1. ¿Mbaʼépa oipota Ñandejára ñandéve g̃uarã?

 ÑANDEJÁRA ningo oipota iporãvante ñandéve g̃uarã. Haʼe ojapo vaʼekue Adán ha Évape oiko hag̃ua peteĩ hardín iporãitereívape. Ñandejára oipota kuri haʼekuéra ifamília, oipota avei ombotuicha hikuái pe hardín ojagarrapa peve ko yvy ha oñangareko umi animál rehe (Génesis 1:28; 2:8, 9, 15; ehecha nóta 6).

 2. a) ¿Mbaʼérepa ikatu jajerovia Ñandejára ojapotaha ko yvýgui peteĩ hardín iporãitereíva? b) ¿Mbaʼeichagua persónapa haʼe oipota oiko ko yvy ape ári ha mboy tiémporepa?

² ¿Ndépa ere algún día jaikotaha avei peteĩ hardín iporãitereívape? Jehová heʼi: “Che haʼéma la ajapótava ha katuete oikóta upéva, che akumplíta la adesidi vaʼekue” (Isaías 46:9-11; 55:11). Jahechaháicha, mbaʼeve ndojokomoʼãi Ñandejárape okumpli hag̃ua hembipota. Jehová ndahaʼéi vaʼekue ojapo reínteva ko yvy, síno ojapo “ojeiko hag̃ua pype” (Isaías 45:18). Haʼe oipota ko yvy henyhẽ héntegui. ¿Péro mbaʼeichagua persónapa haʼe oipota oiko ko yvy ape ári ha mboy tiémporepa? La Biblia heʼi: “Umi hembiapo porãvape oñemeʼẽta ko yvy, ha oikóta pype opa ára g̃uarã” (Salmo 37:29; Apocalipsis 21:3, 4).

 3. ¿Mbaʼépa ikatu ñañeporandu jahechávo umi mbaʼe oikóva?

³ Koʼag̃aite peve ningo la hénte hasy ha omano. Heta hendápe oĩ oñorairõva ha ojojukáva. Ñandejára ningo ndoipotái kuri jaiko péicha. ¿Mbaʼérepa upéicharõ oiko koʼã mbaʼe? La Biblia añoite ikatu omombeʼu ñandéve mbaʼérepa.

4, 5. a) ¿Mávapa oñeʼẽ vaʼekue Évape peteĩ mbói rupive? b) ¿Mbaʼéichapa peteĩ persóna ivuénovagui ikatu oiko peteĩ mondaha?

⁴ La Biblia omombeʼu Ñandejára orekoha peteĩ enemígo oñehenóiva chupe “Diablo ha Satanás”. Pe hardín de Edénpe Satanás oñeʼẽ vaʼekue Évape peteĩ mbói rupive (Apocalipsis 12:9; Génesis 3:1). Upérõ haʼete vaʼekue voi pe mbói la oñeʼẽva Évape (ehecha pe nóta 7).

⁵ ¿Mávapa ojapo vaʼekue Satanáspe? ¿Ojapópa rakaʼe chupe Ñandejára? Nahániri. Haʼe ningo peteĩ ánhel ivuénova kuri ha oĩ vaʼekue yvágape Ñandejára ojapórõ guare ko yvy Adán ha Évape g̃uarã. Péro upéi ko ánhel ou tuichaiterei okambia ha oiko chugui pe Diablo (Job 38:4, 7). Ñantende porãve hag̃ua ñamoĩmi peteĩ ehémplo: ¿Mbaʼéichapa peteĩ persóna ivuénovagui ikatu oiko peteĩ mondaha? ¿Upéicha voípa onase vaʼekue? Nahániri. Pe persóna ikatu ou oipota peteĩ mbaʼe noperteneséiva chupe ha oiko opensa meme upévare, ha amáske opensa hese oipotave rei. Upéi oñepresentávo chupe peteĩ oportunida, omondáma katu. Péicha haʼe voi ojapo ijehegui peteĩ mondaha (elee Santiago 1:13-15; ehecha nóta 8).

 6. ¿Mbaʼéichapa peteĩ ánhel ivuénovagui ou vaʼekue oiko Ñandejára enemígo?

⁶ Upéva oiko vaʼekue Satanás rehe. Jehová ojapo rire Adán ha Évape, heʼi chupekuéra ifamília hag̃ua ha omyenyhẽ hag̃ua ko yvy (Génesis 1:27, 28). Upépe oiméne pe ánhel opensa raʼe: “Entéro koʼã persóna ningo ikatu hína chemombaʼeguasu chéve Jehovápe rangue”. Ha amáske opensa upévare, oipotavéntema pe adorasión okorrespondéva Jehovápe añoite. Ko ánhel ou oipota umi hénte omombaʼeguasu chupe. Upéi oñepresenta chupe peteĩ  oportunida ha ombotavy Évape (elee Génesis 3:1-5). Ojapóvo upéva, oiko chugui Ñandejára enemígo, Satanás el Diablo.

 7. a) ¿Mbaʼérepa Adán ha Eva omano vaʼekue? b) ¿Mbaʼérepa ñande avei ñandetuja ha upéi ñamano?

⁷ Adán ha Eva odesovedese vaʼekue Ñandejárape ha hoʼu pe frúta haʼe oproivi vaʼekue chuguikuéra (Génesis 2:17; 3:6). Péicha haʼekuéra ou opeka ha kon el tiémpo omano. Jehová heʼi voi kuri naiñeʼẽrendúiramo hikuái oikotaha hesekuéra upéva (Génesis 3:17-19). Upéicha avei enterove oúva Adán ha Évagui haʼe avei pekadór ha omano (elee Romanos 5:12). Ñantende porãve hag̃ua mbaʼéicha rupípa Adán ha Eva familiakuéra onase avei pekadór, ikatu ñamoĩ peteĩ ehémplo: Peteĩ vandéha ipéramo peteĩ párte, entéro umi tórta oñembojýva guive upe vandéhape osẽta avei ipe upe pártepe. Upéicha avei Adán odesovedesérõ guare Ñandejárape, oiko chugui peteĩ pekadór ha entéro oúva chugui pekadór jeýmante vaʼerã. Ha enterove ñande pekadór rupi, jakakuaa rire ñandetuja térã ñaneg̃uaig̃ui ha ñamano (Romanos 3:23; ehecha nóta 9).

8, 9. a) ¿Mbaʼépa Satanás ogueroviakase Adán ha Évape? b) ¿Mbaʼérepa Jehová nohundíri raʼe upepete voi umi opuʼãvape hese?

⁸ Satanás opuʼã kuri Ñandejárare omboligárõ guare Adán ha Évape odesovedese hag̃ua Jehovápe. Satanás ogueroviakase kuri Adán ha Évape Jehová ijapuha chupekuéra, nogovernaporãiha ha ndoipotaiha iporãva chupekuéra g̃uarã. Satanás heʼi yvyporakuéra noikotevẽiha Ñandejára heʼi chupekuéra mbaʼépa ojapo vaʼerã. Heʼi avei Adán ha Évape haʼekuéra ikatuha ijeheguínte odesidi mbaʼépa oĩ porã ha mbaʼépa oĩ vai. ¿Mbaʼépa ojapo Jehová osolusiona hag̃ua upe situasión? Haʼe ikatu kuri ojuka upepete umi opuʼãvape hese, péro ojapórire upéicha, nomeʼẽmoʼãi oportunida ojehecha hag̃ua Satanás ijapu hague.

 ⁹ Upéicha rupi Jehová nohundíri kuri upepete umi opuʼãvape hese, síno omeʼẽ tiémpo yvyporakuérape oiko hag̃ua haʼekuéra oikoseháicha. Péicha enterovéva ohechakuaáta Satanás ijapuha ha Jehová añetehápe oikuaaha mbaʼépa iporãve yvyporakuérape g̃uarã. Kapítulo 11-pe oñeñeʼẽvéta upe témare. Péro, ¿mbaʼépa nde repensa Adán ha Eva ojapo vaʼekuére? ¿Okonvenípa raʼe chupekuéra ojapo Satanás heʼíva ha odesovedese Ñandejárape? Jehová ningo omeʼẽmbaite vaʼekue Adán ha Évape opa mbaʼe. Haʼekuéra  perfékto vaʼekue, oiko peteĩ hardín iporãitereívape ha oreko peteĩ traváho ogustaitereíva chupekuéra. Satanás katu nomeʼẽi chupekuéra mbaʼeve iporãva. ¿Mbaʼépa nde rejapo vaʼerãmoʼã reimérire Adán ha Eva lugárpe?

10. ¿Mbaʼépa jadesidi vaʼerã káda uno?

¹⁰ Koʼág̃arupi ñande avei jadesidi vaʼerã peteĩ mbaʼe iñimportánteva. Káda uno jadesidi vaʼerã jahejátapa Jehová ñanegoverna ha upéicha jahechauka avei Satanás ijapuha, térãpa jahejáta Satanás ñanegoverna (Salmo 73:28; elee Proverbios 27:11). Ko múndope saʼi oĩ iñeʼẽrendúva Ñandejárape. Koʼág̃a ningo ndahaʼéi Jehová hína la ogovernáva ko múndo. ¿Máva piko upéicharõ ogoverna hína koʼág̃a?

11, 12. a) ¿Mbaʼéicha rupípa Satanás ikatu vaʼekue oofrese Jesúspe ko múndo? b) ¿Mbaʼe téxtopa omombeʼu Satanás ogovernaha ko múndo?

¹¹ Jesús oikuaa porã vaʼekue mávapa la ogovernáva ko múndo. Peteĩ jey Satanás ohechaukapaite Jesúspe “umi goviérno oĩva ko múndope ha umi rrikésa orekóva”. Ha upéi heʼi chupe: “Koʼã mbaʼe ameʼẽmbaitéta ndéve reñesũramo che renondépe ha una ves jepe cheadora” (Mateo 4:8, 9; Lucas 4:5, 6). Epensamína Satanás heʼi vaʼekuére. ¿Ikatúta piko haʼe oofrese Jesúspe umi goviérno ndahaʼéirire imbaʼe? Nahániri. Umi goviérno oĩmbaite rupínte ipoguýpe haʼe ikatu kuri oofrese Jesúspe umíva.

¹² Ikatu oime repensa: “Mbaʼéicha piko Satanás ogovernáta ko múndo, si Jehová ningo pe Todopoderóso ha haʼe la ojapo vaʼekue opa mbaʼe” (Apocalipsis 4:11). Ha siertoite upéva. Péro Jesús heʼi porã vaʼekue Satanás haʼeha ‘ko múndo ruvicha’ (Juan 12:31; 14:30; 16:11). Apóstol Pablo avei heʼi Satanás haʼeha “ko múndo jára” (2 Corintios 4:3, 4). Ha apóstol Juan heʼi avei ‘ko múndo kompletoite oĩha pe aña poguýpe’ (1 Juan 5:19).

13. ¿Mbaʼérepa ñaikotevẽ peteĩ goviérno idiferénteva?

¹³ Ko múndo ningo amás día ivaive ohóvo. Opárupi jahecha gérra, hénte ikorrúptova, hovamokõiva ha ivioléntova. Yvyporakuéra ningo hetáma oñehaʼã osolusiona hag̃ua koʼã mbaʼe, ha mbaʼevénte nokonsegíri. Péro koʼẽrõitéma Ñandejára ohundíta Satanás goviérno Armagedónpe ha omoĩta hekovia peteĩ goviérno oguerútava hustísia (Apocalipsis 16:14-16; ehecha nóta 10).

14. a) ¿Mávapepa oiporavo Jehová ogoverna hag̃ua Irréino? b) ¿Mbaʼépa heʼíma vaʼekue la Biblia Jesús rehe?

¹⁴ Jehová oiporavo Jesúspe ogoverna hag̃ua Irréino. La Biblia ningo heʼíma vaʼekue voi Jesús haʼetaha pe “Prínsipe de Paz” ha ogovernataha opa árare (Isaías 9:6, 7). Jesús omboʼe vaʼekue idisipulokuérape ojerure hag̃ua Ñandejárape ko goviérnore heʼívo: “Tou ne Rréino, tojejapo ne volunta ko yvy ape ári ojejapoháicha yvágape” (Mateo 6:10). Kapítulo 8-pe jahecháta mbaʼéichapa Ñandejára ogovernáta ko múndo tuichakuére (elee Daniel 2:44). Haʼe ogoverna vove, ojapóta ko múndogui peteĩ hardín iporãitereíva (ehecha nóta 11).

15. ¿Mbaʼe rehepa oñeʼẽ la Biblia heʼívo “yvy ipyahúva”?

¹⁵ La Biblia heʼi: “Ñande ñahaʼarõ hína umi yvága pyahu ha peteĩ yvy pyahu, ha umívape siémpre oĩta hustísia” (2 Pedro 3:13; Isaías 65:17). La Bíbliape sapyʼánte heʼi jave “yvy”, oñeʼẽ hína umi hénte oikóvare ko múndope (Génesis 11:1). Upéicharõ, apóstol Pedro heʼívo “yvy pyahu” oñeʼẽ hína entéro umi hénte ohupytýtavare heta mbaʼe porã iñeʼẽrendu rupi Ñandejárape.

16. ¿Mbaʼépa ohupytýta umi oikótava Ñandejára goviérno poguýpe, ha mbaʼépa jajapo vaʼerã jahupyty hag̃ua upéva?

¹⁶ Jesús heʼi vaʼekue umi oikótava Ñandejára goviérno  poguýpe ‘ohupytytaha jeikove opaveʼỹva’ (Marcos 10:30). ¿Mbaʼépa jajapo vaʼerã jahupyty hag̃ua upéva? Eleemína Juan 3:16 ha 17:3, upépe retopáta la rrespuésta. La Biblia omombeʼu avei mbaʼéichapa jaikóta Ñandejára ojapo vove ko yvy tuichakuégui peteĩ hardín iporãitereíva. Jahechamína upéva umi párrafo oúvape.

17, 18. ¿Mbaʼéichapa jaikuaa oĩtaha pyʼaguapy ko múndope ha ndaiporimoʼãveimaha mbaʼeve jakyhyje hag̃ua?

¹⁷ Ndoikomoʼãvéima gérra ha ndaiporimoʼãvéima hénte iñañáva, ivioléntova ha omondáva. Opaitétama umi ojapóva mbaʼe vai (Salmo 37:10, 11). Ñandejára ndohejamoʼãvéima oiko “ni peteĩ gérra ko yvy ape ári” (Salmo 46:9; Isaías 2:4). Ko múndo henyhẽta umi hénte ohayhúvagui Ñandejárape ha iñeʼẽrendúva chupe. Ha enterovéva oikóta pyʼaguapýpe opa árare (Salmo 72:7).

¹⁸ Jehová siervokuéra oikóta pyʼaguapýpe. Ndaiporimoʼãvéima jakyhyje hag̃ua. La Biblia omombeʼu umi israelita iñeʼẽrendu aja entéro Ñandejárape, haʼe oprotehe hague chupekuéra (Levítico 25:18, 19). Ñandejára goviérno poguýpe avei ndajakyhyjemoʼãvéima mbaʼevégui ni avavégui (elee Isaías 32:18; Miqueas 4:4).

19. ¿Mbaʼérepa jaʼekuaa ndofaltamoʼãiha ñandéve jaʼu vaʼerã Ñandejára goviérno poguýpe?

¹⁹ Ndofaltamoʼãi jaʼu vaʼerã. La Biblia heʼi voi: “Ko yvy oprodusi porãitereíta, umi montáña ruʼãme entéro, hembypáta la ojekosecha vaʼerã” (Salmo 72:16). Jehová “ñanevendesíta ha pe yvy oprodusi porãta” (Salmo 67:6).

20. ¿Mbaʼéichapa jaikuaa ko yvy kompletoitégui oikotaha peteĩ hardín iporãitereíva?

²⁰ Ko yvy kompletoitégui oikóta peteĩ hardín iporãitereíva. Enterovénte orekóta hóga tee ha hardín iporãva (elee Isaías 65:21-24; Apocalipsis 11:18). Jaikóta peteĩ lugár ojoguaitereívape hardín de Edénpe. Jehová omeʼẽmbaitéta ñandéve opa mbaʼe ñaikotevẽva. La Biblia heʼi voi  Ñandejárare: “Nde reavri nde po ha remeʼẽ entérope opa mbaʼe oipotáva” (Salmo 145:16).

21. ¿Mbaʼéichapa jaikuaa umi animál oikotaha trankílo yvyporakuérandi?

²¹ Animalkuéra oikóta trankílo yvyporakuérandi. Ndajakyhyjemoʼãvéima mbaʼeveichagua animálgui. Koʼág̃arupi oĩ heta animál iñarõ térã iponsóñava, péro Ñandejára goviérno poguýpe umi mitã mimi jepe ikatúta ohuga umívandi ha ndojapomoʼãi hesekuéra mbaʼeve (elee Isaías 11:6-9; 65:25).

22. ¿Mbaʼépa ojapóta Jesús umi hasýva rehehápe?

²² Ndaiporimoʼãvéima mbaʼeveichagua mbaʼasy. Jesús oĩrõ guare ko yvy ape ári, omonguera vaʼekue heta héntepe (Mateo 9:35; Marcos 1:40-42; Juan 5:5-9). Ha jahecháma haguéicha, Jehová omoĩ Jesúspe ogoverna hag̃ua Irréino, ha haʼe ogoverna vove oipeʼapaitéta umi mbaʼasy. Ndaiporimoʼãvéima heʼíva: “Cherasy hína” (Isaías 33:24; 35:5, 6).

23. ¿Mbaʼépa opromete avei Ñandejára?

²³ Umi omano vaʼekue oikove jeýta. Ñandejára opromete omoingove jeytaha hetaiterei omano vaʼekuépe. La Biblia heʼi voi “oñemoingove jeytaha umi ihústova ha iñinhústovape” (elee Juan 5:28, 29; Hechos 24:15).

24. ¿Mbaʼéichapa reñeñandu reikuaávo ikatuha reiko Ñandejára goviérno poguýpe?

²⁴ Enterove jadesidi vaʼerã mbaʼépa jajapóta, jadesidi vaʼerã jaservítapa Jehovápe térãpa jajapótante ñandéve ñandegustáva. Jadesidíramo jaservi Jehovápe, jaikuaa ñaneraʼarõha heta mbaʼe porã. Peteĩ kuimbaʼe oĩ vaʼekue Jesús ykére ojejukátarõ guare chupe, ojerure Jesúspe imanduʼami hag̃ua hese ág̃a oĩ vove Irréinope, ha Jesús heʼi chupe: “Reiméta chendive pe paraísope” (Lucas 23:43). Pe kapítulo oúvape ñaaprendevéta heta mbaʼe Jesúsgui, ha jahecháta avei mbaʼéichapa haʼe rupive Jehová okumplipaitéta umi mbaʼe opromete vaʼekue.