ohecha mbaʼéichapa oñekumpli umi profesía bíblica, ikyreʼỹvétantema hikuái ojapo hag̃ua opa ikatúva Jehová servísiope.

11. ¿Mbaʼépa ikatu vaʼekue ojapo Áquila ha Priscila, ha mbaʼérepa?

¹¹ Umi matrimónio imitãva ikatu oaprende heta mbaʼe Áquila ha Priscílagui. Ko matrimónio judío ningo oiko vaʼekue Rómape, ha chuguikuéra oiko vaʼekue kristiáno ohendu rire umi notísia porã oñeʼẽva Crístore. Katuete ningo haʼekuéra oikóne raʼe trankílo upépe ha ovyʼa upéicha. Péro la isituasionkuéra tuichaiterei ou okambia pórke pe emperadór Claudio omanda vaʼekue enterove judío osẽ vaʼerãha Rómagui. ¡Ajépa ijetuʼueténe raʼe upéva Áquila ha Priscílape g̃uarã! Haʼekuéra oheja vaʼerã opa mbaʼe oikuaáva, oho oiko ótro ládo ha omoñepyrũ ótro lugárpe la inegósio ojapohápe óga kárpa. ¿Ombotapykuétapa hikuái Ñandejára Rréino oiko haguére hesekuéra koʼã mbaʼe? Nde oiméne reikuaa voi hína la rrespuésta. Hóga pyahúpe, Coríntope, haʼekuéra oñepyrũ oipytyvõ pe kongregasión upepeguápe. Ombaʼapo avei hikuái apóstol Páblondi omombarete hag̃ua umi ermáno oĩvape upépe. Upéi haʼekuéra ova ohóvo ótro siudápe oipytyvõ hag̃ua umi lugár oĩvehápe nesesida (Hech. 18:18-21; Rom. 16:3-5). ¡Hetaite mbaʼe porã ningo ohupytýne raʼe hikuái oñondive!

12. ¿Mbaʼérepa umi matrimónio omoĩ vaʼerã méta Jehová servísiope?

¹² Umi matrimónio koʼag̃agua ikatu osegi Áquila ha Priscila ehémplo omotenondéramo oñondive Ñandejára Rréino. Upévare iporãta oĩ aja de nóvioma voi oñeʼẽramo hikuái umi méta ikatúvare omoĩ. Peteĩ paréha omoĩramo peteĩ méta ha oñehaʼãmbaite ohupyty upéva oñondive, haʼekuéra ikatúta ohecha porãve mbaʼéichapa Jehová oipytyvõ chupekuéra (Ecl. 4:9, 12). Jahechamína Raúl ha Elizabeth experiénsia. Raúl omombeʼu: “Roĩrõ guare de nóvio, ore roñeʼẽma vaʼekue umi méta ikatúvare romoĩ”. Ha Elizabeth omombeʼu: “Ore  roñeʼẽma vaʼekue upe témare ikatu hag̃uáicha roñatende umi mbaʼe rodesidíva upe rire, ani ág̃a umíva káusare ndaikatúi jey rokumpli umi méta rorekóva”. Raúl ha Elizabeth ikatu vaʼekue ova Micronésiape oservi hag̃ua peteĩ lugár oĩvehápe nesesida.

13. Ohechaukaháicha Salmo 28:7, ¿mbaʼépa oikóta jajeroviáramo Jehováre?

¹³ Ojapo haguéicha Raúl ha Elizabeth, koʼág̃arupi heta matrimónio odesidi oikotaha sensillomínte ikatu hag̃uáicha oñemeʼẽmbaite hikuái predikasiónpe. Peteĩ matrimónio omoĩramo umi méta Jehová servísiope ha upéi ombaʼapo oñondive ohupyty hag̃ua umíva, ohupytýta hikuái hetaiterei mbaʼe porã. Haʼekuéra ohecháta mbaʼéichapa Jehová oñangareko hesekuéra, ojeroviavéta hese hikuái ha katuete ovyʼaitereíta (elee Salmo 28:7).

14. ¿Mbaʼéichapa apóstol Pedro ha hembireko ohechauka vaʼekue ojeroviaha pe promésa oĩvare Mateo 6:25, 31-34-pe?

¹⁴ Umi matrimónio ikatu avei oaprende peteĩ mbaʼe iñimportánteva apóstol Pedro ha hembirekógui. Seis mése térã un áñorupi Pedro oikuaa rire Jesúspe, haʼe odesidi vaʼerã kuri peteĩ mbaʼe iñimportantetereíva. Pedro ningo ojededika vaʼekue la péskape omantene hag̃ua ifamíliape. Upévare Jesús oinvitárõ guare chupe oiko hag̃ua chugui isegidór, Pedro oreko vaʼerã kuri enkuénta ifamíliape odesidi mboyve (Luc. 5:1-11). Ha Pedro oelehi porãiterei pórke odesidi ohotaha Jesúsndi ha opredikataha hendive de tiémpo kompléto. Ha oĩ heta mbaʼe ohechaukáva Pedro rembireko oapoja hague upe desisión. Por ehémplo, la Biblia omombeʼu Jesús orresusita rire, haʼe omoirũ hague Pédrope umi iviáhepe, ha oiméne ojapo raʼe upéva peteĩ tiémpore (1 Cor. 9:5). Katuete ningo haʼe ehémplo vaʼekue umi ermána omendávape g̃uarã. Upéicha rupi Pedro ikatu vaʼekue trankílamente oñemoñeʼẽ umi omendávape (1 Ped. 3:1-7). Ojekuaa porãiterei ningo Pedro ha hembireko ojeroviaiterei hague Jehová promesakuérare, koʼýte pe promésa heʼívare Jehová núnka nombofaltamoʼãiha mbaʼeve umi omotenondévape Irréino (elee Mateo 6:25, 31-34).

15. ¿Mbaʼépa penemboʼe Tiago ha Esther experiénsia?

¹⁵ Oiméramo ojapo unos kuánto áñonte la pemenda hague, ¿mbaʼépa ikatu pejapo pembaʼaposeve hag̃ua Jehová servísiope? Upearã penepytyvõta pehecháramo mbaʼe mbaʼépa ojapo umi ótro matrimónio. Por ehémplo, ikatu pelee umi artíkulo hérava “Kyreʼỹme oñekuaveʼẽ hikuái oservi hag̃ua”. Koʼã artíkulo oipytyvõ vaʼekue Tiago ha Esthérpe, peteĩ matrimónio brasilero, oservise hag̃ua oĩvehápe nesesida. Tiago omombeʼu: “Roleévo umi experiénsia ohechaukáva mbaʼéichapa Jehová okuida isiervokuérare koʼág̃arupi, ore roñanduse avei Jehová oregiaha ha oñangarekoha orerehe”. Tiémpo rire, haʼekuéra ova Paraguáipe, ha oservi hína upépe 2014 guive peteĩ kongregasión portuguéspe. Esther heʼi: “Oréve ningo oregustaiterei la heʼíva Efesios 3:20. Roservi aja Jehovápe, heta vésema rohecha mbaʼéichapa oñekumpli orerehe ko téxto”. Upe kártape, apóstol Pablo opromete vaʼekue Jehová omeʼẽtaha ñandéve hetave mbaʼe upe ikatúvagui jajerure. ¡Ha siertoite ningo la heʼíva ko téxto!

16. Oiméramo peteĩ matrimónio imitãva omoĩse peteĩ méta Jehová servísiope, ¿mávapepa ikatu ojerure konsého?

¹⁶ Peẽ ningo ikatu peñevenefisia pe experiénsia orekóvagui umi ermáno ha ermána oaprende vaʼekue ojerovia Jehováre. Por  ehémplo, oĩ umi matrimónio oservíma vaʼekue Jehovápe de tiémpo kompléto hetaiterei áñore. ¿Mbaʼérepa napeporandúi chupekuéra mbaʼeichagua métapa ikatu pemoĩ? Péicha pehechaukáta hína avei pejeroviaha Jehováre (Prov. 22:17, 19). Umi ansiáno ningo ikatu avei oipytyvõ umi matrimónio imitãvape omoĩ ha ohupyty hag̃ua umi méta Jehová servísiope.

17. ¿Mbaʼépa oiko vaʼekue Claudio ha Marísare, ha mbaʼépa ñaaprende iñehemplokuéragui?

¹⁷ Péro sapyʼánte ningo umi mbaʼe ñaplanea vaʼekue Jehová servísiope nosẽi pe ñande ñahaʼarõ haguéicha. Upéva ningo oiko vaʼekue Claudio ha Marísare, pe matrimónio ajeʼi ñañeʼẽ hague. Tres áño omenda haguépe, haʼekuéra ova ombaʼapo hag̃ua konstruksiónpe oñemopuʼãrõ guare pe sukursál de Finlandia. Péro upéi oñentera 6 mésente ikatutaha opyta ombaʼapo upépe. Ñepyrũrã oñedesepsiona hikuái, péro upe riremínte oñeinvitáma chupekuéra oike hag̃ua peteĩ kúrsope oaprende hag̃ua árabe. Koʼág̃a haʼekuéra vyʼápe oservi hína ótro paíspe peteĩ kongregasión árabepe. Opensávo umi mbaʼe ohasa vaʼekuére, Marisa heʼi: “Jakyhyjeʼíngo añete ñañepyrũ hag̃ua jajapo peteĩ mbaʼe núnka ndajajapói vaʼekue, upévare jajeroviámante vaʼerã Jehováre. Péro ahechakuaa Jehová siémpre orepytyvõ hague pe roimoʼãʼỹháicha, ha ahecha rire upéva ajeroviavéntema hese”. Ohechaukaháicha ko experiénsia, peẽ ikatu peĩ segúro Jehová siémpre penepremiataha pejeroviáramo hese pende pyʼaite guive.

18. ¿Mbaʼépa ikatu ojapo umi omendáva osegi hag̃ua ojerovia Jehováre?

¹⁸ Pe matrimónio ningo peteĩ rregálo oúva Jehovágui, ha haʼe oipota umi omendáva odisfruta ko rregálo (Prov. 5:18; Mat. 19:5, 6). Peẽ matrimónio imitãva, ¿ikatúnepa pehecha mbaʼépa pemotenonde hína pende rekovépe? ¿Peñehaʼãmbaitépa hína pehechauka hag̃ua Jehovápe pemombaʼetereiha umi rregálo haʼe omeʼẽ vaʼekue peẽme? Peñemboʼékena Jehovápe, peheka Iñeʼẽme umi konsého penepytyvõtava pene situasiónpe ha upéi pesegi umi konsého haʼe omeʼẽva peẽme. ¡Ikatu peime segúro katuete pevyʼaitereitaha pene matrimóniope pemotenondéramo oñondive Jehová servísio!