KAPÍTULO 18

¿Mbaʼépa ikatu ajapo agana hag̃ua pláta?

“Aikotevẽ pláta ajogua hag̃ua che autorã” (Sergio).

“Che ahaseterei de kómpra” (Laurie-Ann).

“Oĩ heta mbaʼe chegustáva ha aipotaitereíva, péro che tuakuéra ndaikatúi ojogua chéve” (Mike).

OIMÉNE nde avei rejoguase heta mbaʼe, térã reipytyvõse nde tuakuérape. Ha ndaikatúiramo jepe reipytyvõ guasu chupekuéra ekonómikamente, ikatu hína rejoguase nde aorã térã ótra kósa reikotevẽva, ha péicha tuicha rembovevýitama chuguikuéra igásto.

Pe pláta ningo ideprovécho, tahaʼe rejogua hag̃ua nde kosarã térã pekonsegi hag̃ua umi mbaʼe peikotevẽva ne famíliape. Ha Jesús oprometéramo jepe Ñandejára okuidataha umi ‘omotenonde memévare Irréino’, umi kristiáno lomímonte  ombaʼapo vaʼerã oñemantene hag̃ua (Mateo 6:33; Hechos 18:1-3; 2 Tesalonicenses 3:10). ¿Mbaʼépa rejapokuaa regana hag̃ua pláta? Ha iñimportanteveha, ¿mbaʼépa rejapokuaa pono reñekonsentraiterei plátarente?

Mbaʼéichapa ikatu retopa nde travahorã

Oiméramo reikotevẽ añete álgo ha nde tuakuéra ndaikatúi ojogua ndéve, ikatu rekonsegi peteĩ traváho ndete voi rejogua hag̃ua. Péro reñeʼẽ raẽ vaʼerã nde tuakuérandi, ikatu hína ogusta chupekuéra la idéa. Oiméramo oipota hikuái rembaʼapo ha pe goviérno opermitíramo, ikatu resegi koʼã 4 konsého:

Emombeʼu rembaʼaposeha. La hénte oikuaárõ rembaʼaposeha, erekovéta oportunida rekonsegívo nde travahorã. Emombeʼu ne vesíno, nde profesór ha avei ne hentekuérape. Ha nereñanimáirõ direktoite rejerure chupekuéra nde travahorã, ikatu reporandúnte primerorã mbaʼépepa ombaʼapo raʼe hikuái orekórõ guare nde eda.

Rehekakuaa vaʼerã. Rehecháramo diáriope, Internétpe térã algún anúnsio umi komérsio renondépe oikotevẽha empleádo, ehónte vaʼerã ehecha, ikatu ndegusta ha rekonsegi mbaʼe nde travahorã. Peteĩ mitãrusu hérava Dave omombeʼu mbaʼéichapa okonsegi itravahorã, haʼe heʼi: “Che aheka vaʼekue diáriope ha atopa heta traváho cheinteresáva. Upéi amondo chupekuéra che kurríkulum ha ahenói avei por teléfono”. Péro upéva ndoikóiramo ndete voi  ikatu remombeʼu mbaʼépa rejapokuaa peichahágui oĩramo oikotevẽva mbaʼe upe servísio.

Eprepara peteĩ kurríkulum ha erreparti. Eskrivi peteĩ kuatiáre nde réra, ne direksión, ha avei mbaʼépa rejapokuaa térã mbaʼépepa rembaʼapóma raʼe. Ha ndereikuaáiramo mbaʼépa remoĩta, ani rejepyʼapy, epensánte koʼã mbaʼére: ¿opytámapa nde kárgope ne ermanitokuéra térã reñatendémapa raʼe ótro mitãre? Upéva ohechauka nerresponsavleha. ¿Térã reipytyvõmapa raʼe nde túape oarregla hag̃ua hiʼáuto? Upéicharõ ikatu oime ndevale hína mekánikape. ¿Térã reipurukuaápa peteĩ komputadóra? ¿O rejapómapa raʼe peteĩ traváho práktiko koléhiope ha upe rire nenóta porã? Umíva remoĩkuaa ne kurríkulumpe, ikatu ogusta mbaʼe umi ohekávape hína iñempleadorã. Rejapopa rire la ne kurríkulum ikatúma reñepyrũ rerreparti. Ikatu avei emeʼẽ ne amigokuéra térã ne hentekuérape, peichahágui oikuaárõ g̃uarã álgien oikotevẽvape empleádo.

Embaʼapo ne kuéntare. Epensa umi mbaʼe ojepuru memévare ogapýpe péro ndaiporiguasúiva nde reikohárupi, térã umi traváho ikatúva oime ne vesinokuéra oikotevẽ. Por ehémplo, repreparakuaa prodúkto de limpiésa revende hag̃ua. Térã rembopukuaáramo algún instruménto musikál, ikatu rekovraʼimi remboʼe hag̃ua ótrope. Remombeʼukuaa avei ne vesinokuérape rekopi térã rekaʼapikuaaha. Koʼã mbaʼe ningo ndaiporiguasúi ojaposéva, ñande kristianokuéra katu nañatĩri jajapo hag̃ua oimehaichagua traváho (Efesios 4:28). Péro reñehaʼã vaʼerã nekyreʼỹ ha nerresponsávle rembaʼaposéramo ne kuéntare.

Repensa porãnte vaʼerã la rejapótavare. Upearã eguapy raẽ vaʼerã ekalkula erekótapa pláta remoñepyrũ hag̃ua ne negósio, térã ikatútapa rekumpli pe traváho reofreséva (Lucas  14:28-30). Primeroite eñeʼẽ vaʼerã nde tuakuérandi, ha ikatu avei reñemongeta umi ombaʼapóma vaʼekuéndi peichagua traváhope. Avei rehecha vaʼerã noiméipa tekotevẽta repaga algún impuésto térã rejerure vaʼerãpa algún permíso (Romanos 13:1).

Ndeekilivrádo vaʼerã

Ñamoĩ chupe rehoha vísi ári ha regueraha ne mochíla, peteĩ pelóta, unos kuánto káha ha hetave mbaʼe. ¿Ajépa ijetuʼúta ndéve reho la nde visikléta ári ha avei regueraha hetaiterei mbaʼe nde jyva ári? Upeichaite avei oikóta rejagarráramo peteĩ traváho ndeforsaitereítava. Reipurúramo hetaiterei ne tiémpo ha ne mbaretekue rembaʼapo hag̃ua koléhio rire, upéva ojapo vaíta nde salúre ha ne notakuéra ikatu oguejypa. Ha ivaiveha, ikatu hína reperde umi rreunión, nde estúdio personál ha predikasión. Peteĩ mitãkuña hérava Michèle omombeʼu: “Aikérõ guare koléhiope aha vaʼekue avei ambaʼapo ha upéva chemokaneʼõiterei, upéicha rupi sapyʼánte afaltámi vaʼekue rreunionhápe”.

 Upéicharõ, ani remombaʼeterei pe pláta. Jesús ohechauka vaʼekue pe pláta añetehápe nañanembovyʼaiha heʼírõ guare: “Ovyʼa umi ohechakuaáva oikotevẽha Ñandejárare” (Mateo 5:3). Ha avei heʼi vaʼekue: “Peguerekóramo jepe heta mbaʼe, pende rekove nodependéi umi mbaʼe peguerekóva rehe” (Lucas 12:15). Peteĩ ermána hérava Maureen heʼi: “Che ningo ndaikoséi pláta rapykuéri. Aikuaa porã ajapóramo upéva ikatuha añemomombyry Jehovágui”.

Añetehápe, oĩ país umi mitãrusu ha mitãkuña tekotevẽhápe ombaʼapómante oipytyvõ hag̃ua ifamíliape oñemantene hag̃ua. Péro péva ndahaʼéiramo nde káso, natekotevẽi rembaʼapoiterei ha reipurupa upévape ne tiémpo. Umi investigasión ojejapo vaʼekue ko témare ohechauka umi oikéva koléhiope nombaʼapói vaʼerãha mas de 20 óra por semána pórke operhudikáta chupekuéra, ha oĩ voi país oproivíva upéva. Upévare haʼekuéra heʼi umi oikéva koléhiope ombaʼapo vaʼerãha éntre 8 ha 10 órante por semána. Rréi Salomón omeʼẽ vaʼekue voi ko konsého: “Iporãve repytuʼuʼimi, reiko rangue rejejuka traváhope. Péicha haʼete reikóva yvytu rapykuéri” (Eclesiastés 4:6).

Avei nemanduʼa vaʼerã ‘umi rrikésa ikatuha tuicha nembotavy’, ha upéva káusare ikatu ndekaiguéma reho hag̃ua rreuniónpe ha predikasiónpe (Marcos 4:19). Upévare oiméramo  redesidíma rembaʼapotaha reike aja koléhiope, tekotevẽ reñeorganisa porã ani hag̃ua rembotapykue umi rresponsavilida reguerekóva Ñandejára renondépe. Upearã reñemboʼe vaʼerã Jehovápe ha ejerure chupe tanepytyvõ redesidi porã hag̃ua. Haʼe ikatu nemombarete ndeekilivrádo hag̃ua ha pono reñemomombyry chugui.

RETOPAVÉTA INFORMASIÓN VOLÚMEN 1, KAPÍTULO 21-PE

MBAʼÉPA JAHECHÁTA PE ÓTRO KAPÍTULOPE

¿Ndépa rekontrola la pláta, térãpa reheja pe pláta nekontrola ndéve? ¿Reikuaasépa mbaʼéichapa ikatu reipuru porã nde pláta?

TÉXTO OĨVA LA BÍBLIAPE

“Pe iñateʼỹva ojedeseapa rei péro haʼe ndohupytýi mbaʼeve, pe ikyreʼỹva katu hetaiterei mbaʼe ohupytýta” (Proverbios 13:4).

PETEĨ KONSÉHO

Ikatu emondo ne kurríkulum umi emprésape, oiméramo jepe upe moméntope ndojeruréi hína empleádo.

¿REIKUAÁPA RAʼE?

Heta paíspe el 85 por ciento voi umi traváho oĩva noñeanunsiái diáriope, Internétpe ni moõve.

UMI MBAʼE AJAPÓTAVA

¿Mbaʼépa ikatu ajapo akonsegi hag̃ua che travahorã? ․․․․․

Ambaʼapóta ․․․․․ órante a la semána.

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa tekotevẽ regana pláta?

● ¿Mbaʼe mbaʼépa ikatu ijetuʼu ndéve reaseptáramo peteĩ traváho?

● ¿Mbaʼéichapa ikatu rehecha hendaitépe pe pláta?

[Komentário oĩva páhina 153-pe]

“Núnka nderevyʼamoʼãi repensáramo reguereko vaʼerãha umi kósa ipyahuvéva, pórke siémpre oĩta álgo rejoguasétava. Upévare iporãvéta revyʼáramo umi mbaʼe reguerekomívarente” (Jonathan).

[Rrekuádro oĩva páhina 155-pe]

Errespeta pe pláta, péro ani ndeplatarayhu

Peteĩ kyse haimbe porãva ideprovechoiterei peteĩ kosinéro pópe. Péro ikatu ipeligróso peteĩ noñatendéiva térã ndoipurukuaáiva pópe. Upeichaite avei pe pláta, reipuru porãramo ideprovechoitereíta ndéve, péro ndereipurukuaáiramo ikatu ndeperhudika. Apóstol Pablo heʼi vaʼekue voi ipeligrosoha ñandeplatarayhu. Heta hénte ningo iplataseterei rupi oñemomombyry iñamigokuéragui, ihentekuéragui ha ivaiveha katu oñemomombyry Ñandejáragui, “ha upéva ogueru chupekuéra heta sufrimiénto” (1 Timoteo 6:9, 10). ¿Mbaʼépa ikatu reaprende upévagui? Pe pláta ikatuha ideprovécho, péro reñatende vaʼerã pono ndeplatarayhu.

[Taʼanga oĩva páhina 153-pe]

Reguerekóramo hetaiterei rresponsavilida nde travahohápe, koléhiope ha avei kongregasiónpe, ijetuʼúta ndeekilivrado hag̃ua