1. ¿Mbaʼe iporãvapa ohupytýma heta mitãrusukuéra?

 KÁDA áño ningo hetaiterei mitãrusukuéra ojevautisa. ¿Ndépa rejapóma upéva? Oiméramo upéicha, katuete umi ermanokuéra ha Jehová ovyʼaiterei hína ndereheve (Prov. 27:11). Epensamína umi mbaʼe porã ehupytýmavare. Nde ningo hetáma estudia porã la Biblia, oiméne voi heta áñorema. Ha restudia rupi péicha, reiméma konvensído la Biblia haʼeha Ñandejára Ñeʼẽ. Ha ndahaʼéi upéva añónte, koʼág̃a nde reikuaáma ha rehayhúma la Biblia Apoharépe. Nde rehayhueterei rupi Jehovápe, emeʼẽma chupe nde rekove ha ejevautisáma, péicha oikóma ndehegui peteĩ Jehová siérvo. ¡Ajépa iporãite upéva!

2. ¿Mbaʼépa jahecháta ko artíkulope?

 ² Nde oiméne heta mbaʼe embohovái raʼe ejevautisa mboyve ha ijetuʼu kuri ndéve ndefiél hag̃ua Jehovápe. Péro upéva ndopái upépe, amedída ke ndeedave rehóvo, embohováita hetave pruéva. Satanás oñehaʼãta omokangy ndehegui pe mborayhu reñandúva Jehováre ha oñehaʼãmbaitéta anivéma hag̃ua reservi chupe (Efes. 4:14). Aníkena reheja oiko nderehe upéva. ¿Mbaʼépa nepytyvõta esegi hag̃ua siémpre neñeʼẽrendu Jehovápe ha ekumpli ne promésa reservitaha chupe? Upearã esegi vaʼerã eprogresa, ‘esegi ekakuaapa peve Ñandejára servísiope’ (Heb. 6:1). ¿Mbaʼéichapa ikatu ehupyty upéva?

3. ¿Mbaʼépa ojapo vaʼerã entéro kristiáno ojevautisa rire?

³ Jajevautisa rire ningo enterove ñande tekotevẽterei jasegi pe konsého apóstol Pablo omeʼẽ vaʼekue umi kristiáno oĩvape Éfesope. Haʼe omokyreʼỹ chupekuéra oiko hag̃ua chuguikuéra “peteĩ kuimbaʼe okakuaapámava” (Efes. 4:13). Upéicha haʼete  heʼíva chupekuéra: “Pesegíkena peprogresa”. Apóstol Pablo ningo ñanepytyvõ ñantende hag̃ua upéva okomparárõ guare mbaʼéichapa peteĩ kristiáno oprogresa peteĩ mitã okakuaávare ohóvo. Peteĩ mitãraʼy onase ramóvape ningo la ituakuéra ohayhu ha ohecharamoiterei. Péro pe mitã ningo ndahaʼemoʼãi mitãraʼy pára siémpre. Kon el tiémpo haʼe okakuaáta ha ndojapomoʼãvéima “umi mbaʼe mitãnguéra ojapóva” (1 Cor. 13:11). Peichaite avei ñande, jajevautisa rire jasegi vaʼerã japrogresa. Koʼág̃a jahechamíta umi konsého ñanepytyvõtava jahupyty hag̃ua upéva.

4. ¿Mbaʼe kualidápa nepytyvõta esegi hag̃ua eprogresa? Emyesakã. (Filipenses 1:9).

⁴ Esegi ehayhuve Jehovápe. Nde ningo ehayhuetereíma Jehovápe, péro ikatu hína ehayhuetevéntema chupe. ¿Mbaʼéichapa ikatu ejapo upéva? Apóstol Pablo oñemboʼe vaʼekue ikatu hag̃uáicha pe mborayhu orekóva umi kristiáno Filiposgua ‘okakuaave ohóvo’ (elee Filipenses 1:9). Upéicharõ ñande ikatu ñamongakuaa pe mborayhu ñañandúva Jehováre. ¿Mbaʼéichapa? ‘Jaikuaa porãvo Ñandejára rembipota ha ñantende porãvo upéva’. Amáske jaikuaa porãve Jehovápe, jahayhuvéta chupe ha ñamombaʼevéta entéro mbaʼe haʼe ojapóva ñanderehehápe. Avei ñantende porãvéta mbaʼérepa haʼe odesidi térã ojapo peteĩ mbaʼe. Ñande ningo siémpre jajapose umi mbaʼe ombovyʼáva Jehovápe ha núnka ndajajaposéi peteĩ mbaʼe omoñeñandu vaítava chupe. Ñañehaʼã voi jaikuaa mbaʼépa Jehová oipota jajapo ha mbaʼéichapa ikatu jajapo upéva.

5, 6. ¿Mbaʼéichapa ikatu jahayhuve Jehovápe? Emyesakã.

⁵ Jesús oĩrõ guare ko yvy ape ári ohechauka porãiterei vaʼekue mbaʼeichaguápa Itúa Jehová. Upévare amáske jaikuaa porãve Jesúspe, jahayhuvéta avei Jehovápe (Heb. 1:3). Ha ikatu hag̃uáicha ñande jaikuaa porã Jesúspe, iporãta jastudia porãrõ umi lívro de Mateo, Marcos, Lucas ha Juan. Oiméramo nderejepokuaái relee la Biblia káda día, iporãta eñepyrũramo elee koʼã lívro oñeʼẽva Jesúsre. Ha releévo rehóvo umi rreláto, eñatende umi kualida porã haʼe orekóvare. Por ehémplo, la héntepe ndahasýi vaʼekue oñemongeta hag̃ua hendive, ha peteĩ jey ohupi ijyva ári umi mitãme jepe (Mar. 10:13-16). Umi idisipulokuéra ndokyhyjéi vaʼekue omombeʼu hag̃ua chupe umi mbaʼe oñandúva (Mat. 16:22). Péicha Jesús osegi vaʼekue Itúa yvagapegua ehémplo, ha upévare jaikuaa ikatuha ñañemoag̃ui Jehováre. Haʼe ningo naiprovlémai ohendu hag̃ua umi orasión ñande jajapóva chupe ñande pyʼaite guive. Upévare ñañemboʼe jave ikatu ñamombeʼu Jehovápe enteroite mbaʼe ñañandúva, jaikuaágui haʼe nañanekondenamoʼãiha. Haʼe ningo ñanderayhueterei ha ojepyʼapy ñanderehe (1 Ped. 5:7).

⁶ Jesús ningo ombyasyeterei vaʼekue umi héntepe. Apóstol Mateo heʼi vaʼekue: “Jesús omañávo umi héntere ombyasyeterei chupekuéra, pórke ohecha mbaʼéichapa oñemaltrata umi héntepe ha isarambipaha hikuái. Umi hénte ojogua umi ovecha ndorekóivape pastór” (Mat. 9:36). ¿Ha mbaʼéichapa oñeñandu Jehová? Jesús heʼi: “Che Ru oĩva yvágape ndoipotái oñehundi ni peteĩ koʼã che disípulo iñumíldeva mitãicha jepe” (Mat. 18:14). ¡Ajépa ñanembovyʼaite upéva! Upévare amáske jaikuaa porãve Jesúspe, jahayhuvéta hína Jehovápe.

7. ¿Mbaʼéichapa nepytyvõta rehasavéramo tiémpo umi ermáno ha ermána ijerovia mbaretévandi?

⁷ Nde ikatu avei esegi eporohayhuve ha eprogresa ehasavéramo tiémpo umi ermáno ha ermána ijerovia mbaretéva oĩvandi  ne kongregasiónpe. Péicha ehechakuaáta mbaʼéichapa haʼekuéra ovyʼa. Haʼekuéra ningo noñarrepentíri odesidi haguére oservi Jehovápe. Ejerure chupekuéra tomombeʼu ndéve umi experiénsia porã oguereko vaʼekue hikuái oservívo Jehovápe. Ha oiméramo redesidi vaʼerã peteĩ mbaʼe iñimportánteva, ejerurékena chupekuéra konsého. Nemanduʼákena, “opa mbaʼe osẽ porãve oĩháme heta persóna omeʼẽva konsého” (Prov. 11:14).

8. ¿Mbaʼépa ikatu rejapo oiméramo reduda peteĩ mbaʼe la Biblia omboʼévagui?

⁸ Aníkena eduda. Jahecháma haguéicha  párrafo 2-pe, Satanás ndoipotaiete nde eprogresa espirituálmente. Haʼe ikatu ojapo upéva nembodudávo umi mbaʼe la Biblia omboʼévagui. Por ehémplo ikatu hína etopa umi ogueroviáva pe evolusión, ha upéva ningo oheja vaieterei Ñandejárape. Ikatu oime anteve nemitãvépe nerepensáiva upe témare, péro koʼág̃a rekakuaáma ha ikatu voi oñemboʼe hína nde eskuélape pe evolusión. Péro haʼete la regueroviaséva umi nde profesorkuérape oñeʼẽ jave upe témare. Upéicharõ jepe, ikatu hína haʼekuéra núnka noñehaʼãiva oheka umi pruéva ohechaukáva oĩha peteĩ Kreadór. Nemanduʼákena pe konsého jatopávare Proverbios 18:17-pe: “Pe omombeʼu raẽva la oiko vaʼekue haʼetévaicha heʼíva siertogua, péro upéi ou pe ótra persóna ha ojapo heta pregúnta ojekuaa porã hag̃ua upe oiko vaʼekue”. Reguerovia rangue entéro mbaʼe oñemboʼéva nde eskuélape, iporãvéta ndete voi restudiáramo umi mbaʼe omboʼéva la Biblia. Ikatu reheka informasión oñeʼẽva upe témare ñane puvlikasionkuérape. Térã ikatu hína eñeʼẽ umi ermáno térã ermána anteve oguerovia vaʼekuéndi pe evolusión, ha eporandu chupekuéra mbaʼépa okonvense raʼe chupekuéra oĩha peteĩ Kreadór. Koʼã mbaʼe ningo ikatu nepytyvõ ehechakuaa hag̃ua oĩha peteĩ Kreadór.

9. ¿Mbaʼépa reaprende Melissa experiénsiagui?

⁹ Peteĩ ermána hérava Melissa oñepyrũ oinvestiga umi téma oñeʼẽva pe kreasión rehe, ha upéva oipytyvõ chupe anivéma hag̃ua oduda. * Haʼe heʼi: “Eskuélape oñeñeʼẽ jave pe evolusiónre omombeʼu voi hikuái jakree hag̃uáicha. Upévare ñepyrũrã che nañanimái vaʼekue ainvestiga upe téma akyhyjégui siértorõ g̃uarã pe evolusión. Péro upéi ahechakuaa Jehová  ndoipotaiha ñande jakree peteĩ mbaʼe umi ótro heʼi haguérente, síno haʼe oipota ñandete voi ñaĩ konvensído umi mbaʼe jagueroviávare. Upearã añepyrũ astudia pe lívro ¿Existe un Creador que se interese por nosotros?, ha umi folléto ¿Es la vida obra de un Creador?, ha El origen de la vida. Cinco cuestiones dignas de análisis. Péva ningo che la aikotevẽ vaʼekue. Ha ambyasy voi arevéma ndajapói hague upéva”.

10, 11. ¿Mbaʼépa nepytyvõta siémpre nderekopotĩ hag̃ua? (1 Tesalonicenses 4:3, 4).

¹⁰ Emboyke umi kondúkta naiporãiva. Nemitãrusu aja ningo pe deséo sexuál imbareteve, ha ikatu hína ótro nemboliga nderekovai hag̃ua. Ha Satanás oipota voi rejapo upéva. ¿Mbaʼépa nepytyvõta siémpre nderekopotĩ hag̃ua? (elee 1 Tesalonicenses 4:3, 4). Eñemboʼe jave neañoháme, emombeʼupaite Jehovápe umi mbaʼe reñandúva ha ejerure chupe nemombarete hag̃ua (Mat. 6:13). Nemanduʼákena Jehová nepytyvõsetereiha ha ndahaʼeiha nekondenaséva (Sal. 103:13, 14). Avei la Biblia ikatu hína nepytyvõ. Melissa, ajeʼi ñañeʼẽ hague, oñehaʼãmbaite vaʼekue ani hag̃ua oguereko umi pensamiénto naiporãiva. Haʼe heʼi: “Alee rupi la Biblia káda día chepytyvõ amboyke hag̃ua peichagua pensamiénto, ha avei chepytyvõ ahayhuve hag̃ua Jehovápe ha aservise hag̃ua chupe” (Sal. 119:9).

¹¹ Aníkena ndénte esolusionase pe provléma reguerekóva. Eñeʼẽkena nde tuakuérandi, jepe ijetuʼu ndéve eñemongeta hag̃ua koʼã témare. Péro iñimportánte hína rejapo upéva. Melissa heʼi: “Añemboʼe Jehovápe chepyʼaguasu hag̃ua ha upéi añeʼẽ che tuakuérandi la che provlémare. Ajapo rire upéva tuicha añeñandu porãve ha ahechakuaa Jehová cherayhuetereiha”.

12. ¿Mbaʼéichapa ikatu redesidi porãve?

¹² Ejegiákena umi konsého oĩvare la Bíbliape. Nde ekakuaavévo rehóvo mbeguekatúpe ndete voi ikatúta redesidi hetave mbaʼe. Upéicharõ jepe nemitãrusu rupi ndereguerekoguasúi gueteri heta experiénsia. Upévare, ¿mbaʼépa nepytyvõta ani hag̃ua rejapo peteĩ mbaʼe ndereja vaítava Jehová renondépe? (Prov. 22:3). Peteĩ ermána hérava Kari omombeʼu mbaʼépa oipytyvõ kuri chupe ikatu hag̃uáicha odesidi porãve. Haʼe ohechakuaa peteĩ kristiáno ijerovia mbaretéva noikotevẽiha peteĩ rrégla káda situasiónpe g̃uarã. Haʼe heʼi: “Che ahechakuaa tekotevẽha antende porãve umi konsého oĩva la Bíbliape”. Elee jave la Biblia iporãta eñeporandu: “¿Mbaʼépa chemboʼe ko aleéva Jehová opensa lájagui? ¿Oĩpa umi konsého ikatúva chepytyvõ ajapo hag̃ua umi mbaʼe oĩ porãva? Oiméramo upéicha, ¿mbaʼéichapa chepytyvõta upéva amoĩramo en práktika?” (Sal. 19:7; Is. 48:17, 18). Elee rupi la Biblia ha ejepyʼamongeta umi konsého oĩvare pype, nepytyvõta redesidi hag̃ua Jehová oipotaháicha. Amedída ke eprogresa, nde jerovia imbaretevéta. Rehechakuaáta hína natekotevẽiha reguereko peteĩ rrégla káda situasiónpe g̃uarã. Upéva rangue rejegiáta umi konsého oĩvare la Bíbliape ha upéva nepytyvõta ehechakuaa hag̃ua mbaʼépa Jehová opensa peteĩ mbaʼére.

13. ¿Mbaʼéichapa ikatu nepytyvõ eelehi porãramo umi ne amigorã? (Proverbios 13:20).

¹³ Eelehi ne amigorã umi ohayhúva Jehovápe. Jahecháma haguéicha ko artíkulope, ikatu hag̃uáicha nde eprogresa espirituálmente tekotevẽterei eelehi porã umi ne amigorã (elee Proverbios 13:20). Peteĩ ermána hérava Sara ou kuri ndovyʼavéi. Upéi oiko peteĩ mbaʼe oipytyvõva chupe ikatu hag̃uáicha ovyʼa jey. Sara omombeʼu: “Atopa umi che amigokuerarã hústo aikotevẽve jave. Peteĩ ermána imitãva ha che, káda semána roñembyaty jepi  rostudia hag̃ua pe rrevísta Ñemañaha. Ha ótro katu chepytyvõ ikatu hag̃uáicha akomenta umi rreuniónpe. Péicha che amigokuéra chepytyvõ rupi añepyrũ ahechakuaa iñimportantetereiha pe estúdio personál ha pe orasión. Upéicha rupi pe che amista Jehovándi imbareteve ha añepyrũ jey avyʼa”.

14. ¿Mbaʼépa ojapo Julien otopa hag̃ua iñamigorã?

¹⁴ ¿Mbaʼéichapa ikatu etopa ne amigorã umi nepytyvõtava eservi hag̃ua Jehovápe? Julien, koʼág̃a haʼéva peteĩ ansiáno, omombeʼu: “Chemitãrusúpe aguereko heta amígo apredika rupi umi ermanokuérandi. Koʼã che amigokuéra ningo ikyreʼỹeterei vaʼekue predikasiónpe, ha upéva chepytyvõ avyʼa hag̃ua avei predikasiónpe ha ajapose hag̃ua avei che prekursorádo. Upépe ahechakuaa ikatuha aguereko amígo teete ha chepytyvõtava ndahaʼéiramo jepe cheavegua hikuái. Upe rire Betélpe avei atopa che amigorã. Iñehemplokuéra tuichaiterei chepytyvõ aelehi porã hag̃ua mbaʼéichapa ajedivertíta, ha upéva chepytyvõ añemoag̃uive hag̃ua Jehováre”.

15. ¿Mbaʼéichapa apóstol Pablo oipytyvõ vaʼekue Timotéope oelehi porã hag̃ua iñamigorã? (2 Timoteo 2:20-22).

¹⁵ ¿Mbaʼépa ejapo vaʼerã ehechakuaáramo ejeheʼaiterei rupi peteĩ oĩvandi kongregasiónpe ikatuha ombyai ne amista Jehovándi? Apóstol Pablo oikuaa porã vaʼekue yma pe kongregasiónpe jepe ikatuha oĩ umi noñekomportáiva peteĩ kristiánoicha. Upévare heʼi vaʼekue Timotéope oñemomombyry hag̃ua umichaguágui (elee 2 Timoteo 2:20-22). Pe ñane amista jaguerekóva Jehovándi ningo iporãiterei. Upévare ñande ñambaʼapo jejopy ñañemoag̃ui hag̃ua Jehováre ha ndajahejaséi avavete ombyai ñandehegui pe amista jaguerekóva hendive (Sal. 26:4).

16. ¿Mbaʼeichagua métapa ikatu emoĩ?

¹⁶ Emoĩ umi méta nepytyvõtava. Emoĩkena umi méta nepytyvõtava esegi hag̃ua eprogresa ha ndejerovia mbareteve hag̃ua (Efes. 3:16). Por ehémplo, ikatu ejedesidi estudia porãvetaha neañoháme ha eñehaʼãtaha elee la Biblia káda día (Sal. 1:2, 3). Térã ikatu ehechakuaa tekotevẽha eñemboʼe pyʼỹive ha nde pyʼaite guive. Ikatu oime ifálta hína ndéve ejejokokuaave eelehi jave umi ne diversionrã térã mbaʼéichapa eipurúta ne tiémpo upearã  (Efes. 5:15, 16). Jehová ohecháramo nde eñehaʼãmbaiteha eprogresa, haʼe ovyʼaitereíta ndereheve.

17. ¿Mbaʼépa jahupytýta ñaipytyvõramo ótrope?

¹⁷ Nde ningo esegíta emehora kómo kristiáno eipytyvõramo ótrope. Jesús heʼi vaʼekue voi: “Javyʼaiteve ñameʼẽvo, ñandéve oñemeʼẽ rangue” (Hech. 20:35). Nembovyʼaitereíta ningo eipurúramo ne tiémpo ha ne mbaretekue eipytyvõ hag̃ua ótrope. Por ehémplo ikatu eipytyvõ umi ermáno ijedámava ha hasykatúvape oĩva ne kongregasiónpe. Ikatu embaʼejogua chupekuéra térã eipytyvõ chupekuéra oipurukuaa hag̃ua iteléfono térã itávlet. Ha oiméramo nde haʼe peteĩ ermáno, ikatu ereko la méta oiko hag̃ua ndehegui siérvo ministeriál, ha péicha eipytyvõ porãve hag̃ua umi ermáno ha ermanakuérape (Filip. 2:4). Ikatu avei ehechauka eporohayhuha eñeʼẽvo umi héntepe Ñandejára Rréinore (Mat. 9:36, 37). Ha ikatúma guive, emoĩkuaa la méta eservi hag̃ua Jehovápe de tiémpo kompléto.

18. ¿Mbaʼéichapa nepytyvõta eprogresa hag̃ua eservíramo de tiémpo kompléto?

¹⁸ Nde eservíramo Jehovápe de tiémpo kompléto, eguerekóta hetave oportunida eprogresa hag̃ua espirituálmente. Por ehémplo ikatu eho pe Eskuéla de Evanhelisadórpe, eservi Betélpe térã konstruksiónpe. Peteĩ ermána imitãva oservíva de prekursóra hérava Kaitlyn heʼi: “Ahasa rupi tiémpo predikasiónpe umi ermáno ha ermána ijerovia mbaretévandi, chepytyvõ kuri asegi hag̃ua aprogresa ajevautisa rire. Iñehemplokuéra tuichaiterei chepytyvõ astudiave hag̃ua la Biblia ha añehaʼãve hag̃ua aporomboʼe porã”.

19. ¿Mbaʼe vendisiónpa ehupytýta esegi rupi eprogresa?

¹⁹ Amedída ke esegi eprogresa ejevautisa rire, ehupytýta hetaiterei vendisión. Eipuru porãta ne huventu eservi hag̃ua Jehovápe, eiko rangue umi mbaʼe ndovaléiva mbaʼeverã rapykuéri (1 Juan 2:17). Nde ningo ejeíta heta akãrasýgui, pórke ndereikomoʼãi edesidi vai hína. Upéva rangue evyʼáta ha esẽ porãta umi mbaʼe ejapóvape (Prov. 16:3). Ne ehémplo tuichaiterei omokyreʼỹta umi ermanokuéra imitãva ha ijedámavape (1 Tim. 4:12). Ha la iñimportantevéva katu eñeñandu porã ha ndepyʼaguapýta eikuaágui eime porãha Jehovándi ha ereko rupi chupe ne amigoitéramo (Prov. 23:15, 16).